Kapitulo 50
Pumanaw dagiti Jaredite iti Babel
Nalinteg a lallaki ni Jared ken ti kabsatna a lalaki a nagnaed iti siudad a maawagan iti Babel. Nagbiagda iti ginasgasut a tawtawen sakbay dagiti Nephite.
Nadangkes ti kaaduan dagiti tao iti Babel. Nangbangonda iti maysa a torre a mangpadas a dumanon iti langit. Nagpungtot ti Apo ket binalbaliwanna ti pagsasaoda.
Indawat ni Jared iti kabsatna a lalaki nga ikararag ken kiddawenna iti Apo a saanna a sukatan ti pagsasao dagiti kaamaan ken gagayyemda.
Nagkararag ti lalaki a kabsat ni Jared, ken sinungbatan ti Apo ti kararagna. Ni Jared, ti kabsatna a lalaki, ken dagiti kaamaan ken gagayyemda ket maawatanda pay laeng ti tunggal maysa.
Imbaga ti Apo iti lalaki a kabsat ni Jared nga ummongenna ti kaamaan ken dagiti gagayyemna ket pumanawda iti daga. Intugotda dagiti ayupda ken ti amin a kita dagiti bukbukel.
Kinuna ti Apo nga idauluanna dagiti Jaredite nga agturong iti naikari a daga.
Nagtiliw dagiti Jaredite kadagiti tumatayab ken ikan nga itugotda.
Nangitugotda kadagiti pangen ti uyokan.
Nagdaliasat dagiti Jaredite iti langalang. Nakisao ti Apo kadakuada manipud iti ulep ken imbagana kadakuada no ania a dalan ti papanan.
Kinuna ti Apo a nasken nga agserbi iti Dios dagiti tao nga agindeg iti naikari a daga wenno madadaeldanto.
Idi makadanon dagiti Jaredite iti igid ti baybay, impatakderda dagiti toldada. Nagindegda iti igid ti baybay iti uneg ti uppat a tawen.