Kapitulo 23
Ammon: Maysa a Naindaklan a Katulongan
Pimmanaw dagiti uppat nga annak a lallaki ni Mosiah iti Zarahemla tapno mangisuro kadagiti Lamanite iti ebanghelio. Napan ti tunggal maysa kadakuada iti sabali a siudad.
Napan ni Ammon iti daga ti Ismael. Idi sumrek iti siudad, pinungo dagiti Lamanite isuna ket impanda isuna iti arida, ni Lamoni.
Imbaga ni Ammon ken ni Ari Lamoni a kayatna ti makipagnaed kadagiti Lamanite. Naragsakan ni Lamoni ket pinaruk-atanna kadagiti taona ni Ammon.
Kinuna ni Ammon nga agbalinto a maysa kadagiti katulongan ti ari. Imbaon isuna ti ari a mangbantay kadagiti arbanna.
Maysa nga aldaw bayat ti panangyabog ni Ammon ken ti sumagmamano a dadduma pay a katulongan kadagiti arban tapno makaalada iti danum, winarawara dagiti mannanakaw a Lamanite dagiti ayup ket pinadasda a takawen ida.
Nagbuteng dagiti katulongan a kadua ni Ammon. Pinatay ni Ari Lamoni dagiti dadduma a katulonganna a nakapukaw kadagiti ayup kadagitoy a mannanakaw.
Ammo ni Ammon a daytoy ti gundawayna nga usaren ti bileg ti Apo tapno maallukoyna ti puspuso dagiti Lamanite. Kalpasanna dumngegdanto kadagiti pannursurona.
Imbaga ni Ammon kadagiti katulongan a no ummongenda dagiti nawarawara nga ayup, saanto a papatayen ti ari ida.
Daras a nasarakan ni Ammon ken dagiti dadduma pay a katulongan dagiti ayup ket inyabogda ida nga agsubli iti lugar a paginunam.
Nagsubli dagiti mannanakaw a Lamanite. Imbaga ni Ammon iti dadduma pay a katulongan a bantayanda dagiti arban bayat ti pannakirangetna kadagiti mannanakaw.
Saan a kabuteng dagiti mannanakaw a Lamanite ni Ammon. Impagarupda nga alistoda a mangpatay kenkuana.
Adda ti bileg ti Dios ken ni Ammon. Pinalsiitan ken pinatayna ti sumagmamano a mannanakaw, a namagpungtot unay kadagiti dadduma pay a mannanakaw.
Pinadasda ti mangpatay ken ni Ammon kadagiti pang-orda, ngem tunggal itang-ay ti mannanakaw ti pang-orna ken ni Ammon, pinugsayna ti takiag ti mannanakaw. Gapu iti buteng, nagtaray a pimmanaw dagiti mannananakaw.
Impan dagiti katulongan dagiti napugsay a takiag ken ni Ari Lamoni ket imbagana kadakuada no ania ti inaramid ni Ammon.
Nasdaaw ti ari iti naindaklan a bileg ni Ammon. Tinarigagayanna a makita ni Ammon ngem nagbuteng gapu ta impagarupna a Naindaklan nga Espiritu ni Ammon.
Idi napan ti ari a mangkita kenkuana, saan nga ammo ni Ari Lamoni no ania ti isaona. Saan a nakasao iti maysa nga oras.
Tinulongan ti Espiritu Santo ni Ammon a mangammo no ania ti pampanunoten ti ari. Inlawlawag ni Ammon a saan nga isu ti Naindaklan nga Espiritu. Maysa a tao isuna.
Indiaya ti ari ken ni Ammon ti ania man a banag a tarigagayanna no ibagana kenkuana no ania ti bileg nga inusarna tapno abakenna dagiti mannanakaw ken ammona dagiti pampanunoten ti ari.
Kinuna ni Ammon a ti maysa laeng a banag a tarigagayanna ket ti panangpati ni Ari Lamoni no ania ti isaona. Kinuna ti ari a mamati ti amin a banag nga imbagana ni Ammon kenkuana.
Dinamag ni Ammon ken ni Ari Lamoni no mamati iti Dios. Kinuna ti ari a mamati iti Naindaklan nga Espiritu.
Kinuna ni Ammon a ti Dios ti Naindaklan nga Espiritu, a nangparsua iti amin a banag iti langit ken iti daga, ken ammona dagiti pampanunoten dagiti tao.
Kinuna ni Ammon a naparsua dagiti tao a kalanglanga ti Dios. Kinunana pay nga inawagan isuna ti Dios a mangisuro iti ebanghelio ken ni Lamoni ken dagiti taona.
Us-usarenna dagiti nasantuan a kasuratan, sinuruan ni Ammon ni Ari Lamoni maipapan iti Panagparsua, ni Adan, ken ni Jesucristo.
Namati ni Ari Lamoni ken ni Ammon ken nagkararag tapno mapakawan kadagiti basbasolna. Kalpasanna naarinuknok iti daga ket kasla natay.
Binagkat nga impan dagiti katulongan ti ari iti asawana ket impaiddada iti kama. Kalpasan ti dua nga aldaw impagarup dagiti katulongan a natayen ti ari ket inkeddengda ti mangitanem kenkuana.
Saan a namati ti reyna a natayen ti asawana. Iti pannakadamagna iti naindaklan a bileg ni Ammon, indawatna kenkuana a tulonganna ti ari.
Ammo ni Ammon nga adda ni Lamonin iti babaen ti pannakabalin ti Dios. Imbagana iti reyna a makariingto ni Lamoni iti kabigatanna.
Nagtalinaed ti reyna iti denna ni Lamoni iti agpatnag. Kabigatanna bimmangon ni Lamoni ket kinunana a nakitana ni Jesucristo. Napno ti ari ken reyna iti Espiritu Santo.
Sinuruan ni Lamoni dagiti taona maipapan iti Dios ken ni Jesucristo. Nagbabawi dagiti namati iti basbasolda ket nabuniaganda.