Kapitulo 12
Ari Benjamin
Maysa a nalinteg a Nephite ni Ari Benjamin. Babaen ti tulong dagiti dadduma pay a nalinteg a tao, insangbayna ti kappia iti daga.
Limmakay ni Ari Benjamin ket tinarigagayanna a kasarita dagiti taona. Kasapulanna nga ibaga kadakuada a ti lalaki nga anak ni Mosiah ti sumaruno nga ari.
Naggapu dagiti tao manipud iti amin a daga ken nagguummongda iti asideg ti templo. Impatakderda dagiti toldada a naipasango iti ridaw ti templo.
Nagsarita ni Ari Benjamin manipud iti torre tapno mangngeg dagiti Nephite isuna.
Imbagana kadagiti taona nga inkarigatanna ti agserbi a nasayaat kadakuada. Kinunana a ti wagas tapno makapagserbi iti Dios ket babaen ti panagserbi iti tunggal maysa.
Imbaga ni Ari Benjamin kadagiti tao nga agtungpalda kadagiti bilin ti Dios. Agragsakto dagiti sipupudno nga agtungpal kadagiti bilin ken iti maysa nga aldaw makipagnaed iti Dios.
Kinuna ni Ari Benjamin a mayanakto ni Jesucristo iti daga iti mabiit. Maria ti agbalinto a nagan ti inana.
Agaramidto ni Jesus kadagiti milagro. Agasannanto dagiti masakit ken pagungarenna dagiti natay. Aramidennanto a makakita ti bulsek ken makangngeg dagiti tuleng.
Agsagaba ken matayto ni Jesus gapu kadagiti basbasol ti amin a tao. Mapakawanto iti basbasolda dagiti agbabawi ken adda pammatina ken ni Jesus.
Imbaga ni Ari Benjamin kadagiti Nephite a saplintento dagiti nadangkes a tao ni Jesus. Kalpasanna ilansadanto isuna iti krus…
Kalpasan ti tallo nga aldaw agungarto ni Jesus.
Kalpasan ti panagsarita ni Ari Benjamin, nagpakleb dagiti Nephite iti daga. Nagladingitda kadagiti basbasolda ket tinarigagayanda ti agbabawi.
Adda pammati dagiti tao ken ni Jesucristo, ket nagkararagda tapno mapakawanda.
Pinunno ti Espiritu Santo dagiti puspusoda. Ammoda a pinakawan ti Dios ida ken ay-ayatenna ida. Nariknada ti talna ken rag-o.
Imbaga ni Ari Benjamin kadagiti taona a mamati iti Dios. Tinarigagayanna a maammuanda a pinarsua ti Dios ti amin a banag ket masirib ken nabileg isuna.
Imbaga ni Ari Benjamin kadagiti tao nga agpakumbaba ken agkararagda iti inaldaw. Tinarigagayanna kadagiti taona a kanayon a laglagipenda ti Dios ken agbalinda a napudno.
Imbagana kadagiti nagannak a saanda nga ipalubos nga aggaapa ken agsisinnuppiat dagiti annakda.
Imbagana kadakuada nga isuroda dagiti annakda nga agtungpal ken agayat ken agserbi iti tunggal maysa.
Binallaaganna dagiti tao nga agannadda iti no ania ti napanunot, naisao, ken naaramidda. Nasken nga agbalinda a napudno ken agtungpalda kadagiti bilin iti unos ti panagbiagda.
Sinaludsod ni Ari Benjamin kadagiti tao no namatida kadagiti pannursurona. Kinunada amin a namatida. Ti Espiritu Santo ti namangbalbaliw kadakuada, ket saandan a tarigagayan pay ti agbasol.
Nakitulagda amin, wenno nagkari, nga agtungpal kadagiti bilin ti Dios. Naragsakan ni Ari Benjamin.
Inted ni Ari Benjamin iti anakna a ni Mosiah ti karbengan nga agbalin a baro nga ari. Kalpasan ti tallo a tawen natay ni Ari Benjamin.
Maysa a nalinteg nga ari ni Mosiah. Nagtrabaho a nasayaat ket nagserbi kadagiti taona, kas iti inaramid ti amana.