Faaopoopoga E

“O Upumoni Manino ma Taua”

Na saunia le Tusi a Mamona e oo mai i taimi o aso mulimuli, o se taimi o le sosolo o le fenumia’i e uiga i aoaoga faavae, po o upumoni e faavavau a le Atua. O se vaega o le faamoemoega paia o lena tusi o le, e pei ona muaivaaia e Nifae, ina ia ‘faamautu ai le moni o [le Tusi Paia],” ia “faailoa ai mea manino ma taua” na leiloloa i le tele o seneturi, ma ia “faailoa atu ai, i ituaiga, gagana, ma tagata uma, o le Tamai Mamoe a le Atua o le Alo lea o le Tamā Faavavau, ma o le Faaola o le lalolagi” (1 Nifae 13:40).

O le Tusi a Mamona ua faaalia mai ai upumoni e faavavau sa faapea ona leiloloa i le vaitaimi o le Liliu Ese ma faaopoopo mai ai se molimau lona lua, ma manino i le tele o upumoni ua aoaoina i le Tusi Paia. O nisi nei o na upumoni. Vaavaai mo nei ma isi upumoni manino ma taua a o e suesue i le Tusi a Mamona.

O Le Aiga Atua

• O le Tama Faalelagi, Iesu Keriso, ma le Agaga Paia o ni peresona mavaevae ae e tasi le faamoemoega (tagai 3 Nifae 11:32, 36).

• O le Faaola toetu e i ai se sona tino faaletino (tagai 3 Nifae 11:10–17).

Mau faaopoopo e uiga i le Aigaatua: 2 Nifae 31:6–8; Eteru 12:41

O Le Togiola a Iesu Keriso

• Na mafatia Iesu Keriso mo a tatou agasala ma puapuaga; o lea la, o le a Ia silafia le ala e mafai ona fesoasoani ai ia i tatou (tagai Alema 7:11–13).

• E mafai ona faaatoatoaina i tatou e ala i le alofa tunoa o Iesu Keriso (tagai Moronae 10:32–33).

Mau faaopoopo e uiga i le Togiola a le Faaola: 1 Nifae 10:6; 2 Nifae 2:6–9; Iakopo 4:11–12; Mosaea 3:1–19; Alema 34:8–16

O Le Ata o le Faaolataga

• O le Pau o Atamu ma Eva o se vaega taua o le fuafuaga a le Atua (tagai 2 Nifae 2:22–27).

• O le faafeagai sa talafeagai mo tatou ina ia mafai ona faatino le faitalia (tagai 2 Nifae 2:11–16).

• O le a faamasinoina i tatou e tusa ai ma a tatou galuega ma manaoga o o tatou loto (tagai Alema 41:3–7).

• O le “lepa afi ma le teiō” o se faailoga o le mafatia o le tagata e le salamo (tagai 2 Nifae 9:16–19; Mosaea 3:24–27).

Mau faaopoopo e uiga i le ata o le faaolataga: 2 Nifae 9:11–26; Alema 22:12–14; 34:31–35; 42:1–26

O Le Liliuese ma le Toefuataiga

• Na tupu le Liliuese Tele ona o le amioleaga ma le le talitonu (tagai Mamona 8:28, 31–41).

• O le Tusi a Mamona ua faamaonia upumoni o loo aoaoina i le Tusi Paia (tagai 1 Nifae 13:19–41; 2 Nifae 3:12).

• E tatau ona faaigoa le Ekalesia a Keriso i Lona suafa (tagai 3 Nifae 27:3–9).

Mau faaopoopo e uiga i le Liliuese: 1 Nifae 13:1–9, 24–29; 2 Nifae 27–28

Mau faaopoopo e uiga i le Toefuataiga: 1 Nifae 14:7–12; 22:7–11; 2 Nifae 3:7–24; 25:17–18

Perofeta ma Faaaliga

• E molimau perofeta uma ia Iesu Keriso (tagai Mosaea 13:33–35).

• E oo mai se malamalama i upumoni faaleagaga mai le Agaga Paia (tagai Alema 5:45–47).

• E le o i ai i le Tusi Paia ia afioga uma a le Atua (tagai 2 Nifae 29:10–13).

• E le o taofia faaaliga mai le Atua i o tatou aso (tagai Mamona 9:7–9).

Mau faaopoopo e uiga i perofeta: 1 Nifae 22:1–2; Mosaea 8:16–18; Helamana 13:24–33

Mau faaopoopo e uiga i faaaliga: Iakopo 4:8; Alema 12:9–11; 17:2–3; Moronae 10:5

Perisitua

• Sa valaauina ma saunia i latou e umia le perisitua mai le faavaega o le lalolagi (tagai Alema 13:1–3).

• E tatau i se tagata ona maua le pule mai le Atua e folafola atu ai le talalelei (tagai Mosaea 23:17).

Mau faaopoopo e uiga i le perisitua: Mosaea 18:17–20; Alema 13; Helamana 10:7

Sauniga ma Feagaiga

• E alagatatau le papatisoga i le mauaina o le ola e faavavau (tagai 2 Nifae 31:4–13, 17–18).

• E tatau ona faia le papatisoga e ala i le faatofu (tagai 3 Nifae 11:23–27).

• E le manaomia ona papatisoina tamaiti laiti (tagai Moronae 8:8–12).

• E tatau ona faataunuuina sauniga e tusa ai ma poloaiga a Keriso e se tasi ua i ai le pule tatau (tagai Mosaea 18:17–18; 3 Nifae 11:21–27; Moronae 4:1).

Mau faaopoopo e uiga i sauniga: Mosaea 18:8–17; 21:33–35; Alema 13:16; 3 Nifae 18:1–11; Moronae 2–6; 8:4–26

Mau faaopoopo e uiga i feagaiga: 2 Nifae 11:5; Mosaea 5:1–9; Alema 24:17–18

Faaipoipoga ma le Aiga

• E ao i tane ma ava ona alolofa le tasi i le isi (tagai Iakopo3:5–7).

• E tatau i fanau ona tausi a latou fanau i le Alii (tagai 1 Nifae 7:1).

Mau faaopoopo e uiga i le faaipoipoga ma le aiga: 1 Nifae 1:1; 2 Nifae 25:26; Iakopo 2:23–28; Enosa 1:1; Mosaea 4:14–15; 3 Nifae 18:21

Poloaiga

• O le a saunia e le Alii se auala mo i tatou ia ausia ai Ana poloaiga (tagai 1 Nifae 3:7).

• Ua folafola mai le Atua e faamanuia i tatou pe a tatou tausia Ana poloaiga (tagai Mosaea 2:22–24).

Mau faaopoopo e uiga i poloaiga: 1 Nifae 17:3; 22:30–31; Alema 37:13, 35; 50:20