“Faaopoopoga I: ‘O Molimau e Toatolu,’” Sau, Mulimuli Mai ia te Au—Mo Tagata Taitoatasi ma Aiga: Tusi a Mamona 2020 (2020)
“Faaopoopoga I,” Sau, Mulimuli Mai ia te Au—Mo Tagata Taitoatasi ma Aiga: 2020
Faaopoopoga I
O Molimau e Toatolu
Mo le silia i le lima tausaga—mai le taimi o le uluai asiasiga a le agelu o Moronae ia Iosefa Samita e oo i le 1829—sa na’o Iosefa lava le tagata sa faataga e vaai i papatusi auro. O lenei mea na oo ai i ni faitioga ma sauaga tuga mai ia i latou o e na talitonu sa ia faaseseina tagata. Ia vaaifaalemafaufau la i le olioli na lagona e Iosefa ina ua, ao ia faaliliuina le Tusi a Mamona, sa ia iloa ai o le a faataga e le Alii isi e vaai i papatusi ma e mafai foi ona latou “molimau i le moni o le tusi ma mea o i ai i totonu” (2 Nifae 27:12–14; tagai foi i le 2 Nifae 11:3; Eteru 5:2–4).
Ia Iuni 1829, na talosaga ai Oliva Kaotui, Tavita Uitimera, ma Matini Harisi mo se faatagaga e avea ai ma molimau e toatolu lea na valoiaina e le Tusi a Mamona. Sa tuuina mai e le Alii ia i latou o latou manaoga (tagai MFF 17) ma auina mai se agelu, o le na faaalia atu ia i latou ia papatusi. Na ta’ua nei tamalii o Molimau e Toatolu, ma o loo aofia ai la latou molimau tusitusia i totonu o kopi uma o le Tusi a Mamona.1
Sa faamalamalama mai e Peresitene Dallin H. Oaks le mafuaaga e matuai mamana ai le mau a Molimau e Toatolu: “O le mau a Molimau e Toatolu i le Tusi a Mamona ua tu atu i le malosi maoae lava. Na tofu maua taitoatasi e le toatolu se mafuaaga ma se avanoa tele e tauseseina ai lana molimau pe ana faapea e sese, pe faalualuagia ia faamatalaga pe a na i ai se mea e le sa’o. E pei ona lausilafia, ona o feeseeseaiga po o le lotovale na aofia ai isi taitai o le Ekalesia, o nei molimau uma e toatolu na tapeina o latou igoa mai Le Ekalesia a Iesu Keriso o le Au Paia o Aso e Gata Ai e tusa lea o le valu tausaga talu ona faasalalauina la latou molimau. Na taitasi le tagata o le toatolu lenei ma alu i lona lava ala, ma le leai o se manatu e tasi e lagolago se taumafaiga taupulepule e faaleaga. Ae i le iuga o o latou soifua---o vaitau mai le 12 i le 50 tausaga ina ua mavae le tape o o latou igoa mai le ekalesia---e leai se tasi o nei molimau na laa ese mai lana molimau na faasalalauina, pe fai atu se mea e faapuaoa ai lona moni.”2
Seia oo lava i le iuga o o latou soifua, sa le maluelue Molimau e Toatolu i lo latou faamaoni i a latou molimau e uiga i le Tusi a Mamona.
Oliva Kaotui
Ina ua uma ona papatisoina i le Ekalesia ma i se taimi puupuu ao le’i maliu o ia, sa feiloai ai Oliva ma se faifeautalai, o Elder Jacob Gates, o le sa ui atu i Richmond, Misuri, e alu i lana misiona i Egelani. Sa fesili Elder Gates ia Oliva e uiga i lana molimau e uiga i le Tusi a Mamona. Sa toefaamatalaina e le atalii o Elder Gates le tali mai i ai a Oliva:
“O le fesiligia o ia sa faapea ona pei e matuai ootia loloto ai Oliva. E leai se upu na tali mai ai, ae na tu a’e mai lona nofoa, alu atu i le fata tusi, aumai i lalo se Tusi a Mamona o se uluai lomiga, susu’e i le mau a Molimau e Toatolu, ma faitau mai i se agaga na sili ona mamalu ia upu ia sa ia tusia ai lona igoa, i le toeitiiti luasefulu tausaga na muamua atu. Sa faasaga mai i lo’u tama, ma ia faapea mai: ‘Iakopo, ou te manao ia e manatua la’u tala e fai atu ia te oe. O a’u o se toeaina o le a oti, ma o le a se aoga ia te a’u o le ta’u atu o se pepelo ia te oe? Ou te iloa,’ sa ia fai mai ai, ‘o lenei Tusi a Mamona sa faaliliuina e ala i le meaalofa ma le mana o le Atua. Sa vaai i ai o’u mata, na faalogo i ai o’u taliga, ma sa ootia ai lo’u malamalamaaga, ma ou te iloa o mea sa ou molimau i ai e moni. Sa le o se miti, sa le o ni mafaufauga faivalea o le mafaufau—sa moni lava.’”3
Tavita Uitimera
I tausaga mulimuli ane o lona olaga, sa faapea ona nofouta ai Tavita Uitimera i talafeaveai e faapea, na ia teena lana molimau o le Tusi a Mamona. I le tali atu i nei tuuaiga, sa toefaamautuina ai e Tavita lana molimau i se tusi sa lolomiina i se nusipepa i le lotoifale, o le Richmond Conservator:
“Ina ia mafai ona iloa e le lalolagi le mea moni, ua ou manao ai i le taimi nei, i le tu ai, e faapei ua i ai i le lagoto o le olaga, ma i le mata’u ai i le Atua, ina ia faia lenei faamatalaga faalauaitele:
“E faapea, ou te le’i teenaina lava lena molimau, po o soo se vaega lava o lena molimau, lea ua leva ma talu mai ona lolomiina faatasi ma lena Tusi, i le avea ai o se tasi o molimau e toatolu. O i latou e silafiaina lelei a’u, o le a iloa lelei lava sa ou tumau lava e le aunoa i lena molimau. Ma e leai se tagata e mafai ona taitaiseseina pe masalomia o’u manatu i le taimi nei e faatatau i lena lava mea, ou te toe faamautuina le moni o a’u faamatalaga uma, e pei ona sa faia ma lolomiina i lena taimi.
“‘O le ua i ai taliga e faalogo ai, ina faalogo mai ia o ia,’ sa le o se talitonuga sese! O le mea ua tusia ua tusia lava—ma o le e faitauina, ia malamalama o ia.”4
Matini Harisi
E faapei o Oliva Kaotui, sa aluese Matini Harisi mai le Ekalesia mo se taimi ae na iu ina toe papatisoina o ia. I ona tausaga mulimuli ane, sa masani ona ia feaveaia se kopi o le Tusi a Mamona i lalo o lona ‘ao’ao ma molimau i lona moni ia i latou uma o e o le a faalogo: “Ou te iloa e moni lava le Tusi a Mamona. Ma e ui ina teena e tagata uma le moni o lena tusi, ou te le mafai lava ona faia. Ua tamau lo’u loto. Le Atua e, ua tamau loʼu loto! Ua ou iloa moni lava ma mautinoa.”5
Sa tusia e George Godfrey, o se faaaumea a Matini: “O ni nai itula ao le’i maliu o ia … sa ou fesili ai ia [Matini] pe na te le’i lagonaina sa i ai se elemene, o le taufaavalea ma le taufaasese i mea sa tusia ma faamatalaina e uiga i le oo mai o le Tusi a Mamona, ma sa ia tali mai e pei ona sa ia faia ai i taimi uma lava … ma faapea mai: ‘O le Tusi a Mamona e le o se mea pepelo. Ou te iloa mea ua ou iloa. Sa ou vaai i mea na ou vaaia ma sa ou faalogo i mea na ou faalogo i ai. Na ou vaai i papatusi auro lea na tusia mai ai le Tusi a Mamona. Sa faaali mai se agelu ia te a’u ma isi ma molimau mai i le moni o le faamaumauga, pe ana ou pepelo ma tauto pepelo i le molimau ua ou faia nei, semanu ua avea au ma se tagata mauoa, ae semanu e le mafai ona ou molimauina nai lo le mea ua ou faia, ma ua ou faia nei aua ua moni nei mea.’”6
“O Molimau e Tusa Le Toatele ma Lona Lava Finagalo”
O le mau a Molimau e Toatolu e faapitoa ona musuia pe a mafaufau atu i o latou aafiaga i totonu ma i tua o le Ekalesia.7 O ia mea uma, sa le’i tuua lava e Oliva, Tavita, ma Matini le molimau atu i mea na latou oo i ai ma tuuina atu le molimau o le Tusi a Mamona sa faaliliuina e ala i le meaalofa ma le mana o le Atua. Ma sa le na’o i latou.
Sa tautino mai e Nifae anamua, “O le a amata e le Alii le Atua ona aumai o upu o le tusi; ma o fofoga o molimau e tusa le toatele ma lona lava finagalo o le a faamautuina ai e ia lana afioga” (2 Nifae 27:14). E faaopoopo atu i le Perofeta o Iosefa Samita ma Molimau e Toatolu, sa filifilia foi e le Alii isi molimau e toavalu e vaai i papatusi. O loo aofia ai la latou molimau i totonu o kopi uma o le Tusi a Mamona. E pei o Oliva, Tavita, ma Matini, sa tumau le faamaoni o Molimau e Toavalu i la latou molimau o le Tusi a Mamona ma la latou molimau e uiga i papatusi auro.
O William E. McLellin o se tasi o uluai tagata liliu mai i le Ekalesia o e na iloa patino le toatele o molimau o le Tusi a Mamona. Sa iu ina aluese William ma le Ekalesia, ae sa faaauau pea ona aafia loloto i molimau mamana sa ia faalogo i ai mai molimau.
“O lenei ou te fesili,” sa tusia ai e McLellin ao agai atu i le faaiuga o lona olaga, “e faapefea ona ou masalomia se vaega o molimau faamaoni faapena, i le tuuina mai o se molimau moni faapena ma faamaoni? O nei tamalii a o i ai i tausaga sili ona lelei o o latou olaga, sa vaai i le faaaliga vaaia o se agelu, ma tuuina atu la latou molimau i tagata uma. Ma e toavalu tamalii na vaai i papatusi, ma sa fetagofi i ai. O lea na iloa ai e nei tamalii uma ia mea na latou folafolaina mai e matuai moni lelei lava. Sa latou faia lena mea a o latou talavou, ma le taimi nei ina ua toeaiina ua latou tautino mai foi na lava mea.”8
E ui ina tatou te le’i vaai i papatusi auro e pei ona sa vaai i ai Molimau e Toatolu, ae e mafai ona tatou maua le malosi mai a latou molimau. E tusa lava pe na luitauina o latou uiga tauleleia ma na faamata’uina lo latou saogalemu ma ola ona o a latou molimau, ae sa tumau faamaoni lava nei tamalii o le faamaoni lotototoa i la latou molimau vaaitino seia oo lava i le taimi mulimuli.