Fakamatala Fakalahi E

“Ngaahi Moʻoni Mahinongofua mo Pelepelengesi”

Naʻe teuteuʻi e Tohi ʻa Molomoná ke ʻomi ʻi he ngaahi ʻaho fakaʻosí, ko ha taimi ʻo e puputuʻu lahi fekauʻaki mo e tokāteliné, pe moʻoni taʻengata ʻa e ʻOtuá. Ko e konga ia ʻo e taumuʻa fakalangi ʻo e tohi ko iá, hangē ko ia naʻe tomuʻa mamata ki ai ʻa Nīfaí, ke “fakamoʻoniʻi ʻa hono moʻoni ʻo e [Tohi Tapú],” ke “ fakamahinoʻi ʻa e ngaahi meʻa mahinongofua mo mahuʻinga” kuo mole he ngaahi senituli kuo ʻosí, pea ke “fakahā ia ki he faʻahinga, mo e ngaahi lea, mo e kakai fulipē, ko e Lami ʻa e ʻOtuá ko e ʻAlo ia ʻo e Tamai Taʻengatá, pea ko e Fakamoʻui ʻo e māmaní” (1 Nīfai 13:40).

‘Oku fakahā mai ʻe he Tohi ʻa Molomoná e ngaahi moʻoni taʻengata naʻe mole lolotonga e Hē Mei He Moʻoní pea tānaki atu ha fakamoʻoni hono ua, ʻo fakamahinoʻi e ngaahi moʻoni naʻe akoʻi ʻi he Tohi Tapú. Ko ha niʻihi eni ʻo e ngaahi moʻoni ko iá. Fekumi ki he ngaahi meʻá ni mo ha ngaahi moʻoni mahinongofua mo pelepelengesi ʻi hoʻo ako e Tohi ʻa Molomoná.

Ko e Toluʻi ʻOtuá

• ʻOku sino māvahevahe ʻa e Tamai Hēvaní, Sīsū Kalaisi, mo e Laumālie Māʻoniʻoní ka ʻoku nau taha pē ʻi he taumuʻá (vakai, 3 Nīfai 11:32, 36).

• ʻOku maʻu ʻe he Fakamoʻuí ha sino ongoʻingofua (vakai, 3 Nīfai 11:10–17).

Ngaahi potufolofola kehe fekauʻaki mo e Toluʻi ʻOtuá: 2 Nīfai 31:6–8; ʻEta 12:41

Ko e Fakalelei ʻa Sīsū Kalaisí

• Naʻe mamahi mo faingataʻaʻia ʻa Sīsū Kalaisi koeʻuhi ko ʻetau ngaahi angahalá kae lava ke Ne ʻafioʻi e founga ke tokoniʻi kitautolú (vakai, ʻAlamā 7:11–13).

• ʻE lava ke tau hoko ʻo haohaoa ʻi he ʻaloʻofa ʻa Sīsū Kalaisí (vakai, Molonai 10:32–33).

Ngaahi potufolofola kehe fekauʻaki mo e Fakalelei ʻa e Fakamoʻuí: 1 Nīfai 10:6; 2 Nīfai 2:6–9; Sēkope 4:11–12; Mōsaia 3:1–19; ʻAlamā 34:8–16

Ko e Palani ʻo e Fakamoʻuí

• Ko e Hinga ʻa ʻĀtama mo ʻIví ko ha konga mahuʻinga ia ʻo e palani ʻa e Tamai Hēvaní (vakai, 2 Nīfai 2:22–27).

• Naʻe fie maʻu e fehangahangaí ke tau lava ʻo fakaʻaongaʻi e tauʻatāina ke filí (vakai, 2 Nīfai 2:11–16).

• ʻE fakamaauʻi kitautolu ʻo fakatatau mo ʻetau ngaahi ngāué mo e ngaahi holi ʻo hotau lotó (vakai, ʻAlamā 41:3–7).

• ʻOku fakataipe ʻe he “ano ʻo e afi mo e maka-vela” ʻa e mamahi ʻa kinautolu ʻoku ʻikai fakatomalá (vakai, 2 Nīfai 9:16–19; Mōsaia 3:24–27).

Ngaahi potufolofola kehe fekauʻaki mo e palani ʻo e fakamoʻuí: 2 Nīfai 9:11–26; ʻAlamā 22:12–14; 34:31–35; 42:1–26

Ko e Hē mei he Moʻoní mo Hono Toe Fakafoki Mai ʻo e Ongoongoleleí

• Naʻe hoko ʻa e Hē Fakaʻaufuli mei he Moʻoní koeʻuhi ko e fai angahalá mo e taʻetuí (vakai, Molomona 8:28, 31–41).

• ʻOku fakamoʻoniʻi ʻe he Tohi ʻa Molomoná ʻa e ngaahi moʻoni naʻe akoʻi ʻi he Tohi Tapú (vakai, 1 Nīfai 13:19–41; 2 Nīfai 3:12).

• ʻOku totonu ke ui e Siasi ʻo Kalaisí ʻi Hono huafá (vakai, 3 Nīfai 27:3–9).

Ngaahi potufolofola kehe fekauʻaki mo e Hē mei he Moʻoní: 1 Nīfai 13:1–9, 24–29; 2 Nīfai 27–28

Ngaahi potufolofola kehe fekauʻaki mo e Fakafoki Mai ʻo e Ongoongoleleí: 1 Nīfai 14:7–12; 22:7–11; 2 Nīfai 3:7–24; 25:17–18

Kau Palōfitá mo e Fakahaá

• ʻOku fakamoʻoni e kau palōfita kotoa pē kia Sīsū Kalaisi (vakai Mōsaia 13:33–35).

• ʻOku fakafou mai e ʻilo ki he moʻoni fakalaumālié ʻi he Laumālie Māʻoniʻoní (vakai, ʻAlamā 5:45–47).

• ʻOku ʻikai maʻu kotoa e ngaahi folofola ʻa e ʻOtuá ʻi he Tohi Tapú (vakai, 2 Nīfai 29:10–13).

• Kuo teʻeki ke ngata ʻa e fakahā mei he ʻOtuá ʻi hotau kuongá (vakai, Molomona 9:7–9).

Ngaahi potufolofola kehe fekauʻaki mo e kau palōfitá: 1 Nīfai 22:1–2; Mōsaia 8:16–18; Hilamani 13:24–33

Ngaahi potufolofola kehe fekauʻaki mo e fakahaá: Sēkope 4:8; ʻAlamā 12:9–11; 17:2–3; Molonai 10:5

Lakanga fakataulaʻeikí

• Naʻe uiuiʻi mo teuteu ʻa e kau maʻu lakanga fakataulaʻeikí mei hono ʻai ʻo e tuʻunga ʻo māmaní (vakai, ʻAlamā 13:1–3).

• Kuo pau ke maʻu ʻe ha taha e mafai mei he ʻOtuá ke malanga ʻaki e ongoongoleleí (vakai, Mōsaia 23:17).

Ngaahi potufolofola kehe fekauʻaki mo e lakanga fakataulaʻeikí Mōsaia 18:17–20; ʻAlamā 13; Hilamani 10:7

Ngaahi Ouaú mo e Ngaahi Fuakavá

• ʻOku mahuʻinga ʻa e papitaisó ke maʻu e moʻui taʻengatá (vakai, 2 Nīfai 31:4–13, 17–18).

• Kuo pau ke fakahoko e papitaisó ʻi he fakauku (vakai, 3 Nīfai 11:23–27).

• ʻOku ʻikai fie maʻu ke papitaiso e fānau īkí (vakai, Molonai 8:8–12).

• Kuo pau ke fakahoko e ngaahi ouaú ʻo fakatatau ki he ngaahi fekau ʻa Kalaisí ʻe ha taha ʻokú ne maʻu e mafai totonu (vakai, Mōsaia 18:17–18; 3 Nīfai 11:21–27; Molonai 4:1).

Ngaahi potufolofola kehe fekauʻaki mo e ngaahi ouaú: Mōsaia 18:8–17; 21:33–35; ʻAlamā 13:16; 3 Nīfai 18:1–11; Molonai 2–6; 8:4–26

Ngaahi potufolofola kehe fekauʻaki mo e ngaahi fuakavá: 2 Nīfai 11:5; Mōsaia 5:1–9; ʻAlamā 24:17–18

Nofomalí mo e Fāmilí

• ʻOku totonu ke feʻofaʻaki ʻa e husepānití mo e uaifí (vakai, Sēkope 3:5–7).

• ʻOku totonu ke ohi hake ʻe he ngaahi mātuʻá ʻenau fānaú ki he ʻEikí (vakai, 1 Nīfai 7:1).

Ngaahi potufolofola kehe fekauʻaki mo e nofomalí mo e ngaahi fāmilí: 1 Nīfai 1:1; 2 Nīfai 25:26; Sēkope 2:23–28; ʻĪnosi 1:1; Mōsaia 4:14–15; 3 Nīfai 18:21

Ngaahi Fekaú

• ʻE teuteu ʻe he ʻEikí ha founga maʻatautolu ke fakahoko ʻEne ngaahi fekaú (vakai, 1 Nīfai 3:7).

• ʻOku talaʻofa mai e ʻOtuá ke tāpuakiʻi kitautolu kapau te tau tauhi ʻEne ngaahi fekaú (vakai, Mōsaia 2:22–24).

Ngaahi potufolofola kehe fekauʻaki mo e ngaahi fekaú: 1 Nīfai 17:3; 22:30–31; ʻAlamā 37:13, 35; 50:20