Kev Qhia cov Me Nyuam Yaus

Yog koj muaj cov me nyuam yaus hauv koj tsev neeg, nov yog tej yam ntxim saib ntxim ua uas yuav pab lawv kawm tau:

• Hu nkauj. Cov nkauj qhuas Vajtswv thiab cov nkauj los ntawm Children’s Songbook txawj qhia cov lus qhuab qhia. Cia li siv kev nrhiav topics index nyob nram qab phau Children’s Songbookkom nrhiav tau tej zaj uas hais txog tej ntsiab cai ntawm txoj moo zoo uas koj qhia. Pab koj cov me nyuam siv tej zaj lus qhia hauv cov nkauj no hauv lawv lub neej. Piv txwv hais tias, tej zaum koj yuav xav nug txog tej lus los sis tej kab lus hauv cov nkauj. Koj cov me nyuam hu nkauj los tau, es tsis tas li ntawd xwb, lawv txawj piav tes txog tej yam hauv cov nkauj los sis mloog cov nkauj thaum lawv ua lwm yam ntxim saib ntxim ua.

• Mloog los sis ua yeeb yam txog ib zaj dab neeg. Cov me nyuam yaus nyiam mloog dab neeg—los ntawm cov vaj lug kub, los ntawm koj lub neej, los ntawm lub Koom Txoos zaj keeb kwm, los sis hauv lub Koom Txoov tej phau ntawv xov xwm. Nrhiav kev kom lawv pab hais dab neeg. Lawv tuav tau cov duab los yog tej khoom, kos duab txog tej yam lawv mloog, ua yeeb yam txog dab neeg, los sis pab hais dab neeg los tau. Pab koj cov me nyuam paub tej yam tseeb ntawm txoj moo zoo hauv tej zaj uas koj hais.

• Nyeem vaj lug kub. Tej zaum cov me nyuam yaus tsis txawj nyeem ntau, tiam sis koj tseem pab tau lawv ua sib koom kawm los ntawm cov vaj lug kub. Tej zaum koj yuav tsum tsom ntsoov rau ib nqe, ib kab lus, los sis ib lo lus xwb. Tej zaum lawv yuav txawj cim ntsoov tej kab lus me me los ntawm cov vaj lug kub yog tias lawv rov qab hais ob peb zaug. Thaum lawv mloog Vajtswv txoj lus, lawv yuav hnov tus Ntsuj Plig.

• Saib ib daim duab los sis saib ib daim video. Thaum koj muab ib daim duab los sis daim video txog ib lub ntsiab cai ntawm txoj moo zoo los sis ib zaj dab neeg txog vaj lug kub rau koj cov me nyuam saib, cia li nug lawv tej yam uas yuav pab lawv kawm los ntawm tej uas lawv saib. Piv txwv hais tias, koj nug tau, “Muaj dab tsi hauv daim duab no los sis daim video? Ua rau koj xav li cas?” Qhov app Txoj Moo Zoo cov Ntawv, medialibrary.ChurchofJesusChrist.org, thiab children.ChurchofJesusChrist.org yog tej qhov chaw zoo nrhiav cov duab thiab cov video.

• Tsim khoom. Cov me nyuam tsim tau khoom, kos duab, los yog pleev xim txog zaj dab neeg los sis lub ntsiab cai uas lawv kawm.

• Koom tes siv ib yam khoom qhia. Txoj kev siv ib yam khoom qhia yeej pab tau koj cov me nyuam to taub ib lub ntsiab cai txog txoj moo zoo uas nyuaj to taub. Thaum koj siv ib yam khoom qhia, nrhiav kev cia koj cov me nyuam koom tes ua. Lawv yuav kawm los ntawm ib yam uas lawv ua ntau dua li lawv yuav kawm los ntawm kev saib xwb.

• Ua yeeb yam. Thaum cov me nyuam ua yeeb yam txog xwm txheej uas lawv yuav raug hauv lawv lub neej, ces lawv haj yam to taub tias lawv yuav siv lub ntsiab cai txog txoj moo zoo li cas hauv lawv lub neej.

• Rov qab ua yam ntxim saib ntxim ua. Cov me nyuam yaus tej zaum yuav tsum hnov tej ntsiab lus ob peb zaug kom lawv thiaj to taub. Tsis txhob txhawj yog koj rov qab hais tej zaj dab neeg los sis yam ntxim saib ntxim ua ntau zaus. Piv txwv hais tias, tej zaum koj yuav xav siv ob peb txoj kev kom qhia ib zaj dab neeg los ntawm vaj lug kub—nyeem los ntawm phau vaj lug kub, hais ntsiab lus, tso video rau lawv saib, cia koj cov me nyuam pab koj hais dab neeg, caw lawv ua yeeb yam txog zaj ntawd, thiab li ntawd.

  tsev neeg kawm ua ke