Tej Lus Cog Tseg Los ntawm tus Yaj Saub

Qhov uas koj kawm Phau Ntawv Maumoos yuav hloov koj lub siab. Yuav hloov koj tsev neeg lub siab. Cov yaj saub hauv hnub nyoog kawg twb cog lus txog lub hwj chim ntawm Phau Ntawv Maumoos txij thaum tau muab Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg txum tim rov qab los. Cia li xav txog tej lus nram qab no, thiab rov qab nyeem tsis tu tsis tseg. Koj xav txais tej koob hmoov twg ntawm tej no? Thaum koj nyeem Phau Ntawv Maumoos, xav seb puas sau thiab qhia lwm tus txog qhov uas tau muaj raws li tej lus cog tseg no hauv koj lub neej.

Tus Yaj Saub Joseph Smith: “Kuv tau hais rau cov kwv tij tias Phau Ntawv Maumoos yog phau uas raug tshaj txhua phau ntawv nyob hauv ntiaj teb no, thiab yog lub plawv zeb ntawm peb txoj kev teev ntuj, thiab tus neeg uas ua raws li phau ntawv no tej lus ntsiab cai yuav txav tau los ze rau Vajtswv dua lwm phau ntawv” (Teachings of Presidents of the Church: Joseph Smith [2007], 64).

Thawj Tswj Hwm Ezra Taft Benson: “Phau Ntawv Maumoos yeej qhia qhov tseeb, tiam sis nws ua ntxiv thiab.” Phau Ntawv Maumoos yeej ua tim khawv txog Khetos, tiam sis nws kuj ua ntxiv thiab. Yeej muaj ib yam dab tsi ntxiv. Muaj hwj chim hauv phau ntawv no, uas yuav ntws los rau hauv nej lub neej tib lub sij hawm uas nej rau siab kawm phau ntawv no. Nej yuav haj yam muaj hwj chim tiv tau kev ntxias. Nej yuav muaj hwj chim tiv thaiv kom txhob raug lus dag. Nej yuav muaj hwj chim taug txoj kev ti thiab nqaim. Tus Tswv hu cov vaj lug kub ua ‘tej lus uas cawm neeg txoj sia’ (Q&K 84:85), thiab cov lus no yeej muaj tseeb thaum hais txog Phau Ntawv Maumoos. Thaum koj pib tshaib thiab nqhis xav tau cov lus no, nej lub neej yuav muaj ntau nplua mias” (Teachings of Presidents of the Church: Exalas Taft Benson [2014], 141).

Thawj Tswj Hwm Gordon B. Hinckley: “Cov kwv tij thiab cov muam, kuv cog lus rau nej hais tias yog nej yuav thov Vajtswv thaum nej nyeem Phau Ntawv Maumoos, txawm nej twb nyeem pes tsawg zaus lawm los yog, ces tus Tswv tus Ntsuj Plig los yuav muaj ntxiv nyob hauv nej lub siab. Nej yuav haj yam xav ua raws nraim li nws cov lus txib thiab nej yuav paub zoo ntxiv hais tias Vajtswv Leej Tub muaj txoj sia nyob tiag tiag” (Teachings of Presidents of the Church: Gordon B. Hinckley [2016], 233).

Thawj Tswj Hwm Russell M. Nelson: “Kuv cov kwv tij thiab cov muam, kuv cog lus hais tias thaum nej ke thov Vajtswv ke kawm Phau Ntawv Maumoos txhua txhua hnub, nej yuav txiav txim siab zoo dua—txhua hnub. Kuv cog lus hais tias thaum nej xav txog tej yam uas nej kawm, lub rooj ntug yuav qhib plho, thiab nej yuav txais lus teb rau nej cov lus nug thiab kev coj rau nej lub neej. Kuv cog lus hais tias thaum nej rau rau siab nyeem Phau Ntawv Maumoos, nej yuav tiv thaiv nej tus kheej ntawm tej kev phem uas muaj niaj hnub nim no, suav tus kab mob uas yog kev saib duab liab qab thiab lwm yam muaj yees taus” (“Phau Ntawv Maumoos: Nej lub Neej Yuav Zoo Li Cas Yog Tias Tsis Muaj?” Ensign los sis Liahona, Kaum Ib Hlis Ntuj 2017, 62–63).