“Kaum Ob Hlis Ntuj 30–Ib Hlis Ntuj 5. Tej Phab Ntawv Piav txog Phau Ntawv Maumoos: ‘Ib Zaj Tim Khawv Ntxiv txog Yexus Khetos,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Kaum Ob Hlis Ntuj 30–Ib Hlis Ntuj 5. Tej Phab Ntawv Piav txog Phau Ntawv Maumoos,” Los, Nrog Kuv Mus—Rau Ib Leeg thiab Tsev Neeg: 2020
Kaum Ob Hlis Ntuj 30–Ib Hlis Ntuj 5
Tej Phab Ntawv Piav txog Phau Ntawv Maumoos
“Ib Zaj Tim Khawv Ntxiv Txog Yexus Khetos”
Yuav pab koj kawm Phau Ntawv Maumoos yog koj pib nyeem tej phab ntawv ua ntej 1 Nifais. Koj nrhiav tau dab tsi uas ua rau koj zaj lus tim khawv muaj zog?
Sau Ntawv txog Koj tej Kev Tshoov Siab
Ua ntej koj nyeem txog 1 Nifais tshooj 1, qhov uas Phau Ntawv Maumoos tsis zoo li lwm phau ntawv yeej yog ib qho meej heev. Tej phab ntawv uas piav txog Phau Ntawv Maumoos qhia txog ib zaj uas yeej txawv tshaj txhua zaj—hais txog cov tim tswv txoj kev tuaj xyuas, ib co ceev xwm txheej puag thaum ub uas tau muab faus cia hauv ib lub toj, thiab ib tug neeg ua liaj ua teb uas tsis muaj neeg paub txog uas muab cov ceev xwm txheej ntawd txhais lus los ntawm Vajtswv lub hwj chim. Phau Ntawv Maumoos tsis yog keeb kwm txog tej haiv neeg uas nyob hauv Amelikas puag thaum ub xwb. Phau Ntawv Maumoos muaj “qhov txhij txhua ntawm txoj moo zoo uas kav ib txhis li” (zaj lus piav txog Phau Ntawv Maumoos), thiab Vajtswv tus Kheej yog tus uas tau coj phau no tawm los—qhov uas tau sau li cas, tau ceev cia li cas, thiab tau tshaj tawm li cas hauv peb lub caij nyoog. Xyoo no, thaum koj nyeem Phau Ntawv Maumoos, thov Vajtswv, thiab ua raws li phau ntawv no tej lus qhia, koj yuav txais lub hwj chim ntawd hauv koj lub neej, thiab tej zaum koj yuav xav hais, ib yam li Peb tug Tim Khawv tau hais hauv lawv zaj lus tim khawv hais tias, “Yog ib qho zoo kawg nkaus rau [kuv] qhov muag pom.”
Tej lub Tswv Yim Kawm Vaj Lug Kub ntawm Yus Ib Leeg
Phab ntawv piav txog Phau Ntawv Maumoos
Phau Ntawv Maumoos yuav ua rau kuv txoj kev ntseeg Yexus Khetos muaj zog.
Phab ntawv qhia npe ntawm Phau Ntawv Maumoos yeej tsis yog kev qhia npe xwb. Phab ntawv no qhia txog ob peb lub hom phiaj ntawm cov ceev xwm txheej dawb huv no. Nrhiav tej lub hom phiaj no, ces thaum koj kawm Phau Ntawv Maumoos xyoo no, cia li sau lub cim rau tej nqe uas koj xav tias pab ua li tej lub hom phiaj no. Piv txwv hais tias, tej nqe twg pab koj paub tias “Yexus yog tus Khetos, tus Vajtswv uas Nyob Mus Ib Txhis”?
Zaj Lus Piav txog Phau Ntawv Maumoos
Phau Ntawv Maumoos “qhia txog txoj kev cawm seej.”
Txoj hau kev cawm seej yog Leej Txiv Saum Ntuj Ceeb Tsheej txoj hau kev kom pab Nws cov me nyuam txais kev tsa nto, hloov los ua neeg zoo li Nws, thiab muaj kev xyiv fab zoo li Nws muaj (saib 2 Nifais 2:25–26). Yexus Khetos txoj Kev Theej Txhoj yeej qhib kev rau txoj hau kev no, thiab txhua txoj lus qhuab qhia, txoj kab ke, kev khi lus, thiab lus txib uas Vajtswv muab rau peb yog kom pab peb ua raws li txoj hau kev no.
Yog nej xav to taub txoj hau kev cawm seej, ces tsis muaj ib phau zoo nyeem npaum li Phau Ntawv Maumoos. Phau no siv ntau lub npe hais txog Vajtswv txoj hau kev 20 tawm zaus. Thaum koj kawm vaj lug kub xyoo no, cia li nco txog thaum Phau Ntawv Maumoos hais txog Vajtswv txoj hau kev thiab qhov uas tau qhia li cas.
Nov yog ib yam ntxim saib ntxim ua kom pab koj pib ua. Nyeem tej nqe no, thiab sau tej npe uas siv kom hais txog Vajtswv txoj hau kev: 2 Nifais 9:13; 11:5; thiab Amas 12:32–34; 24:14; 41:2; 42:15–16. Txhua lub npe no qhia dab tsi rau koj txog Leej Txiv txoj hau kev?
“Zaj Lus Tim Khawv ntawm Peb tug Tim Khawv”; “Zaj Lus Tim Khawv ntawm Yim tus Tim Khawv”
Kuv txawj ua tim khawv txog Phau Ntawv Maumoos.
Tus Vaj Ntsuj Plig Dawb Huv muaj peev xwm ua tim khawv rau koj hais tias Phau Ntawv Maumoos muaj tseeb, txawm yog koj tsis tau pom cov phiaj kub ib yam li Peb tug Tim Khawv thiab Yim tus Tim Khawv tau pom. Lawv tej zaj lus tim khawv ua rau koj li muaj zog li cas? Koj yuav ua li cas kom “muab [koj lub] npe rau neeg ntiaj teb, los ua tim khawv rau neeg ntiaj teb” txog yam uas koj paub txog Phau Ntawv Maumoos? (“Zaj Lus Tim Khawv ntawm Yim tus Tim Khawv”).
“Zaj Lus Tim Khawv ntawm tus Yaj Saub Joseph Smith”
Qhov uas Phau Ntawv Maumoos tawm los yeej yog ib qho txuj ci tseem ceeb.
Yog leej twg nug koj seb Phau Ntawv Maumoos los qhov twg los, koj yuav hais li cas? Koj yuav hais li cas kom piav txog tus Tswv txhais tes txoj kev coj Phau Ntawv Maumoos tawm los? Joseph Smith tau piav txog qhov uas Phau Ntawv Maumoos tawm los li cas?
“Zaj Lus Tim Khawv ntawm tus Yaj Saub Joseph Smith”
Tau muab Phau Ntawv Maumoos txhais li cas?
Tau muab Phau Ntawv Maumoos txhais los ntawm “Vajtswv lub txiaj ntsim thiab lub hwj chim.” Peb tsis paub ntau txog tus txheej txheem txhais lus no, tiam sis peb paub tias Joseph Smith yog ib tug pom tau, es nws muaj tej cuab yeej pab uas Vajtswv tau npaj rau nws: ob lub pob zeb kaj kaj uas pom kev tshab hu ua Ulees thiab Thumees thiab ib lub pob zeb ntxiv hu ua ib lub pob zeb pom tau. Joseph pom cov ntawv uas sau rau cov phiaj txoj kev txhais lus Akiv hauv cov pob zeb no thiab nws tau nyeem kev txhais lus no thaum ib tug teev ntawv tau sau ntawv. Txhua tus ntawm Joseph cov teev ntawv tau ua tim khawv tias Vajtswv lub hwj chim yog qhov uas tau siv kom muab cov ntawv dawb ceev txhais lus.
Saib “Book of Mormon Translation,” Gospel Topics, topics.ChurchofJesusChrist.org.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Phab ntawv piav txog Phau Ntawv Maumoos
Tej zaum nej tsev neeg yuav xav pib sau tej nqe los ntawm Phau Ntawv Maumoos uas tau txhawb nqa nej txoj kev ntseeg “hais tias Yexus yog tus Khetos” thiab sau tej nqe ntxiv hauv lub xyoo no. Tej zaum nov yog ib lub sij hawm zoo kom tsim nej tsev neeg txoj kev npaj nyeem Phau Ntawv Maumoos: Nej yuav nyeem thaum twg thiab qhov twg? Txhua tus hauv nej tsev neeg yuav ua li cas? Yog xav tau kev pab ntxiv, saib, “Tej lub Tswv Yim rau Tsev Neeg Kev Kawm Vaj Lug Kub” nyob ntawm qhov pib phau no.
Zaj Lus Piav txog Phau Ntawv Maumoos
Ib lub plawv zeb yog ib lub pob zeb zoo li tus tsuas nyob saum cov pob zeb uas nqeg uas ua rau txhua lub pob zeb khov kho thaum nyob ua ke. Xwv kom pab nej tsev neeg to taub vim li cas Phau Ntawv Maumoos yog “lub plawv zeb ntawm peb txoj kev teev ntuj,” tej zaum koj ua taus los sis kos duab txog cov pob zeb ua nqeg uas muaj ib lub plawv zeb nyob sab saud. Yuav ua li cas yog tias yus muab lub plawv zeb tshem? Yuav zoo li cas yog tias peb tsis muaj Phau Ntawv Maumoos? Peb yuav ua li cas kom ua tib zoo saib Phau Ntawv Maumoos yog lub plawv zeb ntawm peb txoj kev ntseeg Yexus Khetos?
Phau Ntawv Maumoos yog lub plawv zeb ntawm peb txoj kev teev ntuj.
“Zaj Lus Tim Khawv ntawm Peb tug Tim Khawv”; “Zaj Lus Tim Khawv ntawm Yim tus Tim Khawv”
Tej zaum nej tsev neeg yuav xav sau txog lawv zaj lus tim khawv txog Phau Ntawv Maumoos, sau lawv tej npe, thiab xav txog tej yam lawv ua tau kom qhia lawv zaj lus tim khawv rau lwm tus.
“Zaj Lus Tim Khawv ntawm tus Yaj Saub Joseph Smith”
Nyob hauv Joseph Smith zaj, peb nrhiav tau puav pheej dab tsi uas qhia hais tias Vajtswv yog tus uas coj Phau Ntawv Maumoos tawm los?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Kawm Zoo Dua Ntxiv ntawm Yus Ib Leeg
Ib txoj lus cog tseg los ntawm tus yaj saub. Thawj Tswj Hwm Russell M. Nelson hais tias, “Kuv cog lus hais tias thaum nej xav txog tej yam uas nej kawm [nyob hauv Phau Ntawv Maumoos], lub rooj ntug yuav qhib plho, thiab nej yuav txais lus teb rau nej cov lus nug thiab kev coj rau nej lub neej” (“Phau Ntawv Maumoos: Nej lub Neej Yuav Zoo Li Cas Yog Tias Tsis Muaj?” Ensign los sis Liahona, Kaum Ib Hlis Ntuj 2017, 62–63).
Maulaunais Muab cov Phiaj Kub Los, los ntawm Gary L. Kapp