“Ib Hlis Ntuj 6–12. 1 Nifais 1–7: ‘Kuv Yuav Mus thiab Ua,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Ib Hlis Ntuj 6–12. 1 Nifais 1–7”, Los, Nrog Kuv Mus—Rau Ib Leeg thiab Tsev Neeg: 2020
Lihais Ncig Mus Ze Hiav Txwv Liab Traveling Near the Red Sea, los ntawm Gary Smith
Ib Hlis Ntuj 6–12
1 Nifais 1–7
“Kuv Yuav Mus thiab Ua”
Nifais tau sau tej yam txog Vajtswv (1 Nifais 6:3). Thaum koj kawm Nifais cov ceev xwm txheej, tsom ntoov rau tej yam txog Vajtswv uas koj nrhiav tau, qhov tseem ceeb yog tej kev tshoov siab los ntawm tus Ntsuj Plig.
Sau Ntawv txog Koj tej Kev Tshoov Siab
Thawj zaj hauv Phau Ntawv Maumoos hais txog ib tsev neeg uas muaj teeb meem tiag tiag. Muaj li no thaum 600 ua ntej Yexus yug los, tiam sis txawm li ntawd los muaj tej yam hauv zaj no uas tej zaum tej tsev neeg niaj hnub nim no yuav paub lawm. Tsev neeg no nyob hauv ib lub ntiaj teb uas phem zuj zus tuaj, tiam sis tus Tswv cog lus rau lawv tias yog lawv coj raws li Nws, Nws yuav coj lawv mus rau kev nyab xeeb. Tahum lawv taug txoj kev ntawd muaj tej lub sij hawm zoo thiab tej lub sij hawm tsis zoo; lawv twb tau txais koob hmoov thiab tej txuj ci tseem ceeb, tiam sis lawv twb muaj kev sib cav sib ceg ntau thiab. Tsis tshua muaj ib zaj ntev npaum li no hauv cov vaj lug kub uas hais txog ib tsev neeg uas sim ua raws li txoj moo zoo: ib leej txiv uas siv zog tshoov nws tsev neeg lub siab kom muaj kev ntseeg, cov tub uas txiav txim siab seb lawv puas ntseeg, ib leej niam uas ntshai txog nws cov me nyuam txoj kev nyab xeeb, thiab cov kwv tij uas sib khib thiab sib cav sib ceg—thiab tej lub sij hawm lawv ib leeg zam txim rau ib leeg. Peb yuav muaj hwj chim yog peb coj raws li tsev neeg no tus yam txwv txog kev ntseeg—txawm yog lawv muaj tej yam uas tsis zoo tag nrho los yog.
Tej lub Tswv Yim Kawm Vaj Lug Kub ntawm Yus Ib Leeg
Cov vaj lug kub muaj nqis heev.
Thawj rau tshooj ntawm Phau Ntawv Maumoos hais ntau yam txog tej phau ntawv dawb ceev, cov ceev xwm txheej dawb ceev, thiab Vajtswv txoj lus. Thaum koj nyeem 1 Nifais 1–6, koj kawm dab tsi txog qhov uas vim li cas Vajtswv txoj lus “muaj nuj nqis heev”? (1 Nifais 5:21). Tej nqe no qhia dab tsi rau koj txog cov vaj lug kub? Koj nrhiav tau dab tsi uas tshoov koj lub siab kom rau siab ntxiv tshawb cov vaj lug kub?
Kuj saib “Scriptures Legacy” (video, ChurchofJesusChrist.org).
Phau Ntawv Maumoos ua tim khawv txog Yexus Khetos.
Raws li lub hom phiaj uas hais nyob hauv phab ntawv qhia npe—kom yaum txhua tus hais tias Yexus yog tus Khetos—Phau Ntawv Maumoos pib hais txog Lihais txoj kev ua yog toog pom tus Cawm Seej. Koj kawm dab tsi txog Yexus Khetos los ntawm tej uas Lihais pom? Tus Cawm Seej tej hauj lwm “tseem ceeb thiab zoo kawg nkaus” hauv koj lub neej yog dab tsi? (1 Nifais 1:14).
Thaum kuv nrhiav thiab tso siab rau tus Tswv, Nws yuav ua rau kuv lub siab mos muag.
Txawm yog Lamas, Lemu-ees, thiab Nifais txhua tus loj hlob tuaj hauv tib tsev neeg thiab raug zoo ib yam, qhov uas lawv txais lawv txiv txoj kev txib li cas hauv tshooj no yeej tsis zoo ib yam. Thaum koj nyeem 1 Nifais 2, sim seb koj puas kawm tau yog vim li cas ua rau Nifais lub siab mos muag thiab vim li cas tsis ua rau nws ob tug tij laug lub siab mos muag. Tej zaum zoo rau koj xav txog qhov uas koj ua li cas thaum tus Tswv txib koj, tsis hais los ntawm tus Vaj Ntsuj Plig Dawb Huv los yog los ntawm Nws tus yaj saub. Thaum twg koj tau hnov tus Tswv txoj kev ua rau koj lub siab mos muag kom koj yuav txaus siab ntxiv ua raws li Nws txoj kev txib thiab tej lus ntuas?
Vajtswv yuav npaj ib txoj kev rau kuv ua raws li Nws lub siab nyiam.
Thaum tus Tswv txib Lihais thiab nws tsev neeg mus khaws cov phooj toog los ntawm Lanpas, Nws tsis qhia tias yuav ua li cas tiag tiag kom ua raws li txoj lus txib no. Hais txog lwm tej lus txib los sis tej kev tshwm sim uas peb txais los ntawm Vajtswv mas qhov no yeej muaj tseeb, thiab ntshe qhov no yuav ua rau peb xav tias Nws twb txib peb ua ib qho “nyuaj heev” (1 Nifais 3:5). Qhov uas Nifais hais li cas txog tus Tswv txoj lus txib, nyob hauv 1 Nifais 3:7, 15–16, tshoov koj lub siab li cas? Puas muaj dab tsi uas koj xav tias koj yuav tsum “mus thiab ua”?
Thaum koj kawm 1 Nifais 1–7, nrhiav tej yam uas Vajtswv ua kom npaj kev rau Lihais thiab nws tsev neeg. Nws tau ua li cas kom ua li no rau koj?
Kuj saib Paj Lug 3:5–6; 1 Nifais 17:3; “Obedience,” Gospel Topics, topics.ChurchofJesusChrist.org; cov video txog Phau Ntawv Maumoos nyob ntawm ChurchofJesusChrist.org los sis qhov app Gospel Library.
Kev nco txog tej yam uas Vajtswv ua pab kuv muaj kev ntseeg txaus ua raws li Nws tej lus txib.
Thaum Lamas thiab Lemu-ees xav yws yws, nkawd pheej muaj Nifais thiab Lihais nyob ze kom pab txhawb nqa thiab qhuab ntuas nkawd. Thaum koj xav yws yws, kev nyeem Nifais thiab Lihais cov lus yuav pab koj muaj lub zeem muag zoo thiab pab koj kawm tau tej lus ntuas zoo. Nifais thiab Lihais tau ua li cas kom sim pab lawv tsev neeg txoj kev ntseeg Vajtswv muaj zog? (see 1 Nifais 4:1–3; 5:1–8; 7:6–21). Koj kawm dab tsi los ntawm nkawd tus yam ntxwv uas yuav pab koj lwm zaus koj raug ntxias yws yws los yog ntxeev siab?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
1 Nifais 1–7
Nyob thoob plaws 1 Nifais1–7, tej zaum nej yuav xav hais kom nej tsev neeg kawm txog qhov uas cov hauv Lihais thiab Xaliyas tsev neeg tau sib raug zoo li cas. Peb kawm dab tsi los ntawm tej kev sib raug zoo no uas yuav pab peb tsev neeg?
Nifais thiab nws tsev neeg tau saib cov yaj saub tej lus rau nqi.
1 Nifais 2:20
Lub ntsiab cai nyob hauv 1 Nifais 2:20 los pheej hais nyob thoob plaws Phau Ntawv Maumoos. Nej tsev neeg yuav ua li cas kom ua raws li lub ntsiab cia no hauv nej lub neej thaum nej kawm Phau Ntawv Maumoos ua ke xyoo no? Tej zaum nej yuav xav nyob ua ke kos duab loj txog qhov uas tus Tswv cog lus li cas hauv nqe no thiab tso rau txhua tus saib hauv nej tsev. Ces daim duab ntawd yuav ua rau nej nco qab sib tham thaum twg nej pom tus Tswv txoj kev foom koob hmoov rau nej tsev neeg thaum nej tau ua raws li Nws cov lus txib. Cia li xav seb puas sau tej yam no rau nej daim duab.
1 Nifais 2:11–13; 3:5–7
Tej zaum nej tsev neeg yuav tau zoo yog nej kawm txog qhov uas Lamas thiab Lemu-ees ua li cas thaum txais tus Tswv cov lus txib thiab Nifais ua li cas. Peb kawm dab tsi los ntawm 1 Nifais 2:11–13; 3:5–7 txog kev yws yws? Peb tau koob hmoov twg thaum peb muab siab rau ntseeg?
1 Nifais 3:19–20; 5:10–22; 6
Tej zaum tej nqe no yuav tshoov nej tsev neeg lub siab kom ceev tej xwm txheej tseem ceeb thiab tej yam uas muaj los hauv nej lub neej. Tej zaum nej yuav xav pib sau ib phau ceev tsev neeg keeb kwm, zoo li cov ceev xwm txeej uas Nifais thiab Lihais sau txog nkawd tsev neeg lub neej. Nej yuav sau dab tsi hauv nej tsev neeg phau ceev xwm txheej?
1 Nifais 7:19–21
Vim li cas Nifais tus yam ntxwv hauv tej nqe no tshoov peb lub siab? Peb tsev neeg tau koob hmoov li cas thaum peb ib leeg “ua siab dawb paug zam txim” rau ib leeg?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Qhia Zoo Dua Ntxiv
Kawm vaj lug kub tsis tu tsis tseg. Ib qho tseem ceeb rau kev qhia zoo hauv tsev yog kev tsim sij hawm kawm vaj lug kub rau nej tsev neeg. Thawj Tswj Hwm Thomas S. Monson qhia hais tias, “Kev nyeem ceev ceev yeej tsis zoo npaum li kev nyeem txhua hnub thiab ua raws li vaj lug kub qhia hauv peb lub neej” (“Be Your Best Self,” Ensign los sis Liahona, Tsib Hlis Ntuj 2009, 68).
Kuv Tau Ua Raws Li tus Ntsuj Plig lub Suab Hais, los ntawm Walter Rane