“Ib Hlis Ntuj 20–26. 1 Nifais 11–15: ‘Txoj Kev Ncaj Ncees thiab Vajtswv lub Hwj Chim Los Ua Ntaj Riam,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Ib Hlis Ntuj 20–26. 1 Nifais 11–15”, Los, Nrog Kuv Mus—Rau Ib Leeg thiab Tsev Neeg: 2020
Qab Zib Tshaj Txhua Yam, los ntawm Miguel Angel González Romero
Ib Hlis Ntuj 20–26
1 Nifais 11–15
“Txoj Kev Ncaj Ncees thiab Vajtswv lub Hwj Chim Los Ua Ntaj Riam”
Koj puas pom koj tus kheej nyob hauv 1 Nifais 11–15? Tej nqe twg muaj nqis tshaj rau koj thiab koj tsev neeg?
Sau Ntawv txog Koj tej Kev Tshoov Siab
Thaum Vajtswv muaj ib txoj hauj lwm loj heev rau Nws tus yaj saub ua, feem ntau Nws ua rau tus yaj saub ntawd ua yog toog loj heev uas pab tus yaj saub to taub Vajtswv lub hom phiaj rau Nws cov me nyuam Mauxes ua yog toog pom “lub ntiaj teb no …, thiab cov neeg nyob rau haud, thiab saum ntuj” (Mauxes 1:36). Tus Tim Thawj Yauhas pom keeb kwm ntawm lub ntiaj teb no thiab tus Cawm Seej txoj Kev Los Zaum Ob (saib phau Tshwm Sim). Joseph Smith pom Leej Txiv thiab Leej Tub (saib Joseph Smith—Keeb Kwm 1:17–18). Lihais ua yog toog pom txoj kev uas peb yuav tsum taug kom mus cuag tug Cawm Seej thiab Nws txoj kev hlub.
Zoo li tau sau ntawv nyob hauv 1 Nifais 11–14, Nifais tau pom tus Cawm Seej txoj kev qhuab qhia, Lihais cov tub ki nyob hauv thaj av uas cog lus cia, thiab Vajtswv txoj hauj lwm hauv hnub nyoog kawg yuav zoo li cas. Txoj kev ua yog toog no tau npaj Nifais rau txoj hauj lwm uas nws yuav tsum ua thaum yav tom ntej, thiab yeej yuav pab npaj koj—vim Vajtswv muaj ib txoj hauj lwm rau koj ua hauv Nws lub nceeg vaj. Koj yog ib tug ntawm “cov ntseeg ntawm tus Me Nyuam Yaj lub koom txoos” uas Nifais pom “cov uas tau tawg khiav ri niab mus thoob plaws hauv lub ntiaj teb; thiab lawv tau muab txoj kev ncaj ncees thiab Vajtswv lub hwj chim uas muaj yeeb koob heev los ua ntaj riam thaiv lawv” (1 Nifais 14:14).
Tej lub Tswv Yim Kawm Vaj Lug Kub ntawm Yus Ib Leeg
Vajtswv txib Yexus Khetos los kom qhia peb txog Nws txoj kev hlub.
Xwv kom pab Nifais to taub tus ntoo uas nws txiv tau pom txhais li cas, ib tug tim tswv tau muab “Leej Txiv tus uas Nyob Mus Ib Txhis Leej Tub” rau nws pom (1 Nifais 11:21). Qhov no ua rau Nifais to taub hais tias tus ntoo piv rau Vajtswv txoj kev hlub. Tiam sis txoj kev ua yog toog tsis tau tiav lawm. Thaum koj nyeem thiab xav txog 1 Nifais 11, koj kawm dab tsi uas pab koj to taub vim li cas Yexus Khetos yog tus zoo kawg nkaus kom qhia txog Vajtswv txoj kev hlub?
Yog xav kawm txog lwm lub cim nyob hauv Lihais txoj kev ua npau suav, saib 1 Nifais 11:35–36; 12:16–18; thiab 15:21–30.
Kuj saib Yauhas 3:16.
Tus Tswv tau npaj kev rau txoj Kev Muab txoj Moo Zoo Txum Tim Rov Qab Los.
Nifais tsis tau nyob ntev txaus pom ntau yam uas muaj hauv nws txoj kev ua yog toog. Koj xav tias yog vim li cas qhov uas Nifais paub tej no yog ib qho uas muaj nqis? Vim li cas qhov uas koj paub tej no yog ib qho uas muaj nqis? Tej zaum koj yuav xav nug koj tus kheej qhov no txhua zaus koj nyeem ib yam dab tsi uas Nifais ua yog toog pom.
Nov yog ib txhia ntawm tej yam uas Nifais pom: nws cov neeg thaum yav tom ntej (saib tshooj 12), kev tuaj kav teb chaws Amelikas thiab Kev Sawv Rog Tawm Tsam Tsoom Fwv Amelikas (saib tshooj 13:12–19), Kev Tso Qhov Tseeb Tseg Loj Heev (saib tshooj 13:20–29), thiab txoj Kev Muab txoj Moo Zoo Txum Tim Rov Qab Los (saib tshooj 13:32–42).
“Lub koom txoos uas muaj zog thiab txaus ntxub” uas Nifais pom yog dab tsi?
Txwj Laug Dallin H. Oaks piav hais tias “lub koom txoos uas muaj zog thiab txaus ntxub” uas Nifais piav txog yeej piv rau “ib txoj kev tawm tswv yim los yog lub koom haum uas tawm tsam kev ntseeg Vajtswv. Thiab ‘kev poob cev qhev’ uas ‘lub koom txoos no’ xav coj haiv neeg ntseeg los raug tsis yog kev raug kaw ntawm sab cev nqaij daim tawv tiam sis yog kev poob cev qhev rau tej tswv yim tsis tseeb” (“Stand as Witnesses of God,” Ensign, Peb Hlis Ntuj 2015, 32).
Leej twg yog tus txiv neej uas Nifais pom uas tus Ntsuj Plig los tshoov nws lub siab kom mus “rau saum cov dej hiav txwv”?
Nifais pom tias tus Vaj Ntsuj Plig Dawb Huv yuav tshoov Christopher Columbus lub siab kom hla dej hiav txwv mus rau Amelikas. Thaum lub Peb Hlis Ntuj 14, 1493, Columbus sau li no txog nws txoj kev hla dej hiav txwv: “Qhov uas kuv tau ua li no los yeej tsis yog los ntawm kuv txuj ci twg … ; vim qhov uas tib neeg lub cim xeeb tsis muaj peev xwm xav txog nws tus kheej los, Vajtswv tus Ntsuj Plig tau pub rau tib neeg sim xav, vim Vajtswv hnov Nws cov tub qhe uas hlub Nws tej lus thov xwv kom lawv ua tej yam uas neeg xav tias tsis muaj leej twg ua taus” (The Annals of America [Encyclopedia Britannica, Inc., 1976], 1:5).
Cov vaj lug kub hauv hnub nyoog kawg muab tej yam uas “meej thiab muaj nuj nqis heev” txum tim rov qab los.
Nifais ua yog toog pom hais tias phau Npaivnpaum—uas nws piav tias yog “cov Neeg Yudais ib phau ceev xwm txheej”—yuav muaj “ntau yam uas meej thiab muaj nuj nqis heev raug muab rho tawm hauv phau ntawv mus” (1 Nifais 13:23, 28). Tiam sis, nws kuj pom tias Vajtswv yuav muab tej no txum tim rov qab los ntawm “lwm cov ntawv”—uas yog Phau Ntawv Maumoos thiab lwm cov vaj lug kub hauv hnub nyoog kawg (saib 1 Nifais 13:39–40). Tej yam tseeb uas muaj nqis twg yog tej yam uas Phau Ntawv Maumoos pab peb to taub zoo dua ntxiv? Koj lub neej txawv li cas vim tau muab tej yam meej thiab muaj nuj nqis no txum tim rov qab los lawm?
Phau Ntawv Maumoos muab tej yam tseeb ntawm txoj moo zoo txum tim rov qab los tej uas tau ploj mus hauv lub Caij Nyoog Tso Qhov Tseeb Tseg.
Kuj saib “Plain and Precious Truths,” Ensign, Peb Hlis Ntuj 2008, 68–73; Russell M. Nelson, “Phau Ntawv Maumoos: Nej lub Neej Yuav Zoo Li Cas Yog Tias Tsis Muaj?” Ensign los sis Liahona, Kaum Ib Hlis Ntuj 2017, 60–63.
Tus Tswv yuav teb kuv yog tias kuv muaj kev ntseeg thov nrog ib lub siab mos muag.
Koj puas tau xav tias koj tsis txais kev tshwm sim yus tus kheej—xav tias Vajtswv tsis hais lus rau koj? Thaum Nifais ob tug tij laug xav li no ces Nifais tau hais kom nkawd ua dab tsi? Koj yuav ua li cas kom ua raws li Nifais tej lus ntuas hauv koj lub neej, thiab koj yuav siv nws tej lus kom pab lwm tus li cas?
Kuj saib Yakhauj 4:8; Amas 5:46; 26:21–22.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
1 Nifais 11–14
Thaum nej tsev neeg nyeem tej tshooj no, nres ob peb zaug thiab nug tej yam zoo li no: Nifais pom dab tsi hauv nws txoj kev ua yog toog uas tej zaum ua rau nws zoo siab? Muaj dab tsi uas ua rau nws tu siab? Vim li cas?
1 Nifais 13:20–42
Xwv kom pab nej tsev neeg to taub qhov uas tej yam tseeb uas “meej thiab muaj nuj nqis” nyob hauv Phau Ntawv Maumoos muaj nqis npaum li cas, muab ib zaj uas sau meej heev piv rau ib zaj uas sau rov qab rov quav. Vim li cas Leej Txiv Saum Ntuj Ceeb Tsheej xav kom neeg qhia Nws tej lus tseeb kom meej heev? Tej zaum nej tsev neeg yuav xav ua tim khawv txog tej yam tseeb uas “meej thiab muaj nuj nqis” uas lawv kawm los ntawm Phau Ntawv Maumoos.
1 Nifais 14:12–15
Vim li cas peb muaj “txoj kev ncaj ncees thiab Vajtswv lub hwj chim los ua ntaj riam” thaum peb ua raws li peb tej kev khi lus nrog Vajtswv?
1 Nifais 15:8–11
Nej tsev neeg yuav qhia txog tej lub sij hawm twg thaum lawv tau “nug tus Tswv”? Peb kawm dab tsi los ntawm Nifais tus yam ntxwv?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Kawm Zoo Dua Ntxiv ntawm Yus Ib Leeg
Siv tej yam uas pab kawm. Tej lub cim nram qab, Topical Guide, thiab lwm yam kev pab kawm ua rau yus to taub cov vaj lug kub ntxiv. Piv txwv hais tias, tej cim nram qab pab koj to taub dab tsi txog 1 Nifais 14:20–21?
Nifais txoj Kev Ua Yog Toog Pom Maivliag, los ntawm James Johnson