“Ib Hlis Ntuj 13–19. 1 Nifais 8–10: ‘Los Noj cov Txiv,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Ib Hlis Ntuj 13–19. 1 Nifais 8–10,” Los, Nrog Kuv Mus—Rau Ib Leeg thiab Tsev Neeg: 2020
Lihais Ua Npau Suav, los ntawm Steven Lloyd Neal
Ib Hlis Ntuj 13–19
1 Nifais 8–10
“Los Noj cov Txiv”
Thaum koj nyeem 1 Nifais 8–10, cia li xav tias tej yam twg los ntawm Lihais txoj kev ua yog toog muaj nqis rau koj lub neej. Cia li sau ntawv txog tej kev tshoov siab ntawm sab ntsuj plig uas koj txais hauv koj phau vaj lug kub, ib phau ntawv cim ntsoov, los sis phau ntawv no.
Sau Ntawv txog Koj tej Kev Tshoov Siab
Lihais txoj kev ua npau suav—uas muaj tus nqaj hlau, txoj kev tsaus ntuj uas muaj huab zig niab, lub tsev dav, thiab tus ntoo uas muaj txiv “qab zib tshaj”—yog ib txoj kev caw peb kom txais cov koob hmoov ntawm tus Cawj Seej txoj kev hlub thiab txoj kev theej txhoj. Tiam sis, rau Lihais, txoj kev ua yog toog no yog hais txog nws tsev neeg: “Vim tej yam uas kuv tau pom, kuv thiaj li muaj kev zoo siab rau tus Tswv vim yog Nifais thiab kuj yog Xam thiab. … Tiam sis saib seb, Lamas thiab Lemu-ees, kuv txhawj heev kawg nkaus li vim yog neb” (1 Nifais 8:3–4). Thaum Lihais piav nws txoj kev ua yog toog tiav lawm, nws tau thov kom Lamas thiab Lemu-ees “kom nkawd mloog nws cov lus, kom tej zaum tus Tswv yuav hlub tshua nkawd” (1 Nifais 8:37). Txawm yog koj tau kawm Lihais txoj kev ua yog toog ntau zaus lawm los, zaum no cia li xav li Lihais tau xav—cia li xav txog ib tug uas koj hlub. Thaum koj ua li ntawd, ces kev nyab xeeb ntawm tus nqaj hlau, tej kev txaus ntshai los ntawm lub tsev dav, thiab qhov qab zib ntawm cov txiv yuav muaj ib lub ntsiab tshiab rau koj. Thiab koj yuav to taub ntxiv txog leej txiv uas “muaj siab hlub” tus uas tau txais kev ua yog toog tseem ceeb no.
Tej lub Tswv Yim Kawm Vaj Lug Kub ntawm Yus Ib Leeg
Vajtswv txoj lus coj kuv mus cuag tus Cawm Seej thiab pab kuv paub txog Nws txoj kev hlub.
Lihais txoj kev ua yog toog ua rau yus xav txog qhov uas yus nyob qhov twg tam sim no—thiab yus tab tom mus qhov twg—nyob rau ntawm txoj kev uas yus mus kom paub tus Cawm Seej thiab Nws txoj kev hlub. Thawj Tswj Hwm Boyd K. Packer qhia hais tias: “Tej zaum nej xav tias Lihais txoj kev ua npau suav los yog kev ua yog toog tsis muaj nqis rau nej, tiam sis nws yeej muaj nqis heev. Nej txhua tus nyob haud; peb txhua tus nyob haud (saib 1 Nifais 19:23). Lihais txoj kev ua npau suav txog tus nqaj hlau muaj txhua yam nyob haud uas ib tug … Neeg Ntseeg hauv Hnub Nyoog Kawg no yuav tsum to taub txog kev sib siab ntawm lub neej no” (“Lehi’s Dream and You,” New Era, Ib Hlis Ntuj 2015, 2).
Ib txoj kev kawm txog 1 Nifais 8 yog qhov uas yus sau rau ib daim qhia li muaj ntawm no. Yog xav to taub lub ntsiab ntawm tej lub cim no, yuav pab koj yog koj kawm txog Nifais txoj kev ua yog toog thaum nws thov Vajtswv kom to taub nws txiv txoj kev ua yog toog—qhov tseem ceeb saib 1 Nifais 11:4–25, 32–36; 12:16–18; thiab 15:21–33, 36. Thaum koj kawm txog Lihais txoj kev ua yog toog, cia li xav seb tus Tswv xav kom koj kawm dab tsi.
|
Tej lub cim los ntawm Lihais txoj kev ua yog toog |
Lub ntsiab |
Tej lus nug zoo xav txog |
|---|---|---|
Tej lub cim los ntawm Lihais txoj kev ua yog toog Tus ntoo thiab cov txiv (1 Nifais 8:10–12) | Lub ntsiab | Tej lus nug zoo xav txog Kuv ua dab tsi kom caw lwm tus los txais Vajtswv txoj kev hlub? |
Tej lub cim los ntawm Lihais txoj kev ua yog toog Tus dej (1 Nifais 8:13) | Lub ntsiab | Tej lus nug zoo xav txog |
Tej lub cim los ntawm Lihais txoj kev ua yog toog Tus nqaj hlau (1 Nifais 8:19–20, 30) | Lub ntsiab | Tej lus nug zoo xav txog |
Tej lub cim los ntawm Lihais txoj kev ua yog toog Kev tsaus ntuj muaj huab zig niab (1 Nifais 8:23) | Lub ntsiab | Tej lus nug zoo xav txog |
Tej lub cim los ntawm Lihais txoj kev ua yog toog Lub tsev loj thiab dav (1 Nifais 8:26–27, 33) | Lub ntsiab | Tej lus nug zoo xav txog |
Tej lub cim los ntawm Lihais txoj kev ua yog toog | Lub ntsiab | Tej lus nug zoo xav txog |
Kuj saib David A. Bednar, “Lehi’s Dream: Holding Fast to the Rod,” Ensign los sis Liahona, Kaum Hli Ntuj 2011, 33–37.
Lihais noj cov txiv ntawm tus ntoo cawm txoj sia. Tus Ntoo Cawm txoj Sia, los ntawm Marcus Alan Vincent
Vim li cas Nifais thiaj ua ob co phiaj?
Tus Tswv “lub hom phiaj tseem ceeb” hais kom Nifais ua ob co ceev xwm txheej twb meej heev ob txhiab xyoo tom qab ntawd. Tom qab Joseph Smith muab thawj 116 phab ntawv ntawm Phau Ntawv Maumoos txhais lus, nws muab tej phab ntawv no rau Martin Harris, uas twb ua kom ploj lawm (saib Q&K 10:1–23). Tiam sis Nifais cov phiaj thib ob twb hais txog lub caij nyoog ntawd zoo ib yam, thiab tus Tswv txib Joseph Smith txhais cov phiaj no thiab tsis txhob rov qab txhais qhov uas tau ploj lawm (saib Q&K 10:38–45).
Yog xav paub ntxiv txog cov phiaj nyob hauv 1 Nifais 9, saib “Ib zaj Lus Piav Me Ntsis txog Phau Ntawv Maumoos”; 1 Nifais 19:1–5; 2 Nifais 5:29–32; thiab Maumoos cov Lus 1:3–9.
Cov yaj saub puag thaum ub paub txog Yexus Khetos lub luag hauj lwm thiab tau ua tim khawv txog Nws.
Zaj uas hais txog Lihais txoj kev ua yog toog yeej tau tshoov nws tsev neeg lub siab, tiam sis nws tseem muaj tej yam tseeb nyob mus ib txhis uas nws yuav tsum qhia lawv txog tus Cawm Seej lub luag hauj lwm. Thaum koj nyeem 1 Nifais 10:2–16, cia li xav txog qhov uas vim li cas tus Tswv yuav xav ceeb toom Lihais tsev neeg—thiab peb txhua tus—kom peb paub txog tej yam tseeb no. Cia li xav txog qhov uas koj yuav hais dab tsi rau cov uas koj hlub kom caw lawv tig los rau tus Cawm Seej. Tom qab koj kawm txog Lihais txoj kev ua yog toog thiab tej lus qhia, zoo li Nifais, koj txais kev tshoov siab kom kawm txog dab tsi “los ntawm tus Vaj Ntsuj Plig Dawb Huv lub hwj chim.”? (1 Nifais 10:17).
Vajtswv yuav qhia qhov tseeb rau kuv yog tias kuv rau siab nrhiav.
Koj ua li cas thaum koj kawm txog ib lub ntsiab cai ntawm txoj moo zoo uas koj tsis to taub? Cia li saib tias qhov uas Nifais ua li cas thaum hnov txog Lihais txoj kev ua yog toog (saib 1 Nifais 10:17–19; 11:1) thiab qhov uas Lamas thiab Lemu-ees ua li cas (saib 1 Nifais 15:1–10) yeej sib txawv. Vim li cas lawv tau ua li lawv ua, thiab tau muaj li cas vim lawv ua li ntawd?
Cia li xav seb puas sau txog ib lub sij hawm thaum koj xav paub tej lus qhia txog txoj moo zoo puas muaj tseeb. Tus txheej txheem uas koj siv puas zoo li tej yam uas Nifais ua?
Kuj saib 1 Nifais 2:11–19; Lus Qhuab Qhia thiab Kev Khi Lus 8:1–3.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
1 Nifais 8
Tej zaum nej tsev neeg yuav nyiam ua yeeb yam txog Lihais txoj kev ua yog toog los sis kos duab thiab siv nej cov duab qhia txog qhov ntawd. Los sis tej zaum nej yuav xav muab daim duab txog Lihais txoj kev ua yog toog uas txuas rau zaj lus qhia no rau nej tsev neeg saib thiab caw lawv taw tes rau tej yam thiab nrhiav tau cov vaj lug kub uas piav txog lub ntsiab ntawm tej yam ntawd. Zaj nkauj qhuas Vajtswv “Tus Nqaj Hlau” (Cov Nkauj Qhuas Vajtswv, zaj 127) yeej zoo hu nkauj thaum kawm tshooj no. Tej zaum nej kuj yuav xav saib video txog Lihais txoj kev ua yog toog (saib cov video txog Phau Ntawv Maumoos nyob ntawm ChurchofJesusChrist.org los sis qhov app Gospel Library).
1 Nifais 8:10–16
Peb caw tau leej twg kom los nyob ze dua ntxiv rau Yexus Khetos thiab paub zoo txog Nws txoj kev hlub uas qab zib heev? Peb yuav ua li cas kom “co tes rau lawv”?
1 Nifais 9:5–6
Thaum twg es peb tau ua raws li ib txoj lus txib thaum peb tsis tshua to taub vim li cas yuav tsum ua li ntawd? Peb twb tau koob hmoov twg?
1 Nifais 10:20–22
Qhov uas peb tsis huv ntawm sab cev nqaij daim tawv zoo li qhov uas peb tsis huv ntawm sab ntsuj plig li cas? Peb yuav ua li cas kom ua tib zoo saib xyuas peb thiaj li yuav huv ntawm sab ntsuj plig?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Qhia Zoo Dua Ntxiv
Peb yuav siv cov vaj lub kub li cas hauv peb lub neej? Tom qab nej nyeem ib zaj hauv vaj lug kub, hais kom nej tsev neeg qhia tias lawv yuav siv zaj ntawd hauv lawv lub neej li cas. Piv txwv hais tias, thaum nej tsev neeg nyem 1 Nifais 8:33, tej zaum lawv yuav xav sib tham txog qhov uas lawv yuav ua li cas kom tsis quav ntsej cov uas “taw tes ntshis thuam.”
Tus Ntoo Cawm txoj Sia, los ntawm Avon Oakeson