“Ib Hlis Ntuj 27–Ob Hlis Ntuj 2. 1 Nifais 16–22: ‘Kuv Yuav Npaj txoj Hau Kev Ua Nej Ntej,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Ib Hlis Ntuj 27–Ob Hlis Ntuj 2. 1 Nifais 16–22”, Los, Nrog Kuv Mus—Rau Ib Leeg thiab Tsev Neeg: 2020
Lihais thiab lub Liyahaunas, los ntawm Joseph Brickey
Ib Hlis Ntuj 27–Ob Hlis Ntuj 2
1 Nifais 16–22
“Kuv Yuav Npaj txoj Hau Kev Ua Nej Ntej”
Thaum koj kawm 1 Nifais 16–22, nrhiav tej nqe uas koj nyiam. Ib txhia neeg nyiam sau lub cim rau tej nqe hauv lawv phau vaj lug kub; lwm tus sau tej lus rau ntawm qhov tom ntug. Cia li xav seb koj yuav ua li cas kom sau ntawv txog tej kev tshoov siab uas koj txais.
Sau Ntawv txog Koj tej Kev Tshoov Siab
Thaum Lihais tsev neeg mus rau thaj av uas cog lus cia, tus Tswv tau cog lus rau lawv li no: “Kuv yuav npaj txoj hau kev ua nej ntej, yog hais tias nej ua raws li kuv tej lus txib” (1 Nifais 17:13). Peb paub meej tias, kev cog lus no tsis yog hais tias yuav yooj yim rau lawv mus—lawv tsev neeg twb sib cav, tej hneev twb lov, thiab muaj neeg uas raug kev nyuaj thiab tuag, es lawv tseem yuav tsum ua ib lub nkoj. Tiam sis, thaum twg lawv tsev neeg raug kev nyuaj siab los sis yuav tsum ua tej yam uas tsis muaj leej twg ua taus, Nifais paub tias tus Tswv yeej tsis nyob deb. Nws paub tias Vajtswv “yuav pub [cov neeg rau siab ntseeg] noj, thiab txhawb lawv lub dag zog, thiab npaj kev kom lawv ua tau tiav tej yam uas nws tau txib lawv ua” (1 Nifais 17:3). Yog koj tau xav paub vim li cas tej yam tsis zoo yuav los raug tib neeg zoo ib yam li Nifais thiab nws tsev neeg, tej zaum koj yuav xav kawm tej lub tswv yim hauv tej tshooj no. Tiam sis qhov tseem ceeb dua, koj yuav kawm tias tib neeg zoo ua dab tsi thaum twg lawv raug tej yam tsis zoo.
Tej lub Tswv Yim Kawm Vaj Lug Kub ntawm Yus Ib Leeg
Thaum kuv ua raws li tej lus txib, Vajtswv yuav pab kuv thaum kuv muaj teeb meem.
Tshooj 16–18 hauv 1 Nifais piav txog ob peb qho teeb meem uas Nifais tsev neeg raug, xws li qhov uas ib rab hneev lov lawm (saib 1 Nifais 16:17–32), Ixa-ma-ees txoj kev tuag (saib 1 Nifais 16:34–39), ua ib lub nkoj (saib 1 Nifais 17:7–16; 18:1–4), thiab kev tsis haum xeeb hauv tsev neeg (saib 1 Nifais 18:9–22). Qhov uas Nifais ua li cas thaum raug teeb meem li no thiab qhov uas lwm tus hauv nws tsev neeg tau ua li cas los sib txawv li cas? Tau muaj li cas vim lawv ua li no?
Tej zaum yuav pab koj sau ntawv txog tej yam uas koj kawm rau ib daim uas muaj tej lus saum toj li no: “Teeb Meem,” “Nifais Ua Li Cas”, “Lwm Tus Ua Li Cas,” thiab “Tau Muaj Li Cas Thaum Kawg.” Koj xav tias yog vim li cas Nifais rau siab ntseeg tas mus li tiam sis lwm tus tsis ua li ntawd? Cia li xav txog vim li cas Nifais thiab nws tsev neeg tus yam ntxwv yuav pab koj thaum koj muaj teeb meem.
Kuj saib cov video txog qhov no nyob hauv cov video txog Phau Ntawv Maumoos ChurchofJesusChrist.org los sis qhov app Gospel Library.
1 Nifais 16:10–16, 23–31; 18:11–22
Tus Tswv coj kuv mus los ntawm tej yam me me thiab yooj yim.
Thaum Vajtswv coj Lihais tsev neeg mus rau hauv roob moj sab qhua, Nws tsis tau qhia tias lawv yuav taug tej kev twg mus rau thaj av uas cog lus cia ua ntej. Tiam sis Nws twb muab lub Liyahaunas rau Lihais kom coj nws tsev neeg txhua hnub mus rau qhov chaw kawg. Leej Txiv Saum Ntuj Ceeb Tsheej tau muab dab tsi rau koj kom coj koj kev thiab qhia kev rau koj? Koj xav tias qhov uas hais tias “los ntawm tej yam me me, tus Tswv coj tau tej yam tseem ceeb los” txhais li cas? (1 Nifais 16:29).
Thaum koj nyeem 1 Nifais 16:10–16, 23–31 thiab 18:11–22, xav seb puas sau tej ntsiab cai uas qhia tias Vajtswv ua li cas kom coj Nws cov me nyuam (piv txwv hais tias, 1 Nifais 16:10 qhia tias tej lub sij hawm siv tej yam kom coj peb uas tsis yog raws li peb xav). Koj twb raug xwm zoo li cas uas qhia txog tej ntsiab cai no?
Kuj saib Amas 37:7, 38–47; Lus Qhuab Qhia thiab Kev Khi Lus 64:33–34.
Yog Hais tias Nej Npaj Txhij Nej Yuav Tsis Ntshai, los ntawm Clark Kelley Price
Kuv txawj “muab tag nrho tej vaj lug kub coj los piv rau” kuv tus kheej.
Yaxayas tau sau ntawv rau tag nrho cov neeg Ixayees, thiab Nifais pom tias nws hais txog Nifais tsev neeg—thiab hais txog koj ib yam thiab (saib 1 Nifais 19:23–24). Hais txog Nifais txoj kev hais Yaxayas tej lus mas, Thawj Tswj Hwm Henry B. Eyring hais tias, “Kuv nyeem Yaxayas tej lus … es kuv xav tias Nifais twb xaiv Yaxayas tej lus uas yuav tshoov kuv lub siab ib yam li tus Tswv hais kiag rau kuv xwb” (“The Book of Mormon Will Change Your Life,” Ensign, Feb. 2004, 10)
Thaum xav txog Thawj Tswj Hwm Eyring tej lus, cia li xav txog tej lus nug nram qab no thaum koj nyeem tshooj 20–22:
-
1 Nifais 20:1–9.Tej lus twg hauv tej nqe no piav txog cov neeg Ixayees? Tej lus no piav txog Lamas thiab Lemu-ees li cas? Koj nrhiav tau kev ceeb toom dab tsi thiab tej yam uas koj ua tau hauv koj lub neej?
-
1 Nifais 20:17–22.Tus Tswv tau ua li cas kom coj cov neeg Ixayees mus? Nws tau ua li cas kom coj Lihais tsev neeg mus? Nws coj koj mus li cas?
Koj kawm dab tsi ntxiv nyob hauv 1 Nifais 20–22 uas ua rau koj xav tias tus Tswv hais lus rau koj? Nifais tej lus piav hauv tshooj 22 ua li cas pab koj to taub Yaxayas txoj kev hais tej uas yuav muaj los tom ntej?
Leej twg yog tsev neeg Ixayees thiab Lwm Haiv Neeg?
Tsev neeg Ixayees yog cov xeeb ntxwv ntawm tus yaj saub Yakhauj hauv Phau Qub, tus uas tus Tswv tis npe ua Ixayees (saib Chiv Keeb 32:28; 35:10; kuj saib Bible Dictionary, “Israel”). Tus Tswv tau khi lus nrog Ixayees, thiab nws cov xeeb ntxwv yog Vajtswv cov neeg khi lus. Tiam sis, ntau tiam neeg tom qab ntawd, lawv feem coob twb ntxeev siab rau tus Tswv thiab lawv raug tawg khiav ri niab mus thoob plaws lub ntiaj teb.
Lo lus Lwm Haiv Neeg nyob hauv tej nqe no hais txog cov neeg uas tseem tsis muaj txoj moo zoo lawm (saib Bible Dictionary, “Gentile”). Yaxayas qhia hais tias nyob hauv hnub nyoog kawg Lwm Haiv Neeg yuav txais txoj moo zoo thiab yuav qhia thiab muab tsev neeg Ixayees sau los ua ke (saib 1 Nifais 21:22; 22:8–12; kuj saib Yaxayas 60; 66:18–20).
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
1 Nifais 17:1–6, 17–22
Tej zaum nej tsev neeg yuav xav muab Nifais zaj uas hais txog kev taug mus hauv hav zoov (saib 1 Nifais 17:1–6) piv rau nws ob tug tij laug zaj (saib 1 Nifais 17:17–22) Nej xav tias yog vim li cas lawv tej kev xav txog tej no tsis zoo ib yam? Peb kawm dab tsi los ntawm Nifais txog txoj kev rau siab ntseeg?
1 Nifais 17:17–22; 18:9–16
Thaum twg muaj kev sib khib, sib cav sib ceg, thiab kev yws yws hauv ib tsev neeg ces yuav raug xwm txheej dab tsi? Peb yuav ua li cas kom kov yeej tej teeb meem no?
1 Nifais 19:22–24
Nifais tau muab cov vaj lug kub piv rau nws tsev neeg kom thiaj muaj nqis rau lawv thiab kom lawv kawm tau (saib 1 Nifais 19:23). Muaj ob peb zaj nyob hauv 1 Nifais 16–18 uas tej zaum nej tsev neeg yuav xav piv rau nej tus kheej. Tej zaum nej yuav xav ua yeeb yam txog ib zaj dab neeg thiab sib tham seb zaj no pab tau nej tsev neeg li cas.
1 Nifais 21:14–16
Zaj uas muaj hauv tej nqe no yuav ua li cas pab ib tug uas xav tias tsis muaj leej twg nco qab nws?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Kawm Zoo Dua Ntxiv ntawm Yus Ib Leeg
Thov tus Tswv pab koj. Twb tau muab cov vaj lug kub rau peb los ntawm kev tshwm sim, thiab peb yuav tsum txais kev tshwm sim kom to taub tiag tiag. Tus Tswv tau cog lus tias, “Yog hais tias [koj] … nug kuv los ntawm txoj kev ntseeg, … ces tus Tswv yeej yuav ua tej yam no rau [koj] paub” (1 Nifais 15:11).
Nkawd Tau Ua Kub Ua Ceev rau Kuv, los ntawm Walter Rane