1 Thiab hais ntxiv tias: Cia li cuab pob tseg mloog, Au nej cov uas yog tsev neeg Ixayees, tag nrho nej cov uas tau ntshua tawm thiab raug ntiab tawm vim yog tej kev phem ntawm cov xib hwb uas yog kuv cov neeg; muaj tseeb tiag, tag nrho nej cov uas tau ntshua tawm, uas tau tawg ri niab mus nyob qhov txhia qhov chaw, cov uas yog ib co ntawm kuv tsev neeg, Au cov neeg Ixayees. Au cov neeg uas nyob rau tej koog pov txwv, cia li mloog kuv hais, thiab nej sawv daws cov uas nyob deb cia li mloog thiab; tus Tswv tau xaiv kuv puag thaum tseem nyob hauv plab lawm; txij thaum kuv tseem nyob hauv kuv niam lub plab los nws twb tau muab kuv lub npe hais lawm.

2 Thiab nws tau ua rau kuv lub qhov ncauj ntse npaum li ib rab ntaj ntse ntse; nws tau muab kuv zais rau hauv nws txhais tes tus duab ntxoov ntxoo, thiab nws tau muab kuv ua ib xib xub uas ci nplas; nws tau muab kuv zais rau hauv nws lub hnab ntim xub;

3 Thiab tau hais rau kuv tias: Nej yog kuv cov tub qhe, Au cov neeg Ixayees, cov uas yuav muab yeeb koob rau kuv.

4 Ces kuv tau teb tias, kuv tau ua hauj lwm tsis muaj nuj nqis, kuv tau siv kuv lub dag lub zog rau tej yam uas tsis tseem ceeb thiab tsis muaj nuj nqis; kuv txoj kev txiav txim yeej yuav nrog tus Tswv, thiab kuv txoj hauj lwm yuav nrog kuv tus Vajtswv.

5 Thiab nim no, tus Tswv tau hais tias—tus uas tsim kuv nyob hauv plab los es kom kuv yuav los ua nws ib tug tub qhe, los coj cov Neeg Yakhauj rov qab mus cuag nws—txawm hais tias cov neeg Ixayees tsis tau sib sau los, kuv yeej yuav muaj hwj chim ci ntsa iab rau ntawm tus Tswv lub qhov muag, thiab kuv tus Vajtswv yuav yog kuv lub dag lub zog.

6 Thiab nws tau hais tias: Nws yog ib yam yooj yim uas koj yuav los ua kuv tus tub qhe los cawm kom haiv Neeg Yakhauj muaj ntxiv, thiab yuav rov qab muab tej uas tseg cia rau cov neeg Ixayees lawm txum tim rov rau lawv. Kuv kuj yuav siv koj ua ib lub teeb rau Lwm Haiv Neeg, es kom koj yuav ua tau kuv txoj kev cawm seeg rau sawv daws thoob plaws hauv lub qab ntuj.

7 Tus Tswv tau hais li no, cov neeg Ixayees tus Txhiv Dim, nws Tus Dawb Huv, rau nws tus uas neeg thuam, rau nws tus uas tej haiv neeg ntxub, rau cov kav teb kav chaw tus tub qhe: Tej vaj ntxwv yuav pom thiab yuav sawv ntsug, tej tub huab tais los yuav teev tiam, vim yog tus Tswv uas tseem muaj kev ntseeg heev.

8 Tus Tswv tau hais li no: Thaum lub sij hawm zoo kuv twb tau hnov nej lawm, Au cov neeg nyob hauv tej koog pov txwv ntawm cov dej hiav txwv es, thiab thaum txog hnub cawm seeg kuv twb tau pab nej lawm; thiab kuv yuav hwm nej sawv daws tseg, thiab kuv yuav xa kuv tus tub qhe los rau txoj kev khi lus tseg ntawm cov neeg, los tsim kho lub ntiaj teb, los ua kom muaj neeg mus nyob tej teb chaws uas tsis muaj neeg nyob;

9 Es kom koj yuav hais rau tej neeg raug kaw tias: Cia li mus dawb mus huv; hais rau cov uas tseem zaum hauv txoj kev tsaus ntuj tias: Nej cia li tawm los. Lawv yuav pub noj pub haus rau tom tej kev, thiab lawv tej nras zaub yuav nyob puag saum tej chaw uas siab.

10 Lawv yuav tsis tshaib tsis nqhis, thiab tej hluav taws los sis lub hnub yuav tsis kub lawv; vim nws tus uas muaj txoj kev hlub rau lawv yuav coj lawv txoj hau kev, nws twb yuav coj lawv los ntawm tej qhov dej txhawv.

11 Thiab kuv yuav ua kom muaj ib txog kev mus saum kuv tej roob, thiab kuv tej kev loj yuav raug rhawv kom siab.

12 Thiab tom qab ntawd ces, Au tsev neeg Ixayees, saib seb, tej no yuav tuaj deb deb tuaj; thiab saib seb, tej no tuaj sab pem tuaj thiab sab hnub poob tuaj; thiab tej no tuaj tim lub teb chaws Axavas tuaj.

13 Au ntuj ceeb tsheej cia li hu nkauj, thiab cia li zoo siab, Au lub ntiaj teb; vim cov neeg uas nyob rau sab hnub tuaj tej ko taw yuav tsis txom nyem nyuaj siab ib zaug lawm; thiab cia li tawm plaws los mus rau txoj kev hu nkauj, Au tej roob; vim lawv yuav tsis raug kev nyuaj siab ib zaug ntxiv lawm; vim tus Tswv tau nplij nws cov neeg tej siab tej ntsws, thiab yuav muaj txoj kev hlub rau saum nws cov neeg uas raug kev txom nyem.

14 Tiam sis, saib seb, Xi-oos tau hais tias: Tus Tswv tau tso kuv pov tseg, thiab kuv tus Tswv tau hnov qab kuv lawm—tiam sis nws yuav ua qhia hais tias nws tsis tau ua li ntawd.

15 Vim ib tug poj niam puas yuav muaj cuab kav hnov qab tau nws tus me nyuam uas tseem noj nws mis, es nws yuav tsis muaj txoj kev hlub rau nws tus tub uas nws yug los? Muaj tseeb tiag, tej zaum lawv yuav hnov qab tau, tiam sis kuv yeej yuav tsis hnov qab nej li, Au tsev neeg Ixayees.

16 Saib seb, kuv tau muab nej txaug rau saum kuv tej xib teg; kuv yeej saib ntsoov nej tej ntsa loog.

17 Nej tej me nyuam yuav kov yeej nej tej yeeb ncuab; thiab lawv cov uas saib tsis taus nej yeej yuav raug tawm ntawm nej mus.

18 Cia li tsa nej tej qhov muag ntsia ib puag ncig thiab saib seb; txhua txhia leej no sib sau los ua ke, thiab lawv yuav los nrog nej. Thiab thaum uas kuv tseem muaj txoj sia nyob, tus Tswv hais tias, lawv sawv daws yuav los koom nyob ua pab ua pawg ib yam li tus nkauj nyab hnav tej tsuj tej npuag ua npaim ua npus.

19 Vim nej tej chaw uas raug puas tsuaj thiab tej chaw uas tsuag tag lawm, thiab nej tej liaj tej teb uas raug puas tsuaj, nim no yuav nqaim heev li lawm vim yuav muaj neeg coob heev los nyob; thiab lawv cov uas tau muab nej nqos yuav nyob deb deb.

20 Tej me nyuam uas nej yuav muaj, tom qab uas nej tau ua thawj tug poob lawm, yuav hais dua rau nej tej pob ntseg tias: Qhov chaw no nqaim heev rau kuv; muab chaw rau kuv es kom kuv thiaj tau nyob.

21 Ces koj yuav hais nyob hauv koj lub siab hais tias: Leej twg yug cov me nyuam no rau kuv, tau pom tias kuv twb tau ua kuv cov me nyuam poob tas lawm, thiab yuav tsis yug ib co ntxiv lawm, thiab kuv tseem yog ib tug neeg raug txim thiab yog ib tug neeg loj leeb? Thiab leej twg tau coj tej no los? Saib seb, kuv nyob tib leeg xwb; tej no, lawv mus qhov twg los?

22 Tus Tswv tus uas yog Vajtswv tau hais li no hais tias: Saib seb, kuv yuav tsa kuv txhais tes mus rau Lwm Haiv Neeg, thiab tsa kuv tus chij rau tej neeg; thiab lawv yuav coj koj tej tub hauv lawv tej caj npab los, thiab lawv yuav ev koj tej ntxhais saum lawv tej xub pwg los.

23 Thiab tej vaj ntxwv yuav ua koj txiv qhuav tu yug koj, thiab lawv tej niam vaj ntxwv yuav ua koj niam qhuav tu yug koj; lawv yuav nyo taub hau mus rau hauv av pe koj, thiab yaim tej plua tshauv ntawm koj tej ko taw; thiab koj yuav paub tias kuv yog tus Tswv; vim lawv cov uas tos ntsoov kuv yeej yuav tsis txaj muag li.

24 Vim tus tsiaj puas yuav raug muab txeeb tawm ntawm tus uas muaj zog mus, los sis puas yuav muab tej neeg raug txim raws kev cai tso kom dim?

25 Tiam sis tus Tswv hais li no tias, cov neeg raug txim ntawm tej neeg muaj hwj chim los kuj yuav raug coj mus thiab, thiab tus tsiaj uas raug tus phem heev txhom los yeej yuav raug muab tso kom dim; vim kuv yuav tawm tsam tus uas tawm tsam nej, thiab kuv yuav cawm nej tej me nyuam.

26 Thiab kuv yuav muab lawv cov uas ua nruj ua tsiv rau nej tej nqaij rov qab yug lawv; lawv yuav rov qab qaug rau lawv tej ntshav li qaug cawv txiv hmab qab zib; thiab neeg txhua leej txhua tus yuav paub tias kuv, tus uas yog tus Tswv, yog nej tus Cawm Seeg thiab nej tus Txhiv Dim, Tus uas Muaj Hwj Chim loj kawg nkaus ntawm Yakhauj.