1 Thiab tau muaj tias nkawd txawm tau teev tus Tswv thiab tau tawm nrog kuv mus; thiab peb tau muab ntoo txua ua ntau yam. Thiab tus Tswv tau qhia rau kuv ib ntus dhau ib ntus saib kuv yuav tsum txua cov ntoo ua lub nkoj li cas.

2 Nim no kuv, Nifais, tsis tau txua cov ntoo raws li tej uas tib neeg tau kawm los thiab kuv tsis tau txua lub nkoj mus raws li tej tib neeg txua; tiam sis kuv txawm txua nws raws li zaj uas tus Tswv tau qhia rau kuv; yog li ntawd, nws thiaj tsis zoo li tib neeg ua.

3 Thiab kuv Nifais, tau nce mus saum roob ntau zaus, thiab kuv tau nquag nquag thov tus Tswv; yog li ntawd tus Tswv thiaj tau qhia rau kuv tej yam uas zoo.

4 Thiab tau muaj tias tom qab uas kuv tau txua lub nkoj tiav lawm, raws nraim li tus Tswv lus, kuv ob tug tij laugtau pom tias nws yog ib lub uas zoo, thiab hais tias tus qauv tes uas txua lub nkoj ntawd zoo heev li; yog li ntawd, nkawd thiaj tau rov qab txo nkawd tej hwj chim rau tus Tswv ib zaug dua.

5 Thiab tau muaj tias tus Tswv lub suab tau los hais rau kuv txiv, tias kom peb yuav tsum sawv thiab nqis mus lawm nram lub nkoj.

6 Thiab tau muaj tias kaj ntug tag kis, tom qab uas peb tau npaj ib puas tsav yam, ntau yam txiv hmab txiv ntoo thiab nqaij uas nrhiav tau tom roob moj sab qhua los, thiab nqa zib ntab ntau heev, thiab nqa tej khoom siv raws nraim li tej uas tus Tswv tau txib kom peb nqa, peb txawm tau nqis mus rau hauv lub nkoj, nrog tag nrho peb cov khoom thiab peb tej noob qoob noob loo, thiab tej uas peb tau nqa nrog peb los, txhua txhia leej raws li nws hnub nyoog; yog li ntawd, peb sawv daws thiaj tau nqis mus rau hauv lub nkoj, nrog peb cov poj niam thiab peb cov me nyuam.

7 Thiab nim no, kuv txiv tau muaj ob tug tub nyob rau tom roob moj sab qhua, tus hlob hu ua Yakhauj thiab tus yau hu ua Yauxej.

8 Thiab tau muaj tias tom qab uas peb tau nqis tas huv tib si rau hauv lub nkoj lawm, thiab tau nqa peb tej khoom siv thiab tej yam uas tus Tswv tau txib peb nqa, peb tau coj lawm tom dej hiav txwv thiab raug tsav mus ua ntej ntawm tej cua uas tshuab ncaj qha mus rau tim thaj av uas tau cog lus cia lawm.

9 Thiab tom qab uas peb raug tsav mus ntawm tej cua tau ntau hnub lawm, saib seb, kuv ob tug tij laugthiab Ixama-ees cov tub thiab lawv cov poj niam txawm tau pib ua kev lom zem, kawg tias lawv tau pib dhia muas caum, thiab hu nkauj, thiab hais lus lwj liam ntau yam, muaj tseeb tiag, twb ua rau lawv tsis nco qab txog lub hwj chim uas tau coj lawv los txog qhov ntawd; muaj tseeb tiag, lawv tau khav theeb ua lwj ua liam heev kawg li.

10 Thiab kuv, Nifais, tau pib ntshai heev tias tsam tus Tswv yuav npau taws rau peb, thiab qhuab peb vim peb txoj kev tsis ncaj ncees, xwv kom peb raug dej hiav txwv tob muab peb nqos mus; yog li ntawd, kuv, Nifais, tau pib ua tib zoo hais lus rau lawv; tiam sis saib seb lawv tau npau taws rau kuv, hais tias: Peb tsis xav kom peb tus kwv yau los ua ib tug nom kav peb.

11 Thiab tau muaj tias Lamas thiab Lemu-ees txawm tau ntes kuv thiab muab hlua los khi kuv, thiab nkawd tau ua kub ua ceev heev rau kuv; txawm li ntawd los, tus Tswv tseem nyiaj taus tej ntawd thiab es kom nws thiaj yuav qhia tau nws lub hwj chim, rau txoj kev uas yuav ua kom tiav los raws li nws cov lus uas nws tau hais txog cov neeg phem.

12 Thiab tau muaj tias tom qab uas nkawd tau khi kuv ruaj kawg tias kuv nti tsis tau, lub koob qhia kev, uas tus Tswv tau npaj los, txawm tau nres tsis ua hauj lwm lawm.

13 Yog li ntawd, lawv thiaj tsis paub saib yuav tig lub nkoj rau sab twg, kawg tias muaj cua daj cua dub loj sawv tuaj, muaj tseeb tiag, ib npluav nag xob thiab nag cua uas phem heev, thiab peb tau raug ntsawj rov qab nyob saum cov nplaim dej mus tau peb hnub; thiab lawv tau pib txhawj heev ntshai nyob tsam lawv yuav poob rau hauv dej hiav txwv; txawm li ntawd los lawv tseem tsis tso kuv thiab.

14 Thiab hnub plaub, uas peb tau raug ntsawj rov qab, kob nag xob nag cua ntawd tau pib ua phem heev.

15 Thiab tau muaj tias peb twb yuav luag mag dej hiav txwv tob muab peb nqos mus. Thiab tom qab uas peb tau raug ntsawj nyob saum cov nplaim dej rov qab mus tau plaub hnub lawm, kuv cov tij laugtau pib pom tias Vajtswv tej kev txiav txim twb muaj rau saum lawv lawm, thiab hais tias lawv yuav tsum raug piam sij tsuas ntshai lawv yuav hloov siab lees txim ntawm lawv tej kev tsis ncaj ncees xwb; yog li ntawd, lawv thiaj tau los cuag kuv, thiab hle cov hlua uas khi kuv dab teg, thiab saib seb kuv ob txhais tes tau o heev kawg li; thiab kuv ob lub dab taw los kuj o kawg li thiab, thiab qhov mob mas mob kawg li.

16 Txawm li ntawd los, kuv tseem tau vam khom rau kuv tus Vajtswv, thiab kuv tau qhuas nws tag nrho ib hnub li; thiab kuv tsis tau yws tawm tsam tus Tswv vim kuv tej kev kub ntxhov.

17 Nim no kuv txiv, Lihais, tau hais ntau yam rau lawv, thiab kuj tau hais rau Ixama-ees cov tub thiab; tiam sis, saib seb, lawv tau ua pa tawm lus phem heev rau txhua tus uas yuav hais lus pab kuv; thiab kuv niam kuv txiv los tau mob laug heev lawm, thiab tau raug kev nyuaj siab heev vim nkawd tej me nyuam, nkawd thiaj tau ntshaus ntshov, muaj tseeb tiag, nkawd twb qaug txaj lawm.

18 Vim nkawd txoj kev tu siab thiab kev nyuaj siab ntau, thiab kuv ob tug tij laug txoj kev tsis ncaj ncees, nkawd twb raug coj los nyob ze qhov uas yuav raug nqa tawm ntawm lub sij hawm no mus cuag nkawd tus Vajtswv; muaj tseeb tiag, nkawd tej plaub hau txheeb twb yuav raug muab tso cia qis nyob hauv tej plua tshauv av; muaj tseeb tiag, nkawd twb nyob ze qhov uas yuav raug pov nrog kev nyuaj siab rau hauv ib lub qhov ntxa uas muaj muaj dej.

19 Thiab Yakhauj thiab Yauxej los, tseem yau, es tseem xav tau txoj kev pab ntau, kuj tau nyuaj siab vim nkawd niam tej kev kub ntxhov; thiab kuv tus poj niam nrog nws tej kua muag thiab tej kev thov Vajtswv thiab kuv cov me nyuam thiab, los yeej nplij tsis tau kuv ob tug tij laug tej siab tej ntsws kom muag es kom nkawd yuav daws kuv li.

20 Thiab tsis muaj tus dab tsi li lawm tsuas tshuav Vajtswv lub hwj chim lawm xwb, uas tau ua rau nkawd ntshai nrog txoj kev puas tsuaj, es thiaj nplij tau nkawd tej siab tej ntsws kom muag; yog li ntawd, thaum nkawd tau pom tias nkawd twb yuav raug nqos mus rau hauv qab thu dej hiav txwv tob nkawd thiaj tau hloov siab lees txim rau tej yam uas nkawd tau ua lawm, kawg tias nkawd tau muab kuv daws.

21 Thiab tau muaj tias tom qab uas nkawd tau daws kuv lawm, saib seb, kuv tau muab lub koob qhia kev, thiab nws tau ua hauj lwm raws li kuv lub siab xav. Thiab tau muaj tias kuv tau thov rau tus Tswv; thiab tom qab uas kuv tau thov tas lawm cov cua tau tu lawm, thiab tej cua daj cua dub los tau tu lawm thiab, thiab txawm zoo ntsiag to mus lawm.

22 Thiab tau muaj tias kuv, Nifais, thiaj tau tsav lub nkoj, xwv kom peb yuav rov mus tau dua ncaj lawm tim thaj av uas tau cog lus cia lawm.

23 Thiab tau muaj tias tom qab uas peb tau caij nkoj mus tau ntau hnub lawm peb tau tuaj txog thaj av uas tau cog lus cia lawm; thiab peb txawm tau mus rau saum thaj av, thiab tau tsa peb cov tsev pheeb suab ntaub; thiab peb tau hu nws ua thaj av uas tau cog lus cia lawm.

24 Thiab tau muaj tias peb tau pib ua teb, thiab peb tau pib cog tej noob qoob noob loo; muaj tseeb tiag, peb tau cog tag nrho peb tej noob qoob noob loo rau hauv av, tej uas peb tau nqa hauv Yeluxalees teb chaws tuaj. Thiab tau muaj tias lawv tau hlob zoo heev li; yog li ntawd, peb thiaj raug foom koob hmoov nplua mias.

25 Thiab tau muaj tias peb kuj nrhiav pom nyob rau saum thaj av uas tau cog lus cia lawm, thaum peb tau mus tom hav zoov, kuj muaj txhua txhia yam tsiaj qus nyob rau hauv hav zoov, muaj maum nyuj thiab heev nyuj, thiab zag thiab nees, thiab tshis thiab sai, thiab ib puas tsav yam tsiaj qus, uas yog cia rau tib neeg siv. Thiab peb kuj nrhiav tau ib puas tsav yam quav tooj quav hlau, nrhiav tau kub thiab nyiaj, thiab tooj liab huv tib si.