1 Thiab nim no kuv, Nifais, tsis qhia txog zaj keeb kwm uas hais txog kuv tej poj koob yawm txwv nyob rau hauv kuv phau ceev xwm txheej no; los sis yav no rau tom ntej kuv yeej yuav tsis muab tej no sau rau hauv cov phiaj uas kuv tseem tab tom sau no; vim twb muaj nyob hauv phau ceev xwm txheej uas kuv txiv tau ceev tseg lawm; yog li ntawd, kuv thiaj tsis sau rau hauv txoj hauj lwm no.

2 Yog li ntawd yog kuv hais tias peb yog Yauxej tej xeeb leej xeeb ntxwv ces txaus lawm.

3 Thiab nws yuav tsis ua cas rau kuv yog kuv tsis sau ib puas tsav yam huv tib si uas yog kuv txiv li, rau qhov uas muab tsis tau cov no sau rau saum cov phiaj no, vim kuv xav kom muaj chaw cia rau kuv tau sau tej yam uas yog Vajtswv li.

4 Vim nyob tag nrho hauv kuv lub siab yog qhov uas kuv xav yaum kom neeg los mus cuag tau Anplaham tus Vajtswv, thiab Ixaj tus Vajtswv, thiab Yakhauj tus Vajtswv, thiab kom lawv dim lawv lub txim.

5 Yog li ntawd, tej yam uas ntxim siab rau neeg ntiaj teb kuv tsis sau, tiam sis kuv tsuas sau tej yam uas ntxim siab rau Vajtswv thiab rau cov uas tsis yog neeg ntiaj teb xwb.

6 Yog li ntawd, kuv yuav muab txoj lus txib rau kuv tej xeeb leej xeeb ntxwv, kom lawv yuav tsum tsis txhob siv tej phiaj no sau tej yam uas tsis muaj nuj nqis dab tsi li rau noob neej.