1 Thiab nim no kuv xav kom nej paub, tias tom qab uas kuv txiv, Lihais, tau los xaus qhia tej uas yuav muaj los yav tom ntej ntsig txog nws tej xeeb leej xeeb ntxwv tas lawm, tau muaj tias tus Tswv rov qab hais rau nws dua, hais tias tsis tsim nyog rau nws, Lihais, uas yuav coj nws tsev neeg mus rau tom roob moj sab qhua ib yig xwb; tiam sis tsim nyog nws cov tub yuav tsum tau coj luag tej ntxhais ua poj niam, xwv kom lawv yuav yug tau noob rau tus Tswv nyob rau hauv thaj av uas tau cog lus cia lawm.

2 Thiab tau muaj tias tus Tswv tau txib nws tias kom kuv, Nifais, thiab kuv cov tij laug, yuav tsum rov qab mus lawm pem daim av Yeluxalees dua, thiab mus coj Ixama-ees thiab nws tsev neeg los rau nram roob moj sab qhua no.

3 Thiab tau muaj tias kuv, Nifais, tau nrog kuv cov tij laug, rov qab mus lawm pem roob moj sab qhua nce rov mus pem Yeluxalees dua.

4 Thiab tau muaj tias peb ncaj nraim mus rau hauv Ixama-ees lub tsev, thiab peb tau raug pom zoo nyob ntawm Ixama-ees lub qhov muag, kawg tias thaum kawg peb thiaj tau hais tus Tswv cov lus rau nws.

5 Thiab tau muaj tias tus Tswv tau nplij Ixama-ees lub siab, thiab kuj tau nplij nws tsev neeg tej siab thiab, kawg tias thaum kawg lawv thiaj muab xub ke nrog peb los mus rau nram roob moj sab qhua los cuag peb txiv nram nws lub tsev pheeb suab ntaub.

6 Thiab tau muaj tias thaum peb tsiv mus nyob hauv roob moj sab qhua, saib seb Lamas thiab Lemu-ees, thiab Ixama-ees ob tug ntxhais, thiab Ixama-ees ob tug tub thiab nkawd tsev neeg, txawm tau ntxeev siab tawm tsam peb; muaj tseeb tiag, tau ntxeev siab rau kuv, Nifais, thiab Xam, thiab lawv txiv, Ixama-ees, thiab nws tus poj niam, thiab nws peb tug ntxhais.

7 Thiab tau muaj tias nyob hauv txoj kev ntxeev siab no, lawv xav rov qab mus lawm pem daim av Yeluxalees.

8 Thiab nim no kuv, Nifais, tau nyuaj siab txog lawv txoj kev siab tawv, yog li ntawd kuv thiaj tau hais rau lawv, hais tias, muaj tseeb tiag, twb tau hais rau Lamas thiab Lemu-ees tias: Saib seb neb yog kuv ob tug tij laug, yog vim li cas neb lub siab yuav tawv ua luaj li, thiab yog vim li cas neb siab yuav dig ua luaj li, es neb tseem yuav kom kuv, tus uas yog neb kwv, hais neb thiab, muaj tseeb tiag, thiab tseem yuav kom kuv ua ib tug yam ntxwv rau neb thiab?

9 Yog vim li cas neb tseem tsis tau hnov tus Tswv cov lus thiab?

10 Yog vim li cas es neb tau tsis nco qab tias neb twb tau pom tus Tswv ib tug tim tswv lawm?

11 Muaj tseeb tiag, thiab yog vim li cas es neb tau tsis nco qab tej yam xwm tseem ceeb uas tus Tswv tau ua rau peb lawm, tau cawm peb dim ntawm Lanpas tes, thiab kom peb yuav nqa tau phau ceev xwm txheej?

12 Muaj tseeb tiag, thiab yog vim li cas es neb tau tsis nco qab tias tus Tswv muaj peev xwm ua tau ib puas tsav yam raws nraim li nws lub siab nyiam, rau noob neej, yog tias lawv muaj lub siab ntseeg nws? Yog li ntawd, cia peb muab siab rau ntseeg nws.

13 Thiab yog tias peb yuav muab siab rau ntseeg nws, peb yuav tau txais thaj av uas tau cog lus cia lawm; thiab neb yuav paub tau tias nyob ib ntus tom ntej no tus Tswv cov lus uas tau hais txog kev puas tsuaj ntawm Yeluxalees yeej yuav muaj xwb; vim tias ib puas tsav yam uas tus Tswv tau hais txog kev puas tsuaj ntawm Yeluxalees yuav tsum muaj xwb.

14 Vim saib seb, tsis ntev no tus Tswv tus Ntsuj Plig yuav tsis ua hauj lwm pab lawv lawm; vim saib seb, lawv tau tsis ntseeg cov yaj saub, thiab lawv tau txhom Yelemis coj mus kaw rau hauv tsev rau txim. Thiab lawv tau nrhiav yuav muab kuv txiv txoj sia txo pov tseg, kawg tias lawv tau muab nws ntiab tawm ntawm lub teb chaws mus.

15 Nim no saib seb, kuv hais rau neb tias yog neb yuav rov qab mus pem Yeluxalees neb yuav piam sij nrog lawv ib yam nkaus thiab. Thiab nim no, yog neb yuav xaiv li no, es neb nce rov mus pem lub teb chaws, thiab nco qab ntsoov txog cov lus uas kuv hais rau neb, hais tias yog neb mus neb yuav piam sij ib yam nkaus; vim tej no tus Tswv tus Ntsuj Plig thiaj kom kuv yuav tsum hais.

16 Thiab tau muaj tias thaum kuv, Nifais, tau hais cov lus no rau kuv cov tij laug tas lawm, nkawd txawm tau npau taws rau kuv. Thiab tau muaj tias nkawd tau tsa hlo tes rau kuv, vim saib seb, nkawd tau npau taws heev kawg li, thiab nkawd tau muab hlua los khi kuv, vim nkawd nrhiav muab kuv txoj sia txo pov tseg, es kom nkawd tau tso kuv rau tom roob moj sab qhua rau tsiaj qus noj.

17 Tiam sis tau muaj tias kuv tau thov tus Tswv, hais tias: Au tus Tswv, raws nraim li kuv txoj kev ntseeg uas muaj nyob hauv koj, thov koj cawm kom kuv dim ntawm kuv cov tij laug tes; muaj tseeb tiag, ib yam li muab lub zog rau kuv xwv kom kuv yuav tu tau cov hlua uas khi kuv lawm.

18 Thiab tau muaj tias thaum kuv tau hais cov lus no lawm, saib seb, cov hlua txawm cia li hle xoob tawm ntawm kuv tes thiab taw, thiab kuv tau sawv ntsug ntawm kuv cov tij laug xub ntiag dua, thiab kuv rov qab hais lus rau nkawd ntxiv.

19 Thiab tau muaj tias nkawd tau rov npau taws rau kuv dua, thiab yuav tsa tes rau kuv ntxiv; tiam sis saib seb, Ixama-ees ib tug ntxhais, muaj tseeb tiag, thiab nws niam, thiab Ixama-ees ib tug tub, tau thov kuv cov tij laug, kawg tias lawv thiaj nplij tau nkawd lub siab; thiab nkawd thiaj tau tseg tsis txo kuv txoj sia lawm.

20 Thiab tau muaj tias nkawd txawm tau nyuaj siab, vim nkawd txoj kev phem, ces kawg tias nkawd tau khoov pe ntawm kuv xub ntiag; thiab tau thov kom kuv zam txim pub rau nkawd rau yam uas nkawd tau ua rau kuv lawm.

21 Thiab tau muaj tias kuv tau ua lub siab dawb paug zam txim pub rau nkawd txog ib puas tsav yam uas nkawd tau ua lawm, thiab kuv tau ntuas kom nkawd yuav tsum thov kev zam txim ntawm tus Tswv nkawd tus Vajtswv. Thiab tau muaj tias nkawd tau ua li ntawd. Thiab tom qab uas nkawd tau thov tus Tswv tas lawm peb txawm tau rov qab taug kev mus rau nram peb txiv lub tsev pheeb suab ntaub.

22 Thiab tau muaj tias peb tau los txog nram peb txiv lub tsev pheeb suab ntaub. Thiab tom qab uas kuv thiab kuv cov tij laug thiab tag nrho Ixama-ees tsev neeg huv tib si tau los txog nram kuv txiv lub tsev pheeb suab ntaub lawm, lawv txawm tau ua tus Tswv tus uas yog lawv tus Vajtswv tsaug; thiab lawv tau ua kev cai txi thiab hlawv tsiaj pub rau nws.