“Ob Hlis Ntuj 17–23. 2 Nifais 11–25: ‘Peb Xyiv Fab rau Khetos,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Ob Hlis Ntuj 17–23. 2 Nifais 11–25”, Los, Nrog Kuv Mus—Rau Ib Leeg thiab Tsev Neeg: 2020
Ob Hlis Ntuj 17–23
2 Nifais 11–25
“Peb Xyiv Fab rau Khetos”
Nifais qhia hais tias Yaxayas tej lus “yeej meej rau txhua tus uas muaj lub txiaj ntsim qhia tau tej yuav muaj los yav tom ntej” (2 Nifais 25:4). Thaum koj nyeem nrhiav lub txiaj ntsim qhia tau tej yuav muaj los yav tom ntej los ntawm kev npaj koj tus kheej sab ntsuj plig, kev mloog tus Ntsuj Plig, thiab kev sau ntawv txog koj tej kev tshoov siab.
Sau Ntawv txog Koj tej Kev Tshoov Siab
Kev sau rau saum cov phiaj toog yeej tsis yooj yim, thiab tsis muaj chaw ntau nyob hauv Nifais cov phiaj me. Yog li ntawd vim li cas Nifais yuav siv zog sau Yaxayas tej lus feem ntau hauv nws cov ceev xwm txheej? Nws tau ua li ntawd “xwv kom … [cov] uas pom tej lus no yuav txhawb nqa lawv lub siab thiab muaj kev zoo siab” (2 Nifais 11:8). Zoo li, txoj kev caw kom nyeem Yaxayas tej lus yog ib txoj kev caw kom muaj kev xyiv fab. Koj yuav zoo siab, ib yam li Nifais, rau Yaxayas tej lus qhia txog tej yuav muaj los yav tom ntej hais txog txoj kev muab Ixayees sau los ua ke, tus Mexiyas txoj kev los, thiab kev thaj yeeb hauv lub caij milenias uas tus Tswv cog lus rau cov ncaj ncees. Koj yuav zoo siab hais tias txawm yog ib lub caij uas muaj teeb meem thiab kev tsaus ntuj, koj “tau pom ib txoj kev kaj ci ntsa iab” (2 Nifais 18:22; 19:2). Koj yuav xyiv fab uas koj “daus cov dej tawm ntawm tej qhov dej cawm seej” (2 Nifais 22:3). Los yog hais tias, koj muaj peev xwm xyiv fab rau Khetos (2 Nifais 25:26).
Tej lub Tswv Yim Kawm Vaj Lug Kub ntawm Yus Ib Leeg
Kuv yuav ua li cas kom to taub Yaxayas tej lus qhia zoo dua?
Nifais lees hais tias rau ib txhia neeg, “Yaxayas tej lus tsis tshua meej” (2 Nifais 25:4). Qhov no yeej muaj tseeb rau cov uas tsis paub zoo txog cov Neeg Yudais tej kab lig kev cai puag thaum ub thiab tsis paub tej toj roob hauv pes ib yam li Nifais paub (saib 2 Nifais 25:6). Tiam sis Nifais kuj qhia kom peb paub nrhiav tau lub ntsiab txog Yaxayas tej lus:
-
“Muab nws tej lus los piv rau” koj tus kheej (2 Nifais 11:2).Yaxayas tej lus qhia feem ntau muaj ntau lub ntsiab thiab ntau yam uas siv tau. Piv txwv hais tias, nws tej lus qhia txog kev muab Ixayees tawg khiav ri niab thiab sau los ua ke tej zaum yuav ua rau koj xav txog qhov uas tus Cawm Seej yuav tsum muab koj “sib sau” kom rov qab los cuag Nws.
-
Nrhiav kev kom “muaj lub txiaj ntsim qhia tau tej yuav muaj los yav tom ntej” (2 Nifais 25:4).Txoj kev zoo tshaj kom to taub Yaxayas tej lus qhia txog tej yuav muaj los yav tom ntej yog kom nrhiav tus Ntsuj Plig tej kev tshoov siab. Thov kom Vajtswv coj koj sab ntsuj plig. Tej zaum koj yuav tsis to taub txhua yam thaum tib lub sij hawm, tiam sis tus Ntsuj Plig yeej pab tau koj kawm tias koj yuav tsum paub dab tsi hauv koj lub neej niaj hnub no.
Tej zaum yuav pab koj saib tej kev pab kawm vaj lug kub, tsis hais cov lus cim nram qab, tej zaj piav txog tshooj, Guide to the Scriptures, thiab li ntawd.
“Txoj kev yog yeej yog ntseeg Khetos.”
Nifais tau pib thiab xaus nws txoj kev hais Yaxyas tej lus thaum nws hais lus tim khawv txog Yexus Khetos (saib 2 Nifais 11:2–8; 25:19–29). Muaj dab tsi hauv nws zaj lus tim khawv uas tshoov koj lub siab? Thaum koj kawm vaj lug kub lub lim tiam no, cia li xav txog Nifais txoj kev xav “yaum [nws] cov me nyuam, … kom los ntseeg Khetos, thiab rov los nrog Vajtswv sib raug zoo” (2 Nifais 25:23), thiab sau lub cim rau tej nqe uas yaum koj kom ntseeg thiab coj raws li Yexus Khetos.
Tej zaum yuav pab koj yog koj nco ntsoov tias Yaxayas tej lus qhia uas hais txog tus Cawm Seej feem ntau yog los ntawm kev siv tej lub cim. Piv txwv hais tias, koj pom tau tus Cawm Seej nyob hauv tej lub cim xws li tus tswv ntawm lub vaj txiv hmab (saib 2 Nifais 15:1–7), ib lub pob zeb (saib 2 Nifais 18:14), thiab ib txoj kev kaj (saib 2 Nifais 19:2). Koj nrhiav tau tej lub cim ntxiv txog Yexus Khetos nyob hauv tej tshooj no? Tej lub cim no qhia dab tsi txog Nws rau koj?
Cov neeg muab hlob thiab neeg ntiaj teb yuav raug tej yam kom lawv txo hwj chim.
Nifais twb pom hais tias kev muab hlob yuav ua rau nws cov neeg poob mus (saib 1 Nifais 12:19). Yog li ntawd peb paub zoo tias yog vim li cas Nifais xav qhia nws cov neeg txog Yaxayas tej lus ceeb toom txog kev muab hlob. Nyob hauv tshooj 12 thiab 13, nrhiav tej lus uas Yaxayas siv kom piav txog kev muab hlob, xws li muaj plhus thiab khav txiv. Ces tej zaum koj yuav xav sau ntsiab lus txog tej lus ceeb toom no, zoo li koj sau ib zaj rau koj tus kheej kom ceeb toom txog kev muab hlob.
Kuj saib “Chapter 18: Beware of Pride” (Teachings of Presidents of the Church: Ezra Taft Benson [2014], 229–40).
2 Nifais 12:2–5; 21:9–12; 22; 24:1–3
Nyob hauv lub caij Milenias, Vajtswv cov neeg yuav muaj kev thaj yeeb.
Tej zaum yuav pab koj yog koj xav tias koj nrog Nifais thiab nws cov neeg nyob. Cia li xav seb yuav zoo li cas yog koj khiav tawm ntawm Yeluxalees mus ua ntej lub nroog no raug puas tsuaj (saib 2 Nifais 25:10), es yog li ntawd koj thiaj li koom Ixayees txoj kev tawg khiav ri niab. Koj yuav xav li cas yog koj nyeem Yaxayas tej lus qhia txog qhov uas yuav muab Ixayees sau los ua ke thaum yav tom ntej thiab yuav muaj kev thaj yeeb hauv lub caij Milenias? Vim peb yog Haiv Neeg Ntseeg hauv Hnub Nyoog Kawg, Vajtswv tau hu peb kom peb pab muab Vajtswv cov neeg sau los ua ke hauv hnub nyoog kawg kom npaj rau Khetos txoj kev kav hauv lub caij milenias. Thaum koj nyeem tej nqe no, cia li xav seb koj pab li cas kom muaj raws li tej uas qhia yuav muaj los yav tom ntej uas lawv piav txog. Koj txais kev tshoov siab ua dab tsi kom pab muab Vajtswv cov neeg sau los ua ke?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
2 Nifais 12:1–3
Yog nej tau mus rau lub tuam tsev—“lub roob ntawm tus Tswv lub tsev”—tej zaum nej yuav xav qhia rau nej tsev neeg tias tej kev khi lus ntawm lub tuam tsev pab nej li cas kom “taug [tus Tswv] tej kev.” Yog nej tsis tau mus rau lub tuam tsev, tej zaum yog nej nyeem tej nqe no ua ke ces yuav ua rau nej xav sib tham txog qhov uas nej yuav ua li cas kom npaj txais cov koob hmoov ntawm lub tuam tsev.
2 Nifais 15:18–23
Nej tsev neeg puas txawj xav txog tej lub tswv yim tsis ncaj ncees uas muaj niaj hnub nim no uas tej nqe no piav txog? Peb yuav ua li cas kom tsis txhob raug ntxias los ntawm tej tswv yim cuav txog kev zoo thiab kev phem?
2 Nifais 21
Yog nej tsev neeg xav tau kev pab to taub tshooj no (uas piv rau Yaxayas 11), tej zaum nej nrhiav tau tswv yim nyob hauv Lus Qhuab Qhia thiab Kev Khi Lus 113:1–6, nyob hauv tej nqe no tus Yaj Saub Joseph Smith teb tej lus nug txog Yaxayas 11. Peb kawm dab tsi txog Yexus Khetos los ntawm tej nqe no?
2 Nifais 21:9
Peb ua tau dab tsi kom pab “kev paub txog tus Tswv” yuav puv mus thoob plaws lub ntiaj teb?
2 Nifais 25:23–26
Nej ua tau li cas kom pab nej tsev neeg “xyiv fab rau Khetos” Tej zaum nej yuav xav caw lawv sau rau tej daim ntawv txog tej yam los ntawm tus Cawm Seej uas ua rau lawv muaj kev xyiv fab. Ces, thaum muaj tsev neeg hmo ua ke thaum yav tom ntej los sis tsev neeg kev kawm vaj lug kub, ib tug nyeem tau ib daim. Tej zaum nej tsev neeg yuav xav sau tej daim ntxiv zuj zus hauv xyoo no.
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Kawm Zoo Dua Ntxiv ntawm Yus Ib Leeg
Nrhiav tej tus yam ntxwv. Nyob hauv vaj lug kub peb nrhiav tau tej tus yam ntxwv uas qhia peb tias tus Tswv ua Nws tej hauj lwm li cas. Piv txwv hais tias, nyob hauv 2 Nifais 11–25, tej zaum koj yuav nrhiav tau tej tus yam ntxwv uas qhia tias tus Tswv ceeb toom thiab zam txim li cas.
Lub Tuam Tsev Panama City Panama. “Tus Tswv yuav muab lub roob ntawm tus Tswv lub tsev tsa rau saum tej ncov roob, … thiab txhua haiv neeg yuav ntws los mus rau lub roob ntawm tus Tswv lub tsev.” (2 Nifais 12:2).