1 Thiab nim no, Yakhauj tau hais ntau yam xwm ntxiv rau kuv cov neeg nyob rau lub sij hawm ntawd; txawm li ntawd los tsuas yog tej yam no xwb uas kuv tau muab sau tseg, vim tej uas kuv tau muab sau cia lawm kuv xav hais tias txaus lawm.

2 Thiab nim no kuv, Nifais, sau ntxiv txog Yaxayas tej lus, vim kuv zoo siab heev rau nws tej lus. Vim kuv yuav muab nws tej lus los piv rau kuv cov neeg, thiab kuv yuav xa tej lus no mus thoob plaws rau kuv tej me nyuam huv tib si, vim nws tau pom kuv tus Txhiv Dim lawm tiag, twb ib yam li kuv tau pom nws.

3 Thiab kuv tus kwv, Yakhauj, kuj tau pom nws ib yam li uas kuv tau pom nws; yog li ntawd, kuv yuav xa lawv tej lus mus rau kuv cov me nyuam mus xyaum kom lawv paub tseeb tias kuv tej lus muaj tseeb tiag. Yog li ntawd, los ntawm peb tug cov lus, Vajtswv tau hais tias, kuv yuav tsa qhov tseeb ntawm kuv lo lus. Txawm li ntawd los, Vajtswv tau xa ntau tus tim khawv ntxiv, thiab nws tau xyam qhia nws tej lus huv tib si.

4 Saib seb, kuv lub siab nyiam xyam qhov tseeb rau kuv cov neeg txog qhov uas tus Khetos yuav los tiag; rau qhov, vim yog lub ntsiab no thiaj li muaj Mauxes txoj kev cai; thiab txhua txhia yam huv tib si uas Vajtswv muab los rau noob neej txij li puag thaum chiv keeb los, yog tej cim uas qhia txog yam nws yuav ua.

5 Thiab kuv kuj txaus siab heev rau tus Tswv tej kev khi lus uas nws tau khi tseg rau peb tej yawg koob; muaj tseeb tiag, kuv txaus siab heev rau nws txoj kev zoo, thiab nws txoj kev txim lij, thiab nws lub hwj chim, thiab nws txoj kev hlub uas muaj nyob hauv lub tswv yim tseem ceeb thiab nyob mus ib txhis ntawm txoj kev cawm dim los ntawm txoj kev tuag.

6 Thiab kuv txaus siab heev rau qhov tseeb rau kuv cov neeg tias tsuas yog tus Khetos los pab xwb mas noob neej txhua tus thiaj li yuav tsum piam sij.

7 Vim yog tsis muaj tus Khetos ces yeej tsis muaj Vajtswv; thiab yog tsis muaj Vajtswv ces yeej tsis muaj peb, vim yuav tsis muaj kev tsim lub qab ntuj no. Tiam sis nws muaj Vajtswv, thiab nws yog tus Khetos, thiab nws yeej yuav los thaum txog nws lub sij hawm lawm.

8 Thiab nim no kuv sau Yaxayas ib txhia lus tseg cia, xwv kom kuv cov neeg leej twg tau pom tej lus no yuav txhawb nqa lawv tej siab tej ntsws thiab muaj kev zoo siab rau tib neeg sawv daws. Nim no cov no yog cov lus, thiab cia nej muab lawv piv rau nej thiab rau neeg txhua leej txhua tus.