1 Vim tus Tswv yuav muaj lub siab hlub rau Yakhauj, thiab thiaj tseem yuav xaiv Ixayees, thiab muab lawv mus nyob rau hauv lawv thaj av; thiab cov uas yog qhua yuav raug los koom nrog lawv, thiab lawv yuav npuab rau Yakhauj tsev neeg.

2 Thiab cov neeg yuav coj lawv thiab coj lawv los rau lawv tej chaw; muaj tseeb tiag, yuav tuaj deb puag tim ntuj kawg tuaj; thiab lawv yuav rov qab los rau lawv tej av uas tau cog lus cia lawm. Thiab tsev neeg Ixayees yuav tau tej av ntawd, thiab tus Tswv thaj av yuav raug cia rau tej tub qhe thiab ntxhais qhev; thiab lawv yuav coj cov uas lawv tau txhom lawm mus rau qho uas lawv raug txhom los; thiab lawv yuav kav cov neeg uas tsim txom lawv.

3 Thiab yuav muaj tau tias nyob rau hnub ntawd tus Tswv yuav pub koj so, ntawm koj txoj kev nyuaj siab, thiab ntawm koj txoj kev ntshai, thiab ntawm txoj kev ua qhev hnyav uas koj tau raug yuam ua.

4 Thiab yuav tau muaj tias nyob rau hnub ntawd, tias koj yuav muab zaj paj lug no nkaug Npanpiloos tus vaj ntxwv, thiab hais tias: Cov neeg tsim txom ua li cas ho tsum lawm, lub nroog kub ho tsum lawm!

5 Tus Tswv tau muab cov neeg phem tus pas nrig lov lawm, thiab muab cov neeg kav teb kav chaw tej cwj dam lawm.

6 Nws tus uas tau ua kom cov neeg raug mob tsis tu ncua nyob hauv txoj kev npau taws, nws tus uas tau kav tej haiv neeg nyob hauv txoj kev npau taws, twb raug tsim txom, thiab yuav tsis muaj leej twg cheem tau li.

7 Tag nrho lub ntiaj teb yuav nyob tiaj tus, thiab nyob ntsiag to; lawv yuav zoo siab pib hu nkauj.

8 Muaj tseeb tiag, tej ntoo yuj zoo siab rau koj, thiab tej ntoo ntshaub ntawm Lenpanoos thiab, hais tias: Txij thaum koj tau poob hwj chim lawm tsis muaj tus neeg uas qaug lawm tuaj tawm tsam peb.

9 Ntuj txiag teb tsaus uas nyob puag sab hauv npaj siab tos ntsoov yuav ntsib koj thaum koj mus; nws tau txhib kom cov tuag sawv los rau koj, txhua tus nom tswv hauv ntiaj teb no; nws tau sawv ntawm lawv cov rooj zaum tag nrho cov vaj ntxwv ntawm cov teb chaws.

10 Lawv tag nrho yuav tsa suab thiab hais rau koj hais tias: Puas yog koj tau qaug zog ib yam li peb thiab? Puas yog koj rais los zoo li peb lawm xwb?

11 Koj lub me hwj chim twb raug muab txo nqis mus rau hauv qhov ntxa; tsis hnov koj tej suab raj nrov lawm; tej kas twb nkag rau koj sab hauv, thiab tej kas twb npog koj tas.

12 Koj tau poob saum ntuj ceeb tsheej los li cas, Au Luxifaws, tus tub ntawm caij sawv ntxov! Puas yog koj tau raug tua poob los rau hauv av, uas tau ua rau tej haiv neeg qaug dag qaug zog!

13 Vim koj tau hais nyob hauv koj lub siab tias: Kuv yuav nce mus lawm saum ntuj ceeb tsheej, kuv yuav ua kom kuv lub rooj zaum siab dua li Vajtswv tej hnub qub; kuv kuj yuav zaum rau saum lub roob ntawm txoj kev sib sau los ua ke, uas nyob rau sab ped;

14 Kuv yuav sawv mus rau tej huab sab saum; kuv yuav zoo li tus uas Siab Tshaj Plaws.

15 Tiam sis koj yuav raug txo nqis los mus rau hauv ntuj txiag teb tsaus, mus rau tej sab ntawm lub qhov.

16 Lawv cov uas pom koj yuav ntsia qhov muag nruj nreem rau koj, thiab yuav xav rau koj, thiab yuav hais tias: No puas yog tus txiv neej uas tau ua rau lub ntiaj teb no co ntxhov quav niab, uas tau nchos tej teb chaws?

17 Thiab tau ua rau lub qab ntuj no zoo li ib lub hav zoov, thiab tau rhuav tej nroog nyob hauv, thiab tsis tau kam qhib qhov rooj rau nws tej neeg raug txim?

18 Txhua txhia tus vaj ntxwv ntawm tej haiv neeg, muaj tseeb tiag, lawv txhua leej txhua tus, pw hauv txoj kev tau zoo, lawv txhua leej txhua tus puav leej nyob hauv nws lub tsev.

19 Tiam sis koj tau raug muab txawb tawm ntawm koj lub ntxa zoo li ib ceg ntoo uas lwj ntsuav, thiab nrog rau cov noob uas tau raug muab tua, muab ntaj nkaug tshab, cov uas tau mus rau hauv lub qhov pob zeb; uas zoo ib yam li lub cev neeg tuag uas luag muab tsuj rau hauv qab xib taws.

20 Koj yuav tsis raug faus koom nrog lawv ua ke, vim koj tau rhuav koj thaj av thiab tau muab koj tej neeg tua pov tseg; cov neeg ua phem tej noob yuav tsis raug muaj lub meej yim ib zaug li.

21 Npaj txoj kev tua neeg rau nws tej me nyuam vim lawv cov yawg koob tej kev tsis ncaj ncees, xwv kom lawv yuav sawv tsis taus, thiab tsis tau thaj av ua lawv tug, thiab tsis muaj tej nroog nyob thoob plaws hauv lub qab ntuj no.

22 Vim kuv yuav sawv los tawm tsam lawv, Ib Tsoom Tub Rog tus Tswv hais li, thiab txiav lub npe tawm ntawm Npanpiloos, thiab tej noob, thiab tub, thiab tub xeeb ntxwv, tus Tswv hais li.

23 Kuv kuj yuav muab nws ua ib qhov chaw nyob chaw txoos rau tej os dej nyob thiab tej pas dej; thiab kuv yuav muab rab khaub rhuab ntawm txoj kev puas tsuaj los cheb nws, Ib Tsoom Tub Rog tus Tswv hais li.

24 Ib Tsoom Tub Rog tus Tswv tau cog lus ruaj, hais tias: Tseeb raws li kuv tau xav lawm ces nws yeej yuav muaj los; thiab raws li kuv tau npaj rau, ces nws yeej yuav muaj tseeb—

25 Tias kuv yuav coj cov neeg Axilias los rau hauv kuv thaj av, thiab nyob saum kuv tej roob yuav muab nws tsuj rau hauv qab xib taws; ces nws tus quab yuav ncaim ntawm lawv mus, thiab nws lub nra hnyav yuav ncaim ntawm lawv xub pwg mus.

26 Qhov no yog lub ntsiab uas tau npaj yuav ua rau lub ntiaj teb huv si; thiab qhov no yog txhais tes uas tau ncav tawm mus rau saum txhua haiv neeg.

27 Vim Ib Tsoom Tub Rog tus Tswv tau npaj lawm, thiab leej twg yuav muaj cuab kav hloov tau? Thiab nws txhais tes twb xyab tawm lawm, thiab leej twg yuav tig tau nws rov qab?

28 Nyob rau hauv xyoo ua vaj ntxwv Ahas tuag yog lub nra hnyav no ntag.

29 Koj tsis txhob maj zoo siab, tag nrho nej cov neeg Filixatias, vim nws tus pas uas tau muab nplawm nej twb lov lawm; vim yuav tawm ib tug nab raj kub sai ntawm tus nab tej cag los, thiab nws tej me nyuam yuav yog ib tug nab ya uas tsiv kawg li.

30 Thiab thawj tug me nyuam yug ntawm cov neeg pluag yuav muaj noj, thiab tej neeg txom nyem yuav pw hauv txoj kev tsis muaj xwm txheej; thiab kuv yuav muab txoj kev tshaib plab los tua nej tej cag, thiab nws yuav tua nej tej noob uas seem tshuav.

31 Cia li cuab suab nyiav, Au rooj vag; cia li quaj, Au lub nroog; nej, tag nrho cov neeg Filixatias, uas tau ntshai tag; vim yuav muaj ib nthw pa hluav taws los pem hauv ntuj los, thiab yuav tsis muaj ib tug nyob hauv nws tej caij uas tau teem tseg.

32 Es thaum ntawd ho yuav teb dab tsi rau cov tub xa xov ntawm tej haiv neeg? Tias tus Tswv nrhiav tau Xi-oos lawm, thiab cov neeg pluag ntawm nws cov neeg yuav cia siab rau hauv nws.