1 Thiab nim no, saib seb, kuv cov kwv tij uas kuv hlub es, kuv xav tias nej yuav xav ntsoov tej yam rau hauv nej nruab siab txog tej uas nej yuav tsum ua tom qab uas nej tau nkag mus rau hauv txoj kev. Tiam sis, saib seb, yog vim li cas nej thiaj xav ntsoov tej yam no rau hauv nej tej siab?

2 Nej puas tseem tsis nco qab tias kuv tau hais rau nej tias tom qab uas nej tau txais tus Vaj Ntsuj Plug Dawb Huv lawm nej yuav muaj cuab kav hais tau cov tim tswv yam lus no los? Thiab nim no, nej yuav hais cov tim tswv yam lus tau li cas tsuas yog los ntawm tus Vaj Ntsuj Plig Dawb Huv xwb?

3 Tej tim tswv hais lus los ntawm tus Vaj Ntsuj Plig Dawb Huv lub hwj chim; yog li ntawd, lawv thiaj hais Khetos tej lus. Yog li ntawd, kuv tau hais rau nej tias, cia li noj Khetos tej lus; vim saib seb, Khetos tej lus yuav qhia nej txhua txhia yam tsav uas nej yuav tsum ua.

4 Yog li ntawd, nim no tom qab uas kuv tau hais cov lus no tas lawm, yog hais tias nej tsis to taub tej ntawd ces yeej vim yog nej tsis nug, thiab nej tsis khob; yog li ntawd, nej tsis tau raug coj los rau hauv qhov kaj, tiam sis yuav tsum raug piam sij nyob hauv qhov tsaus ntuj mus.

5 Vim saib seb, kuv hais rau nej ntxiv tias yog nej yuav nkag mus los ntawm txoj kev, thiab txais yuav tus Vaj Ntsuj Plig Dawb Huv, nws yuav qhia rau nej txhua txhia yam uas nej yuav tsum ua.

6 Saib seb, qhov no yog Khetos txoj lus qhia, thiab yuav tsis muaj ib txoj lus qhia ntxiv mus txog thaum uas nws yuav pub nws tus kheej ntawm cev nqaij daim tawv rau nej pom. Thiab thaum nws yuav pub nws tus kheej ntawm cev nqaij daim tawv rau nej pom, tej yam uas nws yuav hais rau nej nej yuav tsum mob siab ntso ua.

7 Thiab nim no kuv, Nifais, hais tsis tau ntxiv lawm; tus Ntsuj Plig cheem tsis pub kuv hais lawm, thiab kuv raug cia nyob quaj ntsuag vim yog txoj kev tsis ntseeg, thiab txoj kev phem, thiab txoj kev tsis lees yuav, thiab txoj kev tawv ncauj ntawm tib neeg; vim lawv yuav tsis nrhiav kev txawj ntse, thiab yeej tsis to taub txog txoj kev txawj ntse tseem ceeb, thaum uas muab rau lawv nyob hauv txoj kev tseeb meej twb meej li lo lus meej tau.

8 Thiab nim no, kuv cov kwv tij uas kuv hlub es, kuv paub tias nej tseem xav ntsoov nyob hauv nej tej siab; thiab nws ua rau kuv nyuaj siab tias kuv yuav tsum hais txog tej yam no. Vim yog tias nej yuav mloog rau tus Ntsuj Plig uas qhia neeg thov Vajtswv ces nej yeej yuav paub tias nej yuav tsum thov Vajtswv; vim tus ntsuj plig phem yuav tsis qhia kom ib tug neeg thov Vajtswv li, tiam sis qhia nws tias kom nws yuav tsum tsis txhob thov Vajtswv.

9 Tiam sis saib seb, kuv hais rau nej tias nej yuav tsum thov Vajtswv txhua txhua lub sij hawm, thiab tsis txhob nkees; thiab nej yuav tsum tsis txhob ua ib yam dab tsi rau tus Tswv tsuas yog ua ntej tshaj plaws nej yuav thov Leej Txiv los ntawm Khetos lub npe tso, xwv kom nws thiaj yuav tshwj saib tej uas nej ua ntawd rau nej, xwv kom tej uas nej ua ntawd yuav yog qhov zoo rau nej tej ntsuj plig.