1 Vim saib seb, tus Tswv, uas yog Ib Tsoom Tub Rog tus Tswv, yuav muab tej khoom noj thiab khoom haus, zaub mov noj tag nrho, thiab tej dej haus huv tib si tshem tawm hauv Yeluxalees, thiab hauv Yudas—

2 Tus neeg muaj hwj chim, thiab tus neeg ua tsov ua rog, tus neeg txiav txim, thiab tus yaj saub, thiab tus neeg txawj ntse, thiab tus txwj laus neeg;

3 Tus thawj tub rog pawg tsib caug, thiab tus neeg ua nom ua tswv, thiab tus neeg pab cuam, thiab tus neeg uas txawj ua yees siv, thiab tus neeg uas txawj hais lus rau laj mej pej xeem.

4 Thiab kuv yuav muab me nyuam rau lawv los ua lawv tej huab tais, thiab tej me nyuam mos yuav los kav lawv.

5 Thiab tej neeg yuav raug ib tug ua kom ib tug nyuaj siab, thiab txhua txhia leej yuav ua kom nws tej neeg zej zog muaj kev nyuaj siab; tus me nyuam yuav tsis ntshai tej laus, thiab tej laj mej pej xeem sawv tawm tsam tej nom tej tswv.

6 Thaum muaj ib tug neeg yuav tuav nkaus nws tus kwv tij ntawm nws txiv tsev neeg, thiab yuav hais tias: Koj muaj ris tsho hnav, koj cia li los ua peb tus nom, thiab tsis txhob cia tej kev puas ntsoog no los rau hauv koj qab teg—

7 Nyob rau hnub ntawd nws yuav tawv, hais tias: Kuv yuav tsis kam ua tus kho tib neeg; vim nyob hauv kuv lub tsev tsis muaj mov noj los sis tsis muaj ris tsho hnav; tsis txhob muab kuv ua tus nom kav cov neeg.

8 Vim Yeluxalees twb raug puas tsuaj lawm, thiab Yudas twb poob lawm, vim lawv tej nplaig thiab tej hauj lwm lawv ua, tau tawm tsam tus Tswv, kom twb qaug lub qhov muag ntawm nws lub yeeb koob.

9 Lawv tej ntsej muag twb ua tim khawv rau lawv, thiab tshaj lawv tej kev txhaum zoo ib yam li cov neeg uas nyob hauv lub nroog Xaudoos, thiab lawv yeej zais tsis tau li. Lawv tej ntsuj plig yuav raug kev txom nyem, vim lawv tau muab nqe zog phem rov rau lawv!

10 Hais rau cov neeg ncaj ncees tias lawv yuav noj qab nyob zoo; vim lawv yuav tau noj tej txiv ntoo uas lawv ua.

11 Kev txom nyem yuav raug rau cov neeg phem, vim lawv yuav piam sij mus; vim lub nqi zog ntawm lawv tej tes yuav los raug rau lawv!

12 Thiab kuv cov neeg, tej me nyuam yog lawv tej neeg tsim kev nyuaj siab, thiab tej poj niam kav lawv. Au kuv cov neeg es, lawv cov uas coj nej ua kom nej ua txhaum thiab rhuav nej tej kev.

13 Tus Tswv twb sawv ntsug hais, thiab sawv los txiav txim rau cov neeg.

14 Tus Tswv yuav txiav txim rau nws tej txwj laus neeg thiab cov tub huab tais uas nyob hauv lawv; vim nej tau muab tej khoom tom tej neeg pluag tog vaj thiab tog tsev coj los noj tag nyob hauv nej tej tsev.

15 Tus Tswv uas yog Ib Tsoom Tub Rog tus Vajtswv hais tias, nej xav tau dab tsi? Nej muab kuv cov neeg ntaus ntsoog txaws, thiab zom tej neeg pluag tej ntsej muag.

16 Tus Tswv hais ntxiv, hais tias: Vim Xi-oos tej ntxhais mas khav txiv heev, thiab mus kev mas ncav caj dab thiab tej qhov muag mas cus ciav rau ub rau no, thaum lawv mus kev mas mus mi muaj plhus ntxiag, thiab lawv tej ko taw mas nrov nrib nreeb—

17 Yog li ntawd tus Tswv yuav foom kom Xi-oos tej ntxhais khaus taub hau thiab hle tawv, thiab tus Tswv yuav pom tau lawv tej yam uas npog ntshis.

18 Nyob rau hnub ntawd tus Tswv yuav muab lawv tej saw nyiaj saw kub uas nrov zoo nkauj, thiab tej kaus mom paj, thiab saw caj dab uas kheej li lub hli pov tseg;

19 Tej saw hlau thiab saw tes, thiab tej phuam npog ntsej muag;

20 Tej kaus mom nyiaj kaus mom kub, thiab tej saw uas coj ntawm tej kav ceg, tej saw khi taub hau, thiab tej txws rau tshuaj tsw qab, thiab tej kauj ntseg;

21 Tej nplhaib, thiab tej kauj ntswg;

22 Tej ce ris tsho uas muaj nuj nqis, thiab tej kaus mom huab tais, thiab tej tsho loj, thiab tej hnab rau nyiaj;

23 Tej tsom qhov muag, thiab tej ntaub uas zoo zoo, thiab tej phuam vas taub hau thiab caj dab, thiab tej phuam npog qhov muag.

24 Thiab yuav muaj tias, tej qhov uas tsw qab ces yuav raug tsw phem tuaj; thiab qhov uas yog txoj siv, yuav yog txoj hlua tuaj; qhov uas muaj plaub hau ntev loo, yuav do hau tuaj; qhov uas yog ib lub ntiab tsuj ntiab npuag, yuav yog ib lub niag ntiab seev tsaj; qhov uas zoo nkauj, yuav yog qhov uas kub hnyiab.

25 Koj tej neeg yuav tuag rau hniav ntaj hniav riam thiab koj tej neeg uas muaj dag muaj zog yuav raug poob tsam.

26 Thiab nws tej neeg yuav quaj ntsuag thiab tau kev txom nyem; thiab nws yuav nyob qhuav qhawv, thiab yuav zaum tib pob rau hauv av.