1 Muaj tseeb tiag, tus Tswv hais li no: Kuv puas tau muab nej pov tseg, los sis kuv puas tau ntiab nej khiav tawm mus ib txhis li? Vim tus Tswv hais li no: Nej niam daim ntawv sib nrauj nyob qhov twg? Kuv tau muab nej rau leej twg, los sis kuv tau muab nej muag rau kuv tej tub uas luag tshuav nuj nqis tus twg? Muaj tseeb tiag, kuv tau muab nej muag rau leej twg? Saib seb, vim nej tej kev tsis ncaj ncees nej tau muab nej tus kheej muag xwb, thiab vim nej tej kev txog kev txhaum nej niam thiaj raug rho tawm lawm.

2 Yog li ntawd, thaum uas kuv los, twb tsis muaj ib tug neeg, thaum uas kuv hu, muaj tseeb tiag, twb tsis muaj leej twg teb. Au tsev neeg Ixayees es, puas yog kuv txhais tes luv lawm es thiaj yuav txhiv tsis tau, los sis puas yog kuv tsis muaj hwj chim tso nej dim? Saib seb, thaum uas kuv npau taws kuv ua tau tej dej hiav txwv qhuav, kuv ua tau tej dej ntws qhuav tau li tej tiaj suab puam thiab tej ntses uas nyob hauv cov dej no tsw lwj iab nqhoob vim tej dej tau qhuav lawm, thiab lawv tuag los yog vim txoj kev nqhis dej.

3 Kuv ua tau saum ntuj dub nciab, thiab kuv ua tej hnab ntaub npog lawv.

4 Tus Tswv uas yog Vajtswv tau pub kuv muaj tej neeg txawj ntse tej nplaig, xwv kom kuv yuav paub lub caij uas yuav qhia ib lo lus rau nej, Au tsev neeg Ixayees. Thaum uas nej nkees nws tsa nej ib tag kis dhau ib tag kis. Nws ua kom kuv lub pob ntseg txawj hnov lus li tej neeg txawj ntse.

5 Tus Tswv uas yog Vajtswv tau qhib kuv lub pob ntseg, es kuv thiaj tsis ntxeev siab, los sis tig khiav ntawm nws mus.

6 Kuv tau tig kuv lub nraub qaum rau cov uas ntaus neeg, thiab cia kuv tej hwj txwv rau luag rho tawm ntawm kuv plhu. Kuv tsis zais kuv lub ntsej muag rau txoj kev txaj muag thiab raug nto qaub ncaug rau.

7 Vim tus Tswv uas yog Vajtswv yuav pab kuv, yog li ntawd kuv yeej yuav tsis swb hlo li. Yog li ntawd kuv puas tau ua kom kuv lub ntsej muag zoo li tej pob zeb ua tawv tawv i, thiab kuv paub tias kuv yuav tsis poob ntsej muag li.

8 Thiab tus Tswv yeej nyob ze, thiab nws yuav qhia hais tias kuv yog ib tug neeg dawb huv. Leej twg yuav nrog kuv sib cav? Peb sawv daws cia li sawv ntsug ua ke. Leej twg yog kuv tus yeeb ncuab? Cia li cia nws txav los ze kuv, thiab kuv yuav siv lub zog ntawm kuv lub qhov ncauj tawm tsam nws.

9 Vim tus Tswv uas yog Vajtswv yeej yuav pab kuv. Thiab txhua leej txhua tus uas nkaug kuv, saib seb, lawv sawv daws yuav qub li tej ris tsho, thiab tej npauj yuav muab lawv noj.

10 Leej twg nyob hauv nej cov es ho ntshai tus Tswv, es ho mloog nws tus tub qhe lub suab, es mus kev hauv qhov tsaus ntuj thiab ho tsis muaj teeb?

11 Saib seb nej sawv daws cov uas rauv taws, uas txhuam kom hluav taws tawm txim ib ncig nej, cia li mus thaum nej cov hluav taws pom kev thiab cia li mus thaum tej txim hluav taws uas nej txhuam cig. Tej yam no yog tej uas nej yuav tau txais los ntawm kuv txhais tes—nej yuav tuag nyob hauv txoj kev tu siab.