1 Thiab nim no kuv, Yakhauj, rov qhia rau nej dua, kuv cov kwv tij uas kuv hlub, uas hais txog ceg neeg ncaj ncees uas kuv tau hais lawm.

2 Vim saib seb, tej lus cog tseg uas peb tau txais lawm yog tej lus cog tseg rau peb raws li sab cev nqaij daim tawv; yog li ntawd, li uas nws tau qhia rau kuv tias muaj coob leej ntawm peb tej me nyuam yuav piam sij rau sab cev nqaij daim tawv vim txoj kev tsis ntseeg, txawm li ntawd los, Vajtswv tseem yuav hlub tshua coob leej thiab; thiab peb tej me nyuam yuav raug txum tim rov los, xwv kom lawv yuav los rau qhov uas yuav muab kev paub txog qhov tseeb ntawm lawv tus Txhiv Dim rau lawv.

3 Yog li ntawd, ib yam li kuv tau hais rau nej lawm, nws tsim nyog tias tus Khetos—vim nag hmo tus tim tswv tau hais rau kuv tias nws lub npe yuav tsum hu li no—yuav los rau hauv cov Neeg Yudais, los rau hauv cov uas ua phem heev dua li luag lwm tus nyob hauv ntiaj teb no; thiab lawv yuav muab nws ntsia rau saum ntoo khaub lig—vim Vajtswv yeej pom zoo li no, thiab yeej tsis muaj ib haiv neeg twg uas nyob hauv ntiaj teb no es yuav muab lawv tus Vajtswv ntsia rau saum ntoo khaub lig.

4 Vim yog hais tias tej txuj ci tseem ceeb loj no tau ua rau hauv lwm haiv neeg ces lawv yeej yuav hloov siab lees txim, thiab paub hais tias nws yog lawv tus Vajtswv.

5 Tiam sis vim tej xib hwb cuav tej hauj lwm thiab tej kev tsis ncaj ncees, lawv cov uas nyob hauv Yeluxalees yuav ua lawv tej caj dab tawv qhwb qhawv tsis kam lees yuav nws, es kom muab nws ntsia rau saum ntoo khaub lig.

6 Yog li ntawd, vim lawv tej kev tsis ncaj ncees, tej kev puas tsuaj, tej kev tshaib kev nqhis, tej kab mob kev nkeeg, thiab tej kev nqaij ntuag ntshav nrog yuav los raug rau lawv; thiab lawv cov uas tsis raug puas tsuaj los yuav raug khiav ri niab mus rau txhua txhia haiv neeg huv tib si.

7 Tiam sis saib seb, tus Tswv uas yog Vajtswv hais li no: Thaum txog hnub uas lawv yuav los ntseeg kuv, tias kuv yog tus Khetos, ces kuv yuav rov qab ceev tej lus uas kuv tau khi tseg rau lawv tej yawg koob tias lawv yuav raug txum tim rov los ntawm cev nqaij daim tawv, nyob rau hauv lub ntiaj teb no, rov mus rau tej av uas yog lawv qub txeeg qub teg.

8 Thiab yuav tau muaj tias tom qab uas lawv tau nyob ri niab ntev heev lawm lawv yuav raug muab sau los ua ke dua, yuav los hauv tej koog pov txwv ntawm tej dej hiav txwv, thiab los hauv plaub ceg kaum ntuj los; thiab Lwm Haiv Neeg yuav tsim txiaj heev nyob ntawm kuv lub qhov muag, Vajtswv hais li ntawd, ntawm qhov uas yuav coj lawv los mus rau tej av uas yog lawv qub txeeg qub teg.

9 Muaj tseeb tiag, Lwm Haiv Neeg tej vaj ntxwv yuav ua txiv qhuav tu yug rau lawv, thiab lawv tej niam vaj ntxwv yuav rais los ua lawv niam qhuav tu yug; yog li ntawd, tus Tswv tej lus cog tseg yog cov uas zoo kawg nkaus rau Lwm Haiv Neeg, vim nws tau hais li, thiab leej twg yuav muaj peev xwm cam tau?

10 Tiam sis saib seb, thaj av no, Vajtswv tau hais tias, yuav yog ib thaj av uas cia ua nej qub txeeg qub teg, thiab Lwm Haiv Neeg yuav tau txais koob hmoov nyob rau saum thaj av no.

11 Thiab thaj av no yuav yog ib thaj av uas nyob ywj siab pub rau Lwm Haiv Neeg, thiab yuav tsis muaj vaj ntxwv nyob saum thaj av no, tsa rau Lwm Haiv Neeg.

12 Thiab kuv yuav txhawb thaj av no lub dag lub zog tawm tsam lwm haiv neeg huv tib si.

13 Thiab Vajtswv hais tias, tus uas tuaj tawm tsam Xi-oos tus ntawd yuav raug piam sij.

14 Vim tus uas tsa ib tug vaj ntxwv sawv tawm tsam kuv yuav raug piam sij, vim kuv, tus Tswv, uas yog tus vaj ntxwv saum ntuj ceeb tsheej, yuav los ua lawv tus vaj ntxwv, thiab kuv yuav ua lub teeb rau lawv cov uas mloog kuv tej lus mus ib txhis li.

15 Yog li ntawd, vim tej yam xwm no, kom kuv tej kev khi lus uas kuv tau khi rau noob neej yuav raug ua kom tiav, tias kuv yuav pab lawv thaum lawv tseem ua neej nyob, kuv yuav tsum ua kom tej hauj lwm ntsiag to ntawm txoj kev tsaus ntuj, tej neeg tua neeg, thiab tej kev phem kev qias puas tsuaj mus.

16 Yog li ntawd, tus uas tawm tsam Xi-oos, tag nrho cov Neeg Yudais thiab tag nrho Lwm Haiv Neeg, tag nrho cov neeg ua qhev thiab cov neeg dim txim, tag nrho poj niam thiab txiv neej, yuav piam sij; vim lawv yog cov tib neeg ntiaj teb uas ua phem ua qias; vim tus uas tsis tuaj kuv tog tus ntawd yeej tawm tsam kuv, peb tus Vajtswv hais li.

17 Vim kuv yuav ua kom kuv tej lus uas kuv tau cog tseg rau noob neej, tias kuv yuav pab lawv thaum lawv tseem ua neej nyob no, tiav—

18 Yog li ntawd, kuv cov kwv tij uas kuv hlub, peb tus Vajtswv hais li no: Kuv yuav kom Lwm Haiv Neeg ua kom nej tej xeeb leej xeeb ntxwv muaj kev kub ntxhov; txawm li ntawd los, kuv yuav ua kom Lwm Haiv Neeg muaj siab mos siab muag, xwv kom lawv yuav zoo li leej txiv rau nej tej noob; yog li ntawd, Lwm Haiv Neeg yuav tau txais koob hmoov thiab yuav raug suav nrog tsev neeg Ixayees.

19 Yog li ntawd, kuv yuav tshwj thaj av no tseg cia rau nej tej noob, thiab rau lawv cov uas yuav los nrog nej tej xeeb leej xeeb ntxwv nyob, mus tas mus li, ua thaj av uas yog lawv qub txeeg qub teg; vim Vajtswv tau hais rau kuv tias nws yog thaj av uas zoo tshaj li lwm thaj av huv tib si, yog li ntawd, kuv xav kom txhua tus neeg uas nyob rau saum thaj av no teev tiam kuv, Vajtswv hais li.

20 Thiab nim no, kuv cov kwv tij uas kuv hlub es, peb pom tau tias peb tus Vajtswv uas muaj kev hlub tau qhia rau peb paub ntau yam txog tej xwm no kawg li, cia peb nco ntsoov txog nws, thiab muab peb tej kev txhaum tso pov tseg, thiab tsis txhob nyo peb tej taub hau, vim peb twb tsis raug ntiab tawm; txawm li ntawd los, peb tau raug tav tawm ntawm thaj av uas yog peb qub txeeg qub teg; tiam sis peb tau raug coj tuaj rau ib thaj av uas zoo dua lawm, vim tus Tswv tau muab tus dej hiav txwv ua peb txoj kev, thiab peb tau nyob rau saum ib lub koog pov txwv hauv dej hiav txwv.

21 Tiam sis tus Tswv tej lus cog tseg uas nws tau cog rau lawv cov uas nyob rau sau tej koog pov txwv mas tseem ceeb kawg nkaus li; yog li ntawd ib yam li nws hais tias tej koog pov txwv, mas nws yeej yuav tsum muaj ntau lub koog pov txwv dua li no, thiab peb cov kwv tij kuj tau txais nyob hauv cov koog pov txwv ntawd.

22 Vim saib seb, tus Tswv uas yog Vajtswv tau coj cov neeg hauv tsev neeg Ixayees khiav ib lub sij hawm dhau ib lub sij hawm, raws nraim li nws lub siab nyiam thiab nws pom zoo. Thiab nim no saib seb, tus Tswv yeej nco ntsoov txhua leej txhua tus uas tau ntshua lawm huv tib si, yog li ntawd nws kuj nco ntsoov txog peb thiab.

23 Yog li ntawd, nej cia li zoo siab hlo, thiab nco ntsoov tias nej muaj kev ywj pheej ua dab tsi rau nej los tau—yuav xaiv txoj kev tuag uas kav mus ib txhis los sis xaiv txoj sia nyob mus ib txhis.

24 Yog li ntawd, kuv cov kwv tij uas kuv hlub es, cia li ua nej lub neej mus raws li Vajtswv nyiam, thiab tsis txhob ua mus raws li tus dab lub siab nyiam thiab mus raws li cev nqaij daim tawv; thiab nco ntsoov tias, tom qab uas nej ua li Vajtswv nyiam lawm, qhov uas nej raug cawm dim twb yog nyob hauv thiab dhau los ntawm Vajtswv txoj kev zoo xwb.

25 Yog li ntawd, los ntawm lub hwj chim ntawm txoj kev sawv hauv qhov tuag rov qab los thov Vajtswv tsa nej sawv hauv txoj kev tuag, thiab los ntawm lub hwj chim ntawm txoj kev theej txhoj thov Vajtswv tsa nej sawv hauv txoj kev tuag uas kav ib txhis, xwv kom nej yuav tau raug txais mus nyob rau hauv Vajtswv lub nceeg vaj uas nyob mus ib txhis, xwv kom nej yuav qhuas nws los ntawm Vajtswv txoj kev zoo. Amees.