Yexus ncav tes pab ib tug poj niam

Nws Yuav Tuav Tes Coj Koj, los ntawm Sandra Rast

Ob Hlis Ntuj 24–Peb Hlis Ntuj 1

2 Nifais 26–30

“Ib txoj Hauj Lwm Zoo Kawg Nkaus thiab Ib qho Txuj Ci Xav Tsis Thoob”

Tus Tswv hais tias, “Kuv txib txhua tus neeg … kom lawv sau tej lus uas kuv hais rau lawv” (2 Nifais 29:11). Los ntawm tus Ntsuj Plig, tus Tswv yuav hais lus rau koj thaum koj kawm Nws txoj lus. Sau ntawv txog tej yam uas koj txais.

Sau Ntawv txog Koj tej Kev Tshoov Siab

Nifais sau hais tias, “Kuv qhia tej yuav muaj los yav tom ntej rau nej txog hnub nyoog kawg” (2 Nifais 26:14). Los yog hais tias, nws sau ntawv txog peb hnub nyoog. Thiab tej yam nws pom yeej ua rau peb txhawj heev: tib neeg tau xyeej Vajtswv lub hwj chim thiab tej txuj ci tseem ceeb, muaj neeg coob uas sib khib thiab nxhov siab, tus dab phem muab txoj hlua ruaj ruaj khi neeg. Tiam sis ntxiv rau tej yam uas ua hauv kev tsaus ntuj no (2 Nifais 26:10, 22) uas tus yeeb ncuab coj, Nifais kuj hais txog “ib txoj hauj lwm zoo kawg nkaus thiab ib qho txuj ci tseem ceeb” uas tus Tswv Nws tus Kheej yuav coj (2 Nifais 27:26). Thiab ib qho tseem ceeb rau txoj hauj lwm ntawd yog ib phau ntawv—ib phau ntawv uas hais lus tawm hauv av los, uas qhia txog Dab Ntxwg Nyoog tej lus dag, thiab ib phau uas zoo li ib tug chij uas kom cov ncaj ncees sib sau ua ke. Phau ntawd yog Phau Ntawv Maumoos, txoj hauj lwm zoo kawg nkaus yog txoj hauj lwm hauv tus Tswv lub Koom Txoos hauv hnub nyoog kawg, thiab qhov txuj ci xav tsis thoob yog qhov uas txawm yog peb qaug zog li cas los, Nws caw peb txhua tus kom koom tes ua txoj hauj lwm no.

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

2 Nifais 26:20–33

Yexus Khetos caw peb txhua tus los cuag Nws.

Tus Yaj Saub Joseph Smith qhia tias Leej Txiv Saum Ntuj Ceeb Tsheej “tsis muaj ciaj ciam rau nws txoj kev hlub tshua thiab cov koob hmoov, ntau tshaj peb npaj siab ntseeg los sis txais tau” (The Joseph Smith Papers, “History, 1838–1856, phau D-1,” phab 4 [addenda], josephsmithpapers.org) Cia li nyeem tej yam uas Nifais pom nyob hauv 2 Nifais 26:20–22 thiab nws qhia dab tsi txog tus Cawm Seej nyob hauv nqe 23–33, thiab muab cov lus no piv rau Joseph Smith tej lus. Koj kawm dab tsi txog tus Tswv txoj kev muaj siab hlub tshua uas tsis muaj ciaj ciam? Vim koj yog ib tug mej zeej ntawm Yexus Khetos lub Koom Txoos koj ua tau dab tsi kom ua neeg zoo li Khetos ntxiv thaum koj nrog Vajtswv cov me nyuam koom ua ke?

Kuj saib 3 Nifais 18:30–32.

2 Nifais 26–27

Phau ntawv hauv ob tshooj no yog dab tsi?

Nifais txoj kev qhia tej yuav muaj los yav tom ntej nyob hauv 2 Nifais 26–27, uas siv tej lus ntau los ntawm Yaxayas tej lus qhia tej yuav muaj los yav tom ntej dhau los (saib Yaxayas 29), twb hais txog qhov uas Phau Ntawv Maumoos yuav tawm los. Txoj kev qhia tej yuav muaj los yav tom ntej no hais txog tej no:

• Cov lus ntawm Lihais cov tub ki (nws cov xeeb ntxwv) uas “lawv tej lus hais yuav tawm hauv av tuaj” zoo li “tus uas txawj ua dab” thiab yuav “khi cia rau hauv ib phau ntawv” (2 Nifais 26:14–17; kuj saib Yaxayas 29:4).

• ib feem ntawm phau ntawv los yuav muab rau ib tug neeg kawm txawj kawm ntse uas hais tias, “Kuv nyeem tsis tau” (2 Nifais 27:15–20; Joseph Smith—Keeb Kwm 1:64–65; kuj saib Yaxayas 29:11).

Ntxiv rau Yaxayas tej lus, muaj lwm tus yaj saub hauv phau Npaivnpaum uas hais txog Phau Ntawv Maumoos, txawm yog lawv tsis hais phau no lub npe. Piv txwv hais tias, Exekhees 37:15–20 hais txog “Yauxej tus pas,” uas tej zaum hais txog cov Neeg Nifais cov ceev xwm txheej, uas yog Yauxej cov xeeb ntxwv. Cov ceev xwm txheej no yuav koom ua ke nrog “Yudas tus pas,” uas yog phau Npaivnpaum.

Muaj lwm yam piv txwv nyob hauv “Phau Ntawv Maumoos” (Phau Qhia txog Vaj Lug Kub, scriptures.ChurchofJesusChrist.org).

2 Nifais 28

Dab Ntxwg Nyoog xav ntxias neeg.

Dab Ntxwg Nyoog tej kev ntxias thiab tom txwv feem ntau los Nifais qhia tawm los ntawm nws tej lus piv txog hnub nyoog kawg nyob hauv 2 Nifais 28. Sim seb koj puav nrhiav tau tej no (piv txwv hais tias, saib nqe 6, 8, 21–23, 29) Vim li cas koj yuav tsum paub txog Dab Ntxwg Nyoog tej kev ntxias? Koj yuav ua li cas thaum tus yeeb ncuab sim ntxias koj?

2 Nifais 28:27–31; 29

Vajtswv tseem muab kev tshwm sim rau Nws cov me nyuam kom coj lawv kev.

Vim peb yog Haiv Neeg Ntseeg hauv Hnub Nyoog Kawg, peb tau koob hmoov vim peb muaj Vajtswv txoj lus nplua mias, yog li ntawd Nifais tej lus ceeb toom yeej muaj nqis rau peb: peb yuav tsum tsis txhob xav tias “peb muaj txaus lawm!” Thaum koj nyeem tej lus ceeb toom nyob hauv 2 Nifais 28 thiab 29, cia li xav txog tej lus nug zoo li no:

• Tus Tswv xav kom kuv xav dab tsi txog Nws txoj lus thiab ua li cas?

• Vim li cas tej lub sij hawm tib neeg “npau taws” vim lawv txais qhov tseeb ntxiv los ntawm Vajtswv? (2 Nifais 28:28). Puas muaj tej lub sij hawm thaum kuv xav li no? Yog kuv xav li ntawd, ces kuv yuav ua li cas kom muaj siab xav txais qhov tseeb ntxiv?

• Qhov uas yus txais Vajtswv txoj lus txhais tau li cas? Kuv yuav ua li cas kom qhia Nws tias kuv xav txais Nws txoj lus ntxiv?

Kuj saib Amas 12:10–11; 3 Nifais 26:6–10.

2 Nifais 29–30

Vajtswv tau npaj Phau Ntawv Maumoos rau peb hnub nyoog.

Nifais tau paub los ntawm kev tshwm sim, ua ntej tau sau Phau Ntawv Maumoos tag nrho lawm, hais tias yuav muaj ib hnub phau no yuav “muaj nuj nqis heev rau noob neej” (2 Nifais 28:2). Vim li cas Phau Ntawv Maumoos muaj nqis rau koj heev? Xav txog txoj lus nug no thaum koj nyeem 2 Nifais 29–30. Muaj tej hauj lwm “zoo kawg nkaus” twg hauv lub ntiaj teb thiab hauv koj lub neej uas Vajtswv ua los ntawm Phau Ntawv Maumoos?

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.

2 Nifais 26:12–13

Nifais qhia tias Yexus Khetos muab Nws tus Kheej tshwm sim los ntawm tus Vaj Ntsuj Plig Dawb Huv. Nej tsev neeg qhia tau dab tsi ib leeg rau ib leeg txog lub sij hawm uas tus Vaj Ntsuj Plig Dawb Huv ua rau nej zaj lus tim khawv txog tus Cawm Seej haj yam muaj zog?

2 Nifais 26:22; 28:19–22

Tej zaum nej tsev neeg yuav nyiam kawm los ntawm ib yam khoom uas piav txog tej uas 2 Nifais 26:22 qhia txog tus dab phem. Thaum koj nyeem txog Dab Ntxwg Nyoog tej lub tom txwv nyob hauv 2 Nifais 28:19–22, tej zaum koj muab tau ib txoj xov zawm ib tug dab tes kom piv txog “ib txoj hlua zooj.” Txoj hlua zooj yeej zoo li Dab Ntxwg Nyoog tej kev ntxias li cas? Yuav ua li cas kom txoj hlua ntawd ruaj ruaj? Peb yuav ua li cas kom paub thaum twg Dab Ntxwg Nyoog dag ntxias peb?

txoj hluas uas ntswj

Nifais muab tus dab phem tej kev ntxias piv rau “ib txoj hlua zooj”

2 Nifais 27:20–21

Qhov uas tus Tswv hais tias, “Kuv yeej ua tau kuv txoj hauj lwm,” txhais li cas? Qhov tseeb no ua rau peb hloov peb txoj kev ua hauj lwm hauv Nws lub Koom Txoos li cas?

2 Nifais 28:30–31

Nej tsev neeg puas txawj xav txog ib yam, zoo li kev tshwm sim uas los ntawm Vajtswv, uas zoo txais ib nyuag qho ntxiv rau ib nyuag qho? Vim li cas Vajtswv qhia qhov tseeb rau peb “ib nqe lus ntxiv rau ib nqe lus, ib ntsiab cai ntxiv rau ib ntsiab cai, muab me ntsis nim no thiab muab me ntsis lwm hnub” thiab tsis qhia thaum tib lub sij hawm xwb?

2 Nifais 29:7–9

Tus Tswv xav qhia dab tsi rau peb los ntawm Phau Ntawv Maumoos?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Kev Kawm Zoo Dua Ntxiv ntawm Yus Ib Leeg

Qhia txog koj tej lub tswv yim. Qhov uas koj sib tham nrog lwm tus txog tej yam uas koj kawm yeej pab tau koj to taub zoo ntxiv. Tom qab koj nyeem 2 Nifais 29:6–14, tej zaum koj yuav xav piav rau ib tug phooj ywg vim li cas peb yuav tsum muaj Phau Ntawv Maumoos.

Nifais sau rau cov phiaj kub

Nifais tej lus qhia txog “ib txoj hauj lwm zoo kawg nkaus thiab ib qho txuj ci xav tsis thoob” uas yuav muaj hauv hnub nyoog kawg (2 Nifais 27:26).