“Peb Hlis Ntuj 23–29. Enos–Maumoos cov Lus: Nws Tshoov Kuv lub Siab Kom Ua Raws Li Nws lub Siab Xav,” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)

“Peb Hlis Ntuj 23–29. Enos–Maumoos cov Lus,” Los, Nrog Kuv Mus—Rau Ib Leeg thiab Tsev Neeg: 2020

Daim Duab

Enos thaum nws yog ib tug tub hluas nrog nws txiv, Yakhauj, thiab nws niam

Yakhauj thiab Enos, los ntawm Scott Snow

Peb Hlis Ntuj 23–29

Enos–Maumoos cov Lus

Nws Tshoov Kuv lub Siab Kom Ua Raws Li Nws lub Siab Xav

Thaum koj nyeem Enos mus txog Maumoos cov Lus, nrhiav tej zaj uas yuav muaj nqis rau koj los sis rau koj tsev neeg.

Sau Ntawv txog Koj tej Kev Tshoov Siab

Enos tau mus hauv hav zoov kom tua tsiaj, tiam sis nws nyob ntev ntxiv kom thov Vajtswv “tas hnub … thiab thaum uas twb tsaus ntuj lawm” (Enos 1:3–4). Vim nws xav xav txais kev zam txim tiag tiag, Enos txaus siab thov Vajtswv ntev li nws yuav tsum thov thiab “siv zog” rau Vajtswv (Enos 1:2). Kev thov Vajtswv tiag tiag yeej zoo li no: tsis yog peb thov kom tau tej yam twg uas peb xav tau tiam sis peb xav sib raug zoo nrog Vajtswv thiab hloov peb lub siab nyiam kom muaj raws li Nws li. Thaum koj thov Vajtswv li no, thaum koj lub suab “mus txog ntua puag saum ntuj,” koj kawm zoo li Enos tau kawm hais tias Vajtswv hnov koj, thiab Nws hlub koj tiag, cov uas koj hlub, thiab Nws hlub koj cov yeeb ncuab thiab (saib Enos 1:4–17). Thaum lub sij hawm zoo li no, Vajtswv yuav qhia Nws lub siab nyiam rau koj, thiab koj yuav haj yam txaus siab thiab haj yam txawj ua raws li Nws lub siab nyiam vim koj sib haum nrog Nws. Ib yam li Maumoos, tej zaum koj “tsis paub txhua yam; tiam sis tus Tswv paub txhua yam … [thiab nws yuav] tshoov [koj] lub siab kom ua raws li nws lub siab xav” (Maumoos cov Lus 1:7).

Daim Duab

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Enos 1:1–3

Ib leej niam los sis leej txiv tej lus yeej kav tau ntev.

Muaj zaj lus qhia dab tsi nyob hauv tej nqe no rau cov niam tsev txiv tsev thiab cov me nyuam?

Enos 1:4–27

Vajtswv yuav teb kuv tej lus uas kuv thov kawg siab kawg ntsws.

Enos txoj kev thov Vajtswv yeej yog kev thov Vajtswv uas yus nco ntsoov hauv tag nrho cov vaj lug kub. Tej zaum koj txoj kev thov Vajtswv yuav tsis zoo li ntawd, tiam sis yeej yuav muaj nqis zoo ib yam. Enos txoj kev thov Vajtswv tej zaum yuav qhia tej yam uas koj thov tau zoo dua ntxiv. Nov yog tej lus nug rau koj xav txog:

Tej lus twg piav txog Enos txoj kev siv zog thov Vajtswv?
Enos tau thov Vajtswv kom tau dab tsi thaum xub thawj? (saib Enos 1:4). Koj yuav kawm dab tsi los ntawm qhov uas Enos hais tom qab Vajtswv teb nws? (saib Enos 1:5–7).
Enos tau ua li cas thaum nws txais Vajtswv tej lus teb?
Koj yuav kawm dab tsi los ntawm Enos txog txoj kev ntseeg tus Tswv uas “ruaj khov kho”? (Enos 1:11).

Yaloos–Oonis

Tus Tswv yuav foom koob hmoov rau kuv thaum kuv ua raws li tej lus txib.

Txoj lus cog tseg uas Vajtswv rov qab hais nyob hauv Phau Ntawv Maumoos feem ntau yog qhov uas yog tias cov Neeg Nifais yuav ua raws li tej lus txib, lawv yuav vam meej (saib 2 Nifais 1:20; Yaloos 1:9–12; Oonis 1:6). Phau Yaloos thiab Oonis qhia ob peb txoj kev uas tau muaj raws li txoj lus cog tseg no. Koj kawm dab tsi los ntawm tej zaj lus no uas pab tau koj “vam meej nyob hauv thaj av”?

Oonis 1:14, 21

Cov neeg hauv Xalahelas yog leej twg?

Tom qab cov Neeg Nifais khiav tawm thaj av Nifais, lawv nrhiav tau ib co neeg coob nyob hauv ib qho chaw hu ua Xalahelas. Cov neeg hauv Xalahelas yog cov xeeb ntxwv ntawm ib pawg Ixayees uas, zoo li Lihais tsev neeg, tau tawm Yeluxalees mus thiab Vajtswv tau coj lawv tuaj txog thaj av uas cog lus cia. Nrog pawg ntawd yog Mules, Xedekiyas ib tug tub, Yudas tus vaj ntxwv uas raug ntes ntawm cov Neeg Npanpiloos thaum txog 587 ua ntej Yexus yug (saib Yelemis 52:1–11; Mauxiyas 25:2; Hilamas 8:21).

Tom qab cov neeg ntawm Xalahelas tuaj txog thaj av uas cog lus cia, lawv tau ntsib Khauli-athumaws (saib Oonis 1:21), tus thib kawg ntawm cov Neeg Yales, es nws zaj lus nyob hauv phau Ethaws.

Maumoos cov Lus

Maumoos cov Lus yog dab tsi?

Maumoos cov Lus yeej zoo li ib tug choj nyob nruab nrab ob pob phiaj uas muaj hauv Phau Ntawv Maumoos. Nyob no Maumoos piav txog ob qho ceev xwm txheej no, thiab nws tej lus qhia ib zaj lus tseem ceeb txog kev tso siab rau tus Tswv, txawm yog peb tsis to taub vim li cas Nws qhia li ntawd.

Thaum Nifais ceev nws cov neeg tej xwm txheej, Vajtswv tau qhia nws kom tsim ob pob phiaj, hu ua Nifais cov phiaj me thiab cov phiaj loj. Nifais tsis tau paub vim li cas Vajtswv txib kom nws tsim ob co phiaj, tiam sis nws tso siab hais tias tus Tswv muaj “ib lub hom phiaj tseem ceeb, lub hom phiaj uas kuv tsis paub” (1 Nifais 9:5; kuj saib “Zaj Lus Piav Me Ntsis txog Phau Ntawv Maumoos”).

Ntau pua xyoo tom qab ntawd, thaum Maumoos sau ntsiab lus txog Nifais cov phiaj loj, nws nrhiav tau cov phiaj me. Cov phiaj me hais txog tej xwm txheej zoo ib yam li tau piav txog hauv cov phiaj loj uas Maumoos tau sau ntsiab lus txog lawm, tiam sis cov phiaj me hais txog tej xwm txheej ntawm sab ntsuj plig thiab cov yaj saub txoj kev qhuab qhia thiab tej lus qhia. Vajtswv tshoov Maumoos lub siab kom ntxiv Nifais cov phiaj me rau hauv nws cov ceev xwm txheej nrog cov phiaj loj.

Ib yam li Nifais, Maumoos tsis tau to taub Vajtswv lub hom phiaj rau ob co phiaj, tiam sis nws tso siab tias yog “ib lub hom phiaj tseem ceeb” (Maumoos cov Lus 1:7).

Hnub no peb paub tias Vajtswv lub hom phiaj yog dab tsi. Thaum xyoo 1828, tom qab Joseph Smith tau txhais lus rau ib feem ntawm Maumoos txoj kev sau ntsiab lus txog Nifais cov phiaj loj (116 phab ntawv), Martin Harris tau ua tej phab ntawv no poob lawm. Vajtswv tau txib Joseph kom tsis txhob rov qab txhais feem no vim tib neeg phem yuav hloov tej lus thiab sim rhuav Joseph ntsej muag (saib Q&K 10, zaj lus piav txog tshooj; Q&K 10:14–19, 30–45) Zoo siab uas Vajtswv tau pom li no ua ntej thiab muab cov phiaj me, uas tau hais keeb kwm zoo ib yam li tej yam uas muaj hauv 116 phab ntawv uas ua poob lawm. Cov phiaj me yog tej phau uas muaj ua ntej Maumoos cov Lus, thiab Maumoos txoj kev sau ntsiab lus ntawm cov phiaj loj los pib tom qab Maumoos cov Lus.

Maumoos Muab cov Phiaj Tso Ua Ke, los ntawm Jorge Cocco

Daim Duab

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.

Enos 1:1–17

Nej tsev neeg saib tau ib daim duab txog Enos thaum nws thov Vajtswv thiab nrhiav hauv Enos 1:1–17 rau tej kab lus uas nej siv tau ua lub npe rau daim duab ntawd. Tej zaum nej thov tau nej tsev neeg kos duab txog Enos zaj lus. Peb kawm dab tsi los ntawm Enos txog txoj kev nrhiav kev zam txim rau peb tej kev txhaum?

Yaloos 1:2

Peb txoj kev kawm Phau Ntawv Maumoos tau ua li cas “qhia txog txoj hau kev cawm seej” rau peb?

Oonis 1:12–22

Tej nqe no qhia dab tsi txog qhov uas peb yuav tsum muaj Vajtswv txoj lus nyob hauv peb lub neej?

Maumoos cov Lus 1:3–9

Peb yuav txais koob hmoov twg los ntawm peb txoj kev ceev xwm txheej rau peb tus kheej thiab peb tsev neeg? Peb yuav ua li cas kom tsom ntsoov rau Khetos thaum peb ceev xwm txheej?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Kev Qhia Zoo Dua Ntxiv

Koom ua ke ntau zaus. Thawj Tswj Hwm Henry B. Eyring qhia hais tias: “Siv txhua lub cib fim muab cov me nyuam sau ua ke kom kawm txog Yexus Khetos cov lus qhuab qhia. Piv rau tus yeeb ncuab tej kev siv zog los ntshe tsis muaj cib fim ntau.” (“The Power of Teaching Doctrine,” Ensign, Tsib Hlis Ntuj 1999, 74).