“Peb Hlis Ntuj 30–Plaub Hlis Ntuj 12. Easter: ‘Nws Yuav Sawv Los … nrog Hwj Chim Kho Tau Mob Nyob hauv Nws Ob txhais Tis,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Peb Hlis Ntuj 30–Plaub Hlis Ntuj 12. Easter,” Los, Nrog Kuv Mus—Rau Ib Leeg thiab Tsev Neeg: 2020
Khetos thiab cov Tim Thawj, los ntawm Del Parson
Peb Hlis Ntuj 30–Plaub Hlis Ntuj 12
Easter
“Nws Yuav Sawv Los … nrog Hwj Chim Kho Tau Mob Nyob hauv Nws Ob txhais Tis”
Txij ob peb hnub ua ntej mus txog Hnub Easter Sunday, thaum koj kawm vaj lug kub koj ib leeg thiab nrog koj tsev neeg, tsom ntsoov rau Phau Ntawv Maumoos zaj lus tim khawv txog Yexus Khetos lub neej, txoj kev tuag, txoj Kev Sawv Rov Los, thiab lub hwj chim theej txhoj.
Sau Ntawv txog Koj tej Kev Tshoov Siab
Cov Tim Thawj puag thaum ub ua siab loj hais lus tim khawv txog Yexus Khetos thiab Nws txoj Kev Sawv Rov Los. Neeg coob heev ntseeg Yexus Khetos thiab rau siab coj raws li Nws vim yog cov tim thawj tej lus hauv phau Npaivnpaum. Tiam sis, muaj ib co uas xav paub seb, yog Yexus Khetos yog tus Cawm Seej ntawm lub ntiaj teb tag nrho, ces vim li cas cov uas pom Nws tsuas muaj ib pawg neeg me me nyob hauv ib cheeb tsam me heev.
Phau Ntawv Maumoos yog ib zaj ua tim khawv ntxiv uas qhia tseeb tias Yexus Khetos yeej yog tus Cawm Seej ntawm lub ntiaj teb, uas “tshwm sim nws tus kheej los rau txhua haiv neeg” (phab ntawv piav txog Phau Ntawv Maumoos) thiab muab kev cawm seej rau txhua tus uas los cuag Nws. Tsis tas li ntawd xwb, zaj lus tim khawv thib ob kuj qhia meej tias kev cawm seej txhais li cas. Yog vim li no Nifais, Yakhauj, Maumoos, thiab tag nrho cov yaj saub tau “rau siab ntso ua hauj lwm sau tej lus no rau saum cov phiaj”—kom tshaj tawm rau tej tiam neeg tom ntej tias lawv kuj “paub txog Khetos, thiab … muaj kev cia siab rau nws lub yeeb koob” (Yakhauj 4:3–4). Lub caij Easter no, cia li xav txog tej zaj lus tim khawv nyob hauv Phau Ntawv Maumoos hais tias lub hwj chim ntawm Khetos txoj Kev Theej Txhoj yeej pab txhua leej txhua tus—txhiv neeg ntiaj teb txhua tus dim thiab txhiv koj dim thiab.
Tej lub Tswv Yim Kawm Vaj Lug Kub ntawm Yus Ib Leeg
2 Nifais 9:6–15, 22; Amas 11:41–45; 40:21–23; 3 Nifais 26:4–5
Vim muaj Yexus Khetos txoj Kev Sawv Rov Los, txhua tus neeg yuav sawv rov los.
Thaum txog lub caij Easter, peb yeej ib txwm xav txog Yexus Khetos txoj Kev Sawv Rov Los, tiam sis kev sawv rov los txhais li cas tiag tiag? Phau Ntawv Maumoos qhia dab tsi rau peb txog txoj kev sawv rov los? Tej zaum thaum koj pib hwm Easter koj yuav xav sau ntawv txog tej yam tseeb txog kev sawv rov los uas koj nrhiav tau nyob hauv 2 Nifais 9:6–15, 22; Amas 11:41–45; 40:21–23; thiab 3 Nifais 26:4–5. Tej zaum koj kuj yuav xav sau ntawv txog qhov uas vim li cas yuav tsum paub txog tej yam tseeb no.
Tej zaum koj yuav kawm tias feem ntau cov yaj saub qhia tej yam tseeb txog txoj Kev Sawv Rov Los nrog tej yam tseeb txog txoj Kev Txiav Txim Zaum Kawg. Cia li xav seb qhov no qhia dab tsi rau koj txog qhov uas txoj Kev Sawv Rov Los thiab txoj hau kev cawm seej tseem ceeb npaum li cas.
Kuj saib Lukas 24:36–43; Tes Hauj Lwm 24:15; 1 Kauleethaus 15:12–23.
Mauxiyas 3:7; 15:5–9; Amas 7:11–13
Yexus Khetos tau ris kuv tej kev txhaum thiab tej kev mob kev nkeeg.
Phau Npaivnpaum qhia meej tias Yexus Khetos tau theej peb lub txhoj rau peb tej kev txhaum. Tiam sis, Phau Ntawv Maumoos ua rau peb haj yam to taub tej yam tseem ceeb txog Khetos txoj kev txi thiab kev raug txom nyem. Koj kawm tau tej lus qhia no nyob hauv Mauxiyas 3:7; 15:5–9; thiab Amas 7:11–13. Tom qab koj nyeem tej nqe vaj lug kub no, cia li xav seb koj puas sau ntawv txog tej yam uas koj kawm nyob hauv ib daim phiaj zoo li no:
|
Tus Cawm Seej tau raug txom nyem li cas? |
Vim li cas Nws raug txom nyem li no? |
Qhov no muaj nqis li cas rau kuv? |
|---|---|---|
Tus Cawm Seej tau raug txom nyem li cas? | Vim li cas Nws raug txom nyem li no? | Qhov no muaj nqis li cas rau kuv? |
Kuj saib Yaxayas 53; Henplais 4:14–16.
Khexemanes, los ntawm Michael T. Malm
Mauxiyas 5:1–2; 27:8–28; Amas 15:3–12; 24:7–19
Yexus Khetos txoj Kev Theej Txhoj ua rau kuv hloov ua neeg huv thiab pab kuv ua neeg zoo tag nrho.
Tej zaum yus yuav muaj cuab kav hais tias Phau Ntawv Maumoos yog ib zaj lus txog ib co neeg uas tau hloov siab vim muaj Yexus Khetos txoj Kev Theej Txhoj. Muaj tseeb tiag, muaj ib txhia neeg uas tau ua txhaum loj heev thiab yog cov yeeb ncuab rau Vajtswv cov neeg ua ntej tus Cawm Seej lub hwj chim tau ua rau lawv lub siab hloov loj heev raws li lawv txoj kev ntseeg Nws. Koj nyeem tau lawv tej zaj hauv Mauxiyas 5:1–2; 27:8–28; and Amas 15:3–12; 24:7–19; tej zaum koj yuav xav txog lwm zaj uas koj yuav xav kawm thiab. Koj kawm dab tsi txog tej zaj no uas zoo ib yam? Koj kawm txog tej yam twg uas sib txawv? Tej zaj no qhia dab tsi rau koj txog qhov uas tus Cawm Seej txoj Kev Theej Txhoj hloov tau koj lub siab?
Kuj saib Amas 5:6–14; 13:11–12; 18; 19:1–16; 22:1–26; 36:16–21; Ethaws 12:27; Maulaunais 10:32–33.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej ua koob tsheej txog Easter nrog nej tsev neeg, nrhiav tej kev rau nej kawm ua kev txog tus Cawm Seej thiab Nws txoj Kev Theej Txhoj, tsis hais txog txoj Kev Sawv Rov Los. Ntawm no yog ob peb lub tswv yim.
3 Nifais 11; 17
Muaj tej tsev neeg uas xav tias kev kawm txog tus Cawm Seej txoj kev tuaj xyuas Amelikas tom qab Nws sawv rov los yog ib yam uas muaj nqis heev hauv lub caij Easter. Cia li yaum nej tsev neeg kom xav txog qhov uas yuav zoo li cas yog tias yus tau xuas Nws tej qhov ntsia hlau (saib 3 Nifais 11:14–15) los sis yus yog ib tug me nyuam uas Nws tau foom koob hmoov rau (saib 3 Nifais 17:21). Zaj no ua li cas ua rau peb haj yam ris tus Cawm Seej txiaj rau Nws txoj Kev Sawv Rov Los? Muaj ib daim duab uas qhia txog zaj no nrog rau tus txheej txheem qhia no; muaj daim duab ntxiv nyob ntawm ChurchofJesusChrist.org. Tej zaum nej tsev neeg kuj yuav nyiam kos duab txog tej yam uas lawv nyeem.
Tej zaj lus los ntawm lub tuam rooj sab laj
Nyob ntau qhov chaw hauv lub ntiaj teb no, lub tuam rooj sab laj hauv lub Plaub Hlis Ntuj los muaj ua ntej Easter. Tej zaum qhov uas nej mloog tej zaj los ntawm lub rooj sab laj yuav pab nej tsev neeg tsom ntsoov rau tus Cawm Seej thaum lub caij Easter no. Piv txwv hais tias, tej zaum nej yuav xav caw nej tsev neeg mloog tej zaj lus ntawm lub rooj sab laj uas ua tim khawv txog Yexus Khetos thiab Nws txoj Kev Sawv Rov Los—qhov tseem ceeb yog los ntawm cov Tim Thawj, uas yog cov neeg tim khawv tshwj xeeb txog Yexus Khetos. Ces koj nyeem tau tej zaj no ua ke thiab kawm txog tej lus qhia uas txhawb nej zaj lus tim khawv txog tus Cawm Seej.
“Tus Khetos uas Muaj txoj Sia Nyob: Cov Tim Thawj tej Lus Tim Khawv”
Nrog nej tsev neeg ua ke, cia li nyeem “Tus Khetos uas Muaj txoj Sia Nyob: Cov Tim Thawj tej Lus Tim Khawv” (Ensign los sis Liahona, Tsib Hlis Ntuj 2017, nyob sab haud; kuj saib ChurchofJesusChrist.org) thiab caw txhua tus mej zeej hauv nej tsev neeg kom lawv xaiv ib zaj Easter los ntawm zaj lus tim khawv no kom qhia rau lwm tus. Piv txwv hais tias, tej zaum nej yuav xav tsim tej daim loj kom tso rau social media, muab dai rau ntawm nej lub qhov rooj, los sis nyob rau ntawm qhov rais.
Cov Video: Tej Neeg Tim Khawv Tshwj Xeeb txog Khetos
ChurchofJesusChrist.org thiab qhov app Txoj Moo Zoo cov Ntawv muaj ib co video hu ua Special Witnesses of Christ. Muaj tej daim video ntawm txhua tus hauv Thawj Pawg Thawj Tswj Hwm thiab Pawg Kaum Ob tug Tim Thawj uas ua tim khawv txog Yexus Khetos. Tej zaum nej tsev neeg yuav xav saib ob peb daim video no thiab sib tham seb tej no qhia dab tsi rau peb txog tej yam uas tus Cawm Seej tau ua rau peb.
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Qhia Zoo Dua Ntxiv
Ua neej raws li Yexus Khetos txoj moo zoo. Qhov tseem ceeb uas nej ua tau yog nej ua ib tug niam tsev txiv tsev yog ua raws li txoj moo zoo kawg siab kawg ntsws. Nov yog txoj kev zoo tshaj plaws kom muaj tus Vaj Ntsuj Plig Dawb Huv nrog nraim nej nyob. Nej tsis tas ua neeg zoo tag nrho, cia li rau siab ua zoo npaum li nej ua tau thiab thov pub kev zam txim rau nej los ntawm tus Cawm Seej txoj Kev Theej Txhoj. (Saib Teaching in the Savior’s Way, 13–14.)
Kev kos duab txog Khetos nrog cov Neeg Nifais los ntawm Ben Sowards