1 Thiab nim no tau muaj tias tau muaj Nifais cov neeg coob coob tau sib sau ua ke, ib puag ncig lub tuam tsev uas nyob hauv thaj av Huaj Vam; thiab lawv ib leeg zoo siab kawg nkaus thiab xav tsis thoob nrog ib leeg, thiab ib leeg qhia rau ib leeg txog qhov loj thiab zoo kawg nkaus uas tau muaj los.

2 Thiab lawv kuj tham txog tus Yexus Khetos no, tus ua lub cim tau raug muab ua txog nws txoj kev tuag.

3 Thiab tau muaj tias thaum lawv ib leeg tseem tab tom tham nrog ib leeg li no, lawv tau hnov ib lub suab zoo li nws tau tawm saum ntuj ceeb tsheej los; thiab lawv tau tsa lawv qhov muag ntsia ib puag ncig, vim lawv tsis to taub lub suab uas lawv tau hnov; thiab nws tsis tau yog ib lub suab nchav, thiab nws kuj tsis yog ib lub suab nrov; tiam sis, thiab txawm tias nws tau yog ib lub suab yau los nws tseem tau chob lawv cov uas tau hnov mus rau hauv nruab siab, kawg tias tsis muaj ib feem ntawm lawv tej cev uas nws tsis tau ua kom tshee li; muaj tseeb tiag, nws tau chob lawv mus rau puag nruab nrog, thiab tau ua rau lawv tej siab kub.

4 Thiab tau muaj tias lawv tau rov hnov lub suab dua, thiab lawv tsis to taub nws.

5 Thiab lawv tau hnov lub suab dua zaum peb, thiab tau cuab lawv tej pob ntseg kom hnov nws; thiab lawv tej qhov muag tau tig ncaj nraim rau lub suab ntawd; thiab lawv tau ntsia ntsoov rau saum ntuj, rau saum qhov uas lub suab tau nqis los.

6 Thiab saib seb, zaum peb lawv tau to taub lub suab uas lawv tau hnov; thiab nws tau hais rau lawv tias:

7 Saib seb kuv tus Tub uas kuv Hlub, tus uas kuv zoo siab heev rau, tus uas ua rau kuv lub npe tau yeeb koob—nej cia li mloog nws.

8 Thiab tau muaj tias, thaum uas lawv to taub lawm lawv tau tsa lawv tej qhov muag dua mus rau saum ntuj; thiab saib seb, lawv tau pom ib tug Neeg nqis saum ntuj los; thiab nws tau hnav ib lub tsho tshaj sab dawb; thiab nws tau nqis los thiab tau sawv ntsug nyob hauv nruab nrab ntawm lawv; thiab tej qhov muag ntawm tag nrho cov neeg coob coob tau tig rau nws, thiab lawv tsis kam qhib lawv tej qhov ncauj, tsis hais ib tug rau lwm tus, thiab tsis paub tias nws txhais li cas, vim lawv tau xav tias nws tau yog ib tug tim tswv uas tau tshwm sim rau lawv.

9 Thiab tau muaj tias nws tau xyab nws txhais tes thiab tau hais rau cov neeg, hais tias:

10 Saib seb, kuv yog Yexus Khetos, tus uas tej yaj saub tau ua tim khawv tias yuav los rau hauv lub ntiaj teb.

11 Thiab saib seb, kuv yog qhov kaj thiab txoj sia ntawm lub ntiaj teb; thiab kuv tau haus tawm ntawm lub khob dej iab uas Leej Txiv tau muab rau kuv, thiab tau ua rau Leej Txiv tau yeeb koob nyob rau hauv txoj kev kuv ris tej kev txhaum ntawm lub ntiaj teb, los ntawm qhov uas kuv tau ua raws li Leej Txiv lub siab nyiam nyob hauv txhua yam txij li thaum chiv keeb los.

12 Thiab tau muaj tias thaum Yexus tau hais cov lus no tas lawm tag nrho cov neeg coob coob tau vau rau hauv av; vim lawv tau nco qab tias nws twb tau raug hais qhia tseg nyob hauv lawv lawm tias Khetos yuav ua nws tus kheej rau lawv pom tom qab ntawm nws txoj kev nce mus rau saum ntuj ceeb tsheej.

13 Thiab tau muaj tias tus Tswv tau hais rau lawv hais tias:

14 Cia li sawv thiab los cuag kuv, xwv kom nej yuav tau muab nej tej tes xuas kuv sab tav, thiab kom nej yuav tau xuas tej qhov ntsia hlau hauv kuv tes thiab hauv kuv taw, xwv kom nej yuav paub tias kuv yog Ixayees tus Vajtswv, thiab tus Vajtswv ntawm tag nrho lub ntiaj teb, thiab tau raug tua rau tej kev txhaum ntawm lub ntiaj teb.

15 Thiab tau muaj tias cov neeg coob coob tau tawm mus, thiab muab lawv tej tes xuas rau hauv nws sab tav, thiab tau xuas tej qhov ntsia hlau hauv nws tej tes thiab hauv nws tej taw; thiab lawv tau ua li no, mus ib leeg zuj zus txog thaum lawv sawv daws tau mus tas, thiab tau pom nrog lawv tej qhov muag thiab tau xuas nrog lawv tej tes, thiab tau paub qhov tseeb thiab tau ua tim khawv, tias twb yog nws ntag, tus uas tau raug muab sau cia los ntawm tej yaj saub, tias yuav los.

16 Thiab thaum lawv tau mus tag nrho thiab tau ua tim khawv rau lawv tus kheej, lawv tau qw nrov nrov tawm ua ib ke, hais tias:

17 Hauxanas! Vajtswv tus uas Siab Kawg nkaus lub npe tau koob hmoov! Thiab lawv tau vau rau ntawm Yexus ko taw, thiab tau teev tiam nws.

18 Thiab tau muaj tias nws tau hais rau Nifais (vim Nifais tau nyob hauv cov neeg coob coob) thiab nws tau txib nws tias kom nws tawm los.

19 Thiab Nifais tau sawv thiab tau mus, thiab tau qhau cev loo nws tus kheej rau ntawm tus Tswv xub ntiag thiab tau nwj nws txhais ko taw.

20 Thiab tus Tswv tau txib nws tias kom nws sawv. Thiab nws tau sawv thiab tau sawv ntawm nws xub ntiag.

21 Thiab tus Tswv tau hais rau nws tias: Kuv muab hwj chim rau koj xwv kom koj yuav muab cov neeg no ua kev cai raus dej thaum uas kuv rov qab nce mus rau saum ntuj ceeb tsheej lawm.

22 Thiab ntxiv tus Tswv tau hu lwm cov neeg los, thiab tau hais rau lawv tib yam; thiab nws tau muab hwj chim rau lawv ua kev cai raus dej. Thiab nws tau hais rau lawv tias: Nej yuav tsum ua kev cai raus dej li no; thiab tsis txhob kom muaj tej kev sib cav nyob hauv nej.

23 Kuv hais tseeb rau nej, tias tus uas hloov siab lees txim txog nws tej kev txhaum dhau los ntawm nej tej lus thiab xav ua kev cai raus dej nyob hauv kuv lub npe, nej yuav tsum ua kev cai raus dej li no rau lawv—Saib seb, nej yuav tsum nqis mus thiab sawv rau hauv dej, thiab nyob ntawm kuv lub npe nej yuav ua kev cai raus dej rau lawv.

24 Thiab nim no saib seb, cov no yog cov lus uas nej yuav hais, hu lawv los ntawm lub npe, hais tias:

25 Tau muab cai rau kuv los ntawm Yexus Khetos, kuv muab koj ua kev cai raus dej nyob ntawm Leej Txiv, thiab ntawm Leej Tub, thiab ntawm tus Vaj Ntsuj Plig Dawb Huv lub npe. Amees.

26 Thiab tom qab ntawd nej yuav muab lawv raus rau hauv dej, thiab rov qab tawm hauv dej los.

27 Thiab nej yuav ua kev cai raus dej zoo li no nyob ntawm kuv lub npe; vim saib seb, kuv hais tseeb rau nej, tias Leej Txiv, thiab Leej Tub, thiab tus Vaj Ntsuj Plig Dawb Huv yog ib tug; thiab kuv nyob hauv Leej Txiv, thiab Leej Txiv nyob hauv kuv, thiab Leej Txiv thiab kuv yog ib tug.

28 Thiab raws li tej uas kuv tau txib nej yuav tsum ua kev cai raus dej li no. Thiab yuav tsum tsis txhob muaj kev sib cav nyob hauv nej, ib yam li tau muaj tas los lawm; thiab tsis txhob muaj tej kev sib cav nyob hauv nej txog kuv tej lus qhuab qhia, ib yam li tau muaj los lawm.

29 Vim kuv hais tseeb tseeb rau nej, tus uas muaj tus ntsuj plig ntawm txoj kev sib cav tsis yog kuv li, tiam sis yog los ntawm tus dab, tus uas yog leej txiv ntawm txoj kev sib cav sib ceg, thiab nws txhib neeg tej siab kom ib leeg sib cav npau taws rau ib leeg.

30 Saib seb, qhov no tsis yog kuv tej lus qhuab qhia, txhib kom neeg tej siab npau taws, ib leeg nkaug ib leeg; tiam sis qhov no yog kuv tej lus qhuab qhia, kom tsis txhob ua tej yam zoo li ntawd lawm.

31 Saib seb, kuv hais tseeb tseeb, rau nej tias, kuv yuav qhia kuv tej lus qhuab qhia rau nej.

32 Thiab qhov no yog kuv tej lus qhuab qhia, thiab nws yog tej lus qhuab qhia uas Leej Txiv tau muab rau kuv; thiab kuv ua tim khawv txog Leej Txiv, thiab Leej Txiv ua tim khawv txog kuv, thiab tus Vaj Ntsuj Plig Dawb Huv ua tim khawv txog Leej Txiv thiab kuv; thiab kuv ua tim khawv tias Leej Txiv txib tag nrho tib neeg sawv daws, nyob txhua qhov, kom hloov siab lees txim thiab ntseeg kuv.

33 Thiab tus uas ntseeg kuv, thiab ua kev cai raus dej, tus ntawd yuav raug cawm dim; thiab lawv yog lawv cov uas yuav tau Vajtswv lub nceeg vaj.

34 Thiab tus uas tsis ntseeg kuv, thiab tsis ua kev cai raus dej, yuav raug txim.

35 Kuv hais tseeb tseeb rau nej, tias qhov no yog kuv tej lus qhia, thiab kuv ua tim khawv txog nws los ntawm Leej Txiv; thiab tus uas ntseeg kuv yeej ntseeg Leej Txiv thiab; thiab rau tus ntawd Leej Txiv yuav ua tim khawv txog kuv, vim nws yuav los xyuas tus ntawd nrog hluav taws thiab nrog tus Vaj Ntsuj Plig Dawb Huv.

36 Thiab li no Leej Txiv yuav ua tim khawv txog kuv, thiab tus Vaj Ntsuj Plig Dawb Huv yuav ua tim khawv rau nws txog Leej Txiv thiab kuv; vim Leej Txiv, thiab kuv, thiab tus Vaj Ntsuj Plig Dawb Huv yog ib tug.

37 Thiab ntxiv kuv hais rau nej, nej yuav tsum hloov siab lees txim, thiab rais los mus zoo li tej me nyuam yaus, thiab ua kev cai raus dej nyob ntawm kuv lub npe, los sis yog tsis li nej yuav tsis muaj kev txais tau tej yam no.

38 Thiab ntxiv kuv hais rau nej, nej yuav tsum hloov siab lees txim, thiab ua kev cai raus dej nyob ntawm kuv lub npe, thiab rais los mus zoo li ib tug me nyuam yaus, los sis yog tsis li nej yuav tsis muaj peev xwm tau Vajtswv lub nceeg vaj.

39 Kuv hais tseeb tseeb rau nej, tias qhov no yog kuv tej lus qhuab qhia, thiab tus uas tsa rau saum qhov no yog tsa rau saum kuv lub pob zeb, thiab tej rooj vag ntawm ntuj txiag teb tsaus yuav kov tsis yeej lawv.

40 Thiab tus uas yuav tshaj ntau dua los sis tsawg dua qhov no, thiab tsim nws los ua kuv tej lus qhuab qhia, ces tib yam li kev phem los ntag, thiab twb tsis tsa rau saum kuv lub pob zeb; tiam sis nws tsa rau saum ib co hauv paus xuab zeb xwb, thiab tej rooj vag ntawm ntuj txiag teb tsaus yuav sawv qhib tos txais cov ntawd thaum tej dej nyab los thiab tej cua los ntaus lawv.

41 Yog li ntawd, tawm mus rau cov neeg no, thiab tshaj tawm tej lus uas kuv tau hais lawm, mus rau qhov kawg ntawm lub ntiaj teb.