1 Thiab kuv hais tseeb rau nej tias, kuv muab ib lub cim rau nej, kom nej yuav paub lub sij hawm thaum tej yam no yuav luag muaj—tias kuv yuav sau los ua ke, los ntawm lawv txoj kev sib faib ntev lawm, kuv cov neeg, Au tsev neeg Ixayees, thiab yuav txhim tsa kuv lub Xi-oos dua nyob hauv lawv.

2 Thiab saib seb, qhov no yog yam uas kuv yuav muab rau nej ua ib lub cim—vim kuv hais tseeb rau nej tias thaum tej yam no uas kuv tshaj tawm rau nej, thiab yam uas kuv yuav tshaj tawm rau nej tom qab no txog kuv tus kheej, thiab los ntawm lub hwj chim ntawm tus Vaj Ntsuj Plig Dawb Huv uas yuav raug muab rau nej los ntawm Leej Txiv, yuav raug ua kom paub rau Lwm Haiv Neeg kom lawv yuav paub txog cov neeg no uas yog ib co seem tshuav ntawm tsev neeg Yakhauj, thiab txog kuv cov neeg no uas yuav raug tawg ri niab los ntawm lawv;

3 Kuv hais rau nej tseeb tseeb tias, thaum tej yam no yuav raug ua rau lawv paub los ntawm Leej Txiv, thiab yuav tawm los ntawm Leej Txiv dhau hauv lawv los rau nej;

4 Vim nws yog ib qho kev txawj ntse nyob hauv Leej Txiv tias lawv yuav tsum raug txhim tsa nyob hauv thaj av no, thiab raug cia ua ib co neeg nyob ywj siab los ntawm lub hwj chim ntawm Leej Txiv, xwv kom tej yam no yuav tau dhau ntawm lawv los rau ib co seem tshuav ntawm nej tej noob, xwv kom txoj kev khi lus ntawm Leej Txiv yuav raug muaj puv npo li tej uas nws tau khi tseg nrog nws cov neeg, Au tsev neeg Ixayees;

5 Yog li ntawd, thaum tej hauj lwm no thiab tej hauj lwm uas yuav raug ua tiav nyob hauv nej tom qab no yuav tawm ntawm Lwm Haiv Neeg los, rau nej tej noob uas yuav tseg txoj kev ntseeg tseg zuj zus vim yog txoj kev tsis ncaj;

6 Vim li no thiaj tsim nyog rau Leej Txiv kom nws yuav tawm ntawm Lwm Haiv Neeg los, xwv kom nws yuav ua nws lub hwj chim rau Lwm Haiv Neeg pom, vim yog qhov no kom Lwm Haiv Neeg, yog lawv tsis ua lawv tej siab tawv, xwv kom lawv yuav hloov siab lees txim thiab los cuag kuv thiab ua kev cai raus dej nyob ntawm kuv lub npe thiab paub txog tej ntsiab tseeb ntawm kuv txoj lus qhia, xwv kom lawv yuav raug suav nrog kuv cov neeg, Au tsev neeg Ixayees;

7 Thiab thaum tej yam no muaj los kom nej tej noob yuav pib paub tej yam no—nws yuav yog ib lub cim rau lawv, xwv kom lawv yuav paub tias txoj hauj lwm ntawm Leej Txiv twb tau pib muaj puv npo li txoj kev khi lus uas nws tau khi rau cov neeg uas yog tsev neeg Ixayees lawm.

8 Thiab thaum hnub ntawd los, yuav muaj tias tej vaj ntxwv yuav qos lawv tej qhov ncauj; vim tej yam uas tsis tau raug qhia rau lawv lawv yuav pom; thiab tej yam uas lawv tsis tau hnov lawv yuav to taub.

9 Vim nyob rau hnub ntawd, Leej Txiv yuav ua ib txoj hauj lwm los pab kuv, uas yuav yog ib txoj hauj lwm loj thiab tseem ceeb nyob hauv lawv; thiab yuav muaj cov uas nyob hauv lawv uas tsis ntseeg tej ntawd, txawm tias ib tug neeg yuav tshaj nws tawm rau lawv.

10 Tiam sis saib seb, txoj sia ntawm kuv tus tub qhe yuav nyob hauv kuv txhais tes; yog li ntawd lawv yuav tsis ua rau nws mob, txawm tias nws yuav raug mob vim yog lawv. Tiam sis kuv yuav kho nws kom zoo, vim kuv yuav ua rau lawv pom tias kuv txoj kev txawj ntse yeej loj dua li txoj kev dag ntxias ntawm tus dab.

11 Yog li ntawd yuav muaj tias txhua tus uas tsis ntseeg kuv tej lus, tus uas yog Yexus Khetos, tej uas Leej Txiv tau ua kom nws coj los rau Lwm Haiv Neeg, thiab yuav muab rau nws lub hwj chim kom nws yuav coj lawv los rau Lwm Haiv Neeg, (nws yuav raug ua tiav tib yam li Mauxes tau hais lawm), lawv yuav raug txiav tawm ntawm kuv cov neeg uas yog cov tau khi lus tseg lawm.

12 Thiab kuv cov neeg uas yog ib co seem tshuav ntawm Yakhauj yuav nyob nrog Lwm Haiv Neeg, muaj tseeb tiag, nyob hauv lawv nruab nrab zoo ib yam li ib tug tsov ntxhuav nyob hauv tej tsiaj qus tom hav zoov, ib yam li ib tug thav tsov ntxhuav nyob hauv tej pab yaj, tus uas, yog nws mus mos tau tom thiab dua ua daim, thiab tsis muaj leej twg pab tau.

13 Lawv tej tes yuav raug tsa rau saum lawv tej yeeb ncuab, thiab tag nrho lawv tej yeeb ncuab yuav raug txiav tawm.

14 Muaj tseeb tiag, kev txom nyem yuav raug rau Lwm Haiv Neeg tsuas yog lawv yuav hloov siab lees txim xwb; vim yuav muaj tias nyob rau hnub ntawd, Leej Txiv hais tias, kuv yuav txiav nej tej nees tawm ntawm nej nruab nrab mus, thiab kuv yuav ua kom nej tej tsheb nees luag puas tsuaj;

15 Thiab kuv yuav txiav tej nroog ntawm nej thaj av, thiab rub kom tag nrho nej tej chaw tiv thaiv vau;

16 Thiab kuv yuav txiav tej kev ua dab tawm ntawm nej thaj av, thiab nej yuav tsis muaj tej neeg txawj saib hmoov ntxiv lawm;

17 Nej tej mlom los kuv kuj yuav txiav tawm, thiab nej tej mlom sawv ntsug yuav raug txiav tawm ntawm nej nruab nrab mus, thiab nej yuav tsis tau teev tiam tej hauj lwm ntawm nej tej tes ntxiv lawm;

18 Thiab kuv yuav rho nej tej ntoo yuj tawm ntawm nej nruab nrab mus; ces kuv yuav ua kom nej tej nroog puas tsuaj.

19 Thiab yuav muaj tias tag nrho tej kev dag, thiab tej kev ntxias, thiab tej kev xav tau luag tug, thiab tej kev sib cav sib ceg, thiab tej kev ua dab, thiab tej kev sib daj sib deev, yuav tsis muaj lawm.

20 Vim Leej Txiv hais tias yuav muaj tias, nyob rau hnub ntawd leej twg uas yuav tsis hloov siab lees txim thiab los cuag kuv tus Tub uas kuv Hlub, kuv yuav txiav lawv tawm hauv kuv cov neeg mus, Au tsev neeg Ixayees;

21 Thiab kuv yuav pauj txiaj ntsig thiab npau taws rau lawv, tib yam li rau cov neeg tsis paub Vajtswv, li tej uas lawv tsis tau hnov.

22 Tiam sis yog lawv yuav hloov siab lees txim thiab hnov kuv tej lus, thiab tsis ua lawv tej siab tawv, kuv yuav tsa kuv lub koom txoos nyob hauv lawv, thiab lawv yuav los rau hauv txoj kev khi lus, thiab raug suav nyob hauv cov seem tshuav ntawm Yakhauj no, rau cov uas kuv tau muab thaj av no ua lawv qub txeeg qub teg;

23 Thiab lawv yuav pab kuv cov neeg, cov seem tshuav ntawm Yakhauj, thiab ntau npaum li ntau tau ntawm tsev neeg Ixayees uas yuav los, xwv kom lawv yuav ua tau ib lub nroog, uas yuav raug hu ua Yeluxalees Tshiab.

24 Thiab thaum ntawd lawv yuav pab kuv cov neeg xwv kom lawv yuav raug sau ua ke, cov uas tau tawg ri niab mus rau saum txhua thaj av, los rau hauv Yeluxalees Tshiab.

25 Thiab thaum ntawd lub hwj chim ntawm ntuj ceeb tsheej yuav nqis los rau hauv lawv; thiab kuv kuj yuav nyob hauv plawv.

26 Thiab thaum ntawd txoj hauj lwm ntawm Leej Txiv yuav pib nyob rau hnub ntawd, twb yuav nyob rau thaum txoj moo zoo no yuav raug qhuab qhia nyob hauv cov seem tshuav ntawm cov neeg no. Kuv hais tseeb rau nej, tias nyob rau hnub ntawd txoj hauj lwm ntawm Leej Txiv yuav pib nyob tag nrho rau cov tau sib faib ntawm kuv cov neeg, muaj tseeb tiag, twb yog cov xeem neeg uas tau ploj lawm, uas Leej Txiv tau coj tawm ntawm Yeluxalees lawm.

27 Muaj tseeb tiag, txoj hauj lwm yuav pib nyob tag nrho hauv cov uas tau faib ntawm kuv cov neeg, nrog Leej Txiv npaj txoj kev kom lawv yuav los cuag tau kuv, xwv kom lawv yuav thov Leej Txiv los ntawm kuv lub npe.

28 Muaj tseeb tiag, thiab thaum ntawd txoj hauj lwm yuav pib, nrog Leej Txiv nyob tag nrho rau txhua haiv neeg npaj txoj kev kom nws cov neeg yuav raug sau los tsev rau thaj av ntawm lawv qub txeeg qub teg.

29 Thiab lawv yuav ncaim tawm ntawm txhua haiv neeg mus; thiab lawv yuav tsis tawm nrawm nroos mus, thiab mus los ntawm kev tsiv, vim kuv yuav mus ua lawv ntej, Leej Txiv hais li, thiab kuv yuav ua tus kav lawv qab.