1 Thiab tau muaj tias nyob rau thaum yuav kawg ntawm xyoo kaum yim cov tub rog ntawm cov tub sab ntawd tau npaj ua rog, thiab tau pib nqis tuaj thiab maj nrawm nroos tawm pem tej toj, thiab tawm ntawm tej roob, thiab tej hav zoov, thiab lawv tej chaw nkaum, thiab lawv tej chaw tsis muaj neeg paub, thiab tau pib tuaj nyob rau hauv tej av, tag nrho tej uas nyob rau hauv thaj av sab qab teb thiab tej uas nyob rau hauv thaj av qaum teb, thiab tau pib tuaj nyob rau tag nrho tej av uas tau raug ua ciaj quav poj los ntawm cov Neeg Nifais, thiab tej nroog uas tau raug tso cia tsis muaj neeg nyob.

2 Tiam sis saib seb, twb tsis muaj tej tsiaj qus los sis tej kev plob tua tsiaj nyob rau hauv tej av uas tau raug ua ciaj quav poj los ntawm cov Neeg Nifais, thiab twb tsis muaj tej kev plob tua tsiaj rau cov tub sab tsuas yog tshuav nyob rau hauv hav zoov xwb.

3 Thiab cov tub sab tsis muaj peev xwm nyob tau tsuas yog nyob rau hauv hav zoov xwb, rau txoj kev xav tau zaub mov; vim cov Neeg Nifais tau tso lawv tej av ciaj quav poj, thiab tau sau lawv tej pab yaj thiab lawv tej tsiaj txhu thiab tag nrho lawv tej khoom, thiab lawv tau nyob ua ib pab.

4 Yog li ntawd, twb tsis muaj ib lub sij hawm zoo rau cov tub sab mus nyiag thiab mus muab zaub mov, tsuas yog yuav tawm los ua rog tawm tsam cov Neeg Nifais xwb; thiab cov Neeg Nifais tau nyob ua ib pab, thiab tau muaj coob leej heev, thiab tau tshwj tau rau lawv tus kheej tej khoom noj khoom siv, thiab tej nees thiab tej nyuj twm, thiab tej pab yaj txhua yam, xwv kom lawv yuav kav tau rau ncua li xya xyoo, nyob rau lub sij hawm uas lawv tau cia siab tias yuav ua kom cov neeg tub sab puas tsuaj tawm saum thaj av mus; thiab li no xyoo kaum yim tau dhau mus.

5 Thiab tau muaj tias nyob rau hauv xyoo kaum cuaj Nkidi-ahais tau nrhiav pom tias tsim nyog nws yuav nce mus ua rog tawm tsam cov Neeg Nifais, vim tsis muaj kev uas lawv yuav muaj cuab kav nyob taus tsuas yog yuav mus nyiag thiab ua tub sab thiab tua neeg xwb.

6 Thiab lawv tsis kam faib lawv tus kheej rau saum thaj av kom lawv yuav cog tau qoob loos, ntshai tsam cov Neeg Nifais yuav tuaj tawm tsam lawv thiab tua lawv; yog li ntawd Nkidi-ahais tau muab lus txib rau nws cov tub rog kom nyob hauv xyoo no lawv yuav tsum nce mus ua rog tawm tsam cov Neeg Nifais.

7 Thiab tau muaj tias lawv tau nce tuaj ua rog; thiab nws tau nyob hauv lub rau hli; thiab saib seb, hnub uas lawv tau nce tuaj ua rog tau loj thiab phem heev; thiab lawv tau hnav raws li tej neeg tub sab; thiab lawv tau muaj ib daim tawv yaj ncig lawv puab tais, thiab lawv raug muab ntshav zas, thiab lawv tej taub hau tau muab chais do dus, thiab lawv tau muaj kaus mom hlau nyob saum lawv; thiab coob thiab phem heev yog txoj kev tshwm tuaj ntawm cov tub rog ntawm Nkidi-ahais, vim yog lawv tej tsho tiv rog, thiab vim yog lawv tej cev tau zas ntshav.

8 Thiab tau muaj tias cov tub rog ntawm cov Neeg Nifais, thaum lawv tau pom txoj kev tawm tuaj ntawm cov tub rog ntawm Nkidi-ahas lawm, tag nrho sawv daws tau qaug rau hauv av, thiab tau tsa lawv tej suab quaj rau tus Tswv lawv tus Vajtswv, xwv kom nws yuav tseg lawv thiab cawm lawv dim ntawm tej tes ntawm lawv tej yeeb ncuab.

9 Thiab tau muaj tias thaum cov tub rog ntawm Nkidi-ahais tau pom li no lawv tau pib qw ib lub suab nrov nrov, vim yog lawv txoj kev xyiv fab, vim lawv tau xav tias cov Neeg Nifais tau qaug nrog txoj kev ntshai vim yog txoj kev txaus ntshai heev ntawm lawv tej tub rog.

10 Tiam sis nyob hauv qhov no lawv raug ua chim siab, vim cov Neeg Nifais tsis tau ntshai lawv; tiam sis lawv tau ntshai lawv tus Vajtswv thiab tau thov nws rau txoj kev tsom kwm; yog li ntawd, thaum tej tub rog ntawm Nkidi-ahais tau maj nrawm nroos tuaj rau saum lawv lawv twb npaj ntsib lawv lawm; muaj tseeb tiag, nyob hauv lub zog ntawm tus Tswv lawv tau txais tos lawv.

11 Thiab npluav rog tau pib nyob rau hauv lub rau hli no; thiab npluav rog ntawd tau loj thiab phem heev, muaj tseeb tiag, txoj kev tua neeg tuag ntawd tau ntau thiab phem heev, kawg tias tsis tau paub muaj ib qho kev tua neeg tuag coob nyob rau hauv tag nrho cov neeg ntawm Lihais txij li nws tau ncaim Yeluxalees.

12 Thiab txawm tias muaj tej kev hem thiab tej kev lav lus uas Nkidi-ahais tau ua lawm los, saib seb, cov Neeg Nifais tseem tau yeej lawv, kawg tias thaum kawg lawv tau vau rov qab nyob ntawm lawv xub ntiag.

13 Thiab tau muaj tias Nkikhidoonais tau txib nws cov tub rog kom raws lawv qab mus kom deb txog tej ciam teb ntawm tej hav zoov, thiab kom lawv tsis txhob tseg ib tug twg uas poob rau hauv lawv tes nyob ntawm txoj kev; thiab li no lawv tau raws lawv thiab tau tua lawv, mus txog ntawm tej ciam teb ntawm tej hav zoov, mus txog thaum lawv tau ua tiav zog li txoj lus txib ntawm Nkikhidoonais.

14 Thiab tau muaj tias Nkidi-ahais, tus uas tau sawv ntsug thiab tau sib tua yam tsis ntshai kiag, tau raug raws thaum nws khiav; thiab tau lim hiam heev vim yog nws txoj kev sib tua heev nws tau raug caum cuag thiab tau raug tua. Thiab li no tau yog qhov kawg ntawm Nkidi-ahais tus neeg tub sab.

15 Thiab tau muaj tias cov tub rog ntawm cov Neeg Nifais tau rov qab dua los rau lawv tej chaw tiv thaiv. Thiab tau muaj tias xyoo kaum cuaj no tau dhau mus, thiab cov neeg tub sab tsis tau rov tuaj ua rog dua lawm; thiab lawv tsis tau rov tuaj dua nyob hauv xyoo nees nkaum.

16 Thiab nyob rau hauv xyoo nees nkaum thiab ib lawv tsis tau nce tuaj ua rog, tiam sis lawv tau nce tuaj rau txhua sab zov khoo ib ncig cov neeg ntawm Nifais; vim lawv tau xav tias yog lawv txiav cov Neeg Nifais tawm ntawm lawv tej av, thiab yuav kaw lawv cia nyob txhua txhia sab, thiab yog lawv yuav txiav lawv tawm ntawm tag nrho lawv tej kev muaj cai ua tau uas nyob sab nraud, kom lawv yuav ua tau kom lawv muab lawv tus kheej rau raws li lawv siab xav.

17 Nim no lawv tau tsa rau lawv tus kheej lwm tus thawj coj, uas npe yog Xenalaihas; yog li ntawd nws twb yog Xenalaihas uas tau ua kom yuav tsum muaj qhov kev zov khoo no.

18 Tiam sis saib seb, qhov no tau yog ib qho uas zoo rau cov Neeg Nifais; vim nws mus tsis tau rau cov neeg tub sab yuav zov khoo kom ntev txaus kom muaj taus kev txom nyem rau cov Neeg Nifais, vim yog lawv txoj kev muaj khoom noj khoom siv ntau uas lawv tau teem tseg cia lawm,

19 Thiab vim yog txoj kev muaj khoom noj khoom siv tsis txaus nyob hauv cov neeg tub sab; vim saib seb, lawv tsis muaj dab tsi li tsuas yog muaj nqaij rau lawv txoj kev ciaj nyob xwb, tej nqaij uas lawv tau muab hauv tej hav zoov los;

20 Thiab tau muaj tias tej tsiaj qus tau rais los mus tsawg heev nyob hauv tej hav zoov—kawg tias thaum kawg cov neeg tub sab twb yuav luag piam sij nrog txoj kev tshaib.

21 Thiab cov Neeg Nifais tau tawm mus tsis tu ncua nruab hnub thiab hmo ntuj, thiab tau tawm tsam lawv tej pab tub rog, thiab txiav lawv txhiab txhiab thiab kaum tawm txhiab leej.

22 Thiab li no nws tau rais los ua txoj kev xav ntawm cov neeg ntawm Xenalaihas kom thim ntawm lawv tej kev npaj ua, vim yog txoj kev puas tsuaj loj uas tau los rau saum lawv thaum nruab hnub thiab thaum tsaus ntuj.

23 Thiab tau muaj tias Xenalaihas tau txib rau nws cov neeg kom lawv yuav tsum thim lawv tus kheej ntawm txoj kev zov khoo, thiab mus rau hauv tej feem uas deb tshaj ntawm thaj av qaum teb.

24 Thiab nim no, Nkikhidoonais tau paub txog lawv tej kev npaj ua, thiab tau paub txog lawv txoj kev qaug zog vim yog txoj kev xav tau zaub mov, thiab txoj kev tua tuag coob uas tau raug ua nyob hauv lawv, yog li ntawd nws tau xa nws cov tub rog tawm thaum lub sij hawm tsaus ntuj, thiab tau mus tav kev ntawm lawv txoj kev rov qab, thiab tau tso nws tej tub rog rau ntawm qhov uas lawv yuav khiav mus.

25 Thiab lawv tau ua li no nyob rau thaum sij hawm tsaus ntuj, thiab lawv tau mus ua ntej cov neeg tub sab, es kom tag kis, thaum cov neeg tub sab pib lawv txoj kev mus, lawv thiaj raug ntsib los ntawm cov tub rog ntawm cov Neeg Nifais nyob tom lawv hauv ntej thiab nyob tom lawv qab huv tib si.

26 Thiab cov neeg tub sab uas tau nyob rau sab nram hav kuj tau raug txiav tawm nyob hauv lawv tej chaw khiav mus nkaum. Thiab tag nrho txhua yam no tau raug ua los ntawm txoj kev txib ntawm Nkikhidoonais.

27 Thiab tau muaj ntau txhiab leej uas tau muab lawv tus kheej ua tej neeg raug txim rau cov Neeg Nifais, thiab lawv cov ua seem tau raug tua.

28 Thiab lawv tus thawj coj, Xenalaihas, raug txhom tau thiab tau raug muab dai rau saum ib tsob ntoo, muaj tseeb tiag, dai rau saum ntsis ntoo ntawd mus txog thaum nws tuag. Thiab thaum lawv tau muab nws dai mus txog thaum nws tuag lawm lawv tau ntov tsob ntoo vau rau hauv av, thiab tau qw nrog ib lub suab nrov nrov, hais tias:

29 Thov tus Tswv tsom kwm nws cov neeg hauv txoj kev ncaj ncees thiab hauv lub siab dawb huv, kom lawv yuav raug ua kom ntog rau hauv av tag nrho cov uas yuav nrhiav tua lawv vim yog lub hwj chim thiab tej kev tuav hauv, tib yam nkaus li tus neeg no uas twb vau rau hauv av lawm.

30 Thiab lawv tau zoo siab, thiab qw nrog ib lub suab dua, hais tias: Thov kom Anplaham tus Vajtswv, thiab Ixaj tus Vajtswv, thiab Yakhauj tus Vajtswv, tsom kwm cov neeg no nyob hauv txoj kev ncaj ncees, ntev npaum li lawv yuav hu rau lub npe ntawm lawv tus Vajtswv rau txoj kev tsom kwm.

31 Thiab tau muaj tias lawv tau pib tag nrho ua ib pab, hu nkauj, thiab qhuas lawv tus Vajtswv rau tej yam loj uas tau ua rau lawv lawm, ntawm qhov uas tau ceev lawv dim ntawm txoj kev poob mus rau hauv tej tes ntawm lawv tej yeeb ncuab.

32 Muaj tseeb tiag, lawv tau qw tias: Hauxanas rau Vajtswv tus uas Siab kawg nkaus. Thiab lawv tau qw hais tias: Tau koob hmoov rau lub npe ntawm tus Tswv Vajtswv uas muaj Hwj Chim Loj kawg nkaus, Vajtswv tus uas Siab kawg nkaus.

33 Thiab lawv tej siab tau muaj kev xyiv fab puv npo, txog rau qhov uas kua muag tawm poob ntau, vim yog txoj kev zoo heev ntawm Vajtswv uas tau cawm lawv dim ntawm tej tes ntawm lawv tej yeeb ncuab; thiab lawv tau paub tias nws yeej yog vim lawv txoj kev hloov siab lees txim thiab lawv txoj kev txo hwj chim es lawv thiaj tau raug cawm dim ntawm ib txoj kev puas tsuaj uas kav ib txhis.