1 Thiab nim no tau muaj tias thaum Yexus tau xaus cov lus hais no tas nws tau tsa nws qhov muag ib puag ncig rau cov neeg coob coob, thiab tau hais rau lawv tias: Saib seb, nej tau hnov tej yam uas kuv tau qhia ua ntej kuv nce mus cuag kuv Txiv; yog li ntawd, tus uas nco qab kuv tej lus hais no thiab ua li lawv, kuv yuav tsa tus ntawd sawv nyob rau thaum hnub kawg.

2 Thiab tau muaj tias thaum Yexus tau hais cov lus no tas nws tau paub tias tau muaj ib txhia neeg nyob hauv lawv uas tau xav tsis thoob, thiab xav tias nws hais yam dab tsi ntsig txog Mauxes txoj kev cai; vim lawv tsis to taub qhov hais tias tej yam qub tau dua mus, thiab tias tag nrho txhua yam tau rais los mus ua tshiab.

3 Thiab nws tau hais rau lawv tias: Tsis txhob poob siab tias kuv tau hais rau nej tias tej yam qub tau dua mus, thiab tias tag nrho txhua yam tau rais los mus ua tshiab.

4 Saib seb, kuv hais rau nej tias txoj kev cai raug muaj puv npo lawm uas tau muab rau Mauxes.

5 Saib seb, kuv yog tus uas tau muab txoj kev cai, thiab kuv yog tus uas tau khi lus nrog kuv cov neeg Ixayees; yog li ntawd, txoj kev cai nyob hauv kuv raug muaj puv npo lawm, vim kuv tau los kom txoj kev cai muaj puv npo; yog li ntawd nws thiaj muaj ib qho xaus.

6 Saib seb, kuv tsis rhuav kom tej yaj saub puas tsuaj, vim ntau npaum li ntau tau uas tseem tsis tau muaj puv npo nyob hauv kuv, kuv hais tseeb rau nej tias, tag nrho yuav muaj kom puv npo.

7 Thiab vim kuv tau hais rau nej tias tej yam qub tau dua mus, kuv tsis tau ua kom puas tsuaj tej uas tau hais txog tej yam uas tseem yuav muaj los.

8 Vim saib seb, tej kev khi lus uas kuv tau khi nrog kuv cov neeg tseem tsis tau muaj puv npo tag nrho; tiam sis txoj kev cai uas tau muab rau Mauxes tau muaj qhov xaus nyob hauv kuv.

9 Saib seb, kuv yog txoj kev cai, thiab qhov kaj. Ntsia rau kuv, thiab tiv mus kom txog thaum kawg, thiab nej yuav muaj txoj sia; vim rau tus uas tiv mus kom txog thaum kawg kuv yuav muab txoj siab nyob mus ib txhis rau.

10 Saib seb, kuv tau muab tej kev cai rau nej; yog li ntawd coj kuv tej lus txib. Thiab qhov no yog txoj kev cai thiab tej yaj saub, vim lawv yeej tau ua tim khawv tseeb txog kuv.

11 Thiab nim no tau muaj tias thaum Yexus tau hais cov lus no tas, nws tau hais rau kaum ob leeg uas nws tau xaiv tias:

12 Nej yog kuv cov pab coj; thiab nej yog ib lub teeb rau cov neeg no, cov uas yog ib co seem tshuav ntawm Yauxej tsev neeg.

13 Thiab saib seb, qhov no yog thaj av ntawm nej qub txeeg qub teg; thiab Leej Txiv tau muab nws rau nej.

14 Thiab tsis tau muaj ib lub sij hawm uas Leej Txiv tau muab lus txib rau kuv kom kuv yuav tsum qhia nws rau nej cov kwv tij uas nyob hauv Yeluxalees.

15 Thiab tsis tau muaj ib lub sij hawm uas Leej Txiv tau muab lus txib rau kuv kom kuv yuav tsum qhia rau lawv txog lwm pab neeg ntawm tsev neeg Ixayees, uas Leej Txiv tau coj khiav tawm ntawm thaj av.

16 Leej Txiv tau txib kuv npaum li no, kom kuv yuav tsum qhia rau lawv:

17 Tias lwm cov yaj kuv muaj uas tsis yog nyob hauv pab no; kuv kuj yuav tsum mus coj lawv los thiab, thiab lawv yuav hnov kuv lub suab; thiab tsuas yuav muaj ib pab, thiab ib tug tswv yug yaj.

18 Thiab nim no, vim yog txoj kev tawv ncauj thiab txoj kev tsis ntseeg lawv thiaj tsis to taub kuv tej lus; yog li ntawd kuv tau raug txib kom tsis txhob hais ntxiv los ntawm Leej Txiv txog tej yam no rau lawv lawm.

19 Tiam sis, kuv hais tseeb, rau nej tias Leej Txiv tau txib kuv, thiab kuv qhia nws rau nej, tias nej tau raug faib ncaim ntawm lawv los vim yog lawv txoj kev tsis ncaj; yog li ntawd nws vim yog lawv txoj kev tsis ncaj uas lawv thiaj tsis paub txog nej.

20 Thiab kuv hais tseeb rau nej dua, tias lawv lwm xeem los Leej Txiv tau muab faib ncaim ntawm lawv mus; thiab nws vim yog lawv txoj kev tsis ncaj uas lawv thiaj tsis paub lawv cov no.

21 Thiab kuv hais tseeb rau nej, tias nej yog lawv cov uas kuv tau hais tias: Lwm cov yaj kuv muaj uas tsis nyob hauv pab no; kuv kuj yuav tsum coj lawv los thiab, thiab lawv yuav hnov kuv lub suab; thiab tsuas yuav muaj ib pab, thiab ib tug tswv yug yaj.

22 Thiab lawv tsis to taub kuv, vim lawv tau xav tias ntshe nws yog Lwm Haiv Neeg; vim lawv tsis to taub tias Lwm Haiv Neeg yuav tsum raug hloov siab tshiab dhau los ntawm lawv txoj kev qhuab qhia.

23 Thiab lawv tsis to taub kuv qhov kuv tau hais tias lawv yuav hnov kuv lub suab; thiab lawv tsis to taub kuv tias Lwm Haiv Neeg yuav tsis hnov kuv lub suab thaum twg los tau—kom kuv txhob ua kuv tus kheej rau lawv pom tsuas yog los ntawm tus Vaj Ntsuj Plig Dawb Huv xwb.

24 Tiam sis saib seb, nej puav leej tau hnov kuv lub suab, thiab tau pom kuv; thiab nej yog kuv cov yaj, thiab nej twb raug suav nrog cov uas Leej Txiv tau muab rau kuv lawm.