1 Nim no saib seb, kuv yuav kom nej pom tias lawv tsis tau tsim ib tug vaj ntxwv rau saum thaj av; tiam sis nyob hauv tib xyoos no, muaj tseeb tiag, xyoo peb caug, lawv tau rhuav lub rooj txiav txim puas tsuaj, muaj tseeb tiag, tau tua tus thawj tub txiav txim ntawm thaj av.

2 Thiab cov neeg tau sib faib ib leeg tawm tsam ib leeg; thiab lawv ib leeg tau faib tawm ntawm ib leeg mus ua pab ua pawg, txhua tus neeg raws li nws tsev neeg thiab nws tej txheeb ze thiab tej phooj ywg; thiab li no lawv tau rhuav tej nom tswv ntawm thaj av puas tsuaj.

3 Thiab txhua pab pawg tau tsa ib tug yawg hlob los sis ib tug thawj rau saum lawv; thiab li no lawv tau rais los mus ua pab pawg thiab tej thawj coj ntawm tej pab pawg.

4 Nim no saib seb, tsis muaj ib tug neeg nyob hauv lawv uas yuav tsis muaj tsev neeg coob thiab tej neeg txheeb ze thiab tej phooj ywg coob li; yog li ntawd lawv tej pab pawg tau rais los mus coob heev.

5 Nim no tau muaj tag nrho tej yam no, thiab tseem tsis tau muaj rog nyob rau hauv lawv; thiab tag nrho tej kev tsis ncaj no tau los rau saum cov neeg vim yog lawv tau tso lawv tus kheej mus rau Dab Ntxwg Nyoog lub hwj chim.

6 Thiab tej kev cai ntawm tej nom tswv tau raug puas tsuaj, vim yog txoj kev tuav hauv ntawm cov phooj ywg thiab tej neeg txheeb ze ntawm cov uas tau tua cov yaj saub.

7 Thiab lawv tau ua muaj ib qho kev sib cav loj heev nyob rau hauv thaj av, kawg tias thaum kawg feem neeg uas ncaj me ntsis ntawm cov neeg yuav luag tau rais los mus ua neeg phem huv tib si; muaj tseeb tiag, tsuas tshuav ob peb tug neeg ncaj nyob hauv lawv lawm xwb.

8 Thiab li no rau xyoo tseem tsis tau dhau mus txij li feem coob ntawm cov neeg tau tig tawm ntawm lawv txoj kev ncaj ncees, ib yam li tus dev uas rov qab mus noj nws cov ntuav, los sis ib yam li tus npua uas luag muab dej ntxuav huv huv lawm nws rov qab mus da hawv dua.

9 Nim no txoj kev tuav hauv ntsiag to no, uas tau coj txoj kev tsis ncaj loj heev los rau cov neeg, tau sau lawv tus kheej tuaj ua ke, thiab tau xaiv ib tug neeg ua lawv tus thawj uas lawv tau hu ua Yakhauj;

10 Thiab lawv tau hu nws ua lawv tus vaj ntxwv; yog li ntawd nws tau rais los mus ua ib tug vaj ntxwv rau saum pab neeg phem no; thiab nws tau yog ib tug ntawm cov uas ua thawj heev uas tau muab nws lub suab tawm tsam cov yaj saub uas tau ua tim khawv txog Yexus.

11 Thiab tau muaj tias lawv tseem tsis tau muaj coob ib yam li tej pab pawg ntawm cov neeg, uas tau sib sau ua ke tsuas yog tias lawv tej thawj coj tau tsim lawv tej kev cai, txhua tus raws li nws pab pawg; txawm li ntawd los lawv tseem yog tej yeeb ncuab; txawm tias lawv tsis yog ib co neeg ncaj ncees, los lawv tseem tau sib sau nyob hauv txoj kev ntxub ntawm cov uas tau nkag rau txoj kev khi lus rhuav tej nom tswv kom puas tsuaj.

12 Yog li ntawd, Yakhauj tau pom tias lawv tej yeeb ncuab tau muaj coob dua lawv, nws tau yog tus vaj ntxwv ntawm pab neeg, yog li ntawd nws tau txib nws cov neeg kom lawv yuav tsum khiav mus rau hauv sab puag pem toj ntawm thaj av, thiab nyob ped tau rhawv ib lub nceeg vaj rau lawv, mus txog thaum lawv raug koom los ntawm cov neeg ntxeev siab, (vim nws tau ua txuj ntxias lawv tias yeej yuav muaj ntau tus neeg ntxeev siab) thiab lawv rais los mus muaj zog txaus tawm tsam nrog tej pab pawg ntawm cov neeg; thiab lawv tau ua li.

13 Thiab nrawm heev tau yog lawv txoj kev mus kom nws yuav tsis raug tab kaum mus txog thaum lawv tau mus dhau qhov uas cov neeg yuav txhom tau lawv. Thiab li no tau xaus xyoo thib peb caug; thiab li no tau yog tej kev ua hauj lwm ntawm Nifais cov neeg.

14 Thiab tau muaj tias nyob rau hauv xyoo thib peb caug thiab ib lawv tau sib faib ua pab pawg, txhua tus neeg raws li nws tsev neeg, pab neeg thiab tej phooj ywg; txawm li ntawd los lawv tseem tau los sib haum ib los lus tias lawv ib leeg yuav tsum tsis txhob mus ua rog rau ib leeg; tiam sis lawv tsis tau sib sau ib yam li rau lawv tej kev cai, thiab lawv tej kev nom tswv, vim lawv tau raug txhim tsa raws li tej siab ntawm cov uas yog lawv cov yawg hlob thiab lawv cov thawj coj. Tiam sis lawv tau tsim tej kev cai nruj heev tias kom ib pab yuav tsum tsis txhob hla ib pab, kawg tias thaum kawg lawv tau muaj kev thaj yeeb thiab nyob rau hauv thaj av; txawm li ntawd los, lawv tej siab tau tig ncaim ntawm tus Tswv lawv tus Vajtswv, thiab lawv tau xuas pob zeb ntaus tej yaj saub thiab tau muab lawv ntiab tawm ntawm lawv mus.

15 Thiab tau muaj tias Nifais—tau raug los xyuas los ntawm tej tim tswv thiab tus Tswv lub suab, yog li ntawd tau pom tej tim tswv, thiab tau ua tim khawv los ntawm qhov muag, thiab tau muaj hwj chim muab rau nws kom nws yuav paub txog Khetos txoj kev los ua hauj lwm qhuab qhia txoj moo zoo, thiab kuj tau ua tim khawv los ntawm qhov muag rau lawv txoj kev maj tig ncaim ntawm txoj kev ncaj ncees mus rau lawv txoj kev phem thiab tej kev qias.

16 Yog li ntawd, tau tu siab rau txoj kev tawv ntawm lawv tej siab thiab txoj kev dig heev ntawm lawv tej siab—tau tawm mus rau hauv lawv nyob hauv tib xyoos ntawd, thiab tau pib ua tim khawv, yam tsis ntshai, txog txoj kev hloov siab lees txim thiab txoj kev zam txim ntawm tej kev txhaum dhau los ntawm txoj kev ntseeg tus Tswv Yexus Khetos.

17 Thiab nws tau qhuab qhia ntau yam rau lawv; thiab tag nrho lawv los yuav sau tsis tag, thiab ib feem ntawm lawv los ho tsis txaus, yog li ntawd lawv thiaj tsis tau raug muab sau cia rau hauv phau ntawv no. Thiab Nifais tau qhuab qhia nrog hwj chim thiab nrog cai loj heev.

18 Thiab tau muaj tias lawv tau npau taws rau nws, twb yog vim nws tau muaj hwj chim loj dua lawv, vim muaj tsis taus tias lawv yuav tsis ntseeg nws tej lus, vim nws txoj kev ntseeg tus Tswv Yexus Khetos loj heev npaum tias tej tim tswv tau los muab kev pab rau nws txhua hnub.

19 Thiab los ntawm Yexus lub npe nws tau ntiab tej dab thiab tej ntsuj plig tsis huv tawm; thiab nws tus kwv tij kiag nws tau tsa sawv hauv qhov tuag los, tom qab uas nws tau raug xuas pob zeb ntaus thiab tau tuag los ntawm cov neeg.

20 Thiab cov neeg tau pom qhov no, thiab tau ua tim khawv txog nws, thiab tau npau taws rau nws vim yog nws lub hwj chim; thiab nws kuj tau ua ntau yam txuj ci tseem ceeb, nyob ntawm cov neeg qhov muag, los ntawm Yexus lub npe.

21 Thiab tau muaj tias xyoo peb caug thiab ib tau dhau mus, thiab tau muaj tsis coob cov uas tau hloov siab tshiab los rau tus Tswv; tiam sis txhua tus uas tau hloov siab tshiab tau qhia tseeb rau cov neeg pom tias lawv tau raug los xyuas los ntawm lub hwj chim thiab Vajtswv tus Ntsuj Plig, uas nyob hauv Yexus Khetos, nyob hauv tus uas lawv ntseeg.

22 Thiab txhua tus uas tau raug muab tej dab ntiab tawm ntawm lawv lawm, thiab tau raug kho zoo ntawm lawv tej kev mob thiab lawv tej kev qaug zog, tau ua tim khawv tseeb rau cov neeg tias lawv tau raug tshav los ntawm Vajtswv tus Ntsuj Plig, thiab tau raug kho zoo; thiab lawv kuj tau ua tej cim tawm thiab tau ua tej txuj ci tseem ceeb nyob rau hauv cov neeg.

23 Li no kuj tau dhau mus xyoo peb caug thiab ob. Thiab Nifais tau qhia rau cov neeg nyob rau thaum pib ntawm xyoo peb caug thiab peb; thiab nws tau qhuab qhia rau lawv txog kev hloov siab lees txim thiab kev zam txim ntawm tej kev txhaum.

24 Nim no kuv kuj xav kom nej nco ntsoov thiab, tias tsis tau muaj ib tug uas tau raug coj los rau txoj kev hloov siab lees txim es nws ho tsis tau raug ua kev cai raus dej los ntawm dej.

25 Yog li ntawd, tej neeg los rau txoj kev ua hauj lwm qhuab qhia no, tau raug tsa los ntawm Nifais, xwv kom tag nrho cov uas yuav los rau lawv yuav tsum ua kev cai raus dej los ntawm dej, thiab qhov no zoo ib yam li ib qho tim khawv thiab ib qho lus pov thawj rau Vajtswv thiab rau cov neeg, tias lawv tau hloov siab lees txim thiab tau txais ib qho kev zam txim ntawm lawv tej kev txhaum lawm.

26 Thiab tau muaj ntau leej nyob rau thaum pib ntawm xyoo no uas tau raug ua kev cai raus dej rau txoj kev hloov siab lees txim; thiab li no feem ntau ntawm lub xyoos tau dhau mus.