1 Thiab tau muaj tias nws tau txib cov neeg coob coob kom lawv tsum thov Vajtswv, thiab nws cov pab coj. Thiab nws tau txib lawv kom lawv tsis txhob tseg thov Vajtswv nyob hauv lawv tej siab.

2 Thiab nws tau txib lawv kom lawv sawv thiab sawv tsees sawv ntsug rau saum lawv tej ko taw. Thiab lawv tau sawv thiab tau sawv tsees sawv ntsug rau saum lawv tej ko taw.

3 Thiab tau muaj tias nws tau rov ntais mov mog dua thiab tau foom koob hmoov rau nws, thiab tau muab rau cov pab coj noj.

4 Thiab thaum lawv tau noj tas nws tau txib lawv kom lawv yuav ntais cov mov mog, thiab muab rau cov neeg coob coob.

5 Thiab thaum lawv tau muab rau cov neeg coob coob tas lawm nws kuj tau muab cawv txiv hmab rau lawv haus thiab, thiab tau txib lawv kom lawv muab rau cov neeg coob coob.

6 Nim no, twb tsis tau muaj mov mog, los sis cawv txiv hmab, uas raug coj tuaj los ntawm cov pab coj, los sis los ntawm cov neeg coob coob;

7 Tiam sis nws yeej tau muab mov mog tiag tiag rau lawv noj thiab cawv txiv hmab rau lawv haus.

8 Thiab nws tau hais rau lawv tias: Tus uas noj cov mov mog no noj kuv lub cev rau nws tus ntsuj plig; thiab tus uas haus cov cawv txiv hmab no haus kuv cov ntshav rau nws tus ntsuj plig; thiab nws tus ntsuj plig yuav tsis tshaib los sis nqhis ntxiv lawm, tiam sis tsuas muaj tsau npo xwb.

9 Nim no, thaum cov neeg coob coob tag nrho sawv daws tau noj thiab haus, saib seb, lawv tau muaj tus Ntsuj Plig puv npo; thiab lawv tau qw tawm ua ib lub suab, thiab muab yeeb koob rau Yexus, tus uas lawv tau pom thiab tau hnov.

10 Thiab tau muaj tias thaum lawv sawv daws tau muab yeeb koob rau Yexus tas lawm, nws tau hais rau lawv tias: Saib seb nim no kuv ua tas txoj lus txib uas Leej Txiv tau txib kuv txog cov neeg no, uas yog ib co seem tshuav ntawm tsev neeg Ixayees.

11 Nej nco tias kuv tau hais rau nej thiab tau hais tias thaum tej lus ntawm Yaxayas yuav muaj puv npo—saib seb lawv raug muab sau cia, nej muaj lawv nyob ntawm nej, yog li ntawd cia li nrhiav lawv—

12 Thiab kuv hais rau nej tseeb tseeb tias, thaum tej ntawd muaj puv npo ces yog txoj kev muaj puv npo ntawm txoj kev khi lus tseg uas Leej Txiv tau khi rau nws cov neeg, Au tsev neeg Ixayees.

13 Thiab tom qab ntawd cov uas seem tshuav uas raug tawg ri niab mus lwm qhov chaw uas nyob saum lub ntiaj teb, yuav raug sib sau nyob hauv sab hnub tuaj thiab sab hnub poob, thiab sab nram hav thiab sab pem toj; thiab lawv yuav raug coj los rau txoj kev paub txog tus Tswv lawv tus Vajtswv, uas tau txhiv lawv dim.

14 Thiab Leej Txiv tau txib kuv kom kuv muab thaj av no rau nej, ua nej qub txeeg qub teg.

15 Thiab kuv hais rau nej, tias yog Lwm Haiv Neeg tsis hloov siab lees txim tom qab txoj koob hmoov uas lawv yuav tau txais, tom qab uas lawv tau ua rau kuv cov neeg tawg ri niab—

16 Ces nej, cov uas yog ib co seem tshuav ntawm tsev neeg Yakhauj, yuav tawm mus rau hauv lawv; thiab nej yuav mus nyob hauv nruab nrab ntawm lawv cov uas yuav muaj coob; thiab nej yuav mus nyob hauv lawv ib yam li ib tug tsov ntxhuav nyob hauv tej tsiaj qus tom hav zoov, thiab ib yam li ib tug thav tsov ntxhuav nyob hauv tej pab yaj uas yog nws mus mos vau thiab dua ua daim, thiab tsis muaj tus pab tau.

17 Nej txhais tes yuav raug tsa rau saum tawm tsam nej tej yeeb ncuab, thiab tag nrho nej tej yeeb ncuab yuav raug txiav tawm.

18 Thiab kuv yuav sau kuv cov neeg los ua ke ib yam li ib tug neeg sau nws tej tes nplej los rau hauv plag tse.

19 Vim kuv yuav ua kuv cov neeg uas Leej Txiv tau khi lus tseg, muaj tseeb tiag, kuv yuav ua kom nej muaj kub hlau, thiab kuv yuav ua kom nej muaj rau tooj. Thiab nej yuav ntaus pab neeg tawg ua tej dwb daim; thiab kuv yuav muab lawv txoj kev yeej pub rau tus Tswv, thiab lawv tej khoom rau tus Tswv ntawm lub ntiaj teb tag nrho. Thiab saib seb, kuv yog nws tus uas ua qhov ntawd.

20 Thiab Leej Txiv hais tias yuav muaj tias, rab ntaj ntawm kuv txoj kev txim lij yuav dai rawv rau saum lawv nyob rau hnub ntawd; thiab tsuas yog lawv hloov siab lees txim xwb tsis li ces nws yuav vau los rau saum lawv, Leej Txiv hais li, muaj tseeb tiag, rau saum tag nrho tej haiv neeg ntawm Lwm Haiv Neeg.

21 Thiab yuav muaj tias kuv yuav txhim tsa kuv cov neeg, Au tsev neeg Ixayees.

22 Thiab saib seb, kuv yuav txhim tsa cov neeg no nyob rau saum thaj av no, rau txoj kev muaj puv npo ntawm txoj kev khi lus tseg uas kuv tau khi nrog nej tus yawg koob Yakhauj; thiab nws yuav yog ib lub Yeluxalees tshiab. Thiab tej hwj chim saum ntuj ceeb tsheej yuav muaj nyob hauv nruab nrab ntawm cov neeg no; muaj tseeb tiag, kuv los yeej yuav nyob hauv nruab nrab hauv nej.

23 Saib seb, kuv yog nws tus uas Mauxes tau hais txog, hais tias: Tus Tswv nej tus Vajtswv yuav tsa ib tug yaj saub tawm ntawm nej cov kwv tij los rau nej, ib yam li kuv; ntawm nws nej yuav tsum mloog tag nrho txhua yam uas nws yuav hais rau nej. Thiab yuav muaj tias txhua tus cov uas yuav tsis mloog tus yaj saub ntawd yuav raug txiav tawm ntawm cov neeg mus.

24 Kuv hais tseeb rau nej, muaj tseeb tiag, thiab tag nrho cov yaj saub txij li Xamuyees thiab cov uas tom qab ntawd, txhua tus uas tau hais, tau ua tim khawv txog kuv.

25 Thiab saib seb, nej yog tej me nyuam ntawm cov yaj saub; thiab nej yog ib co ntawm tsev neeg Ixayees; thiab nej yog cov uas nyob ntawm txoj kev khi lus uas Leej Txiv tau khi nrog nej tej yawg koob, tau hais rau Anplaham tias: Thiab nyob hauv koj tej noob tag nrho txhua pab neeg ntawm lub ntiaj teb yuav tau koob hmoov.

26 Leej Txiv tau xub tsa kuv los rau nej, thiab tau xa kuv los foom koob hmoov rau nej kom nej txhua tus tig tawm ntawm nws tej kev tsis ncaj; thiab li no los vim nej yog tej me nyuam ntawm txoj kev khi lus—

27 Thiab tom qab uas nej tau koob hmoov lawm ces yuav muaj puv npo li Leej Txiv txoj kev khi lus uas nws tau khi nrog Anplaham hais tias: Nyob hauv koj tej noob txhua pab neeg ntawm lub ntiaj teb yuav tau koob hmoov—rau txoj kev cai nchuav tus Vaj Ntsuj Plig Dawb Huv tawm dhau hauv kuv los rau saum Lwm Haiv Neeg, yam koob hmoov uas los rau saum Lwm Haiv Neeg yuav ua rau lawv muaj zog tshaj sawv daws, rau txoj kev tawg ri niab ntawm kuv cov neeg, Au tsev neeg Ixayees.

28 Thiab lawv yuav ua ib tug nplawm rau cov neeg ntawm thaj av no. Txawm li ntawd los, thaum lawv yuav tau txais kuv txoj moo zoo uas muaj txhij txhua, tom qab ntawd yog lawv yuav ua lawv tej siab tawv rau kuv, kuv yuav rov qab muab lawv tej kev tsis ncaj los rau saum lawv taub hau kiag, Leej Txiv hais li.

29 Thiab kuv yuav nco qab ntsoov txoj kev khi lus uas kuv tau khi nrog kuv cov neeg; thiab kuv tau khi lus tseg nrog lawv tias kuv yuav sau lawv los ua ke nyob hauv kuv lub sij hawm uas tau teem tseg lawm, xwv kom kuv yuav tau rov qab muab rau lawv thaj av ntawm lawv tej yawg koob ua lawv qub txeeg qub teg, uas yog thaj av ntawm Yeluxalees, uas yog thaj av cog lus rau lawv mus ib txhis, Leej Txiv hais li.

30 Thiab yuav tau muaj tias lub sij hawm yuav los, thaum txoj kev muaj puv npo ntawm kuv txoj moo zoo yuav raug coj mus qhia rau lawv;

31 Thiab lawv yuav ntseeg kuv, tias kuv yog Yexus Khetos, Vajtswv Leej Tub, thiab yuav thov rau Leej Txiv los ntawm kuv lub npe.

32 Thaum ntawd lawv tej neeg zov xyuas yuav tsa lawv tej suab, thiab lawv yuav hu nkauj nrog tej suab ua ke; vim lawv yuav pom qhov muag rau qhov muag.

33 Thaum ntawd Leej Txiv yuav sau lawv los ua ke dua, thiab muab Yeluxalees rau lawv ua lawv thaj av qub txeeg qub teg.

34 Thaum ntawd lawv yuav tawg plho los rau txoj kev xyiv fab—Cia li hu nkauj ua ke, nej tej chaw uas tsis muaj nuj nqis ntawm Yeluxalees; vim Leej Txiv twb tau nplij nws cov neeg, nws twb tau txhiv Yeluxalees lawm.

35 Leej Txiv tau ua nws lub hwj chim dawb huv rau ntawm txhua haiv neeg lub qhov muag; thiab tag nrho hauv qab ntuj kawg yuav pom Leej Txiv txoj kev cawm seeg; thiab Leej Txiv thiab kuv yog ib tug.

36 Thiab thaum ntawd yuav muaj li tej uas tau sau cia lawm tias: Cia li tsim, cia li tsim dua, thiab cia li muab nej lub zog los coj, Au Xi-oos es; cia li muab koj tej ris tsho uas zoo zoo nkauj coj los hnav, Au Yeluxalees, lub nroog dawb huv es, vim txij li no mus yuav tsis muaj leej twg uas tsis tau ua kev cai txiav thiab tsis huv los tau rau hauv koj ntxiv lawm.

37 Cia li nchos koj tus kheej ntawm tej hmoov av; cia li sawv, thiab zaum, Au Yeluxalees; tso koj tus kheej tawm ntawm tej hlua ntawm koj caj dab, Au tus ntxhais uas raug txhom ntawm Xi-oos es.

38 Vim tus Tswv hais li no tias: Nej tau muab nej tus kheej muag rau yam tsis muaj nqi, thiab nej yuav raug txhiv dim yam tsis yuav nyiaj.

39 Kuv hais rau nej tseeb tseeb tias, kuv cov neeg yuav paub kuv lub npe; muaj tseeb tiag, nyob rau hnub ntawd lawv yuav paub tias kuv yog nws tus uas hais lus.

40 Thiab thaum ntawd lawv yuav hais tias: Zoo nkauj npaum li cas nyob rau saum tej roob twb yog ob txhais ko taw ntawm nws tus uas coj tej moo zoo los rau lawv, tus uas tau tsim kev thaj yeeb; tus uas coj tej moo zoo los rau lawv cov uas zoo, tus uas tsim txoj kev cawm seeg; uas hais rau Xi-oos tias: Koj tus Vajtswv los kav lawm!

41 Thiab thaum ntawd ib lub suab qw yuav tawm mus tias: Nej cia li ncaim mus, nej cia li ncaim mus, nej cia li tawm ntawm qhov ntawd mus, tsis txhob kov tej uas tsis huv; nej cia li tawm ntawm nruab nrab ntawm nws mus; nej ris tus Tswv tej twj taig yuav tsum dawb huv.

42 Vim nej yuav tsis tawm nrawm nroos mus thiab mus los ntawm kev tsiv; vim tus Tswv yuav mus ua nej ntej, thiab tus Vajtswv ntawm Ixayees yuav ua tus kav nej qab.

43 Saib seb, kuv tus tub qhe yuav ua yam txawj ntse; nws yuav raug txhawb mus siab thiab raug qhuas thiab nyob siab heev.

44 Yam li ntau tus tau xav tsis thoob rau koj—nws lub ntsej muag tau ntswj mob heev, ntau tshaj li lwm tus neeg, thiab nws lub cev ntswj mob dua li tej tib neeg tej tub—

45 Tib yam li ntawd nws yuav ywg ntau haiv neeg; tej vaj ntxwv yuav kaw lawv tej qhov ncauj rau nws, vim tej yam uas tsis tau raug qhia rau lawv lawv yuav pom; thiab tej uas lawv tsis tau hnov lawv yuav to taub.

46 Kuv hais rau nej tseeb tseeb tias, tag nrho tej yam no yeej yuav los tiag tiag, tib yam li Leej Txiv tau txib kuv lawm. Thaum ntawd txoj kev khi lus no uas Leej Txiv tau khi nrog nws cov neeg yuav muaj puv npo; thiab thaum ntawd kuv cov neeg yuav rov qab tau Yeluxalees dua, thiab nws yuav yog thaj av ntawm lawv qub txeeg qub teg.