1 Thiab nim no saib seb, tau muaj tias tag nrho cov neeg ntawm thaj av tau hnov tej lus hais no, thiab tau ua tim khawv txog nws. Thiab tom qab cov lus hais no tas tau muaj kev ntsiag to nyob hauv thaj av tau ncua ntau teev;

2 Vim txoj kev xav tsis thoob ntawm cov neeg tau loj heev ces lawv thiaj tau tsum tsis quaj ntsuag thiab quaj nrov rau txoj kev ploj ntawm lawv tej neeg txheeb ze uas tau raug tuag lawm; yog li ntawd tau muaj kev ntsiag to nyob hauv tag nrho thaj av tau ncua ntau teev.

3 Thiab tau muaj tias tau muaj ib lub suab los rau cov neeg dua, thiab tag nrho cov neeg tau hnov, thiab tau ua tim khawv txog nws, hais tias:

4 Au nej cov neeg ntawm tej nroog loj no uas tau raug vau, cov uas yog tej xeeb leej xeeb ntxwv ntawm Yakhauj, muaj tseeb tiag, cov uas nyob hauv tsev neeg Ixayees, pes tsawg zaus uas kuv tau sau nej ib yam li ib tug poj qaib sau nws tej me nyuam los rau hauv nws qab tis, thiab tau tu nej.

5 Thiab ntxiv, pes tsawg zaus uas ntshe kuv twb sau nej lawm ib yam li ib tug poj qaib sau nws tej me nyuam los nyob hauv nws qab tis, muaj tseeb tiag, Au nej cov neeg ntawm tsev neeg Ixayees, cov uas tau vau; muaj tseeb tiag, Au nej cov neeg ntawm tsev neeg Ixayees, nej cov uas nyob hauv Yeluxalees, ib yam li nej cov uas tau vau; muaj tseeb tiag, pes tsawg zaus uas ntshe kuv twb sau nej lawm ib yam li ib tug poj qaib sau nws tej me nyuam, thiab nej tsis kam.

6 Au nej tsev neeg Ixayees uas kuv tau tseg cia es, pes tsawg zaus uas kuv yuav sau nej ib yam li ib tug poj qaib sau nws tej me nyuam los rau hauv nws qab tis, yog nej yuav hloov siab lees txim thiab tig rov qab los cuag kuv nrog lub siab tag nrho puv npo.

7 Tiam sis yog tias tsis li ntawd, Au tsev neeg Ixayees es, nej tej chaw nyob yuav rais los mus ua tej chaw tsis muaj neeg nyob mus txog lub sij hawm thaum tej kev khi lus rau nej tej yawg koob muaj puv npo.

8 Thiab nim no tau muaj tias tom qab cov neeg tau hnov tej lus no tas lawm, saib seb, lawv tau rov pib quaj nyiav thiab quaj nrov vim yog txoj kev ploj ntawm lawv tej neeg txheeb ze thiab tej phooj ywg.

9 Thiab tau muaj tias peb hnub tau dhau mus. Thiab nws tau yog thaum sawv ntxov, thiab qhov kev tsaus ntuj tau faib ncaim saum thaj av mus, thiab lub ntiaj teb tau tsum tsis tshee, thiab tej pob zeb tau tsum tsis tawg, thiab txoj kev nroo uas phem heev tau tsum, thiab tag nrho tej suab nrov ua tsuj ua tsaug tau tsum.

10 Thiab lub ntiaj teb tau los koom ua ke dua, ces nws thiaj sawv tau; thiab txoj kev quaj ntsuag, thiab txoj kev nyiav, thiab txoj kev quaj ntawm cov neeg uas tau dim muaj sia tau tsum; thiab lawv txoj kev quaj ntsuag tau ntxeev ua kev xyiv fab, thiab txoj kev nyiav tau ntxeev ua kev qhuas thiab kev ua tsaug rau tus Tswv Yexus Khetos, lawv tus Txhiv Dim.

11 Thiab npaum li no tej vajlugkub tau muaj puv npo li tej uas tau hais los ntawm tej yaj saub.

12 Thiab nws tau yog feem uas ncaj ncees dua ntawm cov neeg uas tau raug dim, thiab nws twb yog lawv cov uas tau txais tej yaj saub thiab tsis tau xuas zeb ntaus lawv; thiab nws twb yog lawv cov uas tsis tau txo cov ntshav ntawm cov neeg ntseeg, uas tau raug tseg cia—

13 Thiab lawv tau raug tseg cia thiab tsis raug tog thiab faus rau hauv av; thiab lawv tsis raug poob deg rau hauv tej qhov tob ntawm hiav txwv; thiab lawv tsis tau raug kub hnyiab los ntawm hluav taws, thiab lawv kuj tsis tau raug faus thiab tsuam kom tuag; thiab lawv tsis tau raug tej khauv zeeg cua coj mus; thiab lawv kuj tsis tau raug kov yeej los ntawm tej pa taws thiab ntawm txoj kev tsaus ntuj.

14 Thiab nim no, yog leej twg tau nyeem, cia nws to taub; tus uas muaj tej vajlugkub, cia nws nrhiav kawm lawv, thiab kom pom thiab ntsia saib tag nrho tej kev tuag no thiab tej kev puas tsuaj los ntawm hluav taws, thiab los ntawm pa taws, thiab los ntawm tej cua daj cua dub, thiab los ntawm tej khauv zeeg cua, thiab los ntawm tej av qhib txais lawv, thiab tag nrho tej yam no puas yuav tsis yog rau txoj kev muaj puv npo ntawm tej kev qhia tej uas yuav muaj los yav tom ntej txog ntau yam ntawm tej yaj saub dawb huv.

15 Saib seb, kuv hais rau nej tias, Muaj tseeb tiag, ntau tus tau ua tim khawv txog tej yam no nyob rau lub caij thaum Khetos los, thiab tau raug tua vim lawv tau ua tim khawv txog tej yam no.

16 Muaj tseeb tiag, tus yaj saub Xinos tau ua tim khawv txog tej yam no, thiab Xinoj kuj tau hais txog tej yam no thiab, vim lawv tsuas tau ua tim khawv txog peb, cov uas yog lawv tej noob uas seem tshuav.

17 Saib seb, peb yawg koob Yakhauj kuj tau ua tim khawv txog ib co seem tshuav ntawm Yauxej cov noob. Thiab saib seb, peb tsis yog ib co noob seem ntawm Yauxej los? Thiab tej yam no uas tau ua tim khawv txog peb, tsis yog lawv tau raug muab sau rau saum cov phiaj toog uas peb yawg koob Lihais tau coj tawm ntawm Yeluxalees tuaj los?

18 Thiab tau muaj tias nyob rau thaum kawg ntawm xyoo peb caug thiab plaub, saib seb, kuv yuav qhia rau nej paub tias Nifais cov neeg uas tau raug tseg cia, thiab cov uas tau raug hu ua Neeg Lamas, cov uas tau raug tseg cia, thiab tau muaj ntau yam zoo heev muab rau lawv, thiab tej koob hmoov loj heev tau nchuav tawm los rau saum lawv taub hau, kawg tias tsis ntev tom qab txoj kev Khetos nce mus rau saum ntuj ceeb tsheej nws tau ua nws tus kheej los rau lawv pom tiag tiag—

19 Tau muab nws lub cev rau lawv pom, thiab tau qhuab qhia rau lawv; thiab ib zag ntawm nws txoj kev qhuab qhia yuav raug muab tom qab no. Yog li ntawd rau lub sij hawm no kuv yuav tau xaus kuv tej lus hais.