Tshooj 25
Nyob rau lub caij ntawm txoj Kev Nqis Los Zaum Ob cov neeg khav theeb thiab cov neeg phem yuav raug kub hnyiab zoo ib yam li tej quav nyab npleg—Eliyas yuav rov qab los ua ntej hnub loj thiab ntshai heev ntawd—Piv rau Malakhis 4. Kwv yees li 34 xyoo tom qab yug Yexus.
1 Vim saib seb, hnub ntawd yuav los uas yuav kub ib yam li ib lub qho cub; thiab tag nrho cov neeg khav txiv, muaj tseeb tiag, thiab tag nrho cov neeg ua phem, yuav yog quav nyab npleg; thiab hnub uas yuav los ntawd yuav kub lawv, Ib Tsoom Tub Rog tus Tswv hais li, nws yuav tsis cia lawv tej cag los sis tej ceg li.
2 Tiam sis rau nej cov uas ntshai kuv lub npe, Leej Tub ntawm txoj kev Ncaj Ncees yuav sawv nrog txoj kev kho mob nyob hauv nws tis; thiab nej yuav tawm mus thiab loj hlob zoo ib yam li tus me nyuam nyuj nyob hauv nkuaj.
3 Thiab nej yuav tsuj cov neeg phem; vim lawv yuav ua tej hmoov av nyob hauv nej tej qab xib taws nyob hauv hnub uas kuv yuav ua li no, Ib Tsoom Tub Rog tus Tswv hais li ntawd.
4 Nej yuav tsum nco ntsoov Mauxes txoj kev cai, kuv tus tub qhe, uas kuv tau txib muab rau nws nyob hauv roob Holes rau tag nrho cov neeg Ixayees, nrog tej kev cai thiab tej kev txiav txim.
5 Saib seb, kuv yuav xa Eliyas tus yaj saub los rau nej ua ntej txoj kev los ntawm hnub loj thiab ntshai heev ntawm tus Tswv;
6 Thiab nws yuav tig tej siab ntawm tej txiv los rau tej me nyuam, thiab tej siab ntawm tej me nyuam mus rau lawv tej txiv, nyob tsam kuv yuav los thiab nplawm lub ntiaj teb nrog ib qho kev foom tsis zoo.