1 Thiab nim no tau muaj tias nyob rau hauv xyoo kaum rau txij li thaum Khetos los, Lakhoonias, tus tswv xeev ntawm thaj av, tau txais ib tsab ntawv los ntawm tus thawj coj thiab tus tswv xeev ntawm pab neeg tub sab no; thiab cov no yog cov lus uas tau sau, hais tias:

2 Lakhoonias, tus muaj peev xwm tshaj thiab tus thawj tswv xeev ntawm thaj av, saib seb, kuv sau tsab ntawv no tuaj rau koj, thiab muab txoj kev qhuas loj heev rau koj, vim yog nej txoj kev ruaj khov, thiab txoj kev ruaj khov ntawm nej cov neeg, nyob hauv txoj kev tiv thaiv tej uas nej xav tias yog nej qhov kev muaj cai thiab txoj kev ywj siab; muaj tseeb tiag, nej yeej sawv taus zoo, yam li nej tau raug pab cuam los ntawm ib tug vajtswv txhais tes, nyob rau hauv txoj kev tiv thaiv ntawm nej txoj kev ywj siab, thiab nej tej khoom, thiab nej lub teb chaws, los sis qhov uas nej yeej hu li tiag.

3 Thiab nws zoo li ib qho kev tu siab rau kuv, Lakhoonias tus uas muaj peev xwm tshaj es, cas nej yuav ruam heev thiab tsis muaj qab hau thaum xav tias nej muaj cuab kav sawv tawm tsam coob tug neeg uas tsis ntshai dab tsi uas yog cov nyob hauv kuv txoj kev txib, cov uas nim no nyob rau lub sij hawm no sawv nrog lawv tej cuab yeej, thiab kub siab lug tos ntsoov rau lo lus tias—Nqis mus rau saum cov Neeg Nifais thiab ua kom lawv puas tsuaj.

4 Thiab kuv, tau paub txog lawv txoj kev siab loj uas tsis muaj leej twg kov yeej, tau cob lawv nyob rau hauv tshav rog, thiab tau paub txog lawv txoj kev ntxub uas kav ib txhis rau nej vim yog ntau yam tsis yog uas nej tau ua rau lawv lawm, yog li ntawd yog lawv nqis tuaj tawm tsam nej lawv yuav tuaj xyuas nej nrog kev puas tsuaj huv tib si.

5 Yog li ntawd kuv tau sau tsab ntawv no, muab kiag kuv txhais tes lo nws, vim xav txog rau nej txoj kev tau zoo nyob, vim yog nej txoj kev ruaj khov nyob hauv tej uas nej ntseeg tias yog, thiab nej txoj kev muaj peev xwm nyob hauv tshav rog.

6 Yog li ntawd kuv sau ntawv tuaj rau koj, xav tau kom nej cia li tso swb rau kuv cov neeg no, nej tej nroog, nej tej av, thiab nej tej khoom uas nej muaj, zoo dua li kom lawv yuav tuaj xyuas nej nrog ntaj thiab kom txoj kev puas tsuaj yuav los rau saum nej.

7 Los sis muab ua lwm yam lus hais, nej cia li swb rau peb, thiab koom nrog peb thiab koom paub nrog peb tej hauj lwm ntsiag to, thiab rais los mus ua peb cov kwv tij xwv kom nej yuav zoo li peb—tsis yog peb cov tub qhev, tiam sis yog peb cov kwv tij thiab ua kwv luag muaj tag nrho tej khoom uas peb muaj.

8 Thiab saib seb, kuv cog lus rau koj tias, yog nej yuav ua li no, nrog ib qho kev lav lus, nej yuav tsis raug puas tsuaj; tiam sis yog nej yuav tsis ua li no, kuv lav ib lo lus rau koj tias, nyob rau lub hlis yuav los kuv yuav txib kom kuv cov tub rog yuav nqis tuaj tawm tsam nej, thiab lawv yuav tsis cia lawv tej tes so thiab yuav tsis tso leej twg dim, tiam sis yuav tua nej, thiab yuav cia ntaj vau los rau nej mus txog thaum nej yuav rais los mus tu noob.

9 Thiab saib seb, kuv yog Nkidi-ahais; thiab kuv yog tus tswv xeev ntawm pawg ua hauj lwm ntsiag to no ntawm Nkadi-atoos; uas yog pab pawg thiab tej hauj lwm ntawd uas kuv paub tias zoo; thiab lawv tau muaj thaum ub los thiab lawv tau raug muab cev nqis rau peb.

10 Thiab kuv sau tsab ntawv no tuaj rau koj, Lakhoonias, thiab kuv cia siab tias nej yuav muab nej tej av thiab nej tej khoom, kom tsis muaj ntshav nrog, xwv kom kuv cov neeg no yuav rov muaj tau lawv tej kev muaj cai thiab txoj kev kav, cov uas tau ntxeev siab tawm ntawm nej vim yog nej txoj kev phem uas ceev lawv txoj kev muaj cai ntawm txoj kev kav ncaim ntawm lawv, thiab tsuas yog nej yuav ua li no xwb, kuv yuav pauj txiaj ntsig rau tej kev tsis yog uas lawv tau txais. Kuv yog Nkidi-ahais.

11 Thiab nim no tau muaj tias thaum Lakhoonias tau txais tsab ntawv no nws tau xav tsis thoob kiag li, vim yog txoj kev tsis ntshai ntawm Nkidi-ahais txoj kev xav tau tej khoom ntawm thaj av ntawm cov Neeg Nifais, thiab kuj vim yog txoj kev hem cov neeg thiab txoj kev xav ua pauj tej kev tsis yog ntawm cov uas tsis tau txais tej kev tsis yog, tsuas yog lawv cov uas tau ua txhaum lawv tus kheej los ntawm txoj kev ntxeev siab khiav mus rau cov neeg tub sab uas phem thiab qias.

12 Nim no saib seb, tus Lakhoonias no, tus tswv xeev, tau yog ib tug neeg ncaj, thiab tsis muaj peev xwm ua kom poob siab tau los ntawm tej kev txib thiab tej kev hem ntawm ib tug tub sab; yog li ntawd nws tsis tau cuab pob ntseg rau tsab ntawv ntawm Nkidi-ahais, tus tswv xeev ntawm cov tub sab, tiam sis nws tau kom nws cov neeg yuav tsum quaj thov rau tus Tswv kom muab lub zog tawm tsam lub caij uas cov tub sab yuav nqis tuaj tawm tsam lawv.

13 Muaj tseeb tiag, nws tau xa ib tsab xov mus rau tag nrho hauv nws cov neeg, kom lawv yuav tsum sau lawv tej poj niam, thiab lawv tej me nyuam, lawv tej pab yaj thiab lawv tej tsiaj txhu, thiab tag nrho lawv tej khoom tuaj ua ke, rau ib qho chaw, tsuas tshuav lawv thaj av xwb.

14 Thiab nws tau kom ua tej chaw tiv thaiv ib puag ncig lawv, thiab tej zog ntawm qhov ntawd yuav tsum kom khov heev. Thiab nws tau ua kom tej tub rog, tsis hais cov Neeg Nifais thiab ntawm cov Neeg Lamas, los sis tag nrho lawv cov uas tau nrog cov Neeg Nifais nyob, yuav tsum raug tso zov li tej neeg zov saib ib puag ncig saib lawv, thiab zov lawv nruab hnub thiab hmo ntuj ncaim ntawm cov neeg tub sab.

15 Muaj tseeb tiag, nws tau hais rau lawv tias: Ib yam li tus Tswv tseem muaj txoj sia nyob, tsuas yog nej yuav hloov siab lees txim txog tag nrho nej tej kev tsis ncaj, thiab quaj thov rau tus Tswv xwb, nej yuav tsis raug cawm dim ntawm cov tub sab Nkadi-atoos tej tes ntawd.

16 Thiab tseem ceeb thiab loj heev yog tej lus thiab tej kev qhia tej uas yuav muaj los yav tom ntej ntawm Lakhoonias xwv kom lawv tau ua kom txoj kev ntshai los rau saum cov neeg tag nrho; thiab lawv tau siv tag nrho lawv tej zog uas lawv muaj ua raws li Lakhoonias tej lus.

17 Thiab tau muaj tias Lakhoonias tau tsa tej thawj nom peb kav tag nrho tej tub rog ntawm cov Neeg Nifais, yuav txib lawv nyob rau thaum lub sij hawm uas cov tub sab yuav nqis tawm pem tej hav zoov tuaj tawm tsam lawv.

18 Nim no tus thawj uas saib tag nrho cov thawj nom peb thiab tus thawj coj loj ntawm cov Neeg Nifais cov tub rog tau raug tsa, thiab nws lub npe yog Nkikhidoonais.

19 Nim no nws tau yog raws li kev li kev cai uas nyob tag nrho hauv cov Neeg Nifais kom tsa lawv tej thawj nom peb, (tsuas yog tseg thaum lawv nyob hauv tej sij hawm phem xwb) tej tug uas muaj tus ntsuj plig ntawm txoj kev tshwm sim thiab txoj kev qhia tej uas yuav muaj los yav tom ntej; yog li ntawd, tus Nkikhidoonais no tau yog ib tug yaj saub tseem ceeb heev nyob hauv lawv, thiab kuj yog tus thawj tub txiav txim zoo heev thiab.

20 Nim no cov neeg tau hais rau Nkikhidoonais tias: Thov rau tus Tswv, thiab cia peb nce mus rau saum tej roob thiab rau hauv tej hav zoov, xwv kom peb yuav tau vau rau saum cov tub sab thiab rhuav kom lawv puas tsuaj nyob hauv lawv tej av.

21 Tiam sis Nkikhidoonais hais rau lawv tias: Tus Tswv txwv tsis pub; vim yog peb yuav nce mus tawm tsam lawv tus Tswv yuav coj peb mus rau hauv lawv tes; yog li ntawd peb yuav npaj peb tus kheej nyob hauv nruab nrab ntawm peb thaj av, thiab peb yuav sau tag nrho peb tej tub rog tuaj ua ke, thiab peb yuav tsis mus tawm tsam lawv, tiam sis peb yuav tos mus txog thaum lawv yuav tuaj tawm tsam peb; yog li ntawd ib yam li tus Tswv muaj sia nyob, yog peb ua li no nws yuav coj lawv los rau hauv peb tes.

22 Thiab tau muaj tias nyob rau hauv xyoo kaum xya, nyob rau thaum xyoo yuav kawg, tsab xov ntawm Lakhoonias tau tawm mus thoob plaws rau saum txhua thaj av, thiab lawv tau coj lawv tej nees, thiab lawv tej tsheb nees luag, thiab lawv tej nyuj twm, thiab tag nrho lawv tej pab yaj, thiab tag nrho lawv tej tsiaj txhu, thiab lawv tej noob qoob loos, thiab tag nrho lawv tej khoom, thiab tau tawm mus txhiab txhiab thiab kaum tawm txhiab leej, mus txog thaum uas lawv tau mus tag nrho rau qhov chaw uas tau raug xaiv kom lawv yuav tsum sau lawv tus kheej tuaj ua ke, tiv thaiv lawv tus kheej tawm tsam lawv tej yeeb ncuab.

23 Thiab thaj av uas tau raug xaiv yog thaj av Xalahelas thiab thaj av uas nyob nruab nrab thaj av Xalahelas thiab thaj av Huaj Vam, muaj tseeb tiag, rau tus ciam teb uas nyob nruab nrab ntawm thaj av Huaj Vam thiab thaj av Quav Poj.

24 Thiab tau muaj ntau txhiab leej neeg heev uas raug hu ua cov Neeg Nifais, cov uas tau sau lawv tus kheej tuaj ua ke nyob hauv thaj av no. Nim no Lakhoonias tau ua kom lawv yuav tsum sau lawv tus kheej tuaj ua ke nyob rau hauv thaj av qab teb, vim yog txoj kev foom tsis zoo loj uas tau nyob rau saum thaj av qaum teb.

25 Thiab lawv tau ua chaw tiv thaiv lawv tawm tsam lawv tej yeeb ncuab; thiab lawv tau nyob rau hauv ib thaj av, thiab hauv ib pab, thiab lawv tau ntshai tej lus uas tau hais los ntawm Lakhoonias, kawg tias thaum kawg lawv tau hloov siab lees txim txog tag nrho lawv tej kev txhaum; thiab lawv tau tso lawv tej kev thov rau tus Tswv lawv tus Vajtswv, kom nws yuav tso lawv dim nyob rau lub sij hawm uas lawv tej yeeb ncuab yuav nqis tuaj ua rog tawm tsam lawv.

26 Thiab lawv tau tu siab heev vim yog lawv tej yeeb ncuab. Thiab Nkikhidoonais tau kom lawv yuav tsum ua tej cuab yeej ua rog txhua txhia yam, thiab lawv yuav tsum muaj zog nrog tej tsho tiv rog, thiab nrog tej phiaj hlau, thiab nrog tej phiaj hlau kheej, raws li nws txoj kev qhia.