1 Thiab nim no saib seb, tsis tau muaj ib tug neeg uas muaj sia nyob tag nrho ntawm cov Neeg Nifais uas tau ua ob lub siab txog tej lus ntawm tag nrho cov yaj saub dawb huv uas tau hais lawm; vim lawv paub lawm tias nws yuav tsum tsim nyog tias tej ntawd yuav tsum raug muaj kom puv npo.

2 Thiab lawv paub lawm tias nws tsim nyog tias Khetos tau los lawm, vim yog tej cim ntau uas tau raug muab raws li tej lus ntawm cov yaj saub; thiab vim yog tej uas twb tau muaj los lawm lawv tau paub tias nws tsim nyog tias tag nrho txhua yam yuav tsum muaj raws li tej uas tau hais lawm.

3 Yog li ntawd lawv tau tso tag nrho lawv tej kev txhaum, thiab lawv tej kev qias, thiab lawv tej kev sib daj sib deev, thiab tau rau siab hlo ua hauj lwm nruab hnub hmo ntuj rau Vajtswv.

4 Thiab nim no tau muaj tias thaum lawv tau txhom tau tag nrho cov neeg raug txim tub sab, kawg tias tsis tau muaj ib tug tau dim uas yuav tsis raug tua, lawv tau muab lawv tej neeg raug txim pov rau hauv qhov taub, thiab tau kom Vajtswv txoj lus raug qhuab qhia rau lawv; thiab txhua tus uas yuav hloov siab lees txim txog lawv tej kev txhaum thiab khi ib lo lus tias lawv yuav tsis tua neeg ntxiv lawm raug muab tso rau kev ywj siab.

5 Tiam sis txhua tus cov uas tsis tau khi lus, thiab cov uas tseem pheej muaj tej kev tua neeg ntsiag to tsis tu ncua nyob hauv lawv tej siab, muaj tseeb tiag, txhua tus uas tau raug nrhiav pom ua pa tawm tsiv heev rau lawv tej kwv tij tau raug nyob txim thiab raug txim raws li txoj cai.

6 Thiab li no lawv tau muab ib qho kawg rau tag nrho cov neeg uas phem, thiab neeg tuav hauv thiab qias, qhov uas tau muaj kev phem heev, thiab tau tua neeg coob heev.

7 Thiab li no xyoo nees nkaum thiab ob tau dhau mus, thiab xyoo nees nkaum thiab peb los tib yam, thiab xyoo nees nkaum thiab plaub, thiab xyoo nees nkaum thiab tsib; thiab li no nees nkaum thiab tsib xyoos tau dhau mus.

8 Thiab tau muaj ntau yam tau tshwm sim uas, nyob hauv ib txhia qhov muag, mas loj thiab zoo kawg nkaus li; txawm li ntawd los, tsis muaj peev xwm muab lawv tag nrho sau rau hauv phau ntawv no; muaj tseeb tiag, phau ntawv no tsis muaj peev xwm yuav ntim ib feem pua ntawm tej uas tau ua nyob hauv cov neeg coob leej heev nyob hauv lub sij hawm ntawm nees nkaum thiab tsib xyoos.

9 Tiam sis saib seb muaj ntau phau ceev xwm txheej uas muaj tag nrho tej kev tshwm sim ntawm cov neeg no; thiab ib zag luv tiam sis tseeb tau raug muab los ntawm Nifais.

10 Yog li no kuv tau ua kuv phau ceev xwm txheej txog tej yam no raws li Nifais phau ceev xwm txheej, uas tau muab sau rau saum cov phiaj uas tau hu ua Nifais cov phiaj.

11 Thiab saib seb, kuv sau phau ceev xwm txheej rau saum cov phiaj uas kuv tau muab kuv ob txhais tes ua kiag.

12 Thiab saib seb, kuv hu ua Maumoos, tau hu raws li thaj av Maumoos, thaj av uas Amas tau txhim tsa lub koom txoos nyob hauv cov neeg, muaj tseeb tiag, thawj lub koom txoos uas tau txhim tsa nyob hauv lawv tom qab lawv txoj kev ua txhaum.

13 Saib seb, kuv yog ib tug pab coj ntawm Yexus Khetos, Vajtswv tus Tub. Kuv tau raug hu los ntawm nws mus tshaj tawm nws txoj lus rau nws cov neeg, xwv kom lawv yuav muaj txoj sia kav ib txhis.

14 Thiab nws tau tsim nyog tias kuv, raws li Vajtswv lub siab nyiam, xwv kom tej kev thov Vajtswv ntawm cov uas tau mus ua ntej, cov uas yog cov dawb huv, yuav tsum muaj puv npo raws li lawv txoj kev ntseeg, yuav sau ib phau ceev xwm txheej txog tej yam no uas tau ua los lawm—

15 Muaj tseeb tiag, ib phau ceev xwm txheej me uas tau muaj tej uas txij li lub caij thaum Lihais tau ncaim Yeluxalees, nqis los mus txog rau lub sij hawm no.

16 Yog li ntawd kuv sau kuv phau ceev xwm txheej los ntawm tej zaj uas tau raug muab los ntawm cov uas nyob ua ntej kuv, los mus txog thaum pib kuv lub neej.

17 Thiab tom qab ntawd kuv thiaj sau ib phau ceev xwm txheej txog tej yam uas kuv tau pom nrog kuv ob lub qhov muag kiag.

18 Thiab kuv paub tias phau ceev xwm txheej uas kuv sau yeej yog ib phau ceev xwm txheej uas ncaj thiab tseeb; txawm li ntawd los muaj ntau yam uas, raws li peb yam lus hais, peb tsis muaj cuab kav sau tau.

19 Thiab nim no kuv xaus kuv cov lus hais, uas hais txog kuv tus kheej, thiab pib muab kuv zaj txog tej uas tau muaj ua ntej kuv.

20 Kuv yog Maumoos, thiab ib tug xeeb ntxwv tseeb ntawm Lihais. Kuv muaj qhov uas yuav qhuas kuv tus Vajtswv thiab kuv tus Cawm Seej Yexus Khetos, uas nws tau coj peb tej yawg koob tawm ntawm daim av Yeluxalees, (thiab tsis muaj leej twg paub nws li tsuas yog nws tus kheej thiab cov uas nws tau coj tawm ntawm thaj av xwb) thiab qhov uas nws tau muab rau kuv thiab kuv cov neeg paub ntau heev rau txoj kev cawm seej ntawm peb tej ntsuj plig.

21 Tseeb tiag nws twb tau foom koob hmoov rau Yakhauj tsev neeg, thiab tau muaj siab hlub tshua rau Yauxej cov noob.

22 Thiab yog tias Lihais cov me nyuam tau coj nws tej lus txib nws yeej yuav foom koob hmoov rau lawv thiab ua kom lawv huaj vam raws li nws txoj lus.

23 Muaj tseeb tiag, thiab tseeb tiag nws yuav rov coj ib cov seem tshuav ntawm Yauxej cov noob los paub txog tus Tswv lawv tus Vajtswv dua.

24 Thiab tseeb tiag tib yam li tus Tswv muaj sia nyob, nws yeej yuav sau tawm ntawm plaub ceg kaum ntawm lub ntiaj teb tag nrho tej seem tshuav ntawm Yakhauj cov noob los ua ke, cov uas tau tawg ri niab mus nyob saum lub ntiaj teb txhua qhov.

25 Thiab li nws tau khi lus nrog tag nrho Yakhauj tsev neeg, tib yam li ntawd lo lus khi tseg uas nws tau khi tseg nrog Yakhauj tsev neeg yuav tsum muaj puv npo nyob hauv nws lub sij hawm uas teem tseg, rau txoj kev rov los txum tim tag nrho Yakhauj tsev neeg los paub txog txoj kev khi lus uas nws tau khi nrog lawv lawm.

26 Thiab tom qab ntawd lawv yuav paub lawv tus Txhiv Dim, tus uas yog Yexus Khetos, Vajtswv Leej Tub; thiab tom qab ntawd lawv yuav raug sau tawm ntawm plaub ceg kaum ntawm lub ntiaj teb los rau lawv tej av, qhov uas lawv tau sib ncaim; muaj tseeb tiag, ib yam li tus Tswv muaj sia nyob ces nws yeej yuav muaj li ntawd. Amees.