1 Thiab tau muaj tias li no xyoo cuaj caum thiab tsib kuj tau dhau mus, thiab cov neeg tau pib hnov qab tej cim thiab tej kev xav tsis thoob ntawd uas lawv tau hnov, thiab tau pib tsis yoob rau ib lub cim los sis ib txoj kev xav tsis thoob uas los saum ntuj los, kawg tias lawv tau pib ua lawv tej siab tawv, thiab npog lawv tej siab, thiab tau pib tsis ntseeg tag nrho tej uas lawv tau hnov thiab tau pom—

2 Tau tuav tswv yim hauv lawv tej siab tias tej no tsis muaj nuj nqis, tias nws tau raug ua los ntawm tej neeg thiab los ntawm tus dab lub hwj chim los ntxooj thiab ntxias cov neeg tej siab; thiab li no Dab Ntxwg Nyoog thiaj muab tau cov neeg tej siab dua, kawg tias nws tau ua rau lawv tej qhov muag dig thiab coj lawv mus ntseeg tias Khetos txoj kev qhia yog ib yam uas ruam thiab tsis muaj nuj nqis.

3 Thiab tau muaj tias cov neeg tau pib loj hlob muaj zog nyob hauv txoj kev phem thiab tej kev qias; thiab lawv tsis ntseeg tias yuav muaj dua tej cim los sis tej kev xav tsis thoob ntxiv lawm; thiab Dab Ntxwg Nyoog tau tawm mus ncig, ntxooj tej siab ntawm cov neeg, ntxias lawv thiab ua rau lawv kom lawv yuav tsum ua kev phem loj heev nyob hauv thaj av.

4 Thiab li no xyoo thib cuaj caum thiab rau tau dhau mus; thiab xyoo thib cuaj caum thiab xya los tib yam; thiab xyoo thib cuaj caum thiab yim los tib yam; thiab xyoo thib cuaj caum thiab cuaj los kuj tib yam;

5 Thiab xyoo thib ib puas los kuj tau dhau mus lawm txij li hnub nyoog ntawm Mauxiyas, tus uas yog vaj ntxwv kav cov neeg ntawm cov Neeg Nifais.

6 Thiab rau puas thiab cuaj xyoo tau dhau mus lawm txij li thaum Lihais tau ncaim Yeluxalees.

7 Thiab cuaj xyoos tau dhau mus lawm txij li lub caij uas tau muaj lub cim, lub uas tau hais txog los ntawm cov yaj saub, tias Khetos yuav los rau hauv lub ntiaj teb.

8 Nim no cov Neeg Nifais tau pib ntsuas lawv lub sij hawm txij li lub caij no thaum uas tau muaj lub cim, los sis txij li txoj kev los ntawm Khetos; yog li ntawd, cuaj xyoos tau dhau mus lawm.

9 Thiab Nifais, tus uas yog Nifais leej txiv, tus uas tau saib xyuas cov ceev xwm txheej, tsis rov qab los rau hauv thaj av Xalahelas lawm, thiab tsis muaj peev xwm nrhiav tau nws nyob tag nrho hauv thaj av.

10 Thiab tau muaj tias cov neeg tseem pheej nyob hauv txoj kev phem, txawm tias tau muaj kev qhuab qhia ntau thiab txoj kev qhia tej uas yuav muaj los yav tom ntej uas tau xa mus rau hauv lawv; thiab li no xyoo kaum kuj tau dhau mus lawm; thiab xyoo kaum ib kuj tau dhau mus nyob txoj kev tsis ncaj.

11 Thiab tau muaj tias nyob rau hauv xyoo kaum peb tau pib muaj tsov rog thiab tej kev sib cav sib ceg thoob plaws txhua thaj av; vim cov neeg tub sab Nkadi-atoos tau rais los mus coob heev, thiab tau tua cov neeg coob leej heev, thiab tau tso kev puas tsuaj rau ntau lub nroog heev, thiab tau ua rau neeg tuag thiab ntshav nrog ntau thoob plaws hauv thaj av, tau tsim nyog tias tag nrho cov neeg, tsis hais cov Neeg Nifais thiab cov Neeg Lamas, yuav tsum nqa cuab yeej tawm tsam lawv.

12 Yog li ntawd, tag nrho cov Neeg Lamas uas tau rais los hloov siab tshiab los rau tus Tswv tau koom ua ke nrog lawv cov kwv tij, cov Neeg Nifais, thiab tau raug yuam, rau txoj kev tsis muaj xwm txheej ntawm lawv txoj sia thiab lawv tej poj niam thiab lawv tej me nyuam, kom nqa tej cuab yeej tawm tsam cov tub sab Nkadi-atoos ntawd, muaj tseeb tiag, thiab kuj ceev kom tau lawv tej kev muaj cai, thiab tej cib fim ntawm lawv lub koom txoos thiab ntawm lawv txoj kev pe hawm, thiab lawv txoj kev ywj pheej thiab lawv txoj kev ywj siab.

13 Thiab tau muaj tias ua ntej thaum xyoo kaum peb no tau dhau mus cov Neeg Nifais tau raug ntsib nrog txoj kev puas tsuaj loj vim yog npluav rog no, uas tau rais los mus mob heev.

14 Thiab tau muaj tias cov Neeg Lamas uas tau koom nrog cov Neeg Nifais tau raug suav nyob hauv cov Neeg Nifais;

15 Thiab lawv txoj kev foom tsis zoo tau raug tshem tawm ntawm lawv, thiab lawv tej tawv nqaij tau rais los dawb zoo li cov Neeg Nifais;

16 Thiab lawv tej tub hluas thiab lawv tej ntxhais tau rais los mus zoo nkauj zoo nraug heev, thiab lawv tau raug suav nrog cov Neeg Nifais, thiab tau raug hu ua cov Neeg Nifais. Thiab li no tau xaus xyoo thib kaum peb.

17 Thiab tau muaj tias nyob rau thaum pib ntawm xyoo thib kaum plaub, npluav rog uas nyob nruab nrab ntawm cov tub sab thiab Nifais cov neeg tau muaj ntxiv thiab tau rais los mus mob heev; txawm li ntawd los, Nifais cov neeg tau kov yeej cov tub sab ntau zaus, kawg tias lawv tau raws lawv rov qab tawm ntawm lawv tej av mus rau pem tej roob thiab rau hauv lawv tej chaw tsis muaj neeg paub.

18 Thiab li no tau xaus xyoo thib kaum plaub. Thiab nyob rau hauv xyoo thib kaum tsib lawv tau tawm los tawm tsam Nifais cov neeg; thiab vim yog txoj kev phem ntawm Nifais cov neeg, thiab lawv tej kev sib cav sib ceg thiab tej kev ntxeev siab, cov tub sab Nkadi-atoos tau kov yeej lawv ntau zaus.

19 Thiab li no tau xaus xyoo kaum tsib, thiab li no cov neeg tau nyob hauv qhov uas muaj kev txom nyem ntau; thiab rab ntaj ntawm txoj kev puas tsuaj tau dai rawv rau saum lawv, kawg tias lawv tau yuav luag raug txiav vau los ntawm nws, thiab li no los vim yog lawv txoj kev tsis ncaj.