“Plaub Hlis Ntuj 20–26. Mauxiyas 4–6: ‘Hloov Loj Heev,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)

“Plaub Hlis Ntuj 20–26. Mauxiyas 4–6”, Los, Nrog Kuv Mus—Rau Ib Leeg thiab Tsev Neeg: 2020

Daim Duab

Vaj Ntxwv Npeyamis qhia nws cov neeg

Ua Hauj Lwm rau Nej tus Vajtswv, los ntawm Walter Rane

Plaub Hlis Ntuj 20–26

Mauxiyas 4–6

“Hloov Loj Heev”

Thaum koj nyeem thiab xav txog Mauxiyas 4–6, cia li tsom ntsoov rau tus Vaj Ntsuj Plig Dawb Huv tej kev tshoov siab. Koj txais kev tshoov siab ua tej yam dab tsi zoo? (saib Mauxiyas 5:2).

Sau Ntawv txog Koj tej Kev Tshoov Siab

Koj puas tau hnov ib tug hais lus thiab txais kev tshoov siab kom hloov koj lub neej? Tej zaum, vim koj tau mloog tej lus ntawd, koj tau txiav txim siab tias koj yuav ua neej txawv yav tas los—tej zaum koj tau hloov loj heev. Vaj Ntxwv Npeyamis zaj lus yog ib zaj lus zoo li ntawd, thiab tej yam tseeb uas nws qhia tau raug neeg lub siab zoo li ntawd. Vaj Ntxwv Npeyamis qhia nws cov neeg txog tej uas ib tug tim tswv tau qhia nws—hais tias yuav txais tau cov koob hmoov zoo kawg nkaus los ntawm “Khetos cov ntshav [uas] theej txhoj” (Mauxiyas 4:2). Nws zaj lus tau ua rau lawv hloov lawv txoj kev xav txog lawv tus kheej (saib Mauxiyas 4:2), ua rau lawv hloov lawv lub siab xav (saib Mauxiyas 5:2), thiab tshoov lawv lub siab kom lawv xav khi lus nrog Vajtswv hais tias lawv yeej yuav ua raws li Nws lub siab nyiam (saib Mauxiyas 5:5). Vaj Ntxwv Npeyamis tej lus tau raug nws cov neeg lub siab li no. Nws cov lus yuav raug koj lub siab li cas?

Daim Duab

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Mauxiyas 4

Los ntawm Yexus Khetos, kuv txais tau kev zam txim rau kuv tej kev txhaum.

Kev kov yeej tus neeg ntawm sab cev nqaij daim tawv yeej tsis yooj yim. Yus yuav tsum siv zog heev kom hloov los ua “ib tug neeg dawb huv los ntawm tus Tswv Khetos txoj kev theej txhoj” (Mauxiyas 3:19). Tej lub sij hawm, txawm yog koj xav tias Vajtswv tau zam txim rau koj tej kev txhaum lawm, ua nyuaj rau koj tseem xav li ntawd thiab taug txoj kev ncaj ncees mus li. Vaj Ntxwv tau qhia nws cov neeg kom lawv paub txais tau ib txoj kev zam txim rau tej kev txhaum thiab ua ib tug neeg dawb huv tsis tu tsis tseg. Thaum koj kawm tshooj 4 ntawm phau Mauxiyas, tej zaum koj yuav xav nug koj tus kheej tej yam xws li no:

Nqe 1–12.Qhov uas Vaj Ntxwv Npeyamis cov neeg tau txais kev zam txim ua rau lawv tau cov koob hmoov twg? Vaj Ntxwv Npeyamis tau qhia dab tsi rau lawv kom pab lawv txais tau kev zam txim rau lawv tej kev txhaum? Nws tau qhia dab tsi txog qhov uas peb yuav tsum ua li cas kom txais tau kev cawm seej? Cia li nco txog qhov uas Vaj Ntxwv Npeyamis hais tias peb yuav tsum “nco txog tas mus li” (nqe 11). Koj xav tias koj yuav tsum ua dab tsi kom nco ntsoov tej yam no?

Nqe 12–16.Raws li tej nqe no, yuav muaj li cas hauv peb lub neej yog tias peb ua raws li tej yam uas nws piav txog nyob hauv nqe 11? Koj puas tau muaj tej kev hloov no hauv koj lub neej? Tej kev hloov no puas zoo li tej kev hloov uas piav txog nyob hauv Mauxiyas 3:19?

Nqe 16–30.Qhov uas peb pub rau cov pluag ua li cas pab peb txais tau kev zam txim? Koj yuav ua dab tsi kom ua neeg zoo li Khetos raws li qhia hauv nqe 27 ?

Kuj saib David A. Bednar, “Niaj Hnub Tau Ib txoj Kev Zam Nej tej Kev Txhaum,” Ensign los sis Liahona, Tsib Hlis Ntuj 2016, 59–62; Dale G. Renlund, “Preserving the Heart’s Mighty Change,” Ensign los sis Liahona, Kaum Ib Hlis Ntuj 2009, 97–99.

Mauxiyas 5:1–7

Tus Tswv tus Ntsuj Plig txawj hloov tau kuv lub siab loj heev.

Tib neeg ib txwm hais tias “Kuv hloov tsis taus. Kuv yeej zoo li no xwb.” Tiam sis, Vaj Ntxwv Npeyamis cov neeg qhia peb tias tus Tswv tus Ntsuj Plig yeej hloov tau peb lub siab tiag tiag. Thawj Tswj Hwm Russell M. Nelson qhia hais tias: “Peb hloov tau peb tus yeeb yam. Peb tej kev xav hloov tau. … Kev hloov siab tiag tiag—kev hloov siab uas ruaj khov kho—yuav tsum los dhau ntawm Yexus Khetos txoj Kev Theej Txhoj lub hwj chim uas kho thiab ntxuav peb kom huv. … Yexus Khetos txoj moo zoo yog ib txoj moo zoo ntawm kev hloov siab!” (“Tej Kev Txiav Txim uas Nyob Mus Ib Txhis,” Ensign los sis Liahona, Kaum Ib Hlis Ntuj 2013, 108).

Thaum koj nyeem txog txoj kev hloov siab ntawm Vaj Ntxwv Npeyamis cov neeg, cia li xav txog qhov uas yuav ua li cas kom koj txais tau txoj kev “hloov loj” uas ua rau lawv hloov siab los ntseeg tiag tiag. Puas muaj tej lub sij hawm “hloov loj” hauv koj lub neej uas ua rau koj hloov siab, los sis koj txoj kev hloov siab los ntseeg puas tau los zuj zus?

Kuj saib Exekhees 36:26–27; Amas 5:14; David A. Bednar, “Hloov Siab Los Ntseeg tus Tswv,” Ensign los sis Liahona, Kaum Ib Hlis Ntuj 2012, 106–9.

Tus Cawm Seej muaj peev xwm hloov peb lub siab thiab peb lub neej. Txhais Tes uas Txawj Kho Mob, los ntawm Adam Abram

Mauxiyas 5:5–15

Kuv ris Khetos lub npe thaum kuv ua kev khi lus.

Vaj Ntxwv Npeyamis xav hais lus rau nws cov neeg vim nws xav “tis ib lub npe rau cov neeg no.” Ib txhia yog cov Neeg Nifais thiab ib txhia yog Mules cov xeeb ntxwv, tiam sis nws tsis xav siv ob lub npe no. Nws caw nws cov neeg kom ris “Khetos lub npe” thaum lawv khi lus tias lawv yuav ua raws li Vajtswv hais (Mauxiyas 1:11; 5:10). Koj kawm dab tsi los ntawm Mauxiyas 5:7–9 txog qhov uas yus ris Khetos lub npe txhais li cas?

Txwj Laug D. Todd Christofferson qhia tias, “Yog vim Vajtswv pub hwj chim [ntawm kev coj ncaj ncees thiab sab ntsuj plig] rau peb. Peb txais lub hwj cim ntawd thaum peb khi lus nrog Nws.” (“The Power of Covenants,” Ensign los sis Liahona, Tsib Hlis Ntuj 2009, 20). Thaum koj nyeem Mauxiyas 5:5–15, sau ntawv txog cov koob hmoov uas yuav los rau hauv koj lub neej thaum koj ua raws li tej kev khi lus uas koj tau khi rau Vajtswv. Qhov uas koj ua raws li koj tej kev khi lus pab koj li cas kom muaj txoj kev “hloov loj” tas mus li los ntawm Yexus Khetos thiab Nws txoj Kev Theej Txhoj?

Daim Duab

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.

Mauxiyas 4:9–12

Nej tsev neeg yuav ua dab tsi kom “ntseeg Vajtswv” ntxiv (Mauxiyas 4:9) thiab “nco txog tas mus li, Vajtswv txoj kev tshav ntuj”? (Mauxiyas 4:11). Tej zaum nej tsev neeg yuav xav nyeem Mauxiyas 4:9–12 thiab nrhiav tej kab lus uas pab txhawb nej txoj kev ntseeg Vajtswv. Ces nej sau tau tej kab lus no thiab tso lawv nyob ub nyob no hauv tsev kom nej nco txog tej ntawd. Qhov uas nej nco ntsoov tej no yuav pab peb li cas kom “xyiv fab tas mus li” thiab “txais kev zam txim rau nej tej kev txhaum tas mus li”? (Mauxiyas 4:12).

Mauxiyas 4:14–15

Peb kawm dab tsi txog kev sib cav sib ceg los ntawm ob nqes no?

Mauxiyas 4:16–26

Vim li cas peb zoo li cov neeg thov khawv? Raws li tej nqe no, peb yuav tsum ua li cas rau Vajtswv cov me nyuam tag nrho? (saib Mauxiyas 4:26). Leej twg xav tau peb txoj kev pab?

Mauxiyas 4:27

Nej tsev neeg puas khiav nrawm dua li qhov nej muaj zog? Tej zaum nej yuav xav caw nej tsev neeg ntsuam xyuas tej yam lawv ua seb lawv puas rau siab tiam sis tseem muaj laj lim tswv yim.

Mauxiyas 5:5–15

Qhov uas peb ris Khetos lub npe qhia dab tsi rau peb txog peb txoj kev txheeb ze Nws? Tej zaum yuav pab nej sib tham seb vim li cas tib neeg sau lawv npe rau ntawm lawv tej khoom. Peb yuav ua li cas qhia tias peb yog tus Cawm Seej li?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Kev Qhia Zoo Dua Ntxiv

Saib xyuas kom muaj kev hlub. Qhov uas nej tsev neeg ib leeg ua zoo li cas rau ib leeg yeej hloov tau qhov uas neeg xav li cas hauv nej tsev. Cia li pab txhua tus hauv nej tsev neeg kom ua lawv lub luag hauj lwm kom muaj ib lub tsev uas txhua tus txaus siab qhia txog tej xwm txheej, nug tej yam, thiab hais lus tim khawv. (Saib Teaching in the Savior’s Way, 15.)