“Plaub Hlis Ntuj 27–Tsib Hlis Ntuj 3. Mauxiyas 7–10: ‘Nrog tus Tswv lub Zog,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Plaub Hlis Ntuj 27–Tsib Hlis Ntuj 3. Mauxiyas 7–10”, Los, Nrog Kuv Mus—Rau Ib Leeg thiab Tsev Neeg: 2020
Minerva K. Teichert (1888-1976), Amoos hais rau Vaj Ntxwv Leehais, 1949-1951, pleev roj rau pob zeb, 35 15/16 x 48 yas tes. Brigham Young University Museum of Art, 1969.
Plaub Hlis Ntuj 27–Tsib Hlis Ntuj 3
Mauxiyas 7–10
“Nrog tus Tswv lub Zog”
Thaum koj nyeem ntawv, tej zaum tus Ntsuj Plig yuav ua rau koj xav txog tej kab lus los sis tej nqe. Cia li sau ntawv txog qhov uas tej nqe ntawd muaj nqis rau koj.
Sau Ntawv txog Koj tej Kev Tshoov Siab
Thaum Vaj Ntxwv Mauxiyas’s cov neeg muaj “kev thaj yeeb tsis tu ncua” nyob hauv Xalahelas (Mauxiyas 7:1), ua rau lawv xav txog ib cov Neeg Nifais ntxiv, uas ntau xyoo tas los tau mus nyob hauv thaj av Lihais-Nifais. Ntau tiam neeg twb dhau mus, thiab Mauxiyas cov neeg tsis tau hnov lawv xov. Yog li ntawd Mauxiyas hais kom Amoos mus coj ib pawg mus nrhiav tau cov Neeg Nifais uas twb ncaim lawv mus lawm. Pawg nrhiav tau cov Neeg Nifais ntawd, thiab “vim yog kev ua phem” (Mauxiyas 7:24), cov Neeg Lamas tau muab lawv yuam ua qhev. Tiam sis thaum Amoos thiab nws cov kwv tij tuaj txog, ces lawv cia li muaj kev cia siab tias yuav muaj ib txoj kev dim.
Tej lub sij hawm peb zoo li cov Neeg Nifais uas ua qhev ntawd, peb raug txom nyem vim peb ua txhaum, thiab xav paub seb peb yuav nrhiav kev kaj siab lug li cas. Tej lub sij hawm peb zoo li Amoos, peb txais kev tshoov siab mus pab lwm tus thiab thaum kawg peb kawm tias vim peb ua li ntawd peb tau ua rau lawv xav “tsa [lawv] lub taub hau, thiab zoo siab, thiab tso siab rau Vajtswv” (Mauxiyas 7:19). Txawm yog peb raug xwm txheej li cas los, peb txhua tus yuav tsum hloov siab lees txim thiab “tig rov qab mus cuag tus Tswv kawg siab kawg ntsws” nrog kev ntseeg tias “nws yuav … coj [peb] dim” (Mauxiyas 7:33).
Tej lub Tswv Yim Kawm Vaj Lug Kub ntawm Yus Ib Leeg
Yog kuv tig rov qab mus cuag tus Tswv, tso siab rau Nws, thiab ua hauj lwm rau Nws, Nws yuav coj kuv dim.
Thaum Vaj Ntxwv Leehais ntsib Amoos, uas yog ib tug Neeg Nifais los ntawm Xalahelas, ua rau nws muaj kev cia siab, thiab nws xav kom nws cov neeg muaj kev cia siab ib yam li ntawd. Thaum koj nyeem Mauxiyas 7:14–33, cia li nco txog qhov uas Leehais hais rau nws cov neeg kom txhawb nqa lawv, txhawb lawv txoj kev ntseeg, thiab ua rau lawv muaj kev cia siab tias Vajtswv yuav pab lawv. Txawm yog koj tsis tau ua txhaum ib yam li Leehais cov neeg, nws tej lus yuav pab koj li cas kom tig rov qab mus cuag tus Tswv? Ua piv txwv, koj yuav nyeem hais tias Leehais tau qhia nws cov neeg nco txog thaum Vajtswv tau coj lwm tus dim yav tas los (saib nqe 18–20). Tej zaj no, nrog rau lwm zaj hauv vaj lug kub los sis tej uas muaj dhau los rau koj tus kheej, pab koj li cas kom tso siab rau Vajtswv.
24 daim phiaj uas Leehais cov neeg nrhiav tau yog dab tsi?
Thaum ib pawg me me los ntawm Leehais cov neeg nrhiav thaj av Xalahelas, lawv nrhiav tau 24 daim phiaj kub uas muaj kev kos ntawv uas tsis yog ib yam lus lawv paub. Cov phiaj no, uas Vaj Ntxwv Mauxiyas tau txhais lus, qhia txog ib co neeg hu ua cov Neeg Yales, uas tuaj txog thaj av uas cog lus cia los ntawm tus Pej Thuam Npanpes thiab thaum kawg raug puas tsuaj tag nrho (saib Mauxiyas 28:11–19). Tom qab ntawd Maulaunais tau sau ntsiab lus txog cov phiaj no (saib Ethaws 1:1–2), uas yog phau ntawv Ethaws. Cia li kawm txog qhov uas cov ceev xwm txheej no tau ua li cas rau Mauxiyas cov neeg nyob hauv Mauxiyas 28:18.
Tus Tswv muab cov yaj saub, cov pom tau, thiab cov txais kev tshwm sim kom pab noob neej.
Thaum Leehais hnov Amoos zaj lus tim khawv txog qhov uas tus Tswv tau tsa ib tug pom tau, Leehais “zoo siab kawg li, thiab ua Vajtswv tsaug” (Mauxiyas 8:19). Koj xav tias yog vim li cas nws xav li ntawd? Koj kawm dab tsi txog cov pom tau los ntawm Amoos cov lus nyob hauv Mauxiyas 8:13–19? Hauv peb lub caij nyoog, “Peb txhawb nqa pom zoo rau Thawj Pawg Thawj Tswj Hwm thiab Pawg Kaum Ob tug Thwj Tim ua cov yaj saub, cov pom tau, thiab cov txais kev tshwm sim” (Bible Dictionary, “Seer”). Thaum twg yog zaum kawg uas koj tau xav txog txoj koob hmoov no uas peb muaj cov yaj saub, cov pom tau, thiab cov txais kev tshwm sim hauv lub ntiaj teb no? Tej zaum koj yuav xav sau ntawv txog qhov uas vim li cas cov yaj saub, cov pom tau, thiab cov txais kev tshwm sim yog “ib lub txiaj ntsim tseem ceeb” rau koj (Mauxiyas 8:18).
Tus Yaj Saub Joseph Smith yog tus pom tau uas yog tus thawj ntawm peb lub caij nyoog tso cai no (saib Q&K 21:1; 124:125; Joseph Smith—History 1:62) Joseph tau coj yam ntxwv li cas kom zoo li Amoos cov lus piav txog ib tug pom tau thaum Joseph ua nws txoj hauj lwm qhuab qhia?
Kuv kov yeej kuv tej teeb meem “nrog tus Tswv lub zog.”
Xeenais lees hais tias nws twb tau ua yuam kev. Tej lub sij hawm nws kub siab heev, thiab nws tau ua rau nws cov neeg—Leehais cov neeg cov poj koob yawm txwv—raug teeb meem loj heev thaum nws sib pom zoo nrog Vaj Ntxwv Lamas. Tiam sis tom qab ntawd, thaum nws ua rog tawm tsam cov Neeg Lamas, nws tau pab nws cov neeg kov yeej lawv tej teeb meem nrog kev ntseeg. Thaum koj nyeem Mauxiyas 9–10, cia li nrhiav seb Xeenais cov neeg tau ua dab tsi kom qhia tias lawv muaj kev ntseeg. Vajtswv tau ua dab tsi kom txhawb lawv lub zog? Koj xav hais tias kev mus tom ntej “nrog tus Tswv lub zog” txhais li cas? (Mauxiyas 9:17; 10:10–11).
Tej yam uas kuv xaiv yeej muaj nqis rau tej tiam neeg tom ntej.
Raws li Mauxiyas 10:11–17 hais, cov Neeg Lamas cov poj koob yawm txwv tej cwj pwm thiab tej yam lawv ua tau ua li cas kom cov Neeg Lamas thiaj li tsis paub qhov tseeb? Tej yam uas cov Neeg Lamas cov poj koob yawm txwv xaiv tau ua rau tej tiam neeg tom ntej raug dab tsi? Cia li xav txog cov neeg uas lawv lub neej yuav hloov los ntawm tej yam koj ntseeg thiab xaiv; koj ua dab tsi tam sim no kom lawv yuav muaj kev ntseeg Khetos ntxiv?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Mauxiyas 7:19–20
Cia li nco txog tej zaj uas Leehais hais kom txhawb nqa nws cov neeg txoj kev ntseeg. Tej zaj twg los ntawm vaj lug kub tshoov peb lub siab kom peb “tso siab rau Vajtswv”? Kev tso siab rau Vajtswv txhais li cas? (kuj saib Mauxiyas 9:17; 10:19). Tej zaj twg los ntawm peb lub neej los sis peb cov poj koob yawm txwv lub neej yuav ua rau peb xav tso siab rau Vajtswv ntxiv?
Mauxiyas 7:26–27
Peb kawm dab tsi txog tus Cawm Seej los ntawm tej nqe no? (kuj saib Lus Qhuab Qhia thiab Kev Khi Lus 130:22). Vim li cas peb zoo siab paub tej no?
Mauxiyas 8:13–18
Xwv kom pab nej tsev neeg to taub tias ib tug pom tau yog leej twg, tej zaum nej yuav xav muab daim duab rau lawv saib txog tej cuab yeej uas pab peb pom tej yam me dhau los sis deb dhau, xws li koob tsom deb los sis ib lub tsom kab mob. Tej cuab yeej no zoo li ib tug pom tau li cas? (saib Mauxes 6:35–36). Cov pom tau txawj pom dab tsi uas peb tsis pom? Puas muaj dab tsi uas qhia tias Joseph Smith yog ib tug pom tau?
Tej zaum nej yuav xav muab daim duab txog peb cov yaj saub, cov pom tau, thiab cov txais kev tshwm sim hauv lub caij nyoog no rau nej tsev neeg saib thiab nug nej tsev neeg seb nej paub dab tsi txog lawv. Peb ua dab tsi kom coj raws li lawv?
Mauxiyas 9:14–18; 10:1–10
Thaum cov Neeg Lamas tawm tsam, Xeenas cov neeg twb npaj lawm ntawm sab cev nqaij daim tawv thiab sab ntsuj plig. Peb yuav kawm dab tsi los ntawm Xeenas thiab nws cov neeg txog txoj kev npaj rau teeb meem?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Kawm Zoo Dua Ntxiv ntawm Yus Ib Leeg
Nrhiav koj tej lub tswv yim ntawm sab ntsuj plig. Tus txheej txheem qhia no muaj tej zaj lus thiab ntsiab cai rau koj xav txog, tiam sis tsis txhob xav tias koj yuav tsum kawm tej no xwb. Tej zaum koj yuav txais kev tshoov siab los ntawm tej nqe vaj lug kub los sis nrhiav tej ntsiab cai uas tsis tau hais no. Cia tus Ntsuj Plig coj koj kev.
Kev Ua Yog Toog rau Joseph Smith, los ntawm Clark Kelley Price