“Tsib Hlis Ntuj 18–24. Mauxiyas 25–28: ‘Lawv Hu Ua Vajtswv cov Neeg,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Tsib Hlis Ntuj 18–24. Mauxiyas 25–28”, Los, Nrog Kuv Mus—Rau Ib Leeg thiab Tsev Neeg: 2020
Amas tus Hluas txoj Kev Hloov Siab Los Ntseeg, los ntawm Gary L. Kapp
Tsib Hlis Ntuj 18–24
Mauxiyas 25–28
“Lawv Hu Ua Vajtswv cov Neeg”
Tom qab uas “tus Tswv lub suab los rau [Amas],” nws tau muab cov lus uas tus Tswv qhia nws sau tseg “xwv kom nws yuav tau tej lus no” (Mauxiyas 26:14, 33). Koj yuav ua li cas kom coj raws li Amas tus yam ntxwv?
Sau Ntawv txog Koj tej Kev Tshoov Siab
Yuav luag peb tiam neeg twb dhau mus thaum lawv nyias nyob nyias thaj av, tiam sis cov Neeg Nifais tau rov qab ua ib haiv neeg. Leehais cov neeg, Amas cov neeg, thiab Mauxiyas cov neeg—tsis hais cov neeg hauv Xalahelas uas tsis yog los ntawm Nifais—tam sim no lawv sawv daws “tau suav nrog cov Neeg Nifais” (Mauxiyas 25:13). Lawv feem coob kuj xav los ua mej zeej ntawm lub Koom Txoos uas Amas tau txhim tsa. Yog li ntawd txhua tus uas “xav los ris Khetos lub npe” tau ua kev cai raus dej, “thiab lawv hu ua Vajtswv cov neeg” (Mauxiyas 25:23–24). Ntau xyoo tom qab muaj kev tawm tsam thiab kev poob cev qhev, zoo li cov Neeg Nifais yuav muaj ib lub caij ntawm kev thaj yeeb.
Tiam sis tsev ntev tom qab ntawd, cov uas tsis ntseeg pib tsim txom Haiv Neeg Ntseeg. Qhov tu siab heev yog qhov uas cov uas tsis ntseeg coob yog cov ntseeg cov me nyuam—“tiam neeg uas tab tom loj hlob” (Mauxiyas 26:1), tsis hais Mauxiyas cov tub thiab Amas ib tug tub. Ces muaj ib qho txuj ci tseem ceeb, thiab zaj uas hais txog qhov txuj ci tseem ceeb ntawd twb ua rau cov niam tsev txiv tsev uas nyuaj siab heev muaj kev cia siab. Tiam sis zaj dab neeg txog Amas txoj kev hloov siab los ntseeg tsis yog rau cov niam txiv uas muaj cov me nyuam uas ua loj leeb xwb. Kev hloov siab los ntseeg tiag tiag yog ib qho txuj ci tseem ceeb uas peb txhua tus yuav tsum muaj, txawm los ntawm txoj kev twg los xij.
Tej lub Tswv Yim Kawm Vaj Lug Kub ntawm Yus Ib Leeg
Kuv lav ris kuv txoj kev ntseeg thiab kuv zaj lus tim khawv.
Cov uas tau mloog Vaj Ntxwv Npeyamis zaj lus twb tau hloov siab los ntseeg (saib Mauxiyas 5:1–7), tiam sis kev hloov siab los ntseeg yeej nyob ntawm ib tug neeg thiab yus muab tsis tau rau lwm tus zoo li yus muab tej cuab yeej cuab tam rau yus cov me nyuam. Peb txhua tus yuav tsum hloov siab los ntseeg Yexus Khetos txoj moo zoo. Thaum koj nyeem Mauxiyas 26:1–6 txog “tiam neeg uas tab tom loj hlob” uas los ntawm cov Neeg Nifais, cia li saib tias lawv raug xwm txheej li cas vim lawv tsis ntseeg. Tej zaum koj yuav xav txog lwm tus neeg uas koj xav coj los cuag Khetos. Txawm yog koj muab tsis tau koj txoj kev hloov siab los ntseeg rau lawv, tus Ntsuj Plig yuav ntxhi lus rau koj qhia tej uas koj ua tau kom pab lawv muaj kev ntseeg. Thaum koj nyeem Mauxiyas 25–28 uas hais txog Amas thiab lwm tus mej zeej hauv lub Koom Txoos txoj kev pab tiam neeg uas tab tom loj hlob, tej zaum koj yuav xav txog lwm yam thiab.
Vajtswv cov tub qhe uas rau siab ntseeg xav ua raws li Nws lub siab nyiam.
Tej lub sij hawm peb xav tias ib tug thawj coj hauv lub Koom Txoos xws li Amas yuav paub txhua yam nws yuav tsum ua. Nyob hauv Mauxiyas 26 peb nyeem txog ib qho teeb meem hauv lub Koom Txoos uas Amas tsis tau muaj dua, thiab “nws ntshai … tsam nws [yuav] ua txhaum rau Vajtswv pom” (Mauxiyas 26:13). Amas tau ua dab tsi thaum lub sij hawm no? (saib Mauxiyas 26:13–14, 33–34, 38–39). Amas zaj no qhia dab tsi rau koj txog qhov uas koj yuav ua li cas thaum muaj teeb meem nyuaj heev hauv koj tsev neeg los sis hauv koj txoj kev ua hauj lwm hauv lub Koom Txoos?
Tej zaum yuav zoo yog koj sau tej lus tseeb uas Vajtswv tau muab tshwm sim rau Amas, nyob hauv Mauxiyas 26:15–32. Cia li saib hais tias muaj tej yam tseeb uas tsis tau teb Amas tej lus nug. Qhov no qhia dab tsi rau koj txog kev thov Vajtswv thiab kev txais kev tshwm sim?
Txhua tus neeg yuav tsum rov qab yug dua tshiab.
Peb yeej paub tias Amas tus Hluas yuav tsum yug dua tshiab ntawm sab ntsuj plig, vim nws thiab Mauxiyas cov tub yog “cov neeg ua txhaum uas phem tshaj plaws,” es lawv tau “mus ncig rhuav Vajtswv lub koom txoos” (Mauxiyas 28:4; 27:10). Tiam sis tsis ntev tom qab nws hloov siab los ntseeg, Amas ua tim khawv tias txhua leej txhua tus muaj peev xwm hloov siab los ntseeg—thiab lawv yuav tsum ua li ntawd: Nws hais tias, “Tsis txhob xav tsis thoob tias tib neeg sawv daws … yuav tsum yug dua tshiab” (Mauxiyas 27:25; ntxiv qhov uas ntawv qaij). Yeej suav koj nrog sawv daws thiab.
Thaum koj nyeem ntawv txog Amas tej xwm txheej, uas muaj nyob hauv Mauxiyas 27:8–37, tej zaum koj yuav xav seb yuav zoo li cas yog koj tau pauv nws chaw. Koj tsis xav ua rau lub Koom Txoos puas tsuaj, tiam sis nyaj koj txawj xav txog tej yam uas koj yuav tsum hloov txog koj tus kheej. Leej twg, zoo li Amas txiv, txhawb nqa koj thiab thov Vajtswv pab koj “nrog kev ntseeg ntau heev”? Tej yam twg tau pab “ua kom koj paub txog Vajtswv lub hwj chim thiab txoj cai”? (Mauxiyas 27:14). Tus Tswv tau ua “tej yam tseem ceeb” twg rau koj los sis koj tsev neeg uas koj yuav tsum “nco ntsoov”? (Mauxiyas 27:16). Koj kawm dab tsi los ntawm Amas tus Hluas tej lus thiab tej yam nws tau ua txog qhov uas kev yug dua tshiab txhais li cas? Tej zaum tej lus nug zoo li no yuav pab koj ntsuam xyuas koj txoj kev yug dua tshiab seb zoo li cas.
Kuj saib Mauxiyas 5:6–9; Amas 36; “Conversion,” Gospel Topics, topics.ChurchofJesusChrist.org.
Nws Txiv Zoo Siab, los ntawm Walter Rane
Vajtswv hnov kuv tej lus thov thiab yuav teb raws li Nws lub siab nyiam.
Tej zaum koj paub ib tug niam tsev txiv tsev uas zoo li Amas tus Laus, tus uas nws tus tub los sis nws tus ntxhais xaiv tej yam tsis zoo. Los sis tej zaum tus niam tsev txiv tsev ntawd yog koj ntag. Koj kawm dab tsi nyob hauv Mauxiyas 27:14, 19–24 uas ua rau koj muaj kev cia siab? Tej nqe no yuav ua rau koj hloov koj tej kev thov Vajtswv thaum koj thov pab lwm tus?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Mauxiyas 25:5–11
Mauxiyas cov neeg tau xav li cas tom qab nws nyeem Xeenas cov neeg thiab Amas cov neeg cov ceev xwm txheej rau lawv? Nej tsev neeg puas muaj cov ntawv ceev xwm txheej uas nej nyeem tau? Tej zaum nej yuav xav ntxiv rau nej cov ceev xwm txheej los sis pib ua li ntawd. Nej yuav xav sau txog dab tsi uas yuav pab nej tsev neeg (tsis hais tej tiam neeg tom ntej) “muaj kev xyiv fab heev kawg li” thiab kawm txog “Vajtswv txoj kev zoo”? (Mauxiyas 25:8, 10).
Mauxiyas 25:16
Vim li cas Leehais cov neeg yuav tsum nco ntsoov tias tus Tswv tau tso lawv dim ntawm lawv txoj kev poob cev qhev? Tus Tswv tau ua dab tsi rau peb uas peb yuav tsum nco ntsoov?
Mauxiyas 26:29–31; 27:35
Raws li tej nqe no qhia, ib tug neeg yuav tsum ua li cas kom txais kev zam txim?
Mauxiyas 27:21–24
Thaum nej nyeem tej nqe no, cia li xav txog ib tug hauv nej tsev neeg uas nej xav thov Vajtswv pab thiab yoo mov kom pab nws.
Mauxiyas 27–28
Xwv kom pab nej tsev neeg xav txog tej zaj hauv ob tshooj no, tej zaum nej yuav xav caw lawv kos duab txog cov neeg ntawd thiab siv daim duab kom hais zaj dab neeg ntawd. Los sis tej zaum lawv yuav nyiam ua yeeb yam txog zaj dab neeg no; lawv yuav ua li cas kom piav txog txoj kev hloov siab ntawm Amas thiab Mauxiyas cov tub?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Qhia Zoo Dua Ntxiv
Siv cov duab. Cov duab Gospel Art Book thiab Media Library nyob ntawm ChurchofJesusChrist.org muaj tej daim duab thiab daim video ntau uas pab tau nej tsev neeg xav txog tej ntsiab lus los sis tej xwm txheej.
Daim duab txog ib tug tim tswv tshwm sim rau Amas tus Hluas los ntawm Kevin Keele