“Tsib Hlis Ntuj 25–31. Mauxiyas 29–Amas 4: ‘Lawv Nyob Khov Kho thiab Ruaj Nrees,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Tsib Hlis Ntuj 25–31. Mauxiyas 29–Amas 4,” Los, Nrog Kuv Mus—Rau Ib Leeg thiab Tsev Neeg: 2020
Amas tus Hluas Qhuab Qhia, los ntawm Gary L. Kapp
Tsib Hlis Ntuj 25–31
Mauxiyas 29–Amas 4
“Lawv Nyob Khov Kho thiab Ruaj Nrees”
Kev nyeem vaj lug kub ua rau peb txais tau kev tshwm sim. Cia li qhib siab rau tej zaj lus uas tus Tswv xav qhia rau koj.
Sau Ntawv txog Koj tej Kev Tshoov Siab
Ib txhia yuav xav tias Vaj Ntxwv Mauxiyas lub tswv yim kom muab cov vaj ntxwv pauv muaj cov txiav txim uas cov neeg xaiv yeej yog tswv yim zoo rau lawv txoj kev kav teb chaws. Tiam sis rau cov Neeg Nifais, qhov tseem ceeb rau cov uas Vaj Ntxwv Nau-as uas ua phem kav lawv, txoj kev hloov no yeej tseem ceeb rau lawv sab ntsuj plig thiab. Lawv twb pom tias ib tug vaj ntxwv tsis ncaj ncees tau ua rau nws cov neeg “ua phem” thiab raug “puas tsuaj” (Mauxiyas 29:17), es lawv “cia siab heev” xav tsis muaj ib tug uas muaj hwj chim li no. Txoj kev hloov no yuav cia lawv lav ris lawv txoj kev ncaj ncees thiab “ris [lawv] tus kheej tej kev txhaum” (Mauxiyas 29:38; kuj saib Lus Qhuab Qhia thiab Kev Khi Lus 101:78).
Tiam sis, thaum txiav cov vaj ntxwv txoj kev kav lawm ces cov Neeg Nifais tseem muaj teeb meem thiab. Muaj cov uas txawj ntxias neeg xws li Nihos thiab Alixais uas txhawb nqa tej lub tswv yim cuav, cov tsis ntseeg tau tsim txom Haiv Neeg Ntseeg, thiab lub Koom Txoos cov mej zeej ntau tau muab hlob thiab poob mus. Tiam sis “cov neeg uas txo hwj chim coj raws li Vajtswv” tau “nyob khov kho thiab ruaj nrees” txawm lawv raug dab tsi los xij (Amas 1:25). Thiab vim Mauxiyas tau hloov qhov no, lawv thiaj li “tawm lawv lub suab” kom pab lawv lub sawm fem ua zoo (Amas 2:6).
Tej lub Tswv Yim Kawm Vaj Lug Kub ntawm Yus Ib Leeg
Kuv yeej pab tau kuv zej zog ua zoo.
Tsib xyoos tom qab pib cov txiav txim txoj kev kav, twb muaj kev kub ntxhov uas yuav sim Mauxiyas txoj kev tshaj tawm tias feem ntau cov neeg lub suab yuav xaiv qhov yog (saib Mauxiyas 29:26). Qhov teeb meem no yog hais txog kev ywj siab teev ntuj: ib tug neeg hu ua Alixais xav “rhuav tshem [cov neeg] txoj cai thiab tej sam xeeb ntawm lub koom txoos” (Amas 2:4). Nej puas tau pom cov neeg uas xav rhuav txoj cai teev ntuj nyob hauv koj lub tseb chaws los sis koj zej zog? Koj kawm dab tsi los ntawm tej yam uas cov Neeg Nifais tau ua thaum muaj teeb meem li no? (saib Amas 2:1–7).
Nyaj muaj tej teeb meem tseem ceeb ntxiv nyob hauv koj zej zog. Koj yuav ua li cas, zoo li cov Neeg Nifais, xwv kom koj lub suab yuav koom nrog “cov neeg lub suab”? Tej zaum koj nyob hauv ib qho chaw uas cov neeg lub suab ua tsis taus dab tsi hauv lub tseem fwv; yog li ntawd, puas muaj lwm txoj kev uas koj ua tau kom pab koj zej zog?
Kuv txawj paub thiab xyeej tej lus qhuab qhia cuav.
Txawm yog Nihos lees hais tias nws qhia tej yam cuav, cov Neeg Nifais twb ntseeg nws tej lus tau ntau xyoo tom qab ntawd (saib Amas 1:15–16; 2:1–2; 14:14–18; 15:15; 21:4; 24:28). Vim li cas tib neeg nyiam Nihos tej lus qhia? Thaum koj nyeem Amas 1:2–4, saib seb koj puas paub tej lus cuav nyob hauv Nihos tej lus qhia; tej zaum koj yuav saib hais tias nws twb qhia tej lus cuav ntawd nrog rau tej yam uas ib feem muaj tseeb.
Nkide-oos twb tiv tau Nihos thaum nws “siv Vajtswv tej lus” (Amas 1:7, 9). Koj puas txawj xav txog tej nqe vaj lug kub uas qhia tias Nihos tej lus qhia tsis muaj tseeb? Nov yog ib txhia, tiam sis muaj ntau nqe ntxiv: Mathais 7:21–23; 2 Nifais 26:29–31; Mauxiyas 18:24–26; thiab Hilamas 12:25–26. Cov vaj lug kub no yuav pab koj li cas thaum koj tawm tsam tej lus cuav uas tib neeg qhia niaj hnub nim no?
Ib txoj kev ntxiv uas koj siv tau kom kawm Amas 1 yog kev muab Nihos thiab cov uas coj raws li nws (nqe 3–9, 16–20) piv rau “Vajtswv cov neeg” (nqe 25–30; kuj saib 2 Nifais 26:29–31). Koj yuav ua li cas kom ua neeg zoo li Vajtswv cov neeg ntxiv? Koj puas pom “tswv yim xib hwb cuav” thaum koj ua hauj lwm rau Vajtswv?
Yexus Khetos cov thwj tim tseeb tsis muab lawv lub siab tso rau tej kev nplua nuj.
Tshooj 1 thiab 4 hauv phau Amas piav txog ob lub sij hawm thaum lub Koom Txoos tau vam meej, tiam sis lub Koom Txoos cov mej zeej tsis tau ua zoo ib yam thaum lawv vam meej li ntawd. Koj kawm txog tej yam twg uas sib txawv? Raws li koj kawm los, koj yuav hais tias “cov neeg uas txo hwj chim coj raws li Vajtswv” (Amas 4:15) xav li cas txog kev nplua nuj thiab kev vam meej? Ua rau koj xav hais tias koj yuav hloov koj tus cwj pwm li cas?
“Vajtswv txoj lus” thiab “tej lus tim khawv tseeb tseeb” yeej ua rau neeg hloov siab.
Yog dab tsi uas ua rau Amas “tu siab heev” (Amas 4:15) nyob hauv Amas 4? Ib txhia yuav hais tias lub luag hauj lwm ua tus thawj txiav txim yog txoj hauj lwm zoo tshaj plaws kom kho tej teeb meem uas nws pom nyob hauv nws cov neeg. Tiam sis Amas xav tias yuav tsum muaj ib txoj kev zoo dua. Koj xav li cas txog nws txoj kev pab nws cov neeg? Tej zaum thaum koj kawm koj yuav xav txog tej yam ncaj ncees uas koj ua tau kom pab cov nyob ze koj; yog tias muaj li ntawd, cia li ua tej yam uas koj xav txog.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Amas 1:19–25
Tej zaum yuav zoo rau nej tsev neeg kawm txog tej yam twg uas lub Koom Txoos cov mej zeej tau ua thaum lawv raug tawm tsam hauv tej nqe no. Tej zaum nej yuav xav xyaum teb raws li tsim nyog teb thaum lwm tus tawm tsam peb txoj kev ntseeg. Tej zaum tej daim video Religious Freedom Videos yuav pab.
Amas 3:4
Cov Neeg Alixais xav qhia dab tsi rau lwm tus thaum lawv “muab ib lub cim ntaus rau lawv”? (saib Amas 3:4, 13). Peb txoj kev hnav khaub ncaws thiab kev coj cwj pwm qhia dab tsi rau lwm tus—tsis hais thaum peb txhob txwm ua los sis tsis txhob txwm ua los yog? Tej zaum yog ib lub sij hawm zoo rov qab nyeem “Dress and Appearance” nyob hauv For the Strength of Youth (2011), 6–8.
Amas 4:2–3
Tej yam twg tau “ua rau [peb] tsim dheev los nco txog [peb] tej dej num” uas yuav tsum ua rau Vajtswv? (Amas 4:3). Tej zaum yuav zoo kom qhia tej nqe no tom qab nej muab nej tsev neeg tsa thaum sawv ntxov. Ces nej yuav muaj cib fim sib tham txog qhov nyuaj kom tsim los thaum sawv ntxov yeej zoo li qhov teeb meem uas yog kev tsim los ntawm sab ntsuj plig.
Amas 4:10–11
Peb yuav ua li cas kom tsis txhob ua “ib yam cav loj dawm taw rau cov uas tsis tau zwm rau lub koom txoos”? (Amas 4:10). Tej zaum yuav zoo yog nej sib tham txog qhov uas peb yuav tsum ua tib zoo tsis txhob cia lwm tus, qhov tseem ceeb yog cov mej zeej ntawm lub Koom Txoos, ua tej yam cav loj dawm taw rau peb txoj kev vam meej ntawm sab ntsuj plig.
Amas 4:19
Xwv kom pab nej tsev neeg to taub nej zaj lus tim khawv muaj hwj chim npaum li cas, tej zaum nej yuav xav nug lawg txog ib lub sij hawm thaum ib tug neeg zaj lus tim khawv tau tshoov lawv lub siab heev. Vim li cas Amas tau xaiv siv lus tim khawv thiab Vajtswv txoj lus kom tshoov cov neeg lub siab? (kuj saib Amas 31:5). Vim li cas txoj kev no yeej zoo dua li lwm txoj kev uas tib neeg nyiam siv kom yaum lwm tus hloov siab. Puas muaj leej twg uas peb txhawb tau lawv txoj kev ntseeg lub zog thaum peb hais lus tim khawv rau lawv?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Kawm Zoo Dua Ntxiv ntawm Yus Ib Leeg
Ua koj lub neej raws li vaj lug kub qhia. Cia li xav seb tej dab neeg thiab tej lus qhia hauv vaj lug kub los yuav siv li cas hauv koj lub neej. Piv txwv hais tias, tej zaum koj yuav kawm tias tej yam uas muaj niaj hnub nim no thiab tej teeb meem uas cov Neeg Nifais muaj nyob hauv Amas 1–4 yeej zoo ib yam.
Amas thiab Alixais, los ntawm Scott M. Snow