1 Nim no thaum Mauxiyas tau ua li no tag lawm nws tau xa xov mus thoob plaws hauv thaj av huv tib si, rau tag nrho hauv cov neeg, xav paub lawv kev xav yuav xav tau seb tus twg yuav tsim nyog ua lawv tus vaj ntxwv.

2 Thiab tau muaj tias cov neeg lub suab tau los, hais tias: Peb xav kom koj tus tub Aloos los ua peb tus vaj ntxwv thiab peb tus thawj coj.

3 Nim no Aloos twb tau nce mus rau pem thaj av Nifais lawm, yog li ntawd vaj ntxwv tsis muaj peev xwm muab tau lub teb chaws cob rau nws; thiab Aloos los kuj tsis kam txais lub teb chaws los kav; thiab Mauxiyas cov tub los yeej tsis muaj ib tug uas yuav txaus siab los kav lub teb chaws.

4 Yog li ntawd vaj ntxwv Mauxiyas tau xa xov mus rau cov neeg dua; muaj tseeb tiag, nws twb sau ib co lus xa mus rau cov neeg. Thiab cov no yog tej lus uas tau sau, hais tias:

5 Saib seb, Au nej uas yog kuv cov neeg es, los sis kuv cov kwv tij es, vim kuv saib nej rau nqi zoo li ntawd, kuv xav kom nej yuav tsum xav txog qhov xwm txheej uas nej tau raug hu los ntaus tswv yim—vim nej xav muaj ib tug vaj ntxwv.

6 Nim no kuv tshaj tawm rau nej tias nws tus uas muaj cai ncaj nraim txais tau lub teb chaws tsis kam txais, thiab tsis txaus siab los kav lub teb chaws.

7 Thiab nim no yog hais tias yuav muab lwm tus los hloov nws chaw, saib seb kuv ntshai tias yuav muaj kev sib cav sib ceg sawv nyob hauv nej. Thiab leej twg yuav paub tsuas yog kuv tus tub xwb, tus uas lub teb chaws yog nws li, yuav npau taws thiab ntxias cov neeg no ib txhia lawv nws qab, uas yuav ua kom muaj tsov muaj rog thiab kev sib cav sib ceg nyob hauv nej, qhov uas yuav ua kom muaj nqaij ntuag ntshav nrog ntau thiab muab tus Tswv txoj kev pauv, muaj tseeb tiag, thiab yuav ua kom coob leej tej ntsuj plig puas tsuaj mus.

8 Nim no kuv hais rau nej tias cia peb ua neeg txawj ntse thiab xav txog tej yam no, vim peb tsis muaj cai yuav ua kom kuv tus tub puas tsuaj mus, thiab peb kuj tsis muaj ib qho cai yuav rhuav lwm tus yog nws ho raug xaiv los pauv nws qhov chaw.

9 Thiab yog kuv tus tub yuav tig rov qab mus rau nws txoj kev khav theeb thiab tej uas tsis muaj qab hau nws yeej yuav nco qab txog tej uas nws tau hais lawm, thiab los pom sam nws txoj cai rau lub teb chaws, uas yuav ua kom nws thiab cov neeg no ua kev txog txhaum ntau.

10 Thiab nim no cia peb ua neeg txawj ntse thiab ntsia yav tom hauv ntej rau tej yam no, thiab ua tej uas yuav ua kom muaj kev thaj yeeb rau cov neeg no.

11 Yog li ntawd kuv yuav ua nej tus vaj ntxwv hauv kuv lub neej uas tseem tshuav; txawm li ntawd los, cia peb xaiv tsa cov neeg txiav txim, los txiav txim rau cov neeg no raws li peb txoj kev cai; thiab peb yuav kho ua tshiab rau cov neeg no tej kev noj nyob, vim peb yuav xaiv tsa tej neeg txawj ntse los ua cov neeg txiav txim, cov uas yuav txiav txim rau cov neeg no raws li Vajtswv tej lus txib.

12 Nim no cia ib tug neeg raug Vajtswv txiav txim yuav zoo dua li neeg txiav txim, vim Vajtswv tej kev txiav txim mas yeej ncaj tas mus li, tiam sis neeg tej kev txiav txim mas yeej tsis ncaj tas mus li.

13 Yog li ntawd, yog hais tias mus tau es nej yuav muaj cov neeg ncaj ncees los ua nej tej vaj ntxwv, cov uas yuav txhim kho Vajtswv tej lus txib, thiab txiav txim rau cov neeg no raws li nws tej lus txib, muaj tseeb tiag, yog nej yuav muaj neeg los ua nej tej vaj ntxwv uas yuav ua tau ib yam li kuv txiv Npeyamis tau ua rau cov neeg no lawm—Kuv hais rau nej tias, yog muaj zoo li no tas mus li xwb ces nws yuav tsim nyog tias nej yuav tsum muaj vaj ntxwv los kav nej tas mus li.

14 Thiab kuv tus kheej kiag los twb tau ua hauj lwm tag lub dag lub zog thiab lub hwj chim uas kuv tau muaj, los qhia nej txog Vajtswv tej lus txib, thiab tsim kev thaj yeeb thoob plaws rau hauv thaj av, xwv kom tsis txhob muaj kev tsov kev rog los sis kev sib cav sib ceg, tsis muaj ua tub sab tub nyiag, thiab tsis muaj kev ua lim hiam, thiab tsis muaj kev tua neeg, thiab tsis muaj ib yam dab tsi txog txoj kev tsis ncaj ncees;

15 Thiab leej twg tau ua kev tsis ncaj ncees, kuv tau rau txim rau nws raws li txoj kev txhaum uas nws tau ua txhaum, raws li txoj kev cai uas peb tej yawg koob tau muab rau peb lawm.

16 Nim no kuv hais rau nej tias, vim tej neeg tag nrho yeej tsis ncaj nws tsis tsim nyog tias nej yuav muaj ib tug vaj ntxwv los sis coob tus vaj ntxwv los kav nej.

17 Vim saib seb, kev tsis ncaj ncees ntau npaum li cas yog ib tug vaj ntxwv phem tau ua txhaum, muaj tseeb tiag, thiab kev puas tsuaj loj npaum li cas!

18 Muaj tseeb tiag, nco ntsoov txog vaj ntxwv Nau-as, nws txoj kev phem thiab nws txoj kev qias, thiab nws cov neeg tej kev phem thiab tej kev qias. Saib seb txoj kev puas tsuaj loj npaum li cas tau los rau lawv; thiab kuj yog vim lawv tej kev tsis ncaj ncees lawv tau raug coj los mus rau hauv txoj kev poob cev qhev.

19 Thiab yog tus uas tsim lawv, uas paub tag nrho ib puas tsav yam, tsis tau los rhuav tshuam thiab qhov no los vim yog lawv txoj kev hloov siab lees txim tiag tiag, ces lawv yeej tseem nyob hauv txoj kev poob cev qhev los txog nim no.

20 Tiam sis saib seb, nws tau coj lawv dim vim lawv tau txo hwj chim rau nws; thiab vim lawv tau quaj tas zog thov rau nws nws thiaj tau coj lawv dim ntawm txoj kev poob cev qhev; thiab xws li no tus Tswv ua hauj lwm nrog nws lub hwj chim nyob rau tag nrho txhua txhia yam hauv noob neej, ncav nws txhais caj npab hlub rau lawv cov uas cia siab rau nws.

21 Thiab saib seb, nim no kuv hais rau nej, nej tsis muaj peev xwm rho tau tus vaj ntxwv phem tawm ntawm nws lub rooj zaum tsuas yog yuav muaj kev sib cav sib ceg ntau rau xwb, thiab muaj nqaij ntuag ntshav nrog ntau.

22 Vim saib seb, nws muaj nws tej phooj ywg hauv txoj kev tsis ncaj ncees, thiab nws ceev nws tej tub zov kev nyob ib puag ncig nws; thiab nws dua tej kev cai ntawm cov uas kav ncaj ncees ua ntej nws; thiab nws muab Vajtswv tej lus txib tsuj tuaj hauv qab xib taws;

23 Thiab nws ua dua tej kev cai tshiab, thiab xa lawv mus rau nws cov neeg, muaj tseeb tiag, tej kev cai uas ua raws li nws tus kheej tej kev phem; thiab yog leej twg tsis ua raws li nws tej kev cai nws ua kom raug puas tsuaj; thiab leej twg tawm tsam nws nws yuav xa nws cov tub rog mus ua rog tawm tsam lawv, thiab yog nws ua tau nws yuav ua kom lawv puas tsuaj; thiab ib tug vaj ntxwv tsis ncaj ncees yuav hloov tag nrho tej kev ncaj ncees li no.

24 Thiab nim no saib seb kuv hais rau nej, nws tsis tsim nyog tias tej kev qias li ntawd yuav los rau saum nej.

25 Yog li ntawd, nej cia li xaiv los ntawm cov neeg no tej suab, cov txiav txim, xwv kom nej yuav raug txiav txim raws li tej kev cai uas peb tej yawg koob tau muab rau nej, uas yog cov ncaj ncees, thiab yog cov uas tus Tswv txhais tes tau muab rau lawv lawm.

26 Nim no nws tsis nquag muaj tias cov neeg tej suab yuav xav tau ib yam dab tsi uas tsis raws li qhov uas yog; tiam sis nws nquag muaj rau cov neeg feem tsawg pheej xav tau qhov uas tsis yog; yog li ntawd nej yuav tau coj raws li qhov no thiab ua kom nws yog nej txoj kev cai—los ua nej tej hauj lwm los ntawm cov neeg tej suab.

27 Thiab yog thaum lub sij hawm los es cov neeg tej suab ho xaiv txoj kev tsis ncaj ncees, ces yog lub caij uas Vajtswv tej kev txiav txim yuav los rau nej; muaj tseeb tiag, thaum ntawd yog lub sij hawm uas nws yuav los xyuas nej nrog txoj kev puas tsuaj loj ib yam li uas nws twb tau los xyuas thaj av no lawm.

28 Thiab nim no yog nej muaj cov neeg txiav txim, thiab lawv tsis txiav txim rau nej raws li txoj kev cai uas tau muab, nej muaj peev xwm ua kom lawv yuav raug txiav txim los ntawm tus neeg txiav txim siab zog.

29 Yog nej tej neeg txiav txim uas siab zog tsis txiav txim ncaj, nej yuav kom nej cov neeg txiav txim qes zog ib cov tuaj sib sau ua ke, thiab lawv yuav txiav txim rau nej cov neeg txiav txim siab zog, raws li cov neeg tej suab.

30 Thiab kuv txib kom nej ua tej yam no nyob hauv txoj kev ntshai tus Tswv; thiab kuv txib kom nej ua tej yam no, thiab kom nej tsis txhob muaj vaj ntxwv; xwv kom yog cov neeg no ua kev txhaum thiab tej kev tsis ncaj ncees lawv yuav raug txais rov qab los rau saum lawv tej taub hau.

31 Vim saib seb kuv hais rau nej tias, neeg ntau leej tej kev txhaum tau raug muaj los ntawm lawv tej vaj ntxwv tej kev tsis ncaj ncees; yog li ntawd lawv tej kev tsis ncaj ncees tau raug txais rov qab los rau saum lawv cov vaj ntxwv tej taub hau.

32 Thiab nim no kuv xav tias txoj kev tsis xwm yeem no yuav tsum tsis txhob muaj nyob rau hauv thaj av no lawm, qhov tseem ceeb yog nyob hauv kuv cov neeg no; tiam sis kuv xav kom thaj av no yog ib thaj av uas muaj kev txim lij, thiab kom txhua tus neeg yuav zoo siab rau tej uas nws ua tau thiab tej kev muaj cai li lwm tus, ntev npaum li tus Tswv pom hum tias peb yuav nyob thiab muaj thaj av ua peb ntiag tug, muaj tseeb tiag, twb yuav ntev npaum li peb tej xeeb leej xeeb ntxwv tseem yuav nyob rau saum thaj av.

33 Thiab vaj ntxwv Mauxiyas tseem tau sau ntau yam ntxiv rau lawv, nthuav hlo rau lawv tag nrho tus vaj ntxwv ncaj ncees tej kev nyuaj siab thiab tej teeb meem, muaj tseeb tiag, tag nrho tej kev txhawj ntawm sab ntsuj plig rau lawv cov neeg, thiab tag nrho cov neeg tej kev yws rau lawv tus vaj ntxwv; thiab nws tau piav tag nrho ib puas yam tsav rau lawv.

34 Thiab nws tau hais rau lawv tias tej yam no yuav tsum tsis txhob muaj; tiam sis lub nra yuav tsum los rau tag nrho cov neeg sawv daws, xwv kom txhua tus neeg yuav ris nws feem.

35 Thiab nws kuj tau nthuav rau lawv tag nrho tej kev tsis zoo uas lawv tau ua hauj lwm nyob hauv qab, los ntawm uas cia ib tug vaj ntxwv tsis ncaj ncees kav lawv;

36 Muaj tseeb tiag, tag nrho nws tej kev tsis ncaj ncees thiab tej kev qias, thiab tag nrho tej kev tsov kev rog, thiab kev sib cav sib ceg, thiab tej kev nqaij ntuag ntshav nrog, thiab txoj kev ua tub sab tub nyiag, thiab txoj kev lim hiam, thiab txoj kev ua txhaum kev nkauj kev nraug, thiab txhua yam kev tsis ncaj ncees uas tsis muaj peev xwm muab hais ib yam zuj zus—qhia rau lawv tias tej yam no yuav tsum tsis txhob muaj, tias lawv twb tsis raws li Vajtswv tej lus txib.

37 Thiab nim no tau muaj tias, tom qab uas vaj ntxwv Mauxiyas tau xa tej yam no mus rau cov neeg lawv tau raug yaum paub txog qhov tseeb ntawm nws cov lus.

38 Yog li ntawd lawv tau tso lawv tej kev xav yuav ib tug vaj ntxwv, thiab tau rais los cia siab heev tias kom txhua tus neeg yuav tsum muaj tug sib npaug zos thoob plaws hauv thaj av; muaj tseeb tiag, thiab txhua tus neeg tau kam txaus siab teb rau nws tus kheej tej kev txog txhaum.

39 Yog li ntawd, tau muaj tias lawv tau txoos lawv tus kheej tuaj ua ke tej pab pawg thoob plaws hauv thaj av, tuaj pov lawv tej suab txog qhov uas saib cov twg yuav los ua lawv cov neeg txiav txim, los txiav txim rau lawv raws li txoj kev cai uas tau muab rau lawv; thiab lawv tau zoo siab heev vim yog txoj kev txim lij uas tau muab pub rau lawv.

40 Thiab lawv tau loj hlob muaj zog nyob hauv txoj kev hlub rau Mauxiyas; muaj tseeb tiag, lawv tau saib nws tsim txiaj dua li lwm tus neeg; vim lawv tsis tau ntsia nws zoo li ib tug nom uas nrhiav kom nplua nuj, muaj tseeb tiag, rau txoj kev nplua nuj uas ua puas tsuaj rau tus ntsuj plig; vim nws tsis tau kom lawv them nyiaj rau nws, los sis tsis tau nyiam kev nqaij ntuag ntshav nrog; tiam sis nws tau tsim kev thaj yeeb nyob rau hauv thaj av, thiab nws tau pub rau nws cov neeg tias lawv yuav tsum raug coj dim ntawm txhua yam kev poob cev qhev; yog li ntawd lawv tau saib nws tsim txiaj, muaj tseeb tiag, tshaj qhov yuav ntsuas tau.

41 Thiab tau muaj tias lawv tau xaiv tsa cov neeg txiav txim los kav lawv, los sis los txiav txim rau lawv raws li txoj kev cai; thiab lawv tau ua li no thoob plaws rau txhua thaj av.

42 Thiab tau muaj tias Amas tau raug xaiv los ua thawj tug thawj tub txiav txim, nws kuj yog tus pov thawj hlob thiab, nws txiv tau muab txoj hauj lwm rau nws, thiab muab nws ua tus saib xyuas txog tag nrho tej kev ua dej num ntawm lub koom txoos.

43 Thiab nim no tau muaj tias Amas tau mus raws li tus Tswv tej kev, thiab nws tau coj nws tej lus txib, thiab nws tau txiav txim ncaj ncees; thiab tau muaj kev thaj yeeb tsis tu ncua thoob plaws hauv thaj av.

44 Thiab li no cov neeg txiav txim tau pib kav thoob plaws txhua qhov hauv thaj av Xalahelas, nyob tag nrho hauv cov neeg uas hu ua cov Neeg Nifais; thiab Amas yog thawj tug thiab thawj tub txiav txim.

45 Thiab nim no tau muaj tias nws txiv tau tuag, muaj yim caum thiab ob xyoos, tau ua neej nyob kom Vajtswv tej lus txib muaj puv npo.

46 Thiab tau muaj tias Mauxiyas kuj tau tuag lawm thiab, nyob rau hauv peb caug peb xyoos ntawm nws txoj kev kav, muaj rau caum thiab peb xyoos; uas suav tag nrho, tsib puas thiab cuaj xyoos txij li lub sij hawm Lihais tau ncaim Yeluxalees.

47 Thiab tag li no rau txoj kev kav ntawm cov Neeg Nifais tej vaj ntxwv; thiab tag li no rau Amas lub neej, tus uas nrhiav tsim lawv lub koom txoos.