1 Thiab tau muaj tias Amuloos raug cov Neeg Lamas tus vaj ntxwv tej qhov muag nyiam; yog li ntawd, cov Neeg Lamas tus vaj ntxwv tau pub rau nws thiab nws cov kwv tij kom lawv yuav xaiv tsa tej xib hwb rau nws cov neeg, muaj tseeb tiag, rau saum cov neeg uas nyob hauv thaj av Seloos, thiab hauv thaj av Sailos, thiab hauv thaj av Amuloos.

2 Vim cov Neeg Lamas tau tag nrho cov thaj av no los ua lawv tug; yog li ntawd, cov Neeg Lamas tus vaj ntxwv tau xaiv tsa vaj ntxwv kav tag nrho tej thaj av no huv tib si.

3 Thiab nim no cov Neeg Lamas tus vaj ntxwv lub npe hu ua Lamas, raug hu mus raws li nws txiv lub npe; thiab yog li ntawd nws thiaj hu ua vaj ntxwv Lamas. Thiab nws tau ua vaj ntxwv kav ib co neeg coob.

4 Thiab nws tau xaiv tsa xib hwb los ntawm Amuloos cov kwv tij nyob rau txhua thaj av uas nws cov neeg nyob; thiab yog li no Nifais yam lus thiaj tau pib raug muab qhia nyob thoob plaws hauv cov Neeg Lamas.

5 Thiab lawv yog ib cov neeg ib leeg ua phooj ywg rau ib leeg; txawm li ntawd los lawv tsis paub Vajtswv; thiab Amuloos cov kwv tij los yeej tsis qhia lawv ib yam dab tsi txog tus Tswv lawv tus Vajtswv, thiab tsis qhia Mauxes txoj kev cai; lawv kuj tsis qhia Anpinadais tej lus rau lawv thiab;

6 Tiam sis lawv tau qhia lawv kom lawv yuav tsum khaws lawv tej phau ceev xwm txheej, thiab tias kom lawv ib leeg yuav sau ntawv rau ib leeg.

7 Thiab li no cov Neeg Lamas tau pib nplua nuj, thiab tau pib ib leeg ua luam rau ib leeg thiab tau pib loj hlob zoo, thiab tau pib ua ib cov neeg txawj ntxias thiab txawj ntse, yog rau txoj kev txawj ntse ntawm lub ntiaj teb, muaj tseeb tiag, ib cov neeg txawj dag ntxias heev, nyiam ua txhua yam kev phem thiab tub sab, tsuas yog tseg kiag hauv lawv cov kwv tij xwb.

8 Thiab nim no tau muaj tias Amuloos tau pib siv cai rau saum Amas thiab nws cov kwv tij, thiab tau pib tsim txom nws, thiab ua kom nws cov me nyuam yuav tsum tsim txom lawv cov me nyuam.

9 Vim Amuloos tau paub Amas, tias nws tau yog vaj ntxwv cov pov thawj ib tug, thiab nws yog tus uas ntseeg Anpinadais tej lus thiab tau raug raws tawm ntawm vaj ntxwv xub ntiag, thiab yog li ntawd nws tau npau taws rau nws; nws raug ywj rau ntawm vaj ntxwv Lamas, tiam sis nws tseem tau siv cai rau saum lawv, thiab muab tej hauj lwm rau lawv, thiab tso tej neeg saib hauj lwm zov lawv.

10 Thiab tau muaj tias lawv tej kev txom nyem hnyav heev li uas lawv tau pib quaj sib sib zog thov Vajtswv.

11 Thiab Amuloos tau txib lawv tias lawv yuav tsum tsum lawv tej kev quaj thov; thiab nws tau tso tub zov kev zov lawv saib xyuas lawv, tias yog nrhiav pom leej twg hu Vajtswv yuav tsum raug ua kom tuag.

12 Thiab Amas thiab nws cov neeg thiaj tsis tsa lawv tej suab rau tus Tswv lawv tus Vajtswv, tiam sis tau nchuav lawv tej siab tej ntsws rau nws; thiab nws twb paub txog tej kev xav ntawm lawv tej siab.

13 Thiab tau muaj tias tus Tswv lub suab tau los rau lawv nyob hauv lawv tej kev txom nyem, hais tias: Cia li tsa nej tej taub hau thiab cia li zoo siab, vim kuv paub txog tej lus sib khi uas nej tau khi rau kuv lawm; thiab kuv yuav sib khi lus nrog kuv cov neeg thiab coj lawv dim ntawm txoj kev poob cev qhev.

14 Thiab kuv kuj yuav ua rau tej nra uas nyob saum nej tej xub pwg kom yooj yim, xwv kom nej yuav tsis hnov tias lawv nyob saum nej nraub qaum, thaum uas nej tseem poob cev qhev; thiab kuv yuav ua li no xwv kom nej yuav sawv ua tim khawv rau kuv txij li no mus, thiab xwv kom nej yuav paub tseeb tias kuv, tus Tswv uas yog Vajtswv, yeej los saib xyuas kuv cov neeg thaum lawv muaj kev txom nyem.

15 Thiab nim no tau muaj tias tej nra hnyav uas raug tso saum Amas thiab nws cov kwv tij tau raug ua kom sib; muaj tseeb tiag, tus Tswv tau txhawb lawv lub dag lub zog ces lawv thiaj ris tau lawv tej nra hnyav sib sib, thiab lawv tau kam ua zoo siab hlo thiab ua siab ntev nyiaj rau tag nrho tej uas tus Tswv lub siab nyiam.

16 Thiab tau muaj tias lawv txoj kev ntseeg thiab lawv txoj kev ua siab ntev nyiaj ntau kawg li ces tus Tswv lub suab tau rov qab los rau lawv dua, hais tias: Cia li zoo siab hlo, vim tag kis kuv yuav coj nej tawm ntawm txoj kev ua tauj ua qhev.

17 Thiab nws tau hais rau Amas tias: Koj yuav tsum ua cov neeg no ntej, thiab kuv yuav mus nrog koj thiab coj cov neeg no tawm ntawm txoj kev poob cev qhev.

18 Nim no tau muaj tias Amas thiab nws cov neeg tau sau lawv tej tsiaj ua ke thaum tsaus ntuj, thiab lawv tej qoob loos thiab; muaj tseeb tiag, lawv twb sau lawv tej pab tsiaj los ua ke tag nrho sij hawm ib hmos li.

19 Thiab thaum sawv ntxov tus Tswv tau ua kom muaj ib qho kev tsaug zog heev los rau cov Neeg Lamas, muaj tseeb tiag, thiab tag nrho lawv tej neeg saib hauj lwm tau tsaug zog looj lom.

20 Thiab Amas thiab nws cov neeg tau ncaim mus rau hauv hav zoov; thiab thaum lawv tau tsiv mus tau ib hnub lawm lawv tau rub lawv tej tsev pheeb suab ntaub rau hauv ib lub dawm, thiab lawv tau hu ua lub dawm Amas, vim nws tau coj lawv kev hauv hav zoov.

21 Muaj tseeb tiag, thiab nyob rau hauv lub dawm Amas lawv tau nchuav lawv tej kev ua tsaug rau Vajtswv vim nws tau hlub tshua rau lawv, thiab tau ua yooj yim rau lawv tej nra hnyav, thiab tau coj lawv dim tawm ntawm txoj kev poob cev qhev, vim lawv tau nyob hauv txoj kev poob cev qhev, thiab yeej tsis muaj leej twg yuav tso tau lawv dim tsuas yog tus Tswv lawv tus Vajtswv xwb.

22 Thiab lawv ua tsaug rau Vajtswv, muaj tseeb tiag, tag nrho lawv tej txiv neej thiab tag nrho lawv tej poj niam thiab tag nrho lawv tej me nyuam uas txawj hais lus tau tsa lawv tej suab qhuas lawv tus Vajtswv.

23 Thiab nim no tus Tswv tau hais rau Amas tias: Koj maj thiab coj koj thiab cov neeg no tawm ntawm thaj av no, vim cov Neeg Lamas tau tsim lawm thiab tau caum koj qab; yog li ntawd koj cia li tawm ntawm thaj av no mus, thiab kuv yuav cheem cov Neeg Lamas rau ntawm lub dawm no xwv kom lawv yuav tuaj caum cov neeg no tsis tau ntxiv lawm.

24 Thiab tau muaj tias lawv tau ncaim tawm ntawm lub dawm mus lawm, thiab pib lawv txoj kev tsiv rau hauv hav zoov.

25 Thiab tom qab uas lawv tau mus rau hauv hav zoov tau kaum ob hnub lawm lawv tau los txog hauv thaj av Xalahelas; thiab vaj ntxwv Mauxiyas kuj tau tos txais lawv nrog txoj kev xyiv fab.