1 Thiab nim no, tau muaj tias Amas, tus uas tau khiav tawm ntawm vaj ntxwv Nau-as cov tub qhe, tau hloov siab lees nws tej kev txhaum thiab tej kev tsis ncaj ncees, thiab tau mus ntsiag to rau hauv cov neeg, thiab tau pib qhia Anpinadais tej lus—

2 Muaj tseeb tiag, txog tej uas yuav muaj los, thiab kuj qhia txog txoj kev sawv hauv qhov tuag rov qab los ntawm tus tuag lawm, thiab txoj kev txhiv dim ntawm cov neeg, uas yuav tau raug rhawv kom muaj dhau los ntawm lub hwj chim, thiab tej kev txom nyem, thiab Khetos txoj kev tuag, thiab nws txoj kev sawv hauv qhov tuag rov qab los thiab txoj kev sawv nce mus rau saum ntuj ceeb tsheej.

3 Thiab coob npaum li yuav coob tau uas xav hnov nws cov lus nws txawm tau qhia rau. Thiab nws tau qhia rau lawv ntsiag to, xwv kom vaj ntxwv yuav tsis paub txog tej no. Thiab coob tug tau ntseeg nws tej lus.

4 Thiab tau muaj tias txhua txhia tus uas tau ntseeg nws tau mus rau tom qhov chaw uas hu ua Maumoos, uas tau txais nws lub npe los ntawm tus vaj ntxwv, uas nyob ntawm tej ciam dej ciam av ntawm thaj av uas raug tej tsiaj qus dhia puas tsuaj tag, los ntawm tej sij hawm los sis tej caij.

5 Nim no, nyob ntawm Maumoos tau muaj ib lub pas dej huv huv, thiab Amas tau mus tid, nyob ze ntawm cov dej tau muaj ib koog me nyuam ntoo me, qhov uas nws tau mus nkaum nws tus kheej thaum nruab hnub nraim ntawm vaj ntxwv tej kev nrhiav.

6 Thiab tau muaj tias txhua txhia tus uas ntseeg nws tau mus mloog nws tej lus rau tid.

7 Thiab tau muaj tias tom qab uas tau ntau hnub lawm txawm tau muaj ib pab neeg coob tau sib sau tuaj ua ke rau ntawm qhov chaw Maumoos, tuaj mloog Amas tej lus. Muaj tseeb tiag, tag nrho sawv daws cov uas ntseeg nws tej lus tau sib sau ua ke, mloog nws. Thiab nws tau qhia lawv, thiab tau qhuab qhia txoj kev hloov siab lees txim, thiab txoj kev txhiv dim, thiab txoj kev ntseeg tus Tswv rau lawv.

8 Thiab tau muaj tias nws tau hais rau lawv tias: Saib seb, ntawm no yog cov dej Maumoos (vim lawv thiaj tau raug hu li ntawd) thiab nim no, li uas nej xav los rau hauv Vajtswv pab, thiab raug hu ua nws cov neeg, thiab ib leeg txaus siab ris ib leeg tej nra, xwv kom lawv thiaj li yuav sib;

9 Muaj tseeb tiag, thiab txaus siab nyuaj siab nrog cov uas nyuaj siab; muaj tseeb tiag, thiab nplij cov uas xav tau txoj kev nplij siab, thiab sawv ua Vajtswv tej tim khawv rau txhua lub caij nyoog thiab rau tag nrho txhua txhia yam, thiab nyob tag nrho txhua qhov chaw uas nej yuav nyob, kom mus txog thaum tuag, xwv kom nej yuav raug txhiv dim los ntawm Vajtswv, thiab raug suav nrog cov uas nyob hauv thawj txoj kev sawv hauv qhov tuag rov qab los, xwv kom nej yuav tau txoj sia nyob mus ib txhis—

10 Nim no kuv hais rau nej tias, yog tias qhov no yog yam uas nej tej siab xav tau, ces nej tseem yuav muaj dab tsi thaiv qhov uas ua kev cai raus dej nyob hauv tus Tswv lub npe, kom ua ib qhov tim khawv rau nws tias nej tau khi ib lo lus sib khi nrog nws, tias nej yuav ua hauj lwm rau nws thiab coj nws tej lus txib, xwv kom nws yuav nchuav nws tus Ntsuj Plig nplua mias rau ntxiv saum nej?

11 Thiab nim no thaum cov neeg tau hnov tej lus no, lawv tau npuaj lawv tej tes rau kev xyiv fab, thiab qw hais tias: Qhov no yog qhov uas peb tej siab xav tau.

12 Thiab nim no tau muaj tias Amas txawm tau coj Helas, nws yog thawj tug, thiab tau mus thiab tau sawv rau hauv cov dej, thiab quaj thov, hais tias: Au tus Tswv es, nchuav koj tus Ntsuj Plig los rau saum koj tus tub qhe, xwv kom nws yuav ua txoj hauj lwm no nrog lub siab dawb huv.

13 Thiab thaum nws tau hais tej lus no tas lawm, tus Tswv tus Ntsuj Plig tau los nyob saum nws, thiab nws tau hais tias: Helas, kuv muab koj ua kev cai raus dej, muaj cai los ntawm Vajtswv tus uas Muaj Hwj Chim Loj Kawg Nkaus, kom ua ib qho tim khawv tias koj tau nkag rau ib qho kev sib khi lus los ua hauj lwm rau nws mus txog thaum koj tuag li ntawm sab cev nqaij daim tawv; thiab thov kom tus Tswv tus Ntsuj Plig nchuav los rau saum koj; thiab thov kom nws pub txoj sia nyob mus ib txhis rau koj, dhau los ntawm txoj kev txhiv dim ntawm Khetos, tus uas nws tau npaj txij li thaum ntuj tsim teb raug los lawm.

14 Thiab tom qab uas Amas tau hais cov lus no tas lawm, tag nrho Amas thiab Helas nkawd raug faus ntais rau hauv dej; thiab nkawd tau sawv thiab tau tawm zoo siab hlo hauv dej los, uas muaj tus Ntsuj Plig puv npo.

15 Thiab ntxiv, Amas tau coj lwm tus, thiab tau mus zaum ob rau hauv cov dej, thiab muab nws ua kev cai raus dej raws li thawj tug, tsuas yog nws tsis tau muab nws tus kheej raus rau hauv cov dej ntxiv lawm xwb.

16 Thiab nws tau muab txhua tus uas tau mus rau ntawm qhov chaw Maumoos ua kev cai raus dej zoo li no; thiab lawv muaj kwv yees ncua li ob puas thiab plaub leeg; muaj tseeb tiag, thiab lawv tau ua kev cai raus dej nyob hauv cov dej Maumoos, thiab muaj tus Tswv txoj kev zoo puv npo.

17 Thiab lawv tau raug hu ua Vajtswv lub koom txoos, los sis Khetos lub koom txoos, txij li lub sij hawm ntawd los. Thiab tau muaj tias txhua tus uas tau ua kev cai raus dej los ntawm Vajtswv lub hwj chim thiab txoj cai tau raug muab ntxiv rau nws lub koom txoos.

18 Thiab tau muaj tias Amas, tau muaj cai los ntawm Vajtswv, tau tsa tej pov thawj; twb tsa ib tug pov thawj rau ib pab uas muaj tsib caug leej nws tau tsa los qhuab qhia rau lawv, thiab qhia lawv txog tej yam ntawm Vajtswv lub nceeg vaj.

19 Thiab nws tau txib lawv tias lawv yuav tsum tsis txhob qhia ib yam dab tsi tsuas yog tej yam uas nws tau qhia lawm xwb, thiab tej uas tau hais los ntawm cov yaj saub dawb huv tej qhov ncauj xwb.

20 Muaj tseeb tiag, nws twb tau txib lawv tias lawv yuav tsum tsis txhob qhuab qhia dab tsi tsuas yog qhia txoj kev hloov siab lees txim thiab txoj kev ntseeg hauv tus Tswv, tus uas tau txhiv nws cov neeg lawm xwb.

21 Thiab nws tau txib lawv tias yuav tsum tsis txhob muaj kev sib cav sib ceg ib leeg rau ib leeg, tiam sis lawv yuav tsum ntsia tom ntej nrog tib lub qhov muag, muaj tib txoj kev ntseeg thiab tib txoj kev ua kev cai raus dej, muab lawv tej siab los koom ua ke hauv txoj kev ua pab ua pawg thiab hauv txoj kev ib leeg hlub ib leeg.

22 Thiab li no nws tau txib kom lawv qhuab qhia. Thiab xws li no lawv tau rais los ua Vajtswv cov me nyuam.

23 Thiab nws tau txib lawv tias lawv yuav tsum hwm hnub caiv, thiab ceev nws kom dawb huv, thiab txhua txhia hnub lawv kuj yuav tsum ua tus Tswv lawv tus Vajtswv tsaug.

24 Thiab nws kuj tau txib lawv tias cov pov thawj uas nws tau tsa yuav tsum siv lawv tej tes ua hauj lwm yug lawv.

25 Thiab tau muaj ib hnub nyob hauv txhua txhua lub lim tiam tau muab tshwj tseg cia xwv kom lawv yuav sib sau ua ke qhia cov neeg, thiab teev tiam tus Tswv lawv tus Vajtswv, thiab ntxiv, nquag tuaj sib sau ua ke npaum li lawv muaj hwj chim ua tau.

26 Thiab kom cov pov thawj tsis txhob tos rau cov neeg rau lawv txoj kev pab; tiam sis rau lawv tej hauj lwm lawv yuav tsum tau txais Vajtswv txoj kev zoo, xwv kom lawv yuav loj hlob muaj zog nyob hauv sab Ntsuj Plig, muaj Vajtswv txoj kev txawj ntse, xwv kom lawv yuav qhia nrog Vajtswv lub hwj chim thiab txoj cai.

27 Thiab ntxiv Amas tau txib tias cov neeg ntawm lub koom txoos yuav tsum sib faib lawv tej khoom, txhua tus raws nraim li qhov uas nws tau muaj; yog tus uas ho muaj nplua mias nws yuav tsum tau faib ntau zog; thiab ntawm tus uas muaj tsawg, tsuas thov kom muab tsawg; thiab yuav tsum muab rau tus uas nws tsis muaj.

28 Thiab li no lawv yuav tsum faib lawv tej khoom raws li lawv lub siab thiab qhov xav tau zoo rau Vajtswv, thiab rau cov pov thawj uas ho txom nyem, muaj tseeb tiag, thiab rau txhua tus uas xav tau, uas liab qab.

29 Thiab nws tau hais li no rau lawv, vim tau raug Vajtswv txib; thiab lawv tau ua mus ncaj nraim rau ntawm tus Tswv, ib leeg faib rau ib leeg tsis hais sab cev nqaij daim tawv los sis sab ntsuj plig raws li lawv tej kev xav tau thiab xav yuav.

30 Thiab nim no tau muaj tias tag nrho ib puas yam tsav no tau ua nyob hauv Maumoos, muaj tseeb tiag, nyob ntawm cov dej Maumoos, nyob hauv cov hav zoov uas nyob ze cov dej Maumoos; muaj tseeb tiag, qhov chaw Maumoos, cov dej Maumoos, tej hav zoov Maumoos, zoo nkauj cuag cas rau lawv cov uas muaj lub qhov muag uas tau los paub txog lawv tus Txhiv Dim nyob ntawd; muaj tseeb tiag, thiab lawv tau koob hmoov cuag cas, vim lawv yuav hu nkauj qhuas nws mus ib txhis li.

31 Thiab tej yam no tau ua tiav nyob ntawm tej ciam dej ciam av ntawm thaj av, xwv kom vaj ntxwv yuav tsis paub txog tej yam no.

32 Tiam sis saib seb, tau muaj tias vaj ntxwv, tau nrhiav pom ib qho kev txawv txav nyob hauv cov neeg, tau xa nws cov tub qhe mus soj lawv. Yog li ntawd nyob rau hnub uas lawv tau sib sau tuaj ua ke mloog tus Tswv txoj lus lawv txawm raug nrhiav tau rau vaj ntxwv paub.

33 Thiab nim no vaj ntxwv tau hais tias Amas tau txhib kom cov neeg sawv tawm tsam nws; yog li ntawd nws tau xa nws cov tub rog mus ua kom lawv puas tsuaj.

34 Thiab tau muaj tias Amas thiab tus Tswv cov neeg tau raug ceeb toom txog vaj ntxwv cov tub rog txoj kev tuaj; yog li ntawd lawv tau nqa lawv tej tsev pheeb suab ntaub thiab coj lawv tej tsev neeg thiab tau ncaim mus rau hauv hav zoov.

35 Thiab lawv tau muaj ze li plaub puas thiab tsib caug leej.