1 Thiab tau muaj tias Leehais thiab nws cov neeg tau rov qab mus rau tom lub nroog Nifais, thiab tau rov qab pib nyob hauv thaj av muaj kev thaj yeeb dua.

2 Thiab tau muaj tias tom qab uas tau ntau hnub lawm cov Neeg Lamas raug pib txhib chim nkaug cov Neeg Nifais dua, thiab lawv tau pib tuaj rau hauv tej ciaj ciam ntawm thaj av ib puag ncig.

3 Nim no lawv tsis kam tua lawv, vim yog tej lus lav tseg uas lawv tus vaj ntxwv tau lav rau Leehais lawm; tiam sis lawv pheej ntaus Leehais cov neeg tej plhu, thiab siv cai rau saum lawv; thiab tau pib muab tej nra hnyav rau saum lawv tej nraub qaum, thiab tsav lawv ib yam li lawv tsav ib tug luj ruam—

4 Muaj tseeb tiag, tau ua tag nrho tej no xwv kom tus Tswv txoj lus yuav muaj tiav los.

5 Thiab nim no cov Neeg Nifais tej kev kub ntxhov muaj hnyav, thiab yeej tsis muaj kev uas lawv yuav dim tau ntawm lawv tej tes, vim cov Neeg Lamas tau vij lawv txhua txhia sab.

6 Thiab tau muaj tias cov neeg tau pib yws yws rau vaj ntxwv vim lawv tej kev kub ntxhov; thiab lawv tau pib xav mus tawm tsam rog nrog lawv. Thiab lawv tau xeeb txob vaj ntxwv heev nrog lawv tej lus yws; yog li ntawd nws tau pub rau lawv kom lawv mus ua raws li lawv tej kev xav.

7 Thiab lawv tau sib sau tuaj ua ke dua, thiab hnav lawv tej ris tsho tua rog, thiab tau tawm mus tawm tsam cov Neeg Lamas mus raws kom lawv khiav tawm ntawm lawv thaj av mus.

8 Thiab tau muaj tias cov Neeg Lamas tau kov yeej lawv, thiab tau tav lawv rov qab, thiab tau tua lawv ntau leej.

9 Thiab nim no tau muaj ib qho kev nyuaj siab thiab kev quaj ntsuag kua muag los loj nyob hauv Leehais cov neeg, tej poj ntsuam quaj ntsuag rau lawv tej txiv, tej tub thiab tej ntxhais quaj ntsuag rau lawv txiv, thiab tej kwv tij quaj ntsuag rau tej kwv tij.

10 Nim no tau muaj poj ntsuam coob heev nyob hauv thaj av, thiab lawv tau quaj heev ib hnub dhau ib hnub, vim txoj kev ntshai heev txog cov Neeg Lamas tau los rau saum lawv.

11 Thiab tau muaj tias lawv tej kev quaj tsis tu ncua tau txhib Leehais cov neeg uas seem tshuav kom npau taws rau cov Neeg Lamas; thiab lawv tau rov qab mus ua rog dua, tiam sis lawv raug muab tav rov qab los dua, raug poob tsam ntau.

12 Muaj tseeb tiag, lawv tau rov mus dua uas yog zaum peb, thiab tau raug ib yam nkaus li qub; thiab cov uas tsis raug tuag tau rov qab los dua rau tom lub nroog Nifais.

13 Thiab lawv tau txo lawv hwj chim mus ti nkaus hauv tej plua av, muab lawv tus kheej ywj rau tus quab ua tauj ua qhev, cia lawv tus kheej raug ntaus, thiab raug tav mus rau ub rau no, thiab raug ris nra hnyav, raws li lawv tej yeeb ncuab siab nyiam.

14 Thiab lawv twb tau txo lawv hwj chim qis hauv kev txo hwj chim; thiab lawv tau quaj thov heev kawg rau Vajtswv; muaj tseeb tiag, lawv tau quaj tag hnub li rau lawv tus Vajtswv xwv kom nws yuav coj lawv dim ntawm lawv tej kev txom nyem.

15 Thiab nim no tus Tswv hnov lawv tej lus quaj thov qeeb vim yog lawv tej kev tsis ncaj ncees; txawm li ntawd los tus Tswv tau hnov lawv tej lus quaj thov, thiab tau pib ua rau cov Neeg Lamas tej siab kom mos muag ces lawv tau pib txo kom lawv tej nra hnyav sib me ntsis tuaj; tiam sis tus Tswv tsis tau pom zoo coj lawv dim ntawm txoj kev ua qhev.

16 Thiab tau muaj tias lawv tau maj mam pib vam meej nyob hauv thaj av, thiab tau pib cog noob qoob loos nplua mias ntau ntxiv, thiab yug tej pab tsiaj, thiab tsiaj txhu, ces lawv thiaj tsis tau nyiaj tshaib yoo nqhis.

17 Nim no tau muaj ib co poj niam coob, coob dua li muaj txiv neej; yog li ntawd vaj ntxwv Leehais tau txib tias txhua tus txiv neej yuav tsum tau faib kev pab rau tej poj ntsuam thiab lawv tej me nyuam, xwv kom lawv yuav tsis piam sij nrog kev tshaib; thiab lawv tau ua li no vim yog lawv cov neeg coob uas tau raug tuag lawm.

18 Nim no Leehais cov neeg tau sau ua ib ke ntau npaum li yuav ua tau, thiab tau saib xyuas lawv tej qoob loos thiab lawv tej pab tsiaj;

19 Thiab tus vaj ntxwv twb tsis kam nws tus kheej nyob sab ntsa loog sab nraud, tsuas yog nws coj nws tej tub zov nyas nrog nws xwb, ntshai ntshis tias tsam muaj tej yam dab tsi es tsam nws ho poob mus rau hauv cov Neeg Lamas tes.

20 Thiab nws tau kom nws cov neeg yuav tsum zov thaj av ib puag ncig, saib los ntawm tej yam dab tsi es lawv thiaj txhom tau cov pov thawj uas tau khiav mus rau hauv hav zoov, cov uas tau nyiag cov Neeg Lamas tej ntxhais, thiab uas tau txob ib qho kev puas tsuaj loj los rau saum lawv.

21 Vim lawv tau xav txhom lawv xwv kom lawv yuav tau rau txim rau lawv; vim lawv tau los rau hauv thaj av Nifais thaum tsaus ntuj, thiab tau ris lawv tej qoob loos thiab lawv tej khoom muaj nuj nqis ntau yam mus lawm; yog li ntawd lawv thiaj tau zov tos lawv.

22 Thiab tau muaj tias tsis tau muaj kev sib thab nyob nruab nrab ntawm cov Neeg Lamas thiab Leehais cov neeg ntxiv lawm, mus txog ntua thaum lub sij hawm uas Amoos thiab nws cov kwv tij tau tuaj rau hauv thaj av.

23 Thiab tus vaj ntxwv tau nyob sab rooj vag sab nraud ntawm lub nroog nrog nws tus tub zov kev, tau nrhiav pom Amoos thiab nws cov kwv tij; thiab xav tias lawv yog Nau-as cov pov thawj yog li ntawd nws tau kom lawv raug txhom thiab khi, thiab muab pov rau hauv qhov taub. Thiab yog tias lawv yog Nau-as cov pov thawj ces ntshe nws twb yuav tau ua kom lawv raug muab ua kom tuag.

24 Tiam sis thaum uas nws nrhiav pom tias lawv tsis yog, tiam sis lawv yog nws cov kwv tij, thiab tau tuaj nram thaj av Xalahelas tuaj, nws tau xyiv fab heev kawg nkaus li.

25 Nim no vaj ntxwv Leehais tau xa, ua ntej Amoos tuaj, ib pab neeg tsawg mus nrhiav thaj av Xalahelas; tiam sis lawv nrhiav tsis tau nws, thiab lawv tau poob zoo rau tom hav zoov.

26 Txawm li ntawd los, lawv nrhiav tau ib thaj av uas muaj neeg nyob; muaj tseeb tiag, ib thaj av uas tau muaj pob txha qhuav npog saud; muaj tseeb tiag, ib thaj av uas tau muaj neeg nyob thiab tau raug puas tsuaj tas lawm; thiab lawv, tau xav tias nws yog thaj av Xalahelas, tau rov qab los rau thaj av Nifais, tau los txog tej ciam teb ntawm thaj av ua ntej ob peb hnub Amoos tuaj.

27 Thiab lawv tau coj ib phau ceev xwm txheej nrog lawv los, twb yog ib phau ceev xwm txheej ntawm cov neeg uas lawv nrhiav tau tej pob txha; thiab nws tau raug muab sau rau saum tej phiaj quav hlau.

28 Thiab nim no Leehais rov qab xyiv fab dua thaum kawm paub los ntawm Amoos lub qhov ncauj tias vaj ntxwv Mauxiyas muaj ib qho txiaj ntsim los ntawm Vajtswv, los ntawm qhov ntawd nws muaj peev xwm txhais tau tej lus sau li ntawd; muaj tseeb tiag, thiab Amoos los kuj zoo siab tib yam thiab.

29 Tiam sis Amoos thiab nws cov kwv tij tau muaj kev tu siab vim coob coob leej ntawm lawv cov kwv tij tau raug tua lawm;

30 Thiab tias vaj ntxwv Nau-as thiab nws cov pov thawj tseem tau ua kom cov neeg ua ntau yam kev txog txhaum thiab tej kev tsis ncaj ncees tawm tsam Vajtswv; thiab lawv kuj tau tu siab rau Anpinadais txoj kev tuag; thiab rau Amas txoj kev ncaim thiab cov neeg uas tau nrog nws mus lawm, cov uas tau tsa Vajtswv ib lub koom txoos dhau los ntawm Vajtswv lub zog thiab lub hwj chim, thiab kev ntseeg rau tej lus uas Anpinadais tau hais lawm.

31 Muaj tseeb tiag, lawv tau nyuaj siab rau lawv txoj kev ncaim mus, vim lawv tsis paub tias lawv tau khiav ua qhov twg lawm. Nim no lawv yuav tau zoo siab hlo koom nrog lawv, vim lawv tus kheej los twb tau khi ib lo lus nrog Vajtswv ua hauj lwm rau nws thiab coj nws tej lus txib.

32 Thiab nim no txij li thaum Amoos tuaj, vaj ntxwv Leehais kuj tau khi ib lo lus nrog Vajtswv, thiab kuj muaj coob leej ntawm nws cov neeg thiab, yuav ua hauj lwm rau nws thiab coj nws tej lus txib.

33 Thiab tau muaj tias vaj ntxwv Leehais thiab coob leej ntawm nws cov neeg tau xav ua kev cai raus dej; tiam sis tsis tau muaj leej twg uas nyob hauv thaj av uas muaj txoj cai los ntawm Vajtswv. Thiab Amoos tsis kam ua yam no, xav tias nws tus kheej yog ib tug tub qhe tsis tsim nyog.

34 Yog li ntawd lub sij hawm ntawd lawv tsis tau tsa ib lub koom txoos rau lawv, tos ntsoov rau tus Tswv tus Ntsuj Plig. Nim no lawv tau xav rais los mus zoo li Amas thiab nws cov kwv tij, cov uas tau khiav mus rau hauv hav zoov.

35 Lawv tau xav ua kev cai raus dej kom ua ib qho tim khawv thiab ua ib qho pov thawj tias lawv txaus siab ua hauj lwm rau Vajtswv nrog tag nrho lawv tej siab; txawm li ntawd los lawv tseem tau ncua lub sij hawm; thiab ib zag txog lawv txoj kev ua kev cai raus dej mam muab nyob tom qab no.

36 Thiab nim no tag nrho Amoos, thiab nws cov neeg, thiab vaj ntxwv Leehais thiab nws cov neeg tej kev kawm, yog yuav coj lawv dim tawm ntawm cov Neeg Lamas tes thiab tawm ntawm txoj kev poob cev qhev.