1 Nim no tau muaj tias tau muaj coob leej ntawm tiam hluas uas tsis to taub vaj ntxwv Npeyamis tej lus, tseem yog me nyuam yaus thaum lub sij hawm nws tau hais rau nws cov neeg; thiab lawv tsis ntseeg lawv tej yawg koob tej kev li kev cai.

2 Lawv tsis ntseeg yam uas tau hais txog txoj kev sawv hauv qhov tuag rov qab los ntawm cov tuag, thiab lawv kuj tsis ntseeg txog txoj kev Khetos yuav los.

3 Thiab nim no vim lawv txoj kev tsis ntseeg lawv thiaj tsis muaj peev xwm to taub Vajtswv txoj lus; thiab lawv tej siab tau tawv qhwb qhawv.

4 Thiab lawv tsis kam ua kev cai raus dej; thiab lawv kuj tsis kam koom nrog lub koom txoos. Thiab lawv tau yog ib cov neeg uas nrug nyob raws li lawv tej kev ntseeg, thiab tau ua twj ywm li ntawd mus li, twb nyob hauv lawv txoj kev txhaum thiab kev ntiaj teb; vim lawv tsis kam hu rau tus Tswv lawv tus Vajtswv.

5 Thiab nim no nyob hauv Mauxiyas txoj kev kav teb kav chaw lawv twb tsis muaj coob li ib nrab ntawm Vajtswv cov neeg; tiam sis vim txoj kev tsis sib haum ntawm cov kwv tij lawv tau rais los muaj coob ntxiv tuaj.

6 Vim tau muaj tias lawv tau coj yuam kev coob leej nrog lawv tej lus dag ntxias, cov uas nyob hauv koom txoos, thiab tau ua kom lawv ua txhaum ntau yam; yog li ntawd tau rais los tsim nyog tias cov uas tau ua txhaum, uas nyob hauv lub koom txoos, yuav tsum raug ntuas los ntawm lub koom txoos.

7 Thiab tau muaj tias lawv tau raug coj los rau cov pov thawj, thiab tau coj los rau cov pov thawj los ntawm cov xib hwb; thiab cov pov thawj tau coj lawv los rau Amas, tus uas yog tus pov thawj hlob.

8 Nim no vaj ntxwv Mauxiyas twb tau muab txoj cai rau Amas kav lub koom txoos.

9 Thiab tau muaj tias Amas tsis tau paub txog lawv; tiam sis tau muaj coob tug tim khawv nkaug lawv; muaj tseeb tiag, cov neeg tau sawv thiab tau ua tim khawv txog lawv tej kev tsis ncaj ncees coob heev.

10 Nim no twb tsis tau muaj ib yam zoo li no tshwm sim rau hauv lub koom txoos li, yav tas los lawm; yog li ntawd Amas tau ntxhov siab, thiab nws tau kom lawv yuav tsum raug coj mus cuag vaj ntxwv.

11 Thiab nws tau hais rau vaj ntxwv tias: Saib seb, nov yog coob leej uas peb tau coj tuaj rau koj, cov uas tau raug lawv cov kwv tij ntxo; muaj tseeb tiag, thiab lawv tau raug coj tuaj ntawm ntau yam kev tsis ncaj ncees. Thiab lawv tsis kam hloov siab lees txim ntawm lawv tej kev tsis ncaj ncees; yog li ntawd peb tau coj lawv tuaj rau koj, xwv kom koj yuav txiav txim rau lawv raws li lawv tej kev txhaum.

12 Tiam sis vaj ntxwv Mauxiyas tau hais rau Amas tias: Saib seb, kuv tsis txiav txim rau lawv; yog li ntawd kuv muab lawv rau hauv koj tes los txiav txim.

13 Thiab nim no Amas tau ntxhov siab dua; thiab nws thiaj tau mus thiab thov tus Tswv saib nws yuav ua li cas txog yam xwm no, vim nws tau ntshai tias tsam nws yuav ua txhaum nyob ntawm Vajtswv lub qhov muag.

14 Thiab tau muaj tias tom qab uas nws tau nchuav tag nrho nws lub siab rau Vajtswv lawm, tus Tswv lub suab tau los rau nws hais tias:

15 Koj tau koob hmoov, Amas, thiab lawv cov uas tau ua kev cai raus dej nyob hauv cov dej Maumoos los tau koob hmoov. Koj tau koob hmoov vim yog koj txoj kev ntseeg heev rau kuv tus tub qhe Anpinadais tej lus xwb.

16 Thiab lawv tau koob hmoov vim yog lawv tej kev ntseeg heev rau tej lus uas koj tau hais rau lawv xwb.

17 Thiab koj tau koob hmoov vim koj tau tsa ib lub koom txoos nyob hauv cov neeg no; thiab lawv yuav raug loj hlob, thiab lawv yuav yog kuv cov neeg.

18 Muaj tseeb tiag, cov neeg no uas txaus siab ris kuv lub npe tau koob hmoov; vim lawv yuav raug hu los ntawm kuv lub npe; thiab lawv yog kuv li.

19 Thiab vim koj tau nug kuv txog cov uas ua txhaum, koj tau koob hmoov.

20 Koj yog kuv tus tub qhe; thiab kuv khi lus rau koj tias koj yuav tau txoj sia nyob mus ib txhis; thiab koj yuav ua hauj lwm rau kuv thiab tawm mus nyob hauv kuv lub npe, thiab yuav sau kuv cov yaj los ua ke.

21 Thiab nws tus uas yuav hnov kuv lub suab yuav yog kuv tus yaj; thiab koj yuav txais nws los rau hauv lub koom txoos, thiab kuv kuj yuav txais nws tib yam.

22 Vim saib seb, lub no yog kuv lub koom txoos; tus uas ua kev cai raus dej yuav tsum ua kev cai raus dej rau txoj kev hloov siab lees txim. Thiab tus uas koj txais yuav tsum ntseeg hauv kuv lub npe; thiab kuv yuav zam txim dawb paug rau nws.

23 Vim tus uas tau ris lub ntiaj teb no tej kev txog txhaum twb yog kuv; vim tus uas tsim lawv twb yog kuv; thiab kuv twb yog tus uas pub rau tus uas ntseeg mus txog thaum kawg ib qhov chaw nyob ntawm kuv sab xis.

24 Vim saib seb, lawv yuav raug hu los ntawm kuv lub npe; thiab yog lawv paub kuv lawv yeej yuav tawm los, thiab yuav muaj ib qho chaw nyob mus ib txhis ntawm kuv sab xis.

25 Thiab yuav tau muaj tias thaum suab raj nrov zaum ob thaum ntawd lawv cov uas ib txwm tsis paub kuv yuav tau tawm los thiab yuav sawv ntawm kuv xub ntiag.

26 Thiab thaum ntawd lawv yuav paub tias kuv yog tus Tswv lawv tus Vajtswv, tias kuv yog lawv tus Txhiv Dim; tiam sis lawv yuav tsis raug txhiv kom dim.

27 Thiab thaum ntawd kuv yuav lees rau lawv tias kuv yeej ib txwm tsis paub lawv; thiab lawv yuav ncaim mus rau hauv lub qhov cub uas cig mus ib txhis uas tau npaj rau tus dab thiab nws cov tim tswv.

28 Yog li ntawd kuv hais rau koj, tias nws tus uas pheej tsis hnov kuv lub suab, koj tsis txhob txais rau hauv kuv lub koom txoos tib yam, vim kuv yuav tsis txais nws nyob rau thaum hnub kawg.

29 Yog li ntawd kuv hais rau koj tias, Cia li mus; thiab tus uas ua txhaum rau kuv, koj yuav tsum txiav txim rau nws raws li tej kev txhaum uas nws tau ua lawm; thiab yog tias nws lees nws tej kev txhaum rau koj thiab kuv, thiab hloov siab lees txim tiag tiag ntawm nws lub siab, koj yuav tsum zam txim rau nws, thiab kuv los kuj yuav zam txim rau nws thiab.

30 Muaj tseeb tiag, thiab npaum li kuv cov neeg yuav nquag hloov siab lees txim kuv yuav zam txim rau lawv tej kev txhaum uas lawv ua rau kuv.

31 Thiab nej ib leeg kuj yuav tsum zam txim rau ib leeg rau nej tej kev txhaum; vim kuv hais tseeb rau koj tias, tus uas tsis zam txim rau nws tej kwv tij zej zog tej kev txhaum thaum nws hais tias nws hloov siab lees txim, tus ntawd tab tom coj nws tus kheej los mus raug txim tib yam nkaus.

32 Nim no kuv hais rau koj tias, Cia li mus; thiab tus uas tsis kam hloov siab lees txim rau nws tej kev txog txhaum tsis txhob suav tus ntawd nrog kuv cov neeg; thiab yam no yuav tsum raug coj txij li lub sij hawm no mus.

33 Thiab tau muaj tias thaum Amas tau hnov tej lus no nws tau muab lawv sau cia xwv kom nws yuav tau lawv, thiab xwv kom nws yuav txiav txim rau cov neeg ntawm lub koom txoos raws li Vajtswv tej lus txib.

34 Thiab tau muaj tias Amas tau mus thiab tau txiav txim rau cov uas tau raug txhom ua kev tsis ncaj ncees, raws li tus Tswv txoj lus.

35 Thiab cov uas tau hloov siab ntawm lawv tej kev txhaum thiab tau lees tej txim ntawd, nws tau muab lawv los xyaw nrog lub koom txoos cov neeg;

36 Thiab cov uas tsis kam lees lawv tej kev txhaum thiab tsis hloov siab ntawm lawv tej kev tsis ncaj ncees, tus ntawd raug tsis muab xyaw nrog lub koom txoos cov neeg, thiab lawv tej npe tau raug nrho tawm.

37 Thiab tau muaj tias Amas tau coj kav tag nrho tej xwm txheej ntawm lub koom txoos; thiab lawv tau pib rov qab muaj kev thaj yeeb thiab vam meej heev nyob hauv tej dej num ntawm lub koom txoos, taug kev ceev faj zoo rau tus Tswv, txais coob leej, thiab ua kev cai raus dej rau coob leej.

38 Thiab nim no Amas thiab nws cov phooj ywg ua hauj lwm uas saib xyuas lub koom txoos tau ua tag nrho tej yam no, rau siab mus kev ntawm txhua yam zoo, qhia Vajtswv txoj lus nyob hauv txhua yam, tiv qees txhua yam kev txom nyem, thaum raug cov uas tsis zwm rau hauv Vajtswv lub koom txoos tsim txom.

39 Thiab lawv tau ntuas lawv cov kwv tij; thiab lawv kuj tau raug ntuas, txhua tus los ntawm Vajtswv txoj lus, raws li nws tej kev txog txhaum, los sis rau tej kev txhaum uas nws tau ua, raug Vajtswv txib kom thov Vajtswv tsis txhob tso tseg li, thiab ua tsaug rau tag nrho txhua txhia yam.