1 Nim no Amas, tau raug tus Tswv ceeb toom tias vaj ntxwv Nau-as cov tub rog yuav tuaj tawm tsam lawv, thiab tau ua kom nws cov neeg paub, yog li ntawd lawv tau sau lawv tej pab tsiaj los ua ke, thiab tau muab lawv tej qoob loos, thiab tau ncaim mus rau hauv hav zoov ua ntej vaj ntxwv Nau-as cov tub rog.

2 Thiab tus Tswv tau txhawb lawv lub dag lub zog, xwv kom vaj ntxwv Nau-as cov neeg yuav tsis muaj peev xwm tuaj caum tau lawv rhuav kom lawv puas tsuaj.

3 Thiab lawv tau khiav yim hnub mus rau hauv hav zoov.

4 Thiab lawv tau los txog ib thaj av, muaj tseeb tiag, twb yog ib thaj av zoo nkauj heev thiab zoo nyob heev, ib thaj av uas muaj dej huv huv.

5 Thiab lawv tau rub lawv tej tsev pheeb suab ntaub, thiab tau pib ua liaj teb, thiab tau pib ua vaj tse; muaj tseeb tiag, lawv tau nquag, thiab tau ua hauj lwm tas zog mus li.

6 Thiab cov neeg tau xav kom Amas ua lawv tus vaj ntxwv, vim nws cov neeg tau nyiam nws.

7 Tiam sis nws tau hais rau lawv tias: Saib seb, nws tsis tsim nyog tias peb yuav tsum muaj ib tug vaj ntxwv; vim tus Tswv tau hais li no: Nej yuav tsum tsis txhob saib ib tug siab dua li lwm tus, los sis ib tug tsis txhob xav tias nws zoo dua li lwm tus; yog li ntawd kuv hais rau nej tias tsis tsim nyog tias nej yuav tsum muaj ib tug vaj ntxwv.

8 Txawm li ntawd los, yog nws mus tau tias nej yuav muaj tej neeg ncaj ncees tsis tu ncua los ua nej tej vaj ntxwv nws yeej zoo rau nej muaj tau ib tug vaj ntxwv.

9 Tiam sis nco qab ntsoov txoj kev tsis ncaj ntawm vaj ntxwv Nau-as thiab nws cov pov thawj; thiab kuv tus kheej tau raug mag hauv ib roog ntxiab, thiab tau ua ntau yam uas qias nyob ntawm tus Tswv lub qhov muag, uas tau ua rau kuv hloov siab lees txim mob heev;

10 Txawm li ntawd los, tom qab uas muaj ntau yam kev txom nyem, tus Tswv tau hnov kuv tej lus quaj thov, thiab tau teb kuv tej lus thov, thiab tau muab kuv ua ib rab cuab yeej nyob hauv nws tes coj nej coob leej los paub txog nws qhov tseeb.

11 Txawm li ntawd los, qhov no kuv tsis tau khav, vim kuv tsis tsim nyog yuav khav txog kuv tus kheej.

12 Thiab nim no kuv hais rau nej tias, nej tau raug kav tsis ncaj los ntawm vaj ntxwv Nau-as, thiab tau ua tauj ua qhev rau nws thiab nws cov pov thawj, thiab tau raug coj mus rau hauv txoj kev tsis ncaj ncees los ntawm lawv; yog li ntawd nej tau raug khi nrog txoj kev tsis ncaj ncees tej hlua.

13 Thiab nim no thaum nej tau raug coj dim los ntawm Vajtswv lub hwj chim tawm ntawm tej hlua no; muaj tseeb tiag, twb tawm ntawm vaj ntxwv Nau-as thiab nws cov neeg tes, thiab kuj dim ntawm txoj kev tsis ncaj ncees tej hlua, yog li ntawd kuv xav kom nej yuav nyob ruaj nrees hauv txoj kev ywj siab no uas nej tau raug ua kom nyob ywj siab, thiab kom nej tsis txhob cia siab rau ib tug neeg twg los ua ib tug vaj ntxwv kav nej.

14 Thiab tsis txhob cia siab rau ib tug twg los ua nej tus xib hwb los sis tus qhuab qhia, tsuas yog nws yog ib tug neeg ntawm Vajtswv, taug ntshis nws tej kev thiab coj nws tej lus txib xwb.

15 Amas tau qhia nws cov neeg li no, tias txhua tus neeg yuav tsum hlub nws tej kwv tij zej zog ib yam li nws tus kheej, xwv kom tsis txhob muaj kev sib cav sib ceg nyob hauv lawv.

16 Thiab nim no, Amas tau yog lawv tus pov thawj hlob, nws tau yog tus tsim lawv lub koom txoos.

17 Thiab tau muaj tias tsis muaj leej twg txais tau txoj cai los tshaj tawm los sis qhuab qhia tsuas yog los ntawm Vajtswv dhau los ntawm nws xwb. Yog li ntawd nws tau tsa tag nrho lawv cov pov thawj thiab tag nrho lawv tej xib hwb; thiab tsis tau tsa ib tug twg tsuas yog lawv cov uas yog neeg ncaj ncees xwb.

18 Yog li ntawd lawv tau saib xyuas lawv cov neeg, thiab tau qhia lawv tej yam txog txoj kev ncaj ncees.

19 Thiab tau muaj tias lawv tau pib huaj vam heev nyob rau hauv thaj av; thiab lawv tau hu thaj av ua Helas.

20 Thiab tau muaj tias lawv tau zeej noob thiab huaj vam heev nyob hauv thaj av Helas; thiab lawv tau ua ib lub nroog, uas lawv tau muab hu ua nroog Helas.

21 Txawm li ntawd los, tus Tswv pom tias tsim nyog qhuab qhia nws cov neeg; muaj tseeb tiag, nws sim lawv tej kev ua siab ntev thiab lawv tej kev ntseeg.

22 Txawm li ntawd los—tus uas muab nws txoj kev cia siab tso rau nws tus ntawd yuav raug tsa sawv nyob rau hnub kawg. Muaj tseeb tiag, thiab yuav muaj li rau cov neeg no.

23 Vim saib seb, kuv qhia rau nej paub tias lawv tau raug coj mus rau hauv txoj kev poob cev qhev, thiab tsis muaj leej twg yuav muaj peev xwm tso tau lawv dim tiam sis tsuas yog tus Tswv lawv tus Vajtswv xwb, muaj tseeb tiag, twb yog Anplaham thiab Ixaj thiab Yakhauj tus Vajtswv.

24 Thiab tau muaj tias nws tau tso lawv dim, thiab tau ua rau lawv pom nws lub hwj chim uas loj kawg nkaus, thiab lawv tej kev zoo siab mas ntau kawg li.

25 Vim saib seb, tau muaj tias thaum lawv tseem nyob hauv thaj av Helas, muaj tseeb tiag, nyob hauv lub nroog Helas, thaum tseem tab tom ua teb ib ncig, saib seb ib pab tub rog ntawm cov Neeg Lamas tau tuaj nyob hauv tej ciam teb ntawm thaj av.

26 Nim no tau muaj tias Amas cov kwv tij tau khiav ntawm lawv tej teb, thiab tau sib sau tuaj ua ke rau hauv lub nroog Helas; thiab lawv tau txhawj ntshai heev vim txoj kev cov Neeg Lamas tshwm tuaj.

27 Tiam sis Amas tau tawm mus thiab tau sawv nrog lawv, thiab yaum lawv tias kom lawv tsis txhob txhawj ntshai, tiam sis lawv yuav tsum nco ntsoov tus Tswv lawv tus Vajtswv thiab nws yeej yuav pab lawv.

28 Yog li ntawd lawv tau tsum lawv tej kev ntshai, thiab tau pib quaj thov rau tus Tswv kom nws yuav nplij cov Neeg Lamas tej siab, xwv kom lawv yuav tseg lawv, thiab lawv tej poj niam, thiab lawv tej me nyuam txoj sia.

29 Thiab tau muaj tias tus Tswv tau nplij cov Neeg Lamas tej siab. Thiab Amas thiab nws cov kwv tij tau tawm mus thiab coj lawv tus kheej mus rau hauv lawv tes; thiab cov Neeg Lamas tau txais thaj av ntawm Helas ua lawv tug.

30 Nim no cov Neeg Lamas tej tub rog, uas tau raws vaj ntxwv Leehais cov neeg qab, tau poob zoo rau hauv hav zoov tau ntau hnub.

31 Thiab saib seb, lawv nrhiav tau vaj ntxwv Nau-as cov pov thawj, nyob hauv ib qho chaw uas lawv hu ua Amuloos; thiab lawv tau pib muab thaj av Amuloos ua lawv tug thiab tau pib ua liaj teb.

32 Nim no tus thawj coj ntawm cov pov thawj npe hu ua Amuloos.

33 Thiab tau muaj tias Amuloos tau thov cov Neeg Lamas; thiab nws kuj tau xa lawv tej poj niam, uas yog cov Neeg Lamas tej ntxhais, mus thov lawv cov nus, xwv kom lawv tsis txhob ua kom lawv cov txiv puas tsuaj.

34 Thiab cov Neeg Lamas tau muaj kev hlub rau Amuloos thiab nws cov kwv tij, thiab tsis tau ua kom lawv puas tsuaj, vim yog lawv tej poj niam.

35 Thiab Amuloos thiab nws cov kwv tij tau koom nrog cov Neeg Lamas, thiab lawv tau yos nyob hauv hav zoov nrhiav thaj av Nifais thaum lawv nrhiav pom thaj av Helas, uas Amas thiab nws cov kwv tij nyob.

36 Thiab tau muaj tias cov Neeg Lamas tau cog lus rau Amas thiab nws cov kwv tij tias, yog lawv yuav qhia txoj kev uas coj mus rau thaj av Nifais rau lawv ces lawv yuav pub lawv txoj sia thiab txoj kev ywj siab rau lawv.

37 Tiam sis tom qab uas Amas tau qhia txoj kev uas coj mus rau thaj av Nifais rau lawv tas lawm cov Neeg Lamas txawm tsis ceev lawv tej lus cog; tiam sis lawv tso tub zov kev rau ib puag ncig thaj av Helas, zov Amas thiab nws cov kwv tij.

38 Thiab lawv cov uas seem tshuav tau mus rau tom thaj av Nifais; thiab ib feem ntawm lawv tau rov qab mus rau thaj av Helas, thiab kuj tau coj cov tub zov nyas uas raug tseg rau hauv thaj av tej poj niam thiab tej me nyuam nrog lawv.

39 Thiab cov Neeg Lamas tus vaj ntxwv tau pub rau Amuloos kom nws ua ib tug vaj ntxwv thiab ib tug kav rau saum nws cov neeg, uas tau nyob hauv thaj av Helas; txawm li ntawd los nws yuav tsis muaj hwj chim ua dab tsi uas tsis raws li cov Neeg Lamas tus vaj ntxwv lub siab nyiam.