1 Thiab nim no tau muaj tias thaum Anpinadais tau hais tej lus no tas lawm, vaj ntxwv tau txib cov pov thawj kom muab nws txhom thiab kom nws yuav tsum raug muab tua.

2 Tiam sis tau muaj ib tug nyob hauv lawv uas muaj npe hu ua Amas, nws kuj yog Nifais ib tug xeeb ntxwv. Thiab nws yog ib tug neeg hluas, thiab nws ntseeg tej lus uas Anpinadais tau hais, vim nws tau paub txog txoj kev tsis ncaj uas Anpinadais tau ua tim khawv txog nkaug lawv; yog li ntawd nws tau pib thov vaj ntxwv kom nws tsis txhob npau taws rau Anpinadais, tiam sis kom cia nws tawm mus nrog kev thaj yeeb.

3 Tiam sis vaj ntxwv haj yam npau taws heev, thiab tau kom Amas raug ntiab tawm ntawm lawv mus, thiab tau xa nws cov tub qhe raws nws kom lawv muab nws tua.

4 Tiam sis nws tau khiav ua lawv ntej thiab tau mus nkaum nws tus kheej xwv kom lawv nrhiav tsis tau nws. Thiab nws tau mus nkaum tau ntau hnub tau sau tag nrho tej lus uas Anpinadais tau hais.

5 Thiab tau muaj tias vaj ntxwv tau kom nws cov tub zov nyas los vij Anpinadais thiab txhom nws; thiab lawv muab nws khi thiab muab nws pov rau hauv qhov taub.

6 Thiab tom qab peb hnub, uas tau sab laj nrog nws cov pov thawj, nws tau kom coj Anpinadais rov qab los ntawm nws.

7 Thiab nws tau hais rau nws tias: Anpinadais, peb nrhiav tau ib txoj kev liam txim nkaug koj, thiab koj tsim nyog tuag.

8 Vim koj tau hais tias Vajtswv tus kheej yuav nqis los nrog noob neej nyob; thiab nim no, vim qhov no koj yuav raug muab tua tsuas yog koj yuav thim tag nrho tej lus phem uas koj tau hais txog kuv thiab kuv cov neeg lawm xwb.

9 Nim no Anpinadais tau hais rau nws tias: Kuv hais rau koj, kuv yuav tsis thim tej lus uas kuv tau hais rau koj txog cov neeg no, vim lawv yeej muaj tseeb; thiab xwv kom koj yuav paub qhov tseeb ntawm lawv kuv thiaj tau cia kuv tus kheej kom kuv tau poob rau hauv koj tes.

10 Muaj tseeb tiag, thiab kuv yuav tiv kom mus txog thaum tuag, thiab kuv yuav tsis thim kuv tej lus, thiab tej lus ntawd yuav sawv ua ib qho tim khawv nkaug nej. Thiab yog nej muab kuv tua nej yuav txo cov ntshav uas tsis muaj txim, thiab qhov no kuj yuav sawv ua ib qho tim khawv nkaug nej nyob rau hauv hnub kawg.

11 Thiab nim no vaj ntxwv Nau-as twb yuav luag tso nws, vim nws tau ntshai Anpinadais tej lus; vim nws tau ntshai tias tsam Vajtswv tej kev txiav txim yuav los rau saum nws.

12 Tiam sis cov pov thawj tau tsa lawv tej suab nkaug nws, thiab tau pib liam nws hais tias: Nws tau saib tsis taus tus vaj ntxwv. Yog li ntawd tus vaj ntxwv tau raug txhib kom npau taws rau nws, thiab nws tau muab nws rau luag xwv kom nws yuav raug muab tua.

13 Thiab tau muaj tias lawv tau ntes nws thiab tau muab nws khi, thiab muab tw taws los nplawm nws daim tawv nqaij, muaj tseeb tiag, twb mus txog thaum tuag.

14 Thiab nim no thaum tej nplaim taws tau pib kub nws, nws tau quaj rau lawv hais tias:

15 Saib seb, ib yam li uas nej tau ua rau kuv, ces yuav tau muaj tias nej tej xeeb leej xeeb ntxwv yuav ua kom ntau tus yuav raug tej mob uas kuv raug, twb yuav yog tej mob ntawm txoj kev tuag ntawm hluav taws; thiab tej no los yog vim lawv ntseeg hauv txoj kev cawm seeg ntawm tus Tswv lawv tus Vajtswv.

16 Thiab yuav tau muaj tias nej yuav raug txhua yam kab mob kev nkeeg vim yog nej tej kev tsis ncaj ncees.

17 Muaj tseeb tiag, thiab nej yuav raug nplawm txhua txhia sab, thiab yuav raug raws khiav thiab tawg ri niab mus rau ub rau no, twb yuav zoo ib yam li ib pab tsiaj qus uas raug tej tsiaj qus thiab heev raws khiav.

18 Thiab nyob rau hnub ntawd nej yuav raug raws tua, thiab nej yuav raug ntes los ntawm nej tej yeeb ncuab tes, thiab ces nej yuav raug txom nyem, ib yam li kuv raug, txoj kev mob ntawm txoj kev tuag ntawm hluav taws.

19 Vajtswv ua pauj rau cov uas ua rau nws cov neeg puas tsuaj li no. Au Vajtswv es, txais kuv tus ntsuj plig lauj.

20 Thiab nim no, thaum Anpinadais tau hais cov lus no tas lawm, nws tau ntshau ntshov, tau raug kev tuag los ntawm hluav taws; muaj tseeb tiag, tau raug muab tua pov tseg vim nws tsis kam tso Vajtswv tej lus txib tseg, tau muab qhov tseeb ntawm nws cov lus ntaus cim cia los ntawm nws txoj kev tuag.