“Rau Hli Ntuj 1–7. Amas 5–7: ‘Puas Ua rau Nej lub Siab Hloov Loj Heev Zoo Li No?’”Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Rau Hli Ntuj 1–7. Amas 5–7,” Los, Nrog Kuv Mus—Rau Ib Leeg thiab Tsev Neeg: 2020
Muaj Neeg uas Nco Ntsoov Koj, los ntawm Jon McNaughton
Rau Hli Ntuj 1–7
Amas 5–7
“Puas Ua rau Nej lub Siab Hloov Loj Heev Zoo Li No?”
Amas 5–7 yuav pab koj xav txog koj txoj kev hloov siab los ntseeg Yexus Khetos. Thaum koj nyeem, cia li sau ntawv txog tej yam uas tus Ntsuj Plig qhia koj.
Sau Ntawv txog Koj tej Kev Tshoov Siab
Amas tsis tau paub txog txoj kev phais mob pauv lub plawv uas cawm tau ib tug neeg txoj sia hauv lub caij nyoog no vim lawv muab lub plawv uas mob pauv siv ib lub plawv uas zoo. Tiam sis nws twb paub txog ib txoj kev muab “lub siab hloov” (Amas 5:26)—yog ib txoj kev uas tus Cawm Seej muab ib lub neej ntawm sab ntsuj plig tshiab rau peb, zoo li peb “yug dua tshiab” (saib Amas 5:14, 49). Amas twb paub lawm tias kev hloov siab no yeej yog qhov uas cov Neeg Nifais xav tau. Ib txhia nplua nuj thiab ib txhia pluag, ib txhia muab hlob thiab ib txhia txo hwj chim, ib txhia yog neeg tsim txom thiab ib txhia yog cov uas raug tsim txom (saib Amas 4:6–15). Tiam sis lawv txhua tus yuav tsum los cuag Yexus Khetos kom thiaj txais kev kho mob—ib yam li peb txhua tus. Txawm peb nrhiav kev kom kov yeej kev muab hlob los sis kom nyiaj kev raug txom nyem, Amas zaj lus yeej zoo ib yam: “Cia li los thiab tsis txhob ntshai” (Amas 7:15). Cia tus Cawm Seej hloov ib lub siab uas tawv, muaj kev txhaum, los sis muaj mob pauv ua ib lub siab uas txo hwj chim, dawb huv, thiab tshiab.
Tej lub Tswv Yim Kawm Vaj Lug Kub ntawm Yus Ib Leeg
Kuv yuav tsum txais tau—thiab muaj tas li—ib txoj kev hloov loj hauv kuv lub siab.
Tej lus nug uas Amas tau nug cov neeg Xalahelas, uas muaj nyob hauv Amas 5:14–33, pab tau koj paub koj xav li cas txog koj tus kheej thiab to taub tias qhov uas yus “lub siab hloov loj heev” tas koj lub neej txhais li cas. Thawj Tswj Hwm M. Russell Ballard piav txog qhov uas tej lus nug no muaj nqis heev: “Kuv yuav tsum ib sij siv sij hawm nug kuv tus kheej seb ‘Kuv ua li cas?’ Zoo li yus xam phaj yus tus kheej. … Thaum kuv xam phaj kuv tus kheej, kuv nyiam nyeem thiab xav txog cov lus nyob hauv phau Amas tshooj tsib” (“Rov Qab Los thiab Txais Tau,” Ensign or Liahona, Tsib Hlis Ntuj 2017, 64).
Xav seb puas xav nyeem Amas tej lus nug zoo li koj xam phaj koj tus kheej thiab saib koj lub siab zoo li cas. Tej zaum koj yuav xav sau ntawv txog koj tej lus teb rau tej lus nug ntawd. Koj txais tej kev tshoov siab ua li cas vim koj xam phaj koj tus kheej?
Kuj saib Dale G. Renlund, “Preserving the Heart’s Mighty Change,” Ensign los sis Liahona, Kaum Ib Hlis Ntuj 2009, 97–99.
Khetos txhua tus thwj tim yuav tsum “hloov siab loj heev.”
Los ntawm tus Vaj Ntsuj Plig Dawb Huv kuv yeej paub tau tias tus Cawm Seej thiab Nws txoj moo zoo muaj tseeb.
Amas tau ua tim khawv txog tus Cawm Seej thiab Nws txoj moo zoo, thiab nws kuj piav tias nws tau nws zaj lus tim khawv li cas. Thaum nws ua tim khawv li ntawd, nws tsis tau hais lub sij hawm thaum nws pom thiab hnov ib tug tim tswv (saib Mauxiyas 27:10–17) tiam sis nws hais txog tus nqi uas nws them kom paub ntawm nws tus kheej txog qhov tseeb. Koj kawm dab tsi los ntawm Amas 5:44–51 txog Amas txoj kev los paub qhov tseeb? Koj yuav ua li cas kom coj raws li nws tus yam ntxwv thaum koj siv zog tau ib zaj lus tim khawv los sis ntxiv dag zog rau koj zaj lus tim khawv? Koj kawm dab tsi txog tus Cawm Seej los ntawm Amas tej lus qhia nyob hauv Amas 5:33–35, 48–50, thiab 57–60?
Yog kuv rau siab mloog lus ces yuav pab kuv taug raws nraim “txoj kev uas coj mus rau Vajtswv lub nceeg vaj.”
Cov neeg hauv lub nroog Nkide-oos tsis tau muaj teeb meem zoo ib yam li cov neeg nyob hauv Xalahelas, yog li ntawd tus Ntsuj Plig tau pab Amas paub lawv xav tau dab tsi thiab qhia lawv txog lwm yam (saib Amas 7:17, 26). Tej zaum koj yuav saib muaj tej yam uas tsis zoo ib yam thaum koj nyeem Amas zaj lus nyob hauv Xalahelas (saib Amas 5) thiab nyob hauv Nkide-oos (saib Amas 7). Piv txwv hais tias, Amas pom tias cov neeg hauv Nkide-oos yeej nyob hauv “txoj kev uas coj mus rau Vajtswv lub nceeg vaj” (Amas 7:19). Thaum nws qhuab qhia lawv, Amas qhia lawv txog ntau yam kom lawv paub taug raws nraim txoj kev ntawd (saib Amas 7). Nws tau hais kom lawv ua dab tsi? Koj ua tau li cas hauv koj neej tam sim no?
Tus Cawm Seej ris kuv tej kev txhaum, kuv tej kev mob, thiab kev txom nyem rau Nws tus kheej.
Koj puas tau xav hais tias tsis muaj leej twg to taub koj tej teeb meem thiab tej kev nyuaj siab? Yog koj xav li ntawd, tej yam tseeb uas qhia nyob hauv Amas 7:7–16 pab tau koj. Txwj Laug David A. Bednar tau ua tim khawv tias: “Vajtswv Leej Tub paub thiab to taub tag nrho, vim Nws twb paub thiab ris peb txhua tus tej nra. Thiab vim Nws ua kev txi uas nyob mus ib txhis (saib Amas 34:14), Nws thiaj paub peb lub siab xav thiab yuav ncav tes pab peb nrog Nws txoj kev hlub tshua” (“Kaj Siab Ris Lawv tej Nra,” Ensign los sis Liahona, Tsib Hlis Ntuj 2014, 90).
Thaum koj nyeem Amas 7:7–16, cia li xav txog qhov uas tej nqe no pab peb to taub dab tsi txog lub hom phiaj ntawm tus Cawm Seej txoj kev theej txhoj. Peb yuav ua li cas kom txais tau Nws lub hwj chim hauv peb lub neej? Xav seb koj puas sau ntawv txog koj tej kev xav.
Kuj saib Yaxayas 53:3–5.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Amas 5:6–13
Vim li cas Amas xav kom nws cov neeg nco txog tus Tswv txoj kev siab hlub tshua rau lawv cov poj koob yawm txwv? Tej zaj dab neeg twg los ntawm koj tsev neeg zaj keeb kwm qhia nej txog Nws txoj kev siab hlub tshua? Tej zaum nej yuav xav mus xyuas familysearch.org/myfamily kom ceev tej zaj dab neeg no.
Amas 5:14–33
Tej zaum nej tsev neeg paub tias yus xav li cas thaum yus tau npaj zoo—los sis tsis tau npaj hlo li—thaum yuav mus pw hav zoov, xeem ntawv, los sis mus xam phaj tau hauj lwm. Lawv qhia tau tej zaj twg uas tau muaj tsis ntev tas los kom qhia tias kev npaj zoo yeej tseem ceeb? Tej zaum nej yuav xav caw nej tsev neeg kom rov qab nyeem Amas 5:14–33 thiab nrhiav tej lus uas Amas nug saib seb nws cov neeg puas tau npaj zoo ntsib Vajtswv. Tej zaum txhua tus hauv nej tsev neeg yuav xav xaiv ib co lus nug thiab qhia tias vim li cas cov lus ntawd yuav pab peb npaj mus ntsib Vajtswv. Tej zaum nej tsev neeg yuav xav tso Amas ob peb txoj lus nug rau ub rau no hauv nej tsev rau nej tsev neeg xav txog.
Amas 6:4–6
Vim li cas peb Haiv Neeg Ntseeg koom ua ke? Peb yuav ua li cas kom pab tau peb tus kheej thiab lwm tus thaum peb nyob hauv lub tsev koom txoos?
Amas 7:9–16
Peb kawm dab tsi los ntawm tej nqe no uas pab peb “tsis txhob ntshai” (Amas 7:15) thaum peb yuav tsum hloov siab lees txim? Tej nqe no qhia dab tsi rau peb txog kev tig mus rau tus Cawm Seej thaum peb xav tau kev pab? Peb tau ua dab tsi ntxiv kom txais tau Nws txoj kev pab? Nws tau pab peb li cas?
Amas 7:23
Peb paub leej twg uas yog ib tug yam ntxwv zoo txog tej tus cwj pwm uas muaj hauv nqe no? Vim li cas peb yuav tsum hloov kom muaj tej tus cwj pwm li no?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Qhia Zoo Dua Ntxiv
Nug tej yam uas ua rau nej tsev neeg xav ua tej ntawd. Cia li xav txog tej lus nug uas tshoov nej tsev neeg lub siab kom lawv thiaj li yuav paub ua neej raws li txoj moo zoo ntxiv. “Tej lus nug no tsis yog kom nej sib tham; yog tej lus nug kom nej txawj xav ntawm nej tus kheej” (Teaching in the Savior’s Way, 31).
Tus Tuaj Peb Tog, los ntawm Jay Bryant Ward